Diyin God Bizaad
Mosiah 3


Wóltaʼii 3

Aláahdi naatʼáanii Benjamin tʼahdii yáłtiʼ—Bóhólníihii Tʼáá ałtsojįʼ Bidziilii atsʼíís biyiʼ dóó diné neidínóotįįł—Nihookááʼ dineʼé bibąąhígi ádaatʼéii yá tiʼhooʼníihgo bitsįʼ biih dahasdzánídę́ę́ʼ dił hadahidoonah—Bízhiʼ binahjįʼ tʼéiyá bee yisdánáhóótʼiʼ—Bílaʼashdlaʼii éí diné atsʼíískʼehgo ntsékeesígíí doo biyáʼátʼéehii nahjįʼ kódeiléehgo bíighah dóó Nináʼílyáhígíí bee Christ Yá Naazíinii dadooleeł—Diné doo yáʼádaatʼéehii éí łeetsoii dookʼą́ąłgo dasiyį́ nahalingo tiʼdahooʼníih dooleeł. Díí éí tʼah doo Jesus biʼdichíhę́ędą́ą́ʼ 124 yihahą́ądą́ą́ʼ nahalzhiishgo ádahóótʼįįd.

1 Dóó nááná, shikʼisóó danohłíinii, náádashíídóołtsʼįįł nisin, háálá łahgo bee nihichʼįʼ hanáádeesdzih; jó áko, náásgóó ádahodooníłígíí bee nihił hodeeshnih.

2 Dóó bee nihił hodeeshnihígíí éí Diyin God yá naalʼaʼí shił ííshją́ą́ áyiilaa. Dóó éí kóshidííniid: Chʼéénídzííd; áádóó chʼéénísdzid, jó áádóó éí shidááhdóó yiizįʼ.

3 Dóó éí kóshidííniid: Chʼéénídzííd, dóó saad bee nił hodeeshnihígíí diitsʼį́į́h; jó áko, ayóó átʼáo binahjįʼ hózhóonii éí bee nił hodeeshnih.

4 Háálá, Bóhólníihii nisodizin yidiiztsʼą́ą́ʼ, dóó tʼáá ákogi átʼéego hinínánígíí yee ná nihoníʼą́, dóó nił hodoozhǫǫł biniiyé nichʼįʼ ashííłʼaʼ; dóó áko nidineʼé ałdóʼ bił hodíílnih, áko bí ałdóʼ bee bił dahodoozhǫǫł.

5 Jó áko, áajįʼ ahodoolzhish, dóó doo nízaad hadziih da, adziilii bee, Bóhólníihii Tʼáá ałtsojįʼ Bidziilgo naatʼáanii nilíinii, hináago hoolzhiizh, dóó ahoolʼáádę́ę́ʼ dóó ahoolʼáágóó iiná, éí yáʼąąshdę́ę́ʼ adadoogáałii nihookááʼ dineʼé baʼáłchíní yíká adoolwoł, dóó atsʼíís yiiʼ hináa dooleeł, dóó nihookááʼ dineʼé yitaagháago, álílee ádaatʼéí ííłʼį́į dooleeł, díí éí bitah dahoneezgai yę́ę néidiyiiłá, ádaadinę́ę dahiná áńdeidleʼ, doo naaghá yę́ę naagháago áńdeidleʼ, doo daʼooʼínę́ę daʼooʼį́įgo áńdeidleʼ, dóó bijééhdaakałę́ę daʼdiitsʼaʼ áńdeidleʼ, dóó ląʼída ndaałniihii neíyíłdzííh.

6 Dóó chʼį́įdii beʼiiníziinii éí doodao iiʼsizį́ bidaʼiiníziinii, nihookááʼ dineʼé bijéí biyiʼdę́ę́ʼ haidínóołkał.

7 Dóó índa, bee atsʼádahwiitʼaahii, dóó atsʼíís neezgai, dichin, dibááʼ dóó chʼééh ńdíʼdááh yiiʼ ndoogaał, bílaʼashdlaʼii ndi yiláahdi tiʼhwiidoonih, tʼáá hazhóʼó atsʼíís náádidoolyééł tʼáá bichʼįʼgi; jó áko, bitsįʼ biih dahasdzánídę́ę́ʼ dił hadahidoonah, bidineʼé bibąąhági ádaatʼéii dóó doo biyáʼátʼéehii biniinaa ayóó átʼéego tiʼhwiidoonih.

8 Dóó Jesus Christ wolyée dooleeł, Diyin God biYeʼ, yáʼąąsh dóó nahasdzáán yiTaaʼ nilíinii, hodeeyáádą́ą́ʼ tʼáá ałtsoní Áyiilaaii; dóó bimá éí Mary wolyée dooleeł.

