1 Nengneng yo, kaagian ko, ag yo kasi nanunotan so abasa yo ed saray salita nen profeta Zenos, a sinalita to ed kailalakan na Israel, a nankuan:

2 Talineng yo, O sikayo ed kailalakan na Israel, tan deñgel yo so saray salitak, a sakey a profeta na Katawan.

3 Tan nia, onia so inkuan na Katawan, iyaliling taka, O kailalakan na Israel, ed sakey a maamo a kiew ya oliva, ya inala na sakey a too tan binayuboan to ed dalem na kaolivaan to; tan saya so tinmubo, tan saya so tinmakken, tan ginmapo a nabulok.

4 Tan agawa a say katawan na kaolivaan so linma, tan anengneng to a say kiew na oliva to so ginmapo la a nabulok; tan inkuan to: saya so paltuñgan ko, tan kutkotan ko ed kaliber-liber to, tan bayuboan ko, ag la piga mansimit na saray malangwer tan anlemek a sañga, tan ag ompatey.

5 Tan agawa a saya so pinaltuñgan to, tan saya so kinutkotan to ed kaliber-liber, tan binayuboan to unong ed salita to.

6 Tan agawa a dia ed kayari inlabas na dakel ya agew ginmapo a tinmotubo na siñga ankelag, malangwer tan anlemek ira a sañga; balet nengneng yo, say kabalegan ed tuktok to nia ginmapo ya ompatey.

7 Tan agawa a say katawan na kaolivaan anengneng to so saya, tan inkuan to ed igagangan: Maermen ak a nabalang ko so saya a kiew; dia ed ontan, onla ka tan mangetel ka na saray sañga a manlapu ed balang a kiew na oliva, tan saraya so awit mo dia ed siak; tan palaspasen ta so saray babaleg a sañga ya ongagapo la ya onlenes, tan saraya so ibantak ta ed apoy pian napoolan.

8 Tan nengneng yo, inkuan na Katawan na kaolivaan, alaen ko so dakel ed saraya a malangwer tan anlemek a sañga, tan saraya so isuldong ko ed inerman a kaliktanen ko; tan andi bali la ed siak no bilang say lamut na saya a kiew so ompatey, iñgen pagnayon ko so saray buñga to ya onkana ed siak; dia ed ontan, alaen ko so saraya so malangwer tan anlemek a sañga, tan saraya so isuldong ko no iner so kaliktan ko.

9 Alaen mo so saray sañga na balang a kiew na oliva, tan saraya so iuteng mo, a kasalat na saraya; tan saraya so ginetel ko so ibantak ko ed apoy tan saraya so poolan ko, pian ag ira makadikadika ed dalin na kaolivaan ko.

10 Tan agawa a say igagangan na Katawan na kaolivaan ginawa to so unong ed salita na Katawan na kaolivaan, tan insuldong to so saray sañga na balang a kiew na oliva.

11 Tan say Katawan na kaolivaan ingangan to a saya so kutkotan ed kaliber-liber na señgeg, tan paltuñgan to, tan pabayuboan to, ya inkuan to ed igagangan: Maermen ak a nabalang ko so saya a kiew; dia ed ontan, pian pagnayon ko so lamut to nia pian ag ompatey, pian saya so nayari a pagnayon ko ya onkana ed siak, ginawak so saya a beñgatla.

12 Dia ed ontan, onla ka; bantayan mo so kiew, tan bayuboan mo, unong ed saray salitak.

13 Tan saraya so ipasen ko ed sankautelan na kaolivaan ko, no inerman so kaliktan ko, saya so aliwa a makana ed sika; tan saya so gawaen ko pian pagnayonen ko ya onkana ed siak so peteg a sañga na saya a kiew; tan ontan met, pian naisinop ko so buñga to ed ag-nipanaon, ya onkana ed siak; lapu ed maermen ak a nabalang ko so saya a kiew tan saray buñga to.

14 Tan agawa a say Katawan na kaolivaan so linma, tan iniamot to so saray peteg a sañga na maamo a kiew na oliva ed sankautelan a pasen na kaolivaan, saray arum dia ed sakey a pasen tan saray arum dia ed sananey, unong ed linawa tan kaliktan to.

15 Tan agawa ya andukey a panaon so dinmalan, tan say Katawan na kaolivaan inkuan to ed igagangan to: Gala, onlasur ta ed kaolivaan, pian mankimey ta ed kaolivaan.

