1 Vacamiʼ cʼa, yin Moroni nintzʼibaj can jubaʼ ri utz nintzʼet yin. Nintzʼibaj cʼa chique ri vachʼalal ri Lamaniʼ. Ninvajoʼ chi rijeʼ quetaman chi nicʼo ruviʼ jukʼo juvinek junaʼ ri e kʼaxinek el tok tiyaʼox ri retal ri rupetebal ri Cristo.

2 Cʼa cʼariʼ tok xtinbij jun caʼiʼ oxiʼ chic tzij chive richin yixinpixabaj, xtintzʼapij cʼa el re retal banobel reʼ.

3 Can kitzij vi, yixinpixabaj tok nitzʼet ronojel reʼ, vi xa nuyaʼ kʼij ri Dios chive richin nitzʼet, chi xtinataj cʼa chi ri Ajaf can rujoyovan quivech ri calcʼual ri achiʼaʼ. Quereʼ rubanon pe cʼa tok rutzʼuquic ri Adán, cʼa chupan cʼa chukaʼ ri kʼij tok xticʼul ronojel reʼ. Yixinpixabaj cʼa chukaʼ richin tichʼoboʼ cʼa rij pan ivánima.

4 Tok xticʼul ronojel reʼ, yixinpixabaj chi ticʼutuj cʼa akʼanij chire ri Dios, ri Jumul Tataʼixel, pa rubiʼ ri Cristo, vi man kitzij ta cʼa ronojel reʼ. Cʼariʼ, vi xticʼutuj riqʼuin choj ivánima y riqʼuin kitzij irayibal, y vi cukul chic icʼuʼx riqʼuin ri Cristo, jariʼ tok rijaʼ xtukʼalajirisaj pe chivech ri kitzij richin ronojel reʼ, riqʼuin ri ruchukʼaʼ ri Uxlabixel.

5 Roma cʼa ri ruchukʼaʼ ri Uxlabixel, cʼo banel richin xtivetamaj ronojel ri kitzij.

6 Xabachique cʼa utz, xa choj y kitzij chukaʼ. Roma cʼariʼ, manjun cʼa ri utz nuxilkʼotij ri Cristo, xa nukʼalajirisaj cʼa chi can cʼo vi rijaʼ.

7 Roma cʼa ri ruchukʼaʼ ri Uxlabixel, cʼo cʼa banel richin nivetamaj rix chi rijaʼ can cʼo vi. Roma cʼariʼ, ninvajo yixinpixabaj chi man cʼa tixovaj ri ruchukʼaʼ ri Dios. Roma rijaʼ nisamej riqʼuin uchukʼaʼ junan vacami, chuvaʼk, y benek ruvech, achiʼel cʼa ri quicukubabel cʼuʼx ri calcʼual ri achiʼaʼ.

8 Chukaʼ, vachʼalal, yixinpixabaj chi man queʼivevaj ri lokʼolej sipanic richin ri Dios, roma e cʼo cʼa qʼuiy y xa riqʼuin ri Dios e elenek vi pe. E cʼo cʼa jalajoj ruvech rubaniquil richin yesamajix re lokʼolej sipanic reʼ. Xa can ja vi ri Dios ri nibanon quichin conojel y e yaʼon cʼa roma ri rukʼalajirisanic ri Ruxlabal ri Dios chiquivech ri achiʼaʼ richin yequitoʼ.

9 Can kitzij vi cʼa chi niyaʼox chire jun vinek richin chi nitijon chire ri chʼabel richin utzilej nojibel roma ri Ruxlabal ri Dios.

10 Chire cʼa jun chic vinek niyaʼox richin nitijon chire ri chʼabel richin ri etamabel roma ri Uxlabel riʼ.

11 Niyaʼox cʼa chire jun chic janíla nim rucukubabel cʼuʼx, y chire jun chic niyaʼox ri lokʼolej tak sipanic richin cʼachojirisanic roma ri Uxlabel riʼ.

