1 Ket napasamak nga idi maika-tallo-gasut-ken-innem-a-pulo-ket-tallo a tawen napan dagiti Nephite kadagiti buyotda tapno makigubatda kadagiti Lamanite, iti ruar ti ili a Desolation.

2 Ket napasamak a napasanud manen dagiti buyot ti Nephite iti daga ti Desolation. Ket idinto a sibabannogda pay laeng, dimteng dagiti nasaranta a buyot dagiti Lamanite; ket napinget ti panagrangetda, iti kasta tinagikua dagiti Lamanite ti siudad ti Desolation, ket adu ti napapatayda kadagiti Nephite, ken adu ti pinagbalinda a balud.

3 Ket naglibas dagiti nabati ket timmiponda kadagiti umili iti siudad ti Teancum. Ita adda iti nagbeddengan iti igid ti baybay iti siudad a Teancum; ket asideg met iti siudad ti Desolation.

4 Ket ^agapu ta napan dagiti buyot dagiti Nephite kadagiti Lamanite isu a nangrugida a maparmek; no saan a gapu iti dayta, saan koma ida a nabaelan dagiti Lamanite.

5 Ngem, adtoy, parmeken ti panangukom ti Dios ti nadangkes; ket babaen dagiti nadangkes ^amadusa dagiti nadangkes; agsipud ta dagiti nadangkes ti mangsulisog iti puso dagiti annak ti tao tapno agayus ti dara.

6 Ket napasamak a nagsagana dagiti Lamanite a mapan makigubat iti siudad a Teancum.

7 Ket napasamak iti maika-tallo-gasut-ken-innem-a-pulo-ket-uppat a tawen ginubat dagiti Lamanite ti siudad ti Teancum, tapno matagikuada met ti siudad ti Teancum.

8 Ket napasamak a naparmek ken napagsubli ida dagiti Nephite. Ket idi nakita dagiti Nephite a napagsublida dagiti Lamanite impannakkelda manen ti pigsada; ket inusarda manen ti pigsada, ket tinagikuada ti siudad ti Desolation.

9 Ket ita naiwakasen amin dagitoy a banag, ket rinibribu ti natay iti agsumbangir, kadagiti Nephite ken Lamanite.

10 Ket napasamak a napalabas ti maika-tallo-gasut-ken-innem-a-pulo-ket-innem a tawen, ket nakiranget manen dagiti Lamanite kadagiti Nephite; ngem saan a nagbabawi dagiti Nephite kadagiti dakes a naaramidda, ngem intultuloyda ketdi ti kinadangkesda.

11 Ket awan ti pamuspusan a mabalikas ti dila, wenno ti tao a mangisurat iti naan-anay a panangiladawan iti nakaal-alingget a buya ti dara ken panagpipinnapatay dagiti tao, dagiti Nephite ken Lamanite nga agpadpada; ket napatangken ti tunggal puso, isu a ragsakda ti panagtultuloy ti panagayus ti dara.

12 Ket awan ti nakarkaro a ^akinadangkes kadagiti annak ni Lehi, wenno, uray iti amin a balay ti Israel babaen ti balikas ti Apo, ngem kadagitoy a tao.

13 Ket napasamak a tinagikua dagiti Lamanite ti siudad ti Desolation, ket daytoy gapu ta ^aad-aduda ngem dagiti Nephite.

14 Ket sinerrekda met ti siudad ti Teancum, ket pinapanawda dagiti umili, ket nangalada iti adu a baludda a babbai ken ubbing, ket inaramidda a daton kadagiti ^apagrukbabanda a diosda.

15 Ket iti maika-tallo-gasut-ken-innem-a-pulo-ket-pito a tawen, nagpungtot dagiti Nephite gapu ta indaton dagiti Lamanite dagiti babbai ken annakda, ket kasta unay ti gurada kadagiti Lamanite, iti kasta dinangranda manen dagiti Lamanite, ken pinapanawda ida iti dagada.

16 Ket saanen a sinunotan dagiti Lamanite ti nakiranget kadagiti Nephite agingga iti maika-tallo-gasut-ken-pitopulo-ket-lima a tawen.

17 Ket iti daytoy a tawen immayda nakiranget kadagiti Nephite iti amin a pigsada; ket saanda a mabilang iti kaaduda.

18 Ket ^amanipud kadagitoy a panawen saan a nagun-od dagiti Nephite ti panangiturayda kadagiti Lamanite, ngem nangrugida a mapunas a kasla iti linnaaw iti babaen ti init.

19 Ket napasamak a simmalog dagiti Lamanite a nakiranget iti siudad ti Desolation; ket napagteng ti nadagem a gubat iti daga ti Desolation, ket iti dayta inabakda dagiti Nephite.

20 Ket intarayanda manen ida, ket nakadanonda iti siudad ti Boaz; ket nakirangetda idiay kadagiti Lamanite iti naisangsangayan a kinatured, iti kasta saan a maabak ida dagiti Lamanite agingga a napanda manen iti maikadua a daras.

21 Ket idi kapaminduada ti napan, napapanaw dagiti Nephite ken naisalsalumina ti kaadu ti napapatay; naidaton manen dagiti babbai ken annakda kadagiti didiosen.

22 Ket napasamak nga intarayan manen ida dagiti Nephite, ket inkuyogda amin dagiti umili, kadagiti ili ken purok.

23 Ket ita, siak ni Mormon, idi maimatangak a dandani parmeken dagiti Lamanite ti daga, ngarud napanak iti turod a ^aShim, ket innalak amin dagiti kasuratan nga inlemmeng ni Ammaron nga agpaay iti Apo.