16 Tan agawa a say Katawan na kaolivaan, tan ontan met ed say igagangan, so linma ed kaolivaan a mankimey. Tan agawa a say igagangan inkuan to ed katawan to: Nia, nengneng ka dia; nengneng mo so kiew.

17 Tan agawa a say Katawan na kaolivaan so ninmengneng tan amuria to so kiew ya añgiuteñgan na saray sañga na balang a kiew na oliva; tan saya so nansimit tan ongagapo la a mambuñga. Tan anengneng to a saya so maong; tan say buñga to siñga met buñga na saman so peteg a buñga.

18 Tan inkuan to ed igagangan: Nengneng yo, say sañga na balang a kiew asupsop to so basa na lamut to nia, tan say lamut to nia so añgiter na baleg a biskeg; tan lapu ed baleg a biskeg na lamut to nia saray balang a sañga so añgiter na buñga a maamo. Natan, no ag ta insuldong so saraya a sañga, say kiew inatey la komon. Tan natan nia, mañgisinop ak na dakel a buñga, ya initer na saya a kiew; tan saraya a buñga so isinop ko ya ikana ed ag-nipanaon, ed siak a dili.

19 Tan agawa a say Katawan na kaolivaan inkuan to ed igagangan: Gala, onla ta ed sankautelan a pasen na kaolivaan, tan nengneñgen ta no kasi saray sañga na peteg a kiew so ag añgiter na dakel a buñga met, pian isinop ko so saray buñga ya ikana ed ag-nipanaon, ed siak a dili.

20 Tan agawa a sikara so linma ed pasen ya añgiamotan na katawan ed saraman a peteg a sañga na kiew, tan inkuan to ed igagangan: Nengneng mo so saraya; tan anengneng to so unaan a kiew ya añgiter na dakerakel; tan anengneng to met a saya so maong. Tan inkuan to ed igagangan: Burbor mo so saray buñga to nia, tan isinop mo ya ikana ed ag-nipanaon, pian saraya so isinop ko a pagnayonen ed siak a dili, tan nia, inkuan to, dia ed saya a bayag na panaon saya so binayuboan ko, tan saya so añgiter na dakel a buñga.

21 Tan agawa a say igagangan nankuan ed katawan to: Panon so iniakar mo dia ya añgitanem ed saya a kiew, odino saya a sañga na kiew? Tan nengneng mo, saya a pasen so sankakapuyan ed amin a dalin na kaolivaan.

22 Tan say Katawan na kaolivaan inkuan to ed sikato: Ag mo ak babañgatan; kabat ko a saya so makapoy a pasen na dalin; kanian, inkuan ko ed sika, saya so binayuboan ko ed saya a dukey na panaon, tan anengneng mo a saya so añgiter na dakel a buñga.

23 Tan agawa a say Katawan na kaolivaan inkuan to ed igagangan to: Nengneng ka dia; nia añgitanem ak met na sananey a sañga na kiew; tan kabat mo a saya a pasen na dalin so lalo a makapoy nen say inmuna. Balet, nengneng mo so kiew. Saya so binayuboan ko ed saya ya andukey a panaon, tan saya so añgiter na dakel a buñga; dia ed ontan, burbor mo, tan isinop mo ya ikana ed ag-nipanaon, pian saya so ikanak ed siak a dili.

24 Tan agawa a say Katawan na kaolivaan inkuan to lamet ed igagangan to: Nengneng ka dia, tan nengneng mo met so sananey a sañga, ya intanem ko; nia saya so binayuboan ko met, tan añgiter na buñga.

25 Tan inkuan to ed say igagangan: Nengneng ka dia tan nengneng mo so sankaunoran. Nia, saya so intanem ko ed maong a pasen na dalin; tan saya so binayuboan ko met ed onia la a dukey na panaon, tan melag a kabiañgan na kiew so añgiter na maamo a buñga, tan say arum a kabiañgan na kiew añgiter na balang a buñga; nia, saya a kiew so binayuboan ko a siñga met saraman so arum.

26 Tan agawa a say Katawan na kaolivaan inkuan to ed igagangan: Palaspas mo so saray sañga ya ag añgiter na maong a buñga, tan ibantak mo ed apoy.

