1 Ja’ o jech ti c’alal laj yo’nton ta lo’il ti rey Benjamin ta steclumale, lic sjac’be ta scotolic, yu’un tsc’an tsna’ me chch’unic ti lo’iletic la jyale.

2 Scotolic jmoj avanic, jech la jyalic: jech ta jch’uncutic scotol ti lo’iletic la valbuncutique, xchi’uc jna’ojcutic lec xchi’uc ti ja’ ta bats’imelel ta sventa S espíritu Cajvaltic boch’o tsots xu’ yu’une, ti yu’un jech laj xa sjeltauncutic xchi’uc co’ntoncutic ti jech mu xa jc’ancutic chopol c’usi jpascutique, ti jech ja’ xa no’ox ta jpascutic ta scotol c’ac’al ti c’usitic leque.

3 Xchi’uc vu’uncutic jtuc cutic, ta sventa slequil yo’nton Riox xchi’uc ti c’u x elan ta xalbuncutic Espíritu, ti jech muc’tic quich’ojcutic ac’bel quilcutic ti c’usi jutuc xa sc’an xtale, ti me yu’un jeche, xu’ ta xcalcutic ta scotol c’usitic oy.

4 Ja’ xch’unolajel co’ntoncutic oy ta sventa ti c’usi la jyalbuncutic jreycutic ti jech la jyic’uncutic talel te bu c’usitic lec na’bile, ti bu xcuxet co’ntoncutic ta muc’ta xcuxetel o’ntonale.

5 Xchi’uc calojbecutic co’ntoncutic ti ta jch’unbecutic smantal ti Jrioxcutique xchi’uc ta jpascutic ti c’usi tsc’ane, xchi’uc ta jch’unbecutic smantal ta scotol c’usitic oy, ti c’u x elan chi spasuncutic ta mantal ta scotol c’ac’al c’u yepal c’ac’al cuxuluncutic ti c’uxi mu xquich’cutic tal vocolil muyuc slajeb ta jtojolalcutic jech chac c’u cha’al la jyal Abate, ti c’uxi mu xcuch’cutic svasoal sc’ac’al yo’nton Rioxe.

6 Lec, ti va’ay lo’iletique, ja’ tsc’an ti rey Benjamine, ja’ o jech la jyal: La valic xa ti lo’iletic c’u x elan ta jc’ane, xchi’uc ti c’usi la valic cha pasique ja’ lec stac’ pasel ta bats’imelel.

7 Ja’ jech tana un, ta sventa ti c’usi la valic cha pasique, ja’ xa xnich’onoxuc Cristo, squeremutic xchi’uc stsebetic stuc, yu’un ja’ spasojoxuc ta espíritu; ja’ yo jech chavalic ti la xa sjelta a vo’ntonic ta sventa xch’unolajel a vo’ntonic ta sbie, ja’ yo jech, ja’ te voq’uemoxuc ta stojolal xchi’uc c’otemoxuc xa ta squeremutic xchi’uc ta stsebetic.

8 Yu’un, ja’ xa no’ox o jech smelolal ti stac’ xa colique, yu’un jech muyuc xa jech yan smelolal o ti jech xu’ xa colique, muyuc xa yan biil yich’oj aq’uel ti c’uxi xu’ chtal coltaele, ja’ jech ta jc’an ti ac’o xa vich’ic ta atojolalic ti sbi Cristoe, acotolic ti avalojic xa ta stojolal Riox ti cha ch’unbeic smantal c’alalto ta slajebal a c’ac’alilique.

9 Chc’ot ta pasel ti boch’o tspas jech va’aye, ta xc’ot ta sbats’i c’ob Riox, yu’un sna’oj ti biil c’u x elan xu’ ta xich’ o iq’uele, xchi’uc ta xich’ iq’uel ta sbi Cristo.

10 Chc’ot ta pasel xtoc, ti boch’o mu stsac ta stojolal ti sbi Cristoe, ta o no’ox xich’ iq’uel ta yan biil; ja’ jech, ta xich’ aq’uel ta sts’et c’ob Riox.

11 Ta jc’an ti ac’o xa na’ic ti ja’ jech x elan ti biil la jcalboxuc ta xaq’ue, ti bu mu stac’ tubel ta scotol c’ac’al, ti me mu la paych’unic mantale, ja’ jech bijbijanic me, mu me xa paych’unic ti mantale, jech chac c’u cha’al mu xich’ tubel ti biil ta avo’ntonique.

12 Ti vu’une ta xcalboxuc: Ta jc’an ti ac’o xa vules ta ajolic ta scotol c’ac’al xchi’uc ti te ts’ibabiluc ti li’ biil ta avo’ntonic ti c’uxi mu xa ac’atic ta sts’et c’ob Rioxe, ja’uc no’ox xa va’yic xchi’uc xa votquinic ti c’u x elan snuq’uilal cha vich’ic iq’uele, xchi’uc ti ta c’u x elan biil cha yic’oxuc ti stuque.

13 Yu’un ¿C’u x elan ta xotquin yajval ta abtel jun vinic ti me muyuc abtejem ta yabtele, jech tu jlabal sba cha’ay, xchi’uc tu jnom oy c’usi ta snop xchi’uc ti c’usi ta sc’an tspas ta yo’ntone?

14 Xchi’uc xtoc ¿me stac’ snac’be jcot sburro spat xocon ta naclej jun vinic? ti vu’une ta xcal ti mo’oje, me ja’uc jutuc xu’ ta xac’ te ac’o jmoj ve’uc xchi’uc xchijtac, yu’un ta sibtas xchi’uc ta snuts loq’uel. Ja’ jech ta xcal ti ja’ jechoxuc vo’xuc ti me mu xa na’ic ti biil c’u x elan xu’ cha vich’ic iq’uele.

15 Jech tana, ta jc’an ti ac’o tuq’uicoxuc xchi’uc lequicoxuque, ti ja’uc xa bolesic ti lequil abtelal ti c’uxi Cristo Cajvaltic Riox scotol xu’ yu’un ac’o xac’ a senyailic ti c’uxi ja’uc yu’ntacoxuque, ta sventa ti c’uxi xu’ xa vich’ic iq’uel batel ta vinajele, xchi’uc ti c’uxi oyuc a colemalic muyuc slajebe, xchi’uc ti c’uxi oyuc a cuxlejalic ta sventa c’usi sna’, xchi’uc stsatsal xchi’uc slequilal ti boch’o la spas scotol ti c’usitic oy ta vinajel xchi’uc ta banamil, ti ja’ Riox ta scotole, Jechuc.