Diyin bizaad
Mormon 1
Ahit’áád Hóyahdi Na’asdzoh

Hide Footnotes

Saad Bik’ehgo Nda’anishí

Mormon Binaaltsoos

Wóltaʼii 1

Ammaron éí díí haneʼ diyinii Mormon yineineeztą́ą́ʼ—Nephi bidineʼé dóó Laman bidineʼé daʼahiʼniigą́ą́ʼ—Nephi bidineʼé táltʼéego tʼáá nahasdzáán yikáaʼgi naakai doo haʼnínę́ę éí nahjįʼ kólyaa—Bąąhági átʼéii, doo oodláanii, iiníziin, dóó adilgąsh atisdi silį́į́ʼ. Díí éiyá Jesus náádiidzá dóó bikééʼdóó 321–326gi nahalzhiishgo yihahą́ądą́ą́ʼ ádahóótʼįįd.

1 Dóó kʼad shí, Mormon, tʼáadoo leʼé deiłtsánígíí dóó disétsʼą́ʼígíí baa ahoʼniishneʼ; áádóó díí haneʼ éí Mormon Binaaltsoos wolyéego áshłééh.

2 Dóó Ammaron béésh bikááʼ haneʼ Bóhólníihii yichʼįʼ néideesʼį́į́ʼ yę́ędą́ą́ʼ, shaa níyá, (áko neeznáá shinááhaigo daatsʼí dóó shidineʼé tʼáadoo leʼé yídahoołʼą́ʼígíí éí bíhooshʼaahgo baa ńdiisdzá) dóó Ammaron éí kóshidííniid: Tʼahdii áłchíní nílį́įgo tʼáadoo leʼé honiyą́ągo bee naa ákonisin;

3 Éí bąą, naadiin dóó baʼaan dį́į́ʼ náhááh góneʼ díí dineʼé tʼáadoo leʼé yaa naakaigo yiníłtsʼánígíí éí béénílniih dooleeł; dóó ákónéelą́ą́ʼ ninááhaigo kéyah Antumgóó díínááł, dóó Shim wolyéego dah yiskʼidígíí éí baa díínááł; áadi éí tʼáá ałtso béésh bikááʼ díí diné baa haneʼ diyinii hadiilyaahą́ą Bóhólníihii bichʼįʼ ńdéłʼį́į́ʼ.

4 Jó áádóó, Nephi bidineʼé baa haneʼígíí ndidííʼááł, dóó łaʼ éí bíniʼ tʼáá sinilígi sinil dooleeł; dóó díí dineʼé tʼáadoo leʼé yaa naaskaigo haaniłsídę́ę éí Nephi bibéésh tʼą́hí bikááʼ haneʼ bikááʼ ádíílííł.

5 Dóó shí, Mormon, éí Nephi bitsʼą́ą́dóó hosélį́į́ʼ, (dóó shizhéʼé éí Mormon wolyéé ńtʼę́ę́ʼ) Ammaron tʼáadoo leʼé yee shichʼįʼ haadzíʼę́ę éí bénáshniih.

6 Áádóó shí, łaʼtsʼáadah shinááhaigo, éí shádiʼááhjígo, kéyah Zarahemla wolyéego ndi shizhéʼé bił níʼáázh.

7 Tʼáá ałtso kéyah bikááʼgóó éí kin hadaalʼá silį́į́ʼ, dóó séí tónteel bibąąhgóó hólónígi átʼáo, éí diné tʼóó ahayóí.

8 Áádóó kóneʼ yihahgo éí Nephi bidineʼé, éí éí Nephi bidineʼé dóó Jacob bidineʼé dóó Joseph bidineʼé dóó Zoram bidineʼé danilį́įgo; dóó Lemuel bidineʼé dóó Ishmael bidineʼé éí Laman bidineʼé danilį́įgo, dóó díí Nephi bidineʼé dóó Laman bidineʼé daʼahoogą́ą́ʼ.

9 Kʼad Laman bidineʼé dóó Lemuel bidineʼé dóó Ishmael bidineʼé éí tʼáá ałtso Laman bidineʼé daolyéé ńtʼę́ę́ʼ; dóó naakigo dah oonéłígíí éí Nephi bidineʼé dóó Laman bidineʼé daolyéé ńtʼę́ę́ʼ.