9 Dóó índa, bidineʼé yaa doogááł, áko nihookááʼ dineʼé baʼáłchíní yisdánáhidookah bízhiʼ dayoodlą́ągo binahjįʼ ndi; dóó díí tʼáá ałtso ádzaa ndi tʼahdii tʼóó diné nilį́ daaníi doo, dóó chʼį́įdii beʼiiníziinii éí biiʼ hólǫ́ daaníi dooleeł, dóó atídeidoolííł, dóó tsin ałnáozʼai bikáaʼjįʼ deidiyoołhééł.

10 Dóó náádiilyáádóó tááʼ yiską́ągo náádidoodááł; jó áádóó nihookááʼ dineʼé yá nihodooʼáałgo yidoozįįł; jó áádóó, díí tʼáá ałtso bedaʼdoolnííł áko nihookááʼ dineʼé baʼáłchíní tʼáá ákogi átʼéego bá ndahodootʼááł.

11 Jó áko, dóó ałdóʼ Adam asiihgo yinahjįʼ adáátłizh daazlį́ʼígíí bibąąhági ádaatʼéii bidił yee yá nináʼídlá, éí éí Diyin God íinízinígíí doo bił béédahózingo ádin daazlį́į́ʼ, éí doodago doo bił béédahózingo ndaʼiisííh.

12 Ndi yíi, yííyáhígíí bił hólǫ́ǫ dooleeł tʼáá háiida Diyin God yikʼijįʼ nilį́įgo bił bééhózinígíí léiʼ átʼéhígíí! Háálá éí doo yisdádoogáał da tʼáá hazhóʼó beʼiinaʼ łahgo ánáyiidlaa dóó Bóhólníihii Jesus Christ yoodlą́ągo tʼéiyá.

13 Dóó Bóhólníihii Diyin God yá dahalneʼii, tʼáá ałtso nihookááʼ dineʼé baʼáłchíní yitahgóó ayiisʼaʼ, ałʼąą dóoneʼé, dóó bílaʼashdlaʼii dah deíkáahii, dóó bizaad ałʼąą ádaatʼéí tʼáá ałtso bił hodoonih, áko ákólyaago tʼáá ałtso Christ doogáałgo dayoodlánígíí, bibąąhági ádaatʼéii bee baa ńdadidootʼááł, dóó tʼáá íiyisíí bił dahodoozhǫǫł, tʼáá íídą́ą́ʼ bitah níyá nahalingo.

14 Ákondi Bóhólníihii Diyin God éí bidineʼé diné ayóó ádaa dadzódlíinii danilį́įgo yiyiiłtsą́ dóó beehazʼáanii yeinílá, índa díí éí Moses bibeehazʼáanii.

15 Dóó doogáłígíí tʼáá bítséedi, bee daatʼíinii, dóó álílee ádaatʼéii, dóó náásgóó ádahodoonííł bee datʼíinii, dóó bedaałtʼéii tʼóó ahayóí yił ííshją́ą́ áyiilaa; dóó Diyin God yá dahalneʼii hadaałtʼéí doogáłígíí ałdóʼ yee hachʼįʼ hadahasdzííʼ; dóó ákondi bijéí deistłʼis, dóó Moses bibeehazʼáanii éí tʼáadoo biniiyéhé da tʼáá hazhóʼó bidił bee nináʼílyáhígíí biníkááʼ góneʼ tʼéiyá tʼáadoo yikʼi daʼdiitą́ą da.

16 Dóó bihónéedzą́ągo áłchíní adoosih ndi doo yisdánáhidookah da ńtʼę́ę́ʼ; ndi ánihidishní éí bikʼidahojisdliʼ; jó áko, Adam biniinaa, éí doodago tʼáá áko daanéehgo, diné asiihgo hadadaazhtłizhígíí yiih yíkai, azhą́ ndi Christ bidił éí ndaʼiisíʼígíí yá nináʼílyá.

17 Dóó ałdóʼ nááná, ánáánihidishní, doo nááná łaʼ ázhiʼ binahjįʼ dóó doo łahgi ánáánátʼáo doodao łahgo átʼéego nihookááʼ dineʼé baʼáłchíní yisdánáhidookah da, tʼáá hazhóʼó Christ, Bóhólníihii Aláahdi Bidziilii bízhiʼ binahjįʼ tʼéiyá.

18 Jó áko ánihwiiʼaah, dóó beʼánihwiitʼaah tʼáá ákogi átʼáo; dóó awééʼ tʼahdii awééʼ nilį́įgo ádingo doo diyinkʼehgo tʼáá ádzaagóó yileeh da; ndi, nihookááʼ diné doo yáʼátʼéehii bitsʼíís dóó biyiʼsizíinii yiih deíyizlá tʼáá hazhóʼó áłchínígi átʼé daazlį́įʼgo dóó ahojoobaʼ ádaʼdilnéehgo tʼéiyá, dóó yisdáʼiildééh hólǫ́ǫ́ ńtʼę́ęʼgo, dóó kʼad hólǫ́ǫgo, dóó náásgóó hólǫ́ǫgo, Bóhólníihii Tʼáá ałtsogo Bidziilii, Christ bidił yee nináʼnídláhígíí biníkááʼ góneʼ yoodlánígíí tʼéiyá.

