1 Jnich’on ti vu’un lec jc’anojote, ta jts’ibabot carta yanvelta ta sventa ti c’uxi xu’ xa na’ ti cuxuluntoe, xchi’uc ta jts’ibabot c’usi yan ti ja’ ta xac’ at o’ntonale.

2 Yu’un ti li’e, oyun ta tsots pas c’op xchi’uc jlamanitaetic, ti jech muyuc stsal cu’uncutique, Arqueanto laj ta machita xchi’uc Luram xchi’uc ti Emrone, jech, xchi’uc ep xa laj ch’ayuc ti jvinictac-cutic boch’otic lec xu’ yu’nique.

3 Jech tana, ja’ jech, jnich’on vu’un, ta xal co’nton ti me jech tal svuq’uesic jlamanitaetic ti li’ jteclume, yu’un muyuc ta sutes yo’ntonic, yu’un pucuj ta xich’ic o sujel ti jech ta sa’ic c’op ta jujuntale.

4 Ja’ jech, jbatsel o abtel ta stojolalic ti c’alal tsots ta jc’opanic ta sventa ya’yej Rioxe, ta xniquic xchi’uc ta x-ilinic ta jtojolal; ti c’alal me mu tsotsuc ta jc’opanique, ta stsatsubtas yo’ntonic ta scontrainel ti a’yejetique; ja’ jech ta xal co’nton ti me jech ech’ xa yo’nton S-espíritu Cajvaltic ta stojolalique.

5 Yu’un muc’ no’ox ti ta x-ilinique, ti yu’un jech muyuc bu ta xi’ic ta sventa ti lajele, xchi’uc muyuc xa ti tsc’an sbaic ta jujuntale, xchi’uc ja’ no’ox ti taquin yo’ntonic ta ch’ich’e xchi’uc ti ta sc’an ta spac sc’oplalique.

6 Jech tana, jnich’on ti vu’un lec jc’anojote, jechuc o ti tu jtsotsique, la’ abtejcutic ta c’unc’un, yu’un ti me muyuc xi j-abtejutique, yu’un me ta xcac’tic o batel ta ch’ayel, yu’un oy cabteltic yu’un tsc’an ta jpastic ti li’to oyutic li’ ta yut na pasbil ta banamile, ta sventa ti c’uxi ac’o jtsaltic ti yaj contra lequilal sbatel osile, ti c’uxi xu’ ac’o xcux jch’uleltic te bu ta spas mantal Rioxe.

7 Ja’ jech ta jts’iba jutuc ta sventa ti c’u x-elan stalel li’ jteclume, yu’un jech chac c’u cha’al la jyalbun li’ Amarone, ja’ jech ti jlamanitaetique ep jchuquel yu’nic ti bu la stsaquic te ta muc’ta tec’ubal Sherrizae, jech te oy viniquetic, antsetic xchi’uc ololetic.

8 Ti smalalic xchi’uc ti stotic va’ay antsetic xchi’uc ololetique la smilananic, xchi’uc ja’ ta xac’beic sti’ic sbec’tal smalalic ti antsetique, ti ololetique sbec’tal stotic, xchi’uc muyuc c’usi ta xich’ic ac’bel me ja’uc jutuc vo’.

9 Ja’ jech muc’ no’ox ti xchopolilic jlamanitaetique, jech ma’uc ech’em muc’ jech chac c’u cha’al jteclumaltic ta moriantume, ja’ jech, la stsaquic batel ta chuquel ti stsebic jlamanitaetique, xchi’uc ja’ o la jyuts’intaic ta scotol ta chop c’usitic tu jtsots sc’oplal, ti jech mulivajic xchi’ucquic sbec’talique.

10 Ta ts’acal ti c’alal la spasic ti va’aye, ja’ o la smilic xchi’uc tu jc’ux svocol la spasbeic, ep c’usi chopol la pasbeic ti sbec’talique, ja’ to ti c’uxi chamic oe, ta ts’acal ti c’alal la spasic ti va’aye, ja’ o sjapoic sti’ananbel ti sbec’talic jech chac c’u cha’al chon bolometique, ti va’aye ja’ ta sventa ti stsatsal yo’ntonique, ta spasic jech ta sventa ti yu’un ta xaq’uic ta ilel stsatsal yo’ntonic.

11 Vo’ot jnich’on ti vu’un lec jc’anojote, ¿C’uxi xu’ yu’un jun jteclum jech chac c’u cha’al li’ ti me muyuc c’usi sna’ique?.

12 Xchi’uc jelovan jayibuc no’ox jabil ti jech lec to ox xchi’uc ti oy to ox c’usi sna’e.

13 Vo’ot jnich’on vu’un, ¿C’uxi xu’ yu’un jun jteclum jech chac c’u cha’al li’ jteclum, ti ja’ lec cha’ay c’usi chopole?

14 ¿C’uxi xu’ ta jmalatic Riox ac’o mu xac’ sc’ob ta sq’uelel jtaleltic vu’tic?

15 Ja’ jech, ta xal ti co’ntone, ¡abul sba ti li’ jteclume! la’ xa q’uelo ti talelile vo’ot Riox, yu’un ta snaq’uic ti smulique, ti sbolilique, xchi’uc ti xchopolilic ta a sate.

