1 Ja’ o jech, ti c’alal laj yo’nton ta lo’il ti Abinadi ta va’ay lo’iletique ti reye la spas ta mantal spaletac ti ac’o yiq’uic batel xchi’uc ti ac’o chamuc o yu’nique.

2 Ja’ o te oy jun xchi’il ti ja’ sbi Almae, yu’un ja’ snitililtac Nefi ec xtoc, xchi’uc lec querem vinic to ox, la xch’un ti ya’yejtac Abinadi c’u x elan la jyale, yu’un sna’oj xa ono’ox c’u x elan ti bolilil la jyal Abinadi ta stojolalique, ja’ jech te la sc’opan rey ti c’uxi mu x ilin ta stojolal Abinadie, ti jech ac’o yac’ loc’uc batel ta lec no’oxe.

3 Jech ti reye ech’em to i ilin, la jyac’ ac’o nutsatuc batel ti Alma ta stojolalique, la stac’ batel yaj abteltac ti ac’o bat xnochpatiic batel ti jech ac’o bat smilique.

4 Jech ti stuque jato batel ta stojolalic, xchi’uc la snac’ sba ti c’uxi mu xtaate, ep c’ac’al ti jech snac’oj sbae, la sts’iba scotol ti c’usi la jyal Abinadie.

5 Ja’ o jech ti reye la spas ta mantal yaj chabivanejtac ti jech ac’o bat sjoyibtaic ti Abinadi c’uxi xu’ xiq’uic batel ta stojolale, jech la xchuquic xchi’uc la stiq’uic ta chuquel.

6 Ta ts’acal ti c’alal jelo oxib c’ac’ale, ti c’alal jech la sjac’be spaletac ti reye la spas ta mantal ti ac’o yiq’uic batel yan velta ta stojolale.

7 Jech la jyalbe: Abinadi, oy jtaojcutic mulil ta atojolal, jech xu’ cha cham.

8 Yu’un avaloj ti Riox ta xyaltal stuc ta sventa xnich’nab viniquetique; ja’yo jech tana, ja’ ta sventa ti xu’ xa vich’ milele, ja’ xa no’ox ti me cha c’an pertonal ta scotol c’usi chopol c’opojemot ta jventa vu’un xchi’uc ta sventa jteclumale.

9 Ti Abinadie, ja’o jech la jyal: Ta xcalbot ti muyuc ta jc’an pertonal ta sventa ti c’u x elan lo’iletic la jcalbot ta sventa li’ jteclume; yu’un ja’ ta bats’imelel; ti c’uxi ac’o xa na’ ti yu’un ja’ ta bats’imelele, ja’ yo jech la jcac’ jba ta ac’obic.

10 Jech, jech te xcuch cu’un o ja’ to me li chame, xchi’uc muyuc ta jc’an pertonal ta sventa c’usi caloj, yu’un ja’ te chcom ti c’uxi ja’uc ta xal ta jamal ta sventa c’usi mu xa c’anic vo’xuque, xchi’uc ti me la milicune, cha malic jch’ich’al muyuc smul, xchi’uc xtoc ti va’aye, ja’ ta xcom yal ta jamal ta a contraic vo’xuc ta slajebal c’ac’al.

11 Ja’ o jech, ti rey Noee, te xa ox tsc’an la scolta, yu’un te xi’ ta sventa ya’yejtac; jech, yu’un te xi’ me chc’ot ta stojolal ti c’u x elan tsmeltsanvan Rioxe.

12 Ja’uc ti paleetique te avanic ta scontra Abinadi, te sjapoic stic’bel smul, jech la jyalic: Ti li’e chopol xa c’opojem ta stojolal rey, ja’ o jech, ti reye te ac’bat sc’ac’al yo’nton yan velta ta stojolal xtoc, te la jyac’ ta c’abal ti c’uxi ac’o bat smilique.

13 Ja’ o jech te la jyiq’uic batel xchi’uc la xchuquic, xchi’uc la jyac’beic sbec’tal ta ac’al, jech, ja’ to ti c’uxi cham oe.

14 Jech ti c’alal yu’un ja’ o xa xchi’c’at o ti ta yat c’oq’ue, avan ta stojolalic; jech la jyal:

15 Jech tana, ti c’u x elan la pasbicune, jech chc’ot ta pasel ta stojolal avalab anich’nabic ti jech ta xac’ ac’o epuc ya’yic xc’uxul jech chac c’u cha’al xc’uxul c’oc’ chca’ay chi cham oe; ti li’e ta xch’unic ti ja’ ta xcolic ta sventa Cajvaltic ti ja’ Srioxique.

16 Xchi’uc ta xc’ot ta pasel ti cha vilic scotol ta chop vocolil ta sventa chamele, ti ja’ ta sventa a bolilique.

17 Jech, cha yayijesatic ta buyuc no’ox abec’talic, xchi’uc cha vich’ic loq’uesel batel ta buyuc no’ox xa loc’ xa ech’ic, jech chac c’u cha’al chon bolometic ti ta xich’ loq’uesel ta scoralil ti jech ta xich’ aq’uel batel xchi’uc xibal sba chon bolometic ta te’tique.

18 Ti va’ay me c’ot sc’ac’alile, cha mil abaic, cha yalic ta sc’ob a vaj contraic; ja’ o jech cha va’yic jech chac c’u cha’al chca’ay vu’un xc’uxul chamel ta c’oq’ue.

19 Yu’un ja’ jech ta spac sc’oplal Riox ta sventa ti boch’otic ta soquesbat steclumale, ¡vo’ot Riox ic’bun li’ jch’ulele!

20 Xchi’uc ja’ jech, ti Abinadi c’alal la jyal ti va’ay lo’iletique, yal ta lum, ja’ o icham ta c’oc’, jech, jech c’ot ta pasel yu’un muyuc sc’an la smuc ta yo’nton ti smantaltac Rioxe, ja’ jech la jyac’ ta ilel lec ta bats’imelel c’usi la jyal ti jech cham oe.