Diyin God Bizaad
Mosiah 17


Wóltaʼii 17

Alma Abinadi bizaad yoosdląąd dóó nááyíizóóh—Abinadi kǫʼ yikʼee tiʼhoozniiʼgo ádin silį́į́ʼ—Dabiisxíinii naałniihii dóó kǫʼ yee dadínóonééł dííniid. Díí éí tʼah doo Jesus biʼdichíhę́ędą́ą́ʼ 148 yihahą́ądą́ą́ʼ nahalzhiishgo ádahóótʼįįd.

1 Dóó kʼad áádóó Abinadi díí saad ałtso yee haadzíiʼgo, éí aláahdi naatʼáanii áníigo bipriest danilíinii Abinadi deidoosił dóó deidiyoołhééł.

2 Ndi łaʼ hastiin léiʼ Alma wolyéego, Nephi yitsʼą́ą́dóó hazlį́įʼgo bitah naaghá. Dóó díí hastiin ániid naaghá, dóó Abinadi saad yee haadzíʼígíí yoosdląąd, háálá Abinadi yikʼijįʼ haadzíʼígíí tʼáá aaníí bąąhági átʼéii yaa naakaiígíí bił bééhózin ńtʼę́ę́ʼ; éí bąą aláahdi naatʼáanii Abinadi tʼáadoo bichʼįʼ ná háchįʼí, bíniʼ kʼé binahjįʼ yigááł yił níigo náyooskan.

3 Ndi aláahdi naatʼáanii tʼóó tséʼádin bá hóóchįįd, dóó Alma bitahdóó chʼídeineeshchą́ą́ʼ, dóó bá ndaalʼaʼí yikééʼ yiyííłʼaad deidiyoołhééł biniiyé.

4 Ndi yitsʼą́ą́ʼ dah diilwodiiʼ yitsʼą́ą́ʼ ńdeestʼį́įʼgo tʼáadoo bikʼidaneeztą́ąʼ da. Dóó nanitʼingo tʼóó ahayóí yiską́ Abinadi tʼáá ałtso saad yee haadzíʼę́ę nááyíizo.

5 Áádóó aláahdi naatʼáanii yaa ádahalyáanii Abinadi bináhtʼih dóó daoohsił yidííniid; dóó yidaʼaztłʼǫ́ dóó awáalyaa góneʼ yah adeistʼeʼ.

6 Dóó tááʼ yiską́ągo, bipriest danilíinii yił ninááhazʼą́ągo, bidááhdóó nináánádlóóz.

7 Dóó kóyidííniid: Abinadi, nikʼijįʼ siʼánígíí łaʼ bééhoozin, dóó nidiʼyoolyéłígíí kʼad bíighah.

8 Háálá Diyin God tʼáá bí nihookááʼ dineʼé yitah doogááł dííníniid; dóó kʼad, díí biniinaa nidiʼyoolyééł tʼáá hazhóʼó tʼáá ałtso saad doo yáʼátʼéehii shí dóó shidineʼé bikʼijįʼ háínídzíʼígíí nátʼą́ą́ʼ bee háínídzíiʼgo tʼéiyá.

9 Kʼad Abinadi kódííniid: Shí ánihidishní, saad díí dineʼé bee bikʼijįʼ haasdzíʼígíí doo nátʼą́ą́ʼ bee hadeesdzih da, háálá tʼáá aaníinii ádaatʼé; dóó tʼáá aaníigo nihił béédahodoozįįł biniiyé nihílákʼee yítłizhgo tiʼhwiiséniiʼ.

10 Aooʼ, tiʼhooshníihgo dadeestsaał, dóó shizaad doo nátʼą́ą́ʼ bee hadeesdzih da dóó tʼáá aaníinii átʼéego bee nihikʼijįʼ haʼoodzíiʼ dooleeł. Dóó dashisoołhį́įgo diné tʼáadoo ádzaaí bidił dadidoosas, dóó Diyin God nahwiiʼaahjįʼ ayííłką́ągo tʼáá aaníí haneʼ átʼéego bee nihikʼijįʼ yisdzoh dooleeł.

11 Dóó kʼad aláahdi naatʼáanii Noah kʼadę́ę yiidichííd, háálá bizaad yinásdzíidgo biniinaa; háálá Diyin God bibee ánihwiitʼaahii shikʼijįʼ dooleeł niizį́įʼgo násdzííd.

12 Ndi priest danilíinii yikʼijįʼ yádaʼniiłtiʼ dóó yikʼideidiiʼą́, kódaaníigo: Aláahdi naatʼáanii yiyídzííʼ. Éí bąą aláahdi naatʼáanii bá hóóchįįd, dóó yidiyoolyééł biniiyé yiyiiłtsood.

13 Áádóó ńtʼę́ę́ʼ deisił dóó yidaʼaztłʼǫ́, dóó bitsʼíís tsin tsʼósí ahídahaastłʼǫ́ǫgo yee ńdeineesxaal, aooʼ, kʼasdą́ą́ʼ daaztsą́ąjįʼ.

14 Dóó kʼad kǫʼ bídíʼnííłidgo, yichʼįʼ hadoolghaazh, kóníigo:

15 Jó, tʼáá shí ádashoohłaaígi átʼáo, náásgóó nihidineʼé ląʼída shił nahonigaahígi átʼáo bił ndahonigah dooleeł, kǫʼ bee iilyé neezgaiígi átʼáo; dóó háálá díí éí Bóhólníihii biDiyin God binahjįʼ yisdánáʼiildééh dayoodlánígíí biniinaa.

16 Dóó áhodoonííł bąąhági ádaahtʼínígíí biniinaa ląʼída ałʼąą ádaatʼéego naałniihii bikʼee tiʼdahwiidoohnih.

17 Aooʼ, tʼáá ałtsodę́ę́ʼ atídanihiʼdilʼį́į dooleeł, dóó tʼáá ałtsojígo nanihiʼdinilkaad dóó ałtsʼánihiʼdiilkaad dooleeł, naaldlooshii daʼałchinii dóó baʼátʼeʼ dahólónígíí bidiʼnoolkał nahalingo.

18 Dóó áadi yoołkáałgo ndanihiʼdilzheeh dooleeł, dóó niheʼenaʼí danihidoosił, dóó índa shí tiʼhwiiséniiʼígi átʼáo, kǫʼ neezgaiígíí bee iilyé, bee tiʼdahwiidoohnih.

19 Ákótʼáo Diyin God bidineʼé neiłtseedii nátʼą́ą́ʼ atínéidoodlííł. O Diyin God, shitsʼíís dóó shiyiʼsizíinii shá bá ąą ánílééh.

20 Dóó kʼad, Abinadi díí saad ałtso yee haadzíiʼgo, naaʼíítłizh, tiʼhoozniiʼgo kǫʼ biisxį́; aooʼ, Diyin God bibeehazʼáanii doo nahjįʼ kwííléehgo biniinaa biʼdiisxį́, biʼdiisxínígíí bizaad tʼáá aaníinii yee áyiilaa.