16 Xchi’uc jnich’on vu’un, oy epal me’on antsetic xchi’uc tsebetic ti te oyic ta Sherrizae, ti ja’ic jvoq’uic ti muyuc la jyiq’uic batel jlamanitaetique, ja’ jech ti yaj soltarotac Zenefie la jyic’ batel, ja’ xa no’ox la scomtsanic ti va’aye, ti c’uxi ja’uc bu xloc’ ech’icuc ti c’uxi xu’ staic sve’elique, jech ep me’eletic ti jech yalic ta lum ta alubel ta bee, xchi’uc ti chamique.

17 Ti soltaroetic bu jchi’uc vu’une tu jc’unic, ja’uc ti yaj soltarotac jlamanitaetique la sloq’uesicun te ta Sherriza, jech ep no’ox ti jeloic yaj soltarotac Aarone, te lajic ta xibal sba spersail pas c’ope.

18 ¡Jech ti xchopolil c’usi tspas jteclumale! muyuc stuq’uil xchi’uc muyuc slequilal, ja’ jech muc’ vu’nuc ech’emucun jech chac c’u cha’al vinic, xchi’uc mu vu’nuc ech’emuc jpersa jech chac c’u cha’al jun vinic, ja’ jech mu xa xu’ xcac’ ti jmantaltaque.

19 Ti stuquique tsots spasoj sbaic ta sventa ti c’usi tu jchopole, jech ti c’u x-elan ta xmilvane co’ol sba, muyuc boch’o ta spasbeic pertonal, me ja’uc queremutic xchi’uc me ja’uc moletic, xchi’uc lec cha’yic scotol, ja’ no’ox muyuc lec cha’ayic ti c’usitic lequique, ti c’u x-elan chamic ti cajnilcutic xchi’uc ti jnich’nabcutic ta scotol sba banamile te ta sne’tic jutuc ta scotol c’usitic oy, ti jech mu xu’ xal oq’uile, xchi’uc ti mu stac’ ts’ibaele.

20 Lec tana jnich’on vu’un, muyuc xa bu ep chi c’opoj ta sventa ti c’usi tu jchopol la spasique, ja’ jech, vo’ot xa votquin ti sbolilic boch’otic ja’ic li’ ta jteclume, xchi’uc xa na’o no’ox ti muyuc mantaletic yu’nique xchi’uc ti muyuc lec c’usi tsnopique, ti sbolilique ja’ te ta sne’t batel jutuc ti boch’otic ja’ic jlamanitaetique.

21 Ja’ jech, jnich’on vu’un, mu stac’ xcaq’uic ta c’abal yu’un Riox, yatsame xi yac’bun vocolil.

22 Ja’ jech jnich’on vu’un, ta xcac’ot ta c’abal yu’un Riox, yu’un jpatoj co’nton yu’un Cristo ti cha cole, xchi’uc ta jc’anbe Riox ti ac’o sq’uelbot lec acuxlejal ti c’uxi vo’tuc xa com ta texticoal ti c’uxi li’ jteclum ac’o suticuc batel ta stojolale, o me ja’ ta sventa c’uxi ac’o xich’ic vuq’uesel scotolic. Yu’un vu’un jna’oj ti xu’ ta xchamique, ja’ no’ox ti me la sutes yo’ntonic xchi’uc ti me sutic ta stojolale.

23 Ti me chamique, ja’ jechic jech chac c’u cha’al Jareditaetic, ta sventa stoyub bail yo’ntonic ta sventa st’unic ch’ich’ xchi’uc ta sventa ta spac sc’oplalic, ti me ja’ jeche, ta xchamic.

24 Jna’ojtic ti oy ep quermanotactic jeloic ta jlamanitaetique, xchi’uc ti ta scomtsanic ta stojolalique. Ts’ibao jayibuc ti c’usitic va’aye, ti me vo’ot la comto ti me jech li cham, me muyuc xa bu xaquilot oe, jech jpatoj co’nton ti ta xquilot ta oratic no’oxe, yu’un oy cu’un ch’ul poco’ lo’iletic ti ta jc’an cha cac’bote.

25 Jnich’on vu’un, tuc’uc me xa vac’ aba ta sventa Cristo, ti c’usitic jts’ibaoje mu me xac’ xat a vo’nton, ti jech xac’ xa bat a vo’nton c’alalto me la chame, ja’uc no’ox Cristo xac’bot stsatsal a vo’nton, ti c’u x-elan svocol xchi’uc ti c’u x-elan chame ti c’u x-elan la jyac’ ta ilel sbec’tal ta jtotique, xchi’uc ti slequilale, xchi’uc ti smuc’ule, xchi’uc ti c’u x-elan spatubil o’ntonal ta sventa xojobale, xchi’uc slequilal xchi’uc ti cuxlejal ta sventa sbatel osile, ja’uc te oyuc o ta atojolal sbatel osil.

26 Ti slequil yo’nton Riox ti ja’ jtotique, ti xchotlebe te oy te ta stoylejal vinajel, xchi’uc ti Cajvaltic Jesucristoe, ja’ te ta xchoti ta sbats’i c’ob xchi’uc stsatsal xchi’uc ja’ to ti c’uxi ja’uc xu’nin scotol ti c’usitic oye, ac’o xchi’not xchi’uc ac’o comuc a chi’in ta sbatel osil. Jechuc.