1 Jó, dóó kʼad, díí dineʼé chʼéédzíʼígíí yitsʼą́ą́dóó nooséełii éí bichʼįʼ hadeesdzih nisin, háadida Diyin God díí shizaad yichʼįʼ kwíyiilaago, éí dabizhéʼé yę́ę yéénidahoosįįł; aooʼ, Israel bighandóó dineʼé danohłínígíí, éí nihichʼįʼ yáshtiʼ; dóó díí éí saad bee yáshtiʼ:

2 Israel bighandóó danohłínígíí éí nihił béédahózin doo.

3 Tsʼídá niheʼiinaʼ łahgo áńdaoohdlaago tʼéiyá yisdánádahidookááh éí nihił béédahózin doo.

4 Bee daʼahoogánígíí éí niʼ ndahidoohnił, dóó tʼáadoo baa nihił dahózhǫ́ǫ́góó ndaʼahołtseedi doo, éí nínáádadidoohnił da, tʼáá hazhóʼó Diyin God ánihidííniidgo tʼéiyá; áko díí éí nihił béédahózin doo.

5 Tsʼídá hazhóʼó danihizhéʼé yę́ę béédahodoozįįł, dóó niheʼiinaʼ łahgo ánáyiidlaago, dóó Jesus Christ, Diyin God biYeʼ éí deinohdlą́, dóó Jew dineʼé dabiisxínígíí, dóó aTaaʼ bibee adziilii yee náádiidzáígíí nihił béédahodoozįįł, ákogo anoonééł yikʼehdeesdlį́į́ʼ; dóó ałdóʼ anoonééł bizǫ́sę́ę néidiilá.

6 Dóó éí éiyá daneeznánę́ę néididoołjah, áko bee diné ńdahiidooʼnaał, doo beʼánihwiitʼaah bikááʼdahʼasdáhí bidááhdóó deidoozįįł dóó bá ndahodooyootʼááł.

7 Dóó nihookááʼ dineʼé yisdánáhákáahgo áyiilaa, ákogo tʼáá háiida beʼiinaʼ łahgo ánáyiidlaago doo yee ádąąh dahaztánígíí ánihwiitʼaah bíiníłką́ądi bééhózinígíí éí Diyin God bił hazʼą́ądi éí yił yah adoogááł, yáʼąąshdi sin bee ayóó óʼóʼní yee dahataałii yił dahataał doo, aTaaʼ, aYeʼ dóó Iiʼsizį́ Diyinii bichʼįʼ, éí éí tʼááłáʼí yee Diyin God danilį́, ił hózhǫ́ doo nińtʼiʼii bił dahólǫ́ǫgo.

8 Éí bąą niheʼiinaʼ łahgo áńdaahdlééh, dóó Jesus bízhiʼ binahjįʼ tó bee danihiʼdilzį́į́h, dóó Christ binaʼnitin daoohłtsóód; éí éiyá nihidááhdóó ndootʼááł, doo tʼáá díí haneʼígíí tʼéiyá da, ndi Jew dineʼé baa haneʼígíí Gentile bílákʼedooltsʼił, dóó índa éí bitsʼą́ą́dóó nihichʼįʼ kwíidoolííł.

9 Jó háálá, díí haneʼígíí éí deidoohdląął biniiyé ályaa; dóó éí deinohdlą́ągo díí ałdóʼ deidoohdląął; dóó díí deinohdlą́ągo éí danihizhéʼé danilínę́ę nihił béńdahodoodzįįł, dóó ałdóʼ hodiyingo bitahgóó naanish ayóó átʼéego Diyin God bibee adziilii binahjįʼ ndaʼazhnishę́ę da.

10 Dóó Jacob bitsʼą́ą́dóó dahosoolį́ʼígíí ałdóʼ nihił bédahodoozįįł; éí bąą áłtsé dineʼé Diyin God yił ałhaʼdeetʼánígíí atah danohłį́; dóó Christ deinohdlą́ągo, dóó áłtsé tó bee, danihiʼdoolzį́įʼgo, índa kǫʼ dóó Iiʼsizį́ Diyinii bee nihiʼdoolzį́įʼgo, Yisdáʼiiníiłii bikʼehgo ánóhtʼéego, ánihidííniidę́ę bikʼehgo, éí nihodootʼáałjįʼ ayííłką́ągo éí yáʼátʼéehgo nihił hazʼą́ą doo. Amen.