1 Natan nengneng yo, agawa a siak, Jacob, kanian, dakel so impampulong ko ed saray totook ed salita, (kanian daiset labat so nayarian ko ya isulat a salita, makaseñgeg ed kairapan na pañgitatak na saray salita mi ed saray piligo) tan kabat mi a saraya a beñgatla a nisulat ed saray piligo so nakaukolan a natilak;

2 Balet saray antokaman a beñgatla ya isulat mi ed antokaman a beñgatla likud ed saray wala ed piligo so naandi tan nabalang; balet nayarian mi so mañgisulat na pigara ed saray piligo, a saya so mañgiter ed saray anak mi tan ontan met ed saray inararo mi a kaagian, na melag a pikakabat nipaakar ed sikami, odino nipaakar ed kaamaan da—

3 Natan dia ed saya a beñgatla sikami so mangayaga; tan sikami so nankimey a siseseet ya añgitatak ed saraya a salita ed saray piligo, ed ilalo a saray inararo a kaagian mi tan saray anak mi naawat da so saraya ed misasalamat a puso, tan nengneñgen da so saraya pian napanaralan da so saya a sigagayaga tan aliwa a dia ed ermen, ni say ag-pañgitaltalek, ed saray inmuna ya atateng da.

4 Balet, makaseñgeg ed saya a gagala insulat mi so saraya a beñgatla, pian nakabatan da ya akabat mi si Cristo, tan awