Scriptures
Omochakano Bw’egetabu Kia Mormoni


Omochakano Bw’egetabu Kia Mormoni

Joseph Smith, oyio goetera ase are, ase ekeegwa na chinguru chia Nyasae, amariko akare, amanyekanete buna egetabu kia Mormoni, kiabeire gekoiranigwa naende na goonchorigwa ase omonwa bwegesongo na korwa amang’ana buna abete okoyaegwa amariko aya amachenu. Akaba ogoteba ng’a ekero kiobotuko bwa Sebetemba chitariki 21, 1823, akaba okomorangeria Omonene ase okwegena okonene na gosaba mono, Naboigo Kanya obeire okorora amaroro aigoro igoro yokoirwa. Amang’ana aya aye naro aya akobwatia:

“Erio ekero narenge ase okokomorangeria Nyasae, nkamanya ng’a oborabu bwachire ase enyomba yane, obwe bwagendererete komenteka goika enyomba ekaraba kobua mogaso gati, ekero ekio kegima omonto akaoroka ensemo yegetanda kiane, oteneine ase embeo, na amagoro aye takunete inse y’enyomba.

“Na nigo abegete eganchwa yarenge n’oborabu obonene mono. Naboigo nigo yarenge ere endabu mono kobua kende gionsi ime ase ense kanya nabeire inkorora: na ninde nokwegena ng’a kende nkeri kerarosigwe kebwate oborabu obonene bonga buna obo na bore obochenu mono iga. Amaboko aye nigo arenge bosa, na ebisanyi biaye boigo nigo biarenge bosa, korende nigo atubire akeigo igoro ang’e namareko: Naboigo namagoro aye nigo arenge bosa, nonya nemerondo yaye nigo yarenge bosa, korende igoro akeigo ase ebimbong’i. Omotwe aye na ebigoti biaye nigo biarenge bosa. Nkaba nkomanya ng’a tabegete yanga ende ere eng’ao gotatiga eganchwa eye yoka, buna yarenge ekororekana, nkaba nkorora egekuba kiaye.

“Tari egenchwa eye yoka yarenge ere endabu, korende omobere oye bwonsi nigo orenge obw’obonene kobua buna eranyare gotebwa, na okomekameka kwaye ekeene nigo kwarenge buna okomesa gwenkoba. Enyomba ekaba n’oborabu obonene mono, korende tari oborabu bonga buna boria bwaetanaine ase omobere oye. Ekero narigereretie ritang’ani korende ase obwango obwoba bogantiga.

“Akandangeria ase erieta riane, nagontebia ng’a nigo arenge omotomwa otometwe korwa ase Nyasae gocha ase inde, na erieta riaye nigo are korokwa Moroni; ng’a Nyasae nabwate emeremo aganetie imbe inkoyekora; naboigo ng’a erieta riane ndibe rigwatorwa ase obuya na obobe egati y’ebisaku bionsi biense, ase ebisaku, nemenwa, gose n’ga ndibe rigwatorwa ase obuya na obobe egati ya abanto bonsi.

“Agateba ng’a egetabu nkiarenge aroro kegachire, ekio kiarigetwe igoro ase chibao chiethahabu, ekio kebwate amang’ana yebisaku bi’ense eyeiga, na omochakano obo ase orwerete. Naboigo agateba ng’a enchiri ya kare na kare nigo yarenge imeo, buna yarwetu amo n’Omotoria ase abanto bamenyete ase engaki yakare;

“Naboigo, ng’a narengeo amagena abere ime ase obota bw’efetha – – na amagena aya, akaomeranigwa ase ebao y’egekuba, erinde ekaba egento gekorokwa ng’a Urimu na Ethamamu – – giatananire nechibao. Emeremo na ogokora kwaye amagena aya nigo kwarenge kore okwababani ase engaki yaetire gose abwe kare; na nigo Nyasae ayarosetie ase engencho y’ogonchoria egetabu.

· · · · · · ·

“Naende, agantebia, ng’a ekero indayanyore amagena aya kanya abeire agokwanwa igoro yaye ekiagera engaki y’okonyorwa kwaye kanya teraikerana. Timba inkworokia monto onde bwonsi; nonya namagena yegekuba aria akorokwa Urimu na Ethamanu; gotatiga ase baria indabe ngochika koyarora, onye inkoyaorokia nigo nare koba ingoitwa. Erio buna agendererete gokwana amo naitwe igoro y’echibao chiria – – Okorora gokaigoka ime ase ebirengererio biane na inkaba inkorora aase chibao chiria chiamariko chiare, na buya kegima inkamanya aase aria naende ekero nabete inkoatarera.

“Nyuma ekero enkwana eye yaerire, nkarora oborabu boria bwarenge ase enyomba bogocha amo ase obwango na komoetonana omonto oria orenge gokwana amo nainche, naboigo bokagenderera koera, goika enyomba naende egatigara negesunte, gotatiga ase omonto oria bweka bwamoetenaine, ase ekero egeke bwango, inkarora buna namasaria akamesa nakoigora goika igoro, na agatira goika akarimeria, na enyomba egatigara buna yarenge konya oborabu obo bwaigoro botarayebeka komesa.

“Nkarara inde nokorengereria mono ase okoba inche bweka ase amang’ana aya, na inkaba nomoichano mono ase onsi nabete ingotebigwa, nomotomwa oyo bw’ogokumia oigoro. Ekero, kiobogati gati bw’ogosaba kwane nkamanya naende ng’a enyomba yane yachakire koba n’oborabu na komesa, naboigo ase obwango, buna yarenge, omotomwa oria oria oigoro agacha naende ase inse yegetanda kiane.

Agachika, na koyairorera amang’ana aria aria akorete ekero kieriteng’ani ekero achete, ase ogotakora engaki; Akaba okomanyia igoro y’ekina ekenene ekio kerache ase ense, ekio kerabe nogosaria okonene gw’enchara, okw’omoyio, na okw’amarwaire; naboigo omochando oyo ore omonene nobe ogocha ase ense ekero giekegori eke. Ase okoyabwekania aya; naboigo naende agatira buna ekero kieriteng’ani.

“Ase ensa eyio inkaba inde nebirengererio ebinene mono na okweboria okonene okwe kwagerete chitoro chigasira korwa ase amaiso ane, na nkarara maumama inde n’omoichano igoro yaria naroche na koigwa. korende ogokumia kwane nkoria ekero namoroche omotomwa oria oria ase ensemo y’egetanda kiane, na komoigwa okoirorera gose koyateba naende amang’ana abwekaine naria akwanete ritang’ani, na akamenta kondenda, na gontebia ng’a Saitani nabe ogotema gontema (ime ase ebirengererio igoro y’obotaka na emechando yonsi ere omochie otata), ase okonyora chibao chiria ase okwenyorera obonda. Aya nigo ayankanetie, ase ogoteba ng’a goika tegwenereti imbe nerengo yokonyora chibao echi korende imbe inkomotogia Nyasae, na timba inde nokogania na kong’useka namang’ana ande kobua koagacha oborwoti bwaye; kero kende nabo indabe tingochinyora.

“Nyuma ekero kiogocha kwaye gwa gatato kwarire, naboigo agatira gochia igoro naende buna akorete ritan’gani, na inkaba inkweboria nakoyarengereria aman’gana aria amageni na aria onsi kanya namanyire; erio kegima ekero omotomwa oria agenda korwa ase inde eriagatato, etwoni ekagweya, nkanyora, ng’a bwabeire ang’e gokia, aseigo okoborigwa gweito gokaba gokoira obotuko obogima.

“Chinsa chinke ekero nabokire korwa ase egetenda kiane, naende, buna konya nkagenda gokora emeremo ya botambe; korende, ngachia gotema gokora emeremo ase ogoikeranie chinsa chiabotambe, nkanyora chinguru chiane nigo chire chinke mono echio chiaerete inkaba omworo mono intanyare. Tata, oyorenge ogokora emeremo amo nainche, akamanya ng’a egento gete giakorekanire asende, na agantebia ngende inka. Ingachaka korengereria kogenda ase enyomba, korende ngachia gotema konacha ase orobago ase okogenda isiko ase omogondo orenge, chinguru chikambora kegima, na inkagwa inse ase amaroba ogokonya konde gotaiyio na ase egeka egeke tinamanyete kende inkaba buna oria okure.

“Egento egetang’ani nabete inkoigwa nakomanya neriogi riakwanete ase inde, rikandengeria ase erieta riane. Erio nkarigereria igoro, na inkarora omotomwa oria oria oteneine ase omotwe one, oetenanire n’oborabu buna boria bw’eriteng’ani. Naboigo akairorera nakoyakwana amang’ana onsi ase inde anga buna aria abete ogokwana ase inde obotuko boria, na aganchika kogenda ase tata na komotebia igoro y’okorora na namachiko nabete inkonyora.

“Nkaba nkoigwera; nkairana ase tata aria ase omogondo, na koyaorokia amang’ana aria onsi ase are. Akang’iraneria kegima ng’a ayio naya Nyasae arenge naboigo akamenta gontebia ng’a genda na gokora bo buna omotomwa oria agochigete okore, erio nkayotiga omogondo, na kogenda goika aase aria omotomwa oria antebetie chibao chiria chiabisire; na koinyora okorora koria gw’ekeene nabete nkorora igoro ya aya, erio inkamanya aase kegima ekero naika aroro.