27 Balet nia, say igagangan inkuan to ed sikato: Paltuñgan tayo so saya, tan kutkotan tayo ed kaliber-liber to, tan bayuboan tayo ni ed andokdukey a panaon, ag la piga mañgiter na maong a buñga ya onkana ed sikayo, pian saya so isinop yo ya ikana ed ag-nipanaon.

28 Tan agawa a say Katawan na kaolivaan tan say igagangan na Katawan na kaolivaan binayuboan da so amin a buñga na kaolivaan.

29 Tan agawa a linmabas so andukey a panaon, tan say Katawan na kaolivaan inkuan to ed igagangan: Gala, onlasur ta ed kaolivaan, pian mankimey ta lamet ed kaolivaan. Tan nengneng mo, say panaon manasinger la, tan say kasampotan magano la ya onsabi; dia ed ontan, nakaukolan ko ya isinop so saray buñga ya ikana ed ag-nipanaon, ed siak a dili.

30 Tan agawa a say Katawan na kaolivaan tan say igagangan so linma ed kaolivaan; tan akasabi ra ed kiew a saray peteg a sañga to so asipi, tan dia ed saraya niuteñg so saray balang a sañga; tan nia amin a nengneng na buñga so nanderal ed kiew.

31 Tan agawa a say Katawan na kaolivaan tinawayan to so buñga, manlapu ed balang sakey a nengneng unong ed kinarakel to. Tan say Katawan na kaolivaan inkuan to: Nengneng mo, dia ed saya a dukey na panaon binayuboan ta so saya a kiew, tan insinop ko ya onkana ed siak so dakerakel a buñga.

32 Balet nengneng mo, dia ed saya a panaon añgiter na dakel a buñga, tan angapo so angan sakey ed saraya so maong. Tan nia, wala ya amin so nengneng na makapoy a buñga; tan angapo so gungonak, manwari na amin a kimey ta; tan natan maermen ak a nabalang ko so saya a kiew.

33 Tan say Katawan na kaolivaan inkuan to ed igagangan: Anto so gawaen ta ed saya a kiew, pian makapañgisinop ak lamet na maong a buñga to nia ya onkana ed siak a dili?

34 Tan say igagangan inkuan to ed katawan to: Nia, lapu ed inuteng yo so saray sañga na balang a kiew na oliva saraya so amabiskeg ed lamut, kanian saraya natan so mabilay tan ag inatey; dia ed onia anengneng yo a saraya so maong ni a siansia.

35 Tan agawa a say Katawan na kaolivaan inkuan to ed igagangan: Say kiew ag añgiter ed siak na gungona, tan saray lamut to angapo met so agungonaan ko no saya so mañgiter na mauges a buñga.

36 Angaman ontan, kabat ko a maong so saray lamut, tan makaseñgeg ed dili a gagalak saraya so impagnayon ko; tan lapu ed baleg a biskeg da sikara so añgiter, manlapu ed balang a sañga, na maong a buñga.

37 Balet nia, saray balang a sañga so tinmubo tan tinalo to so saray lamut to nia; tan makaseñgeg saray balang a sañga tinalo to so saray lamut kanian añgiter na dakel a mauges a buñga; tan lapu ed añgiter na dakel a mauges a buñga kanian nanengneng mo ya ongagapo la ya ompatey: tan magano la a nagenap, ya nibantak ed apoy, likud no sikata so mangawa na polaing ed saya pian magnayon.

38 Tan agawa a say Katawan na kaolivaan inkuan to ed igagangan to: Onlasur ta ed sankautelan a pasen na kaolivaan, tan nengneñgen ta no saray peteg a sañga so añgiter met kasi na mauges a buñga.

39 Tan agawa a sikara so linma ed sankautelan a pasen na kaolivaan. Tan agawa ya anengneng da a saray buñga na saray peteg a sañga so nanmaliw met la a mauges; on, say unaan tan say komadua tan ontan met ed say sampot; tan amin da so nanmaliw a mauges.

40 Tan say balang a buñga na saman so sankasampotan tinalo to so kabiañgan na kiew ya añgiter na maong a buñga, angan saman so sañga so linmenes tan inatey.

41 Tan agawa a say Katawan na kaolivaan so mannañgis, tan inkuan to ed igagangan: Anto ni so magmaong a gawaen ko ed kaolivaan?

