1 Balet nia, siak, Jacob, mansalita ak ed sikayo a walaan na malinis a puso. Onnengneng kayo ed Dios ed ag nagiing a nunot, tan mampikasi kayo ed sikato ed mapalalo a pananisia, tan sikayo so ligliwaen to ed saray kasegsegañgan yo, tan ipikasi to a nagamoran yo so saray gegetmaen yo, tan ipaakseb to ya ondapo so kaptekan ed saraman so anapen da so kaderal yo.

2 O amin yo ya awalaan na malinis a puso, itañgay yo so ulo yo tan awat yo so makaruyo a salita na Dios, tan mampenek kayo ed aro to, lapu ed nayarian yo, no saray kanunotan yo so ag-nagiing, ed ando la ya ando.

3 Balet, abagey, abagey, sikayo ya aliwa a malinis ed puso, no sikayo so marutak ed saya ya agew ed arap na Dios; tan likud no sikayo so mambabawi say dalin so naayew niseñgeg ed sikayo; tan saray Lamanite ya aliwa a marutak a siñga sikayo, angaman ontan a sikara so naayew na ansakit ya ayew, sikara so mandusa ed sikayo anga ed kaderal yo.

4 Tan say panaon masiglat ya onsabi, likud no sikayo so mambabawi sikara so mankayarian ed dalin a tawir yo, tan say Katawan a Dios isian to ya iarawi so saray matunong ed limog yo.

5 Nengneng yo, saray Lamanite a kaagian yo, a sikara so binusol yo lapu ed saray karotakan da tan say ayew ya agawa ed saray baog da, lalo a sikara so matunong nen say sikayo; lapu ed ag da alingwanan so gangan na Katawan a saya so niiter ed kaamaan tayo—a wala lambeñgat ed sikara so sakey ya asawa, tan say kamalala angapo ed sikara, tan angapo so nagagawa ya inkabalangkantis ed limog da.

6 Tan natan, saya a gangan so sinumpal da; dia ed ontan, lapu ed asikaso ed pananumpal ed saya a gangan, say Katawan a Dios ag to ra deralen, balet mapañgasi ed sikara; tan dia ed sakey ya agew, manmaliw ira a binendicionan a totoo.

7 Nengneng yo, saray lalaki ya asawa inaro ra so saray asawa ra a bibii, tan saray asawa da a bibii inaro ra so saray asawa ra a lalaki; tan saray asawa a lalaki tan saray asawa a bibii inaro ra so saray anak da; tan say ag da pananisia tan say kabusol da ed sikayo so niseñgeg ed inkauges na kaamaan da; dia ed ontan, kaonoñgan so kaabigan yo nen say sikara, ed pakanengneng na makapanyari a Manamalsa yo?

8 O kaagian ko, mapaga ak a likud no mambabawi kayo ed saray kasalanan yo say baog da so omputi nen say sikayo, sano sikayo tan sikara so ipatnag ed arapan na trono na Dios.

9 Dia ed ontan, sakey a gangan so iter ko ed sikayo, a saya so salita na Dios, ya ag yo la ra busolen ed angan kapigan lapu ed deket na saray baog da; ni say sikara so busolen yo a sumpaen lapu ed inkamarutak da, balet nepeg yo a nunoten so dili ya inkamarutak yo, tan nunoten yo say inkarutak da so sinmabi lapu ed kaamaan da.

10 Dia ed ontan, nunoten yo so saray anak yo, no panon yo ya apaermen so saray puso ra lapu ed saray pañgaligan ya impamuria yo ed arap da; tan ontan met, nunoten yo a nayari, a lapu ed karutakan yo, naawit yo so saray anak yo ed kadederal, tan saray kasalanan da so nibunton ed ulo yo dia ed kaunoran na agew.

11 O kaagian ko, talineng kayo ed saray salitak; Liing yo so biskeg na pakayari ed saray kamarerua yo; igalaw yo so inkasikayo pian nabañgon kayo ed lirep na ipapatey; tan ikban kayo ed sakit na infierno pian ag kayo manmaliw ya angeles na demonyo, a nibantak ed saman a dayat na apoy tan azufre a saya so komadua a patey.

12 Tan natan siak, Jacob, nansalita ak ni na dakel a beñgatla ed saray totoo nen Nephi, a papasakbayan ko ra sumpa ed pikakaloguran tan dia ed alak na laman, tan amin a nengneng na kasalanan, ya ibabagak ed sikara so makapataktakot a pansumpalan da.

13 Tan sakey a kakalasus na saray agawgawa ed saya a totoo, a natan ginmapo la ya ondakel, so ag la nayari ya isulat ed saraya a piligo; balet dakel ed saray agawgawa so nisulat ed saman so babaleg a piligo, tan saray bakal da, tan saray baliñgaan da, tan say oley na saray arari da.

14 Saraya a piligo so atawag na piligo nen Jacob, tan saraya so agawa ed panamegley na lima nen Nephi. Tan sampotan ko la so mambalikas ed saraya a salita.