“Ase okorema, kogenda ase omochie o Manchester, ase ense ya Ontario, ime ya New York, na gotenena ase egetunwa kere ekegwenerete, naboigo kere ekiya mono kobua kende gionsi kiarenge ang’e. Ase ensemo ya mocha y’egetunwa eke, abwe atari are, korwa ase omoerio bw’egetunwa, inse ase rigena riekerengo kegwenerete. Chibao chiria chiethahabu nao chiareirie, chibisirie n’esanduki y’erigena. Rigena eri nigo riarenge rire ririto mono na riaetanaine egati ase ensemo yaigoro, na rinyerere ase chinsonga chiaye, ase ensemo ya gatigati nigo yarenge kororekana igoro ase riroba, korende chinsonga chiaye nigo chiarenge chitubire neriroba.

Ekero narusia amaroba aroro inkanyora egetabo, ekio nanyorete kebwataine amo nomoerio bwerigena, inkarigereria ime yaye na igaria ekeene ingachirora chibao chiria chiethahabu, naboigo inkarora Urimu na Thammamu, amo nebing’ese biria biare ase ebao yegekuba, buna yatebetwe n’omotomwa oria. Esanduku eria ebinto ebi biarenge nigo erosirie n’amagena arenge aareirie amo ase engencho gete enga buna esimiti. Ime ase inse yesanduku amagena abere nao arenge areirie ase enchera y’omosaraba ase esanduku ime, na igoro ya amagena aya nao chibao chiria chiareire amo nebinto binde bionsi.

Ingatema Koyaimokia, korende inkaba ingokanigwa amo n’omotomwa oria, naboigo naende inkamanyigwa ng’a engaki y’okoyarusia aroro kanya teraika, goika abe aroro goika engaki y’emiaka ene yaerire korwa ekero ekio; korende agantebia ng’a goika imbe inkogenda aase aria kera engaki, ase kera omwaka rimo. Naboigo nabe ogocha aroro ase okonyorana nainche aroro, aseigo goika ingenderere gokora bo goika engaki eike ase ogochirusia chibao chiria chiamariko.

“Koreng’anana, buna nachigetwe, nkagenda kera omoerio bw’omwaka, na ase kera engaki inkaba inkonyorana amo n’omotomwa oria igaria, na konyora amachiko na obong’aini korwa ase are kera ekero tware konyorana nere inde nogosemeria ase keria Omonene aganetie gokora, na enchera buna oborwoti bwaye borabe bokoraua ase amatuko y’omoerio.

· · · · · · ·

“Ase egeka engaki egaika ase okoimokia chibao chiria chiamariko, amo na Urimu na Thammamu amo nebingese biegekuba. Ase omotienyi okianda rituko riemerongo ebere nabere, omwaka bw’eribu eyemo nechimia isano naisato na emerongo ebere naisano naibere kanya nagendire buna botambe ase ekero kiomoerio bw’omwaka onde goika aase aria ase chibao echi chiarenge chitindekire, omotomwa oria oria oigoro agachirwa korwa insaria na goching’a amo nogochika oko: ng’a goika imbe inkonyarenda; na onye inkoyatiga atarendirie gose koyang’a, nigo indaserigwe na konachwa korwa ase okwegena; na kondayarende, goika engaki ere, omotomwa oria, arayaganie amariko aya, goika abe akorendwa.

“Bwango nkamanya engencho yagerete naetwe amachiko yokoyarenda amariko aya, na egekogera omotomwa oria atebete n’ga ekero indakore bo ase ayatakeire ase amaboko ane, nabe okoyagania naende. Na tari geka getambe kiaerete etaramanyekana ng’a inabwate amariko aya, na abanto bakayagania koyarusia ase inde. Oboriania obonge bogakorwa ase engencho eye. Emechando egasoa ere emenene mono na emebe kobua ritang’ani, na emeganda emenge ekaba ere n’okogania na kogenderera korigia koyanyora korwa ase inde. Korende ase chisemi chia Nyasae, agatigara arendegete ase amaboko ane goika ekero naikeranetie amachiko aya aria aganeirie korwa ase amaboko ane. Ekero yaikerana koreng’ana nemeroberio, omotomwa oria akayagania, erio inkamoa; amang’ana ayio, akaba naro ase amaboko aye na ase ogochika goika rituko eri, ase rituko riakabere omotienyi ogatono, Omwaka bw, eribu eyemo nechimia isano naisato na emerongo etato netano n’etato.

Ase ogokora amang’ana aya, rora eruru yerigori rinene, (epechi 50–54,) na omogano bw’ekanisa ya Yeso Kristo ya Abaehenu ase amatuko y’omoerio, Volume 1, egesieri 1 goika 6.

Amang’ana aria akare, aria arusetigwe inse ase riroba, buna eriogi ri’omonto ogokwana korwa ase ebuse ime, na gegaonchorerigwa ase omonwa bw’ekerero ase ekeegwa na chinguru chia Nyasae buna gekworokia ekeene kia Igoro, ritang’ani nigo giachabetwe ase ense ase omwaka 1830 na gekarokwa Ebuku Ya Mormoni.