42 Nia, kabat ko ya amin a buñga na kaolivaan, likud lambeñgat ed saraya, so nanmaliw la a mauges. Tan natan saraya so añgiter na maong a buñga nen saman so nanmaliw met la a mauges; tan natan amin a kakiewan ed kaolivaan ko angapo la so kakanaan da likud no saraya so batañgen tan ibantak ed apoy.

43 Tan nengneng mo saya so onor, ya saray sañga to so linmenes, so intanem ko ed maong a pasen na dalin; on, angan dia ed apili-pili ed siak nen saray arum a pasen na dalin ed kaolivaan ko.

44 Tan anengneng mo a binatang ko met so saman so nanderal ed saya a pasen na dalin, pian itanem ko so saya a kiew ed pasen to.

45 Tan anengneng mo a say sakey a kabiañgan to so añgiter na maong a buñga, tan say sakey a kabiañgan to añgiter na balang a buñga; tan makaseñgeg ag ko pinalaspas so saray sañga to nia tan imbantak ed apoy, nengneng mo, tinalo to so maong a sañga kanian linmenes tan inatey.

46 Tan natan, nia, manwari ed amin a panagasikaso a ginawa ta ed kaolivaan ko, saray kakiewan to nia so nanmaliw a mauges, kanian ag ira añgiter na maong a buñga; tan saraya so inilalok a pagnayon ko, pian nisinop ko so saray buñga ya ikana ed ag-nipanaon, ed siak a dili. Balet, nengneng mo, saraya so nanmaliw a siñga balang a kiew na oliva, tan angapo la so kakanaan da no ag saraya so batañgen tan ibantak ed apoy; tan maermen ak a saraya so nabalang ko.

47 Balet anto ni so magmaong a gawaen to ed kaolivaan ko? Impanmeneng ko kasi so limak, ya ag ko binayuboan? Andi, siak so nambayubo ed saya, tan kinutkotan ko so kaliber-liber to, tan pinaltuñgan ko, tan saya so inabunoan ko; tan nankimey ak ed dili a limak ed ñgalñgali sanagew, tan say angaan asinger la. Tan maermen ak no batañgen ko ya amin so kiew ed loob na kaolivaan ko, tan saraya so ibantak ko ed apoy pian napoolan. Siopa kasi so nangawa na kaugsan ed kaolivaan ko?

48 Tan agawa a say igagangan inkuan to ed katawan to: Ag kasi say inkalayug na kaolivaan yo—ag kasi saray sañga to nia tinalo to so saray lamut a maong? Tan makaseñgeg saray sañga tinalo to so saray lamut to, nengneng mo saraya so tinmubo a masiglat nen say biskeg na lamut, kanian saraya so binmiskeg ed inkasikara. Nia, ibagak, ag kasi saya so makaseñgeg kanian saray kiew ed kaolivaan yo so nanmaliw a mauges?

49 Tan agawa a say Katawan na kaolivaan inkuan to ed igagangan to: Onla ta tan batañgen ta so saray kiew na kaolivaan tan ibantak ta ed apoy, pian ag ira makadikadika ed dalin na kaolivaan ko, lapu ed amin la a polaing so ginawak. Anto ni so magmaong a gawaen ko ed kaolivaan ko?

50 Balet, nia, say igagangan inkuan to ed Katawan na kaolivaan: Sikatayo so mañgiter ni na andokdukey a panaon.

51 Tan say Katawan inkuan to: On, mañgiter ak ni na andokdukey a panaon, lapu ed maermen ak a nabalang ko so saray kiew na kaolivaan ko.

52 Dia ed ontan, ekalen ta so saray sañga na saraman so intanem ko ed sankautelan a kabiañgan na kaolivaan ko, tan saraya so iuteng ta ed saray kiew a nanlapuan da; tan palaspasen ta manlapu ed kiew so saraman so sañga a say buñga da so sankapaitan, tan iuteng ta so peteg a sañga na kiew ed pasen da.

53 Tan saya so gawaen ko pian say kiew so ag ompatey, tan, ag la piga, napagnayon ko ya onkana ed siak so saray lamut to nia unong ed gagalak a dili.

54 Tan, nengneng mo, saray lamut na peteg a sañga na kiew ya intanem ko iner man a kaliktan ko so mambibilay ni; dia ed ontan, pian saraya so pagnayon ko ya onkana ed gagalak a dili, pian mañgala ak ed saray sañga na saya a kiew, tan saraya so iuteng ko ed sikara. On, iuteng ko ed saraya so saray sañga na kiew ya ina da, pian pagnayon ko met so saray lamut ya onkana ed siak a dili, pian sano magenap la so biskeg da ag la piga mañgiter ira na maong a buñga ya onkana ed siak, tan nawalaan ak ni na gayaga ed buñga na kaolivaan ko.