19 Háálá diné atsʼíískʼehgo ntsékeesígíí Adam asiihgo adáátłizhę́ędą́ą́ʼ dóó wóshdę́ę́ʼ, Diyin God yitsʼą́ą́jí nilį́, dóó tʼáá ákótʼéego, ahoolʼáa dooleeł, tʼáá hazhóʼó Iiʼsizį́ Diyinii bá haneʼ yiyíistsʼą́ąʼgo tʼéiyá, dóó diné atsʼíískʼehgo ntsékeesígíí nahjįʼ kóyiilaago dóó Bóhólníihii Christ bee nináʼílyáhígíí binahjįʼ Bóhólníihii yá sizį́ silį́įʼgo, dóó áłchínígi átʼé silį́įʼgo, akʼeh hółʼį́ , aa hojoobaʼ, hojoobaʼ áhwiinidzin, haʼólní, ayóó óʼóʼníinii tʼáá íiyisíí biiʼ hólǫ́, dóó Bóhólníihii tʼáá ałtsoní íidoolííł nízinígíí yikʼeh hółʼį́, áłchíní bizhéʼé yikʼeh hółʼínígi átʼéego.

20 Dóó ałdóʼ nááná, ánihidishní, tʼáá ałtso bílaʼashdlaʼii kéédahatʼį́, dóó ałʼąą dóoneʼé dah deíkááh, dóó bizaad ałʼąą ádaatʼéego, Yisdáʼiiníiłii bił béédahodoozįįłjįʼ ahodoolzhish.

21 Jó áádóó, áajįʼ ahoolzhiizhgo, Diyin God bidááhdóó doo łaʼ bąąhági átʼéii bąąh ádin da dooleeł, tʼáá hazhóʼó áłchíní yázhí tʼéiyá, Bóhólníihii Diyin God Aláahdi Bidziilii bízhiʼ yoodlą́ągo dóó iiná łah ánályaa biníkááʼ góneʼ tʼéiyá.

22 Dóó kʼad ndi, Bóhólníihii niDiyin God ánidííniidígíí nidineʼé bee ndanootą́ą́ʼ, ákótʼée ndi Diyin God tʼahdii bąąhági átʼéii bąąh ádin nízin doo, tʼáá hazhóʼó saad bee nihichʼįʼ yááłtiʼígíí binahjįʼ tʼéiyá.

23 Dóó kʼad Bóhólníihii Diyin God saad yee shichʼįʼ haadzíʼígíí, bee nihichʼįʼ yááłtiʼ.

24 Dóó ákótʼáo Bóhólníihii kódííniid: Nihodootʼáałdi, éí díí diné tʼáá aaníinii tʼáá bééhózínígo bikʼijįʼ siláa doo; éí éí bee bá ndahwidiyootʼááł, tʼáá ałtso diné binaanish áyiilaaígíí bikʼehgo, yáʼátʼéehgo daatsʼí, éí doodago nichxǫ́ǫ́ʼígo áyiilaaígíí bikʼehgo.

25 Dóó nichxǫ́ǫ́ʼígo ádaʼiilaaʼígíí éí bibąąhági ádaatʼéii dóó ndaʼiisíʼę́ę deidínóołʼįįł, éí biniinaa Bóhólníihii yitsʼą́ąjįʼ kódadoonííł tʼáá íiyisíí bichʼįʼ ndahwiiʼnáago dóó hoolʼáágóó tiʼdahooʼníihgo, éí áádę́ę́ʼ doo nínáhidookah da; éí bąą doo yáʼátʼéehii bitsʼíís dóó biyiʼsizíinii yiih deiyiizláa doo.

26 Éí bąą, Diyin God bibee ánihwiitʼaah neezgaiígíí ákʼindeisdlá, áko tʼáá ákogi átʼáo ánihwiitʼaah eii doo nahjįʼ bá ndootʼáał da tʼáá Adam tsin bineestʼąʼ baa hóchįʼę́ę yiyą́ągo asiihgo adáátłizhígíí átʼéego; éí bąą, bee ajoobaʼ yę́ę éí hoolʼáágóó doo bíká adoolwoł da silį́į́ʼ.

27 Dóó bitiʼdahooʼnííh éí łeetsoii dookʼą́ą́ł bił beʼekʼid nahalin, éí bikǫʼ doo ntsées da, dóó bilid éí hoolʼáágóó yadiitʼiʼ. Áko Bóhólníihii éí ákótʼáo shichʼįʼ haadzííʼ. Amen.