1 Hinataq kunan, khaynata llaqtanman inka Benjamin rimareqtin, paykunapuraman kacharqan, kreyirqankuchus paykunaman rimasqan simikunata, chayta llaqtanmanta yachayta munaspa.

2 Llapankutaq huk arullapi kutichirqanku: Ari, kreyiykun noqaykuman llapa rimariwasqaykiku simikunapi; yachaykutaqmi hinapuni cheqaq ima kasqanta, Llapa-atiyniyoq Wiraqochaq Nunan ancha hatun t’ikrakuyta noqaykupi utaq sonqoykupi apamusqanrayku, manañataq astawan millay kaq ruwanaykupaq munayniyku noqaykupi kanchu, ichaqa pasaqlla allin kaqta ruwanallaykupaq.

3 Noqayku kikiykupas, Yayaq mana tukukuq sumaq kayninwan, Nunanpa rimariwasqankuwan ima chay hamunan imaymanakunamanta ancha hatun rikuyniyoq kayku; nesitakunman chaytaq llapan imaymanakunamanta unanchaykuman.

4 Inkanchis rimariwasqanchis imaymanakunapi iñiyniykutaqmi, kay ancha hatun yachayta noqaykuman apamurqan, chaywantaq ancha hatun kusikuywan kusikuyku.

5 Munashaykutaqmi Yayanchiswan rimanakuypi haykuyta, munayninta ruwanaykupaq, llapa kamachiwananchis kamachiyninkunapi p’unchawninchiskunaq puchunkuna kasukuq kanaykupaq; angelpa rimasqan hina mana tukukuq muchuyta noqaykuman mana urayachimunaykupaq, Yayaq phiñakuyninpa qerunmanta mana ukyanaykupaq, nispa.

6 Kaymi paykunamanta inka Benjamin munasqan rimaykuna; chhaynataq paykunata nirqan: Munasqay rimaykunatan rimarqankichis, rimanakuy ruwasqaykichistaq chanin rimanakuy.

7 Kunantaq, rimanakuyman haykusqaykichisrayku, Cristoq wawankuna, churinkuna ususinkunapiwan waqyasqa kankichis. Nunapin kunan p’unchaw Pay churiyarqasunkichis; sutinpi iñiywanmi sonqoyku t’ikrakun nispan nirqankichis, chhaynaqa, Paymantan paqarirqankichis, Paypa churi-ususinkunataq wakirqankichis.

8 Kay umawantaq qespi ruwasqa kankichis, manataq hoq uma kanchu chaywan qespi ruwasqa kayta atinaykichispaq. Manan hukniraq suti qosqa kanchu, chaywan qespiy hamunanpaq; chhaynaqa, Cristoq sutinta qankunapi churakunaykichistan munayman, kawsayniykichispa tukukuyninkama kasukuq kanaykichispaq, Yayawan rimanakuypi llapa haykuqkuna.

9 Hinaqa, pipas kayta ruwanqa chayqa, Yayaq paña makinpi tarisqan kanqa, ima sutiwan waqyasqa kananta yachasqankurayku. Cristoq sutinwan waqyasqan pay kanqa.

10 Hinaqa, Cristoq sutinta mana churakuqqa hukniraq sutiwan waqyasqan kanan; chhayaqa, Yayaq lloq’e makinpin chay runa tarikunqa.

11 Huk sutitan qosqaykichis, manataq hayk’aqpas pichasqachu kanqa, ichaqa huchallikuyllawan nispa nisqayta yuyarinaykichistan munayman, kaymi chay suti; hinaqa, qhawakuychis mana huchallikunaykichispaq, sonqoykichismanta kay suti mana pichasqa kananpaq.

12 Niykichistaq: Pasaqllapuni kay suti sonqoykichispi qelqasqa kanantan munayman, Yayaq lloq’e makinpi mana tarisqa kanaykichispaq, ichaqa, waqyasqa kanaykichis aruta, Pay waqyanasuykichis sutitawan uyarinaykichispaq, reqsinaykichispaq ima.

13 Imaynatataq huk runa reqsinman mana servisqan patrontari, paypaq mana reqsisqa kasqan patronta, sonqonpa munayninkunamanta yuyayninkunamantawan kharupi kaqtari?

14 Yapamantataq: Runamasinpa kaq asnutachu huk runa apayukuspa hap’ikapun? Manan nispan nisaykichis; manan saqellanqapaschu uywankuna purapi mikhunanta, ichaqa, qatinqan asnuta, qarqonqataq. Chhaynallataqmi qankuna purapi kanqa, waqyasqa kanaykichis sutita mana yachankichischu chayqa.

15 Chhaynaqa, allin takyasqa mana kuyuchiy atina, allin ruwaykunawan hunt’a kanaykichistawanmi munayman; Cristo, Llapa-atiyniyoq Wiraqocha Yaya Paypata hina markanasuykichispaq, hanaqpachaman apasqa kanaykichispaq; kay pachapi hanaqpachapiwan llapa imaymanakuna ruwaq, llapa patapi kaq Yayaq yachaysapa kayninwan, atiyninwan, chaninchayninwan, khuyapakuyninpiwan ukhunta mana tukukuq qespiyniyoq, wiñay-wiñaypaq kawsayniyoqpiwan kanaykichispaq. Hinataq kachun.