10 Áádóó Zarahemla bił nááháasdzooígíí bąąhgo dóó Sidongi tó naazyínígi éí daʼahiʼniigą́ą́ʼ.

11 Áádóó Nephi bidineʼé éí diné ahąąh ádayiilaa, tádiin dóó baʼaandi mííl yázhí ndi. Áádóó díí kóneʼ yihahgo éí ląʼída ńdaʼahoogą́ą́ʼ, éí éí Nephi bidineʼé éí Laman bidineʼé yikʼehdadeesdlį́į́ʼ dóó tʼóó ahayóí ndeistseed.

12 Áádóó Laman bidineʼé éí nátʼą́ą́ʼ náhideeskai, dóó kéyah biyiʼ kʼé náhásdlį́į́ʼ; dóó tʼáá ádingo dį́į́ʼ nááhai, áko doo ndaʼahiltseedgóó.

13 Ndi kéyah bikááʼgóó bąąhági átʼéii náhásdlį́į́ʼ; áko índa Bóhólníihii bitáaʼgo yikééʼ naazínígíí ayóí áyóʼnínę́ę éí nínéidííʼnil, dóó álílee naʼanish dóó hadaałtʼé áńdaʼalneʼę́ę ádin silį́į́ʼ háálá diné bąąhági átʼéii yaa naakaiígíí biniinaa.

14 Dóó Bóhólníihii éí doo akʼihojídlíi da silį́į́ʼ, dóó Iiʼsizį́ Diyinii éí tʼáá háiida doo bił hólǫ́ǫ da ńtʼę́ę́ʼ, háálá bąąhági átʼéii yaa naakaiígíí dóó doo daʼoodlánígíí biniinaa.

15 Dóó shí, ashdlaʼáadah shinááhaigo dóó hazhóʼó ntséskeesgo, éí bąą Bóhólníihii éí shaa níyá, dóó Jesus biyáʼátʼéehii ayóó átʼéhígíí éí sélįh dóó shił bééhoozin.

16 Dóó díí diné naʼnishtin doo chʼééh nisingo, ndi shizééʼ éí dadeilchid, dóó áko ndíʼnéeshtįįłę́ę éí shichʼįʼ baa hóchįʼ ńtʼę́ę́ʼ; jó háálá biDiyin God éí tʼáá bí ádeinízingo doo yikʼeh dahółʼį́į da; dóó táaʼgo Bóhólníihii yikééʼ naazínígíí ayóí áyóʼnínę́ę éí kéyah biyiʼdę́ę́ʼ chʼétʼeezh, háálá bąąhági átʼéii yaa naakaiígíí biniinaa.

17 Ndi shí éí bitahgóó naashá, ndi ndinéeshtįįłígíí éí shichʼįʼ baa hóchįʼ ńtʼę́ę́ʼ, háálá bijéí deistłʼisígíí biniinaa; dóó bijéí deistłʼisígíí biniinaa kéyahą́ądóʼ doo yáʼátʼéehii bee bá haʼoodzííʼ.

18 Dóó daʼniʼįįhii Gadianton, éí Laman bidineʼé yitahgóó hólónę́ę, éí kéyah ałtso bikááʼgóó tʼóó ahayóí silį́į́ʼ, áko índa éí kéyah yikááʼgóó kéédahojitʼínę́ę éí tʼáadoo leʼé daʼílíinii łeeyiʼgóó ndaazdeesʼį́į́ʼ; dóó honaalyéhé yę́ę bídéeltǫʼ silį́į́ʼ, háálá kéyah doo yáʼátʼééhgóó Bóhólníihii yee yá haadzíʼę́ę biniinaa, chʼééh honaalyéhé yę́ę dajótąʼgo hatsʼą́ą́ʼ yóóʼ ahinidéehgo, dóó doo nibééhóyoodzįįh da.

19 Áádóó diné bee daʼiiníziinígíí, dóó daʼdiłgąshii, dóó nichxǫ́ǫ́ʼígo éédahósinii hazlį́į́ʼ; dóó chʼį́įdii doo yáʼáshóonii bibee adziil éí tsʼídá ałtso kéyah yikááʼgóó hazlį́į́ʼ, áko Abinadi dóó Samuel Laman bidineʼé nilíinii bizaadę́ę éí tʼáá ałtso bidaʼalyaa ndi.