12 Chire jun chic niyaʼox chi nuben nimalej tak samaj ri yekamey.

13 Chukaʼ niyaʼox chire jun chic chi nuyaʼ lokʼolej rutzijol chirij ronojel.

14 Chukaʼ niyaʼox chire chic jun vinek richin yerutzʼet takonaxelaʼ y toʼonelaʼ tak uxlabel.

15 Niyaʼox chukaʼ chire jun chic vinek jalajoj ruvech chʼabel.

16 Chukaʼ niyaʼox chire jun chic richin yerukʼaxaj pa tak chʼabel y jalajoj ruvech tzijobel.

17 Ronojel re lokʼolej sipanic reʼ e elenek pe riqʼuin ri Ruxlabal ri Cristo. Yeyaʼox chique chiquijujunal ri vinakiʼ, achiʼel cʼa ri niquirayij.

18 Ninvajoʼ cʼa yixinpixabaj vachʼalal, chi man cʼa timestaj chi ronojel ri utzilej tak lokʼolej sipanic xa e elenek pe riqʼuin ri Cristo.

19 Vachʼalal ri ix nucʼuʼxlan, ninvajoʼ chukaʼ yixinpixabaj richin man cʼa timestaj chi rijaʼ xa junan ivir, vacami, y benek ruvech. Tokaʼ cʼa chukaʼ chiʼicʼuʼx chi ronojel re lokʼolej sipanic reʼ, achojchij in chʼovinek vi, e richin ri uxlabel y manjun bey xqueqʼuis tok cʼa cʼo na re ruvachʼulef, xaxe cʼa tok ri calcʼual ri achiʼaʼ man niquinimaj ta chic.

20 Romariʼ tok nicʼatzin chi cʼo ri cukubabel cʼuʼx. Vi nicʼatzin chi cʼo ri cukubabel cʼuʼx, nicʼatzin cʼa chukaʼ chi cʼo ri oyobenic pa ánima. Cʼa cʼariʼ, vi nicʼatzin chi cʼo ri oyobenic pa ánima, nicʼatin cʼa chukaʼ chi cʼo ri lokʼokʼebel.

21 Vi manek cʼa ri ilokʼokʼebel rix, can manek vi chic banel richin yixcolotej chupan ri rajavaren ri Dios. Manek cʼa chukaʼ banel richin yixcolotej chupan ri rajavaren ri Dios vi xa manek icukubabel cʼuʼx y vi manek chukaʼ ri oyobenic pan ivánima.

22 Vi xa manek cʼa ri oyobenic pa ivánima, cʼo cʼa chi nixibij iviʼ y ri xibinriʼil xa elenek pe riqʼuin ri etzelal.

23 Ri Cristo can xubij vi quereʼ chique ri katiʼt kamamaʼ ojer: Vi nicukubaʼ icʼuʼx, cʼo cʼa banel richin niben ronojel achique ri utz chuve yin.

24 Vacami yichʼo cʼa quiqʼuin conojel ri vinakiʼ chuvech chijun re ruvachʼulef: Vi napon cʼa ri kʼij tok ri ruchukʼaʼ y ri lokʼolej tak rusipanic ri Dios xquechuputej ka chiʼicojol, xa xtibanatej cʼa queriʼ xa roma cʼa manjun chic ninimaj.

25 Joʼoc quivech ri calcʼual ri achiʼaʼ vi queriʼ xtibanatej, roma ja cʼariʼ tok manjun chic xticʼojeʼ chiʼicojol rix ri xtibanon ta ri utz, can man vi ta jun chic. Vi cʼa cʼo na cʼa jun chiʼicojol rix ri xtuben ri utz, can xtisamej vi cʼa roma ri ruchukʼaʼ ri Dios y ri lokʼolej rusipanic.

26 Joʼoc quivech ri xquechupan ka quichin reʼ y chek queriʼ xquecom ka. Roma xquecom quiqʼuin ri quimac y manek chic banel richin xquecolotej ta chupan ri rajavaren ri Dios. Ninchʼabalij cʼa achiʼel ri nubij ri ruchʼabel ri Cristo y man nintzʼuc ta tzij.