55 Tan agawa ya añgala ra manlapu ed peteg a kiew a nanmaliw a balang, tan inoteng ed peteg a kiew, a saya nanmaliw met a balang.

56 Tan añgala met ira manlapu ed saray peteg a kiew a nanmaliw a balang, tan saraya so inuteng da ed ina a kiew.

57 Tan say Katawan na kaolivaan inkuan to ed igagangan: Ag mo papalaspasen so saray balang a sañga a manlapu ed saray kiew, likud ed saraman so sankapaitan; tan dia ed saraman iuteng mo so unong ed asalitak la ed sika.

58 Tan bayuboan ta lamet so saray kiew ed kaolivaan, tan putotan ta so saray sañga ra; tan palaspasen ta manlapu ed saray kiew saraman so sañga a tinmakken, a kaukolan la ya ompatey, tan ibantak ed apoy.

59 Tan saya so gawaen ko pian, ag la piga, saray lamut so, nawalaan na biskeg lapu ed kamaoñgan da; tan lapu ed inkasalatan na saray sañga, pian say maong taloen to so mauges.

60 Tan makaseñgeg ed impagnayon ko so saray peteg a sañga tan saray lamut da, tan insuldong ko so saray peteg a sañga lamet ed kiew ya ina, tan impagnayon ko so saray lamut na kiew ya ina, ta, ag la piga, saray kiew ed kaolivaan ko so mañgiter lamet na maong a buñga; pian nawalaan ak lamet na gayaga ed buñga na kaolivaan ko, tan, komon, siak so mangayaga na mapalalo lapu ed apagnayon ko so saray lamut tan saray sañga na inmuna a buñga—

61 Dia ed ontan, onla ka, tan tawag mo so saray igagangan, pian mankimey itayo a siseseet ed angaan na nayarian tayo dia ed kaolivaan, pian niparaan tayo so dalan, tan mañgipaway ak lamet na peteg a buñga, a saya so peteg a buñga so maong tan sankablian nen say amin a buñga.

62 Dia ed ontan, onla tayo tan mankimey tayo ed saya a sampot a panaon, tan nia say kasampotan manasinger la, tan saya la so sankaunoran a pamaltong ko ed kaolivaan ko.

63 Isuldong yo so saray sañga; gapoan yo ed sankasampotan pian saraya so unaan, pian say unaan so naunor, tan kutkotan yo so kaliber-liber na saray kiew, mandapag a matakken tan malangwer, say unaan tan say sankasampotan; tan say sankasampotan tan say unaan, pian amin nabayuboan lamet a maminsan ni dia ed sankaunoran la a panaon.

64 Dia ed ontan, kutkotan yo ed kaliber-liber da, tan paltuñgan yo ra, tan abunoan yo ra a maminsan ni, dia ed sankaunoran la a panaon, lapu ed say kasampotan manasinger la. Tan no bilang nagawa a saraya a sampot ya inuteng so ontubo, tan mañgiter na peteg a buñga, dia ed ontan mañgiparaan kayo na dalan ya onkana ed sikara, pian sikara so ontubo.

65 Tan no gagapoan da la so ontubo palinan yo so saray sañga a mañgiter na ampait a buñga, unong ed biskeg na saray maong tan kabaleg na saraya; tan ag yo papalinan a mamimpinsan so saray mauges, ag la piga a saray lamut so mabiskeg a tuloy nen say insuldong, tan say insuldong so ompatey, tan nabalang ko so saray kiew ed ubasan ko.

66 Tan maermen ak a nabalang ko so saray kiew ed kaolivaan ko; dia ed ontan linisan yo ya ibantak so saray mauges unong ed say itotubo na saray maong, pian saray lamut tan saray ñguro so mampara ed biskeg, anga ed saray maong taloen to so mauges, tan saray mauges so nabatang tan ibantak ed apoy, pian ag makadikadika ed dalin na kaolivaan ko; tan dia ed onia panisen ko ya ipaway so saray mauges ed kaolivaan ko.

67 Tan saray sañga na peteg a kiew isuldong ko lamet ed peteg a kiew;

68 Tan saray sañga na peteg a kiew isuldong ko ed saray peteg a sañga na kiew; tan dia ed onia sikara so awiten ko a manolop lamet, pian sikara so mañgiter na peteg a buñga, tan sikara so manmaliw a saksakey.

69 Tan saray mauges so ibantak, on, angan dia ed paway na amin a dalin na kaolivaan ko; tan nia, dia ed saya lambeñgat so pamaltong ko ed kaolivaan ko.

70 Tan agawa a say Katawan na kaolivaan imbaki to so igagangan; tan say igagangan linma tan ginawa to so unong ed gangan na Katawan ed sikato, tan intaruk to so saray arum ya igagangan; tan sikara so pigpigara.

71 Tan say Katawan na kaolivaan inkuan to ed sikara: Onla kayo tan mankimey kayo ed kaolivaan, ed angaan na nayarian yo. Tan nia, saya la so sankaunoran a pambayubok ed kaolivaan ko; lapu ed say kasampotan asinger la, tan say panaon masiglat ya onsabi; tan sano mankimey kayo ed angaan na nayarian yo a kaiba yo ak nawalaan kayo na gayaga ed buñga ya isinop ko ed siak a dili ya ikana ed panaon a saya so onsabi.

72 Tan agawa a saray igagangan so linma tan sikara so nankimey ed angaan na nayarian da; tan say Katawan na kaolivaan so akikimey met ed sikara; tan sinumpal da so saray gangan na Katawan na kaolivaan ed amin a beñgatla.

73 Tan ginmapo ya ontubo so saray peteg a buñga lamet ed kaolivaan; tan saray peteg a sañga so ginmapo ya ontubo tan manlamut a mapalalo; tan saray balang a sañga ginapoan da a palaspasen tan saraya so imbantak da; tan inasikaso ra a mansimbañgan so saray lamut tan saray ñguro, unong ed biskeg da na saraya.

74 Tan dia ed onia sikara so nankimey, a katekep na amin a seet, unong ed saray gangan na Katawan na kaolivaan, anga ed saray mauges so nibantak ed paway na kaolivaan, tan say Katawan impagnayon to ed inkasikato a dili so saray kiew ya añgiter lamet na peteg a buñga; tan nanmaliw ira a siñga saksakey a laman; tan saray buñga so nampapara; tan say Katawan na kaolivaan impagnayon to ed inkasikato a dili so peteg a buñga, a saya so sankablian ed sikato nanlapu la ed gapo.

75 Tan agawa a sanen say Katawan na kaolivaan anengneng to a saray buñga so maong, tan say kaolivaan to so aliwa la a mauges, tinawag to so saray igagangan to, tan inkuan to ed sikara: Nengneng yo, dia ed saya a sankaunoran a panaon binayuboan tayo so kaolivaan ko; tan anengneng yo a ginawak so unong ed linawak; tan impagnayon ko so saray peteg a buñga, pian saya so maong, a siñga unong ed gapo. Tan mapalar kayo; lapu ed maseet kayo ya akikimey ed siak ed kaolivaan ko, tan sinumpal yo so saray gangan ko, tan añgiter kayo lamet na onkana ed siak a peteg a buñga, kanian say kaolivaan ko so aliwa la a mauges, tan saray mauges so nibantak, nia nawalaan kayo na gayaga a kaiba ak makaseñgeg ed saray buñga na kaolivaan ko.

76 Tan nengneng yo, dia ed andukey a panaon isinop ko so buñga na kaolivaan ko onkana ed siak a dili ed ag-nipanaon, a saya so masiglat ya onsabi; tan dia ed saya a sankaunoran a panaon binayuboan ko so kaolivaan ko, tan pinaltuñgan ko, tan kinutkotan ko so kaliber-liber to, tan inabunoan ko; dia ed ontan isinop ko ed siak a dili so saray buñga, dia ed andukey a panaon, unong ed sinalitak.

77 Tan sano onsabi so panaon a saray mauges a buñga so onsabi lamet ed kaolivaan ko, dia ed ontan panolopen ko so saray maong tan saray mauges; tan saray maong so pagnayonen ko ed inkasiak, tan saray mauges so ibantak ko ed pasen da a dili. Tan dia ed ontan onsabi so panaon tan say kasampotan; tan say kaolivaan ko so papoolan ko ed apoy.