27 Yixinpixabaj cʼa chi man queʼimestaj ronojel reʼ, roma xa can chaʼnin vi xtapon ri kʼij tok xtivetamaj chi man nintzʼuc ta tzij, roma can xquinitzʼet vi cʼa chupan ri rucʼojlibal ri Dios y quereʼ xtubij ri Ajaf Dios chive rix: ¿La man xinkʼalajirisaj ta cami chivech rix ri nuchʼabel ri xetzʼibatej can roma re achin reʼ? Rijaʼ xa achiʼel cʼa jun ri nichʼabalin pe chiquicojol ri caminakiʼ y achiʼel cʼa jun ri nichʼo pe chupan ri pokolaj.

28 Yin ninkʼalajirisaj chivech rix re naʼoj reʼ richin queriʼ yekʼajer ri lokʼolej rutzijol. Can kitzij vi cʼa, xqueʼel pe pa ruchiʼ ri jumal Dios y ri ruchʼabel rijaʼ xtitzijox pe riqʼuin jun iyaj mamaj ijaʼtzul cʼa chire jun chic.

29 Ri Dios xtucʼut cʼa chivech chi can kitzij vi ri rutzʼiban can.

30 Ninvajoʼ cʼa chukaʼ yixinpixbaj chi quixjel cʼa pe riqʼuin ri Cristo y titunuʼ cʼa iviʼ quiqʼuin ronojel ri utzilej tak lokʼolej sipanic y man tichop cʼa ri itzel sipanic, ni ta chukaʼ xabachique ri tzʼil.

31 Cacʼastej cʼa y cayacatej pe chupan ri pololaj, rat ri at Jerusalem. Tacusaj cʼa pe ri jebelilej atziak, rat ri at rumiʼal ri Sión. Tacovirisaj cʼa ri axatat y tanimirisaj cʼa el ri icʼulbaʼt benek ruvech richin chi man yasach ta chic, y richin queriʼ xquekʼajer cʼa ri cʼulanen tzij ri xuben ri Jumul Tataʼixel aviqʼuin rat, ri at rujayul ri Israel.

32 Jaʼ, quixjel cʼa pe riqʼuin ri Cristo y titzʼakatisaj iviʼ riqʼuin rijaʼ, y tivevaj can iviʼ chuvech ronojel ri man e chʼajchʼoj ta. Nicʼatzin chi xtivevaj iviʼ riqʼuin ronojel ri man chʼajchʼoj ta, y xtivajoʼ cʼa ri Dios riqʼuin ronojel ri irayibal, ri inojibal, y ri ivuchukʼaʼ. Vi niben cʼa queriʼ, ri rutzil rijaʼ xquixruben cʼa richin queriʼ xquixtzʼakatisan cʼa riqʼuin ri Cristo. Cʼariʼ, vi ix tzʼaket riqʼuin ri Cristo roma ri rutzil ri Dios, can manek vi banel richin nixilkʼotij ri ruchukʼaʼ ri Dios.

33 Chukaʼ cʼa, vi ix tzʼaket chic riqʼuin ri Cristo roma ri rutzil ri Dios y man nixilkʼotij ta ri ruchukʼaʼ rija, jariʼ tok xquixchʼajchʼojirisex riqʼuin ri Cristo. Jariʼ xa roma ri rutzil ri Dios roma xbiyin ri ruquiqʼuel ri Cristo. Ja cʼariʼ ri cʼulanen tzij ri xuben ri Tataʼixel richin nicuyutej ri imac richin queriʼ yixchʼajchʼojirisex y manek chic itzʼilol.

34 Vacami cʼa ninbij chive rix ivonojel: Quiriʼ cʼa. Jubaʼ chic apon xquibeʼuxlan chupan ri lokʼolej cʼojlibel richin quicoten richin ri Dios. Chiriʼ cʼa xquicʼojeʼ vi, cʼa tok ri nuchʼacul y ri vuxlabal xtiquitun chic quiʼ y xquinucʼuex el riqʼuin uchukʼaʼ pa cakʼikʼ, richin queriʼ yixintzʼet rix chuvech ri jebelilej rucʼojlibal ri nimalej Jehová, ri Jumul Kʼatoy Tzij quichin ri e qʼues y chukaʼ ri e caminek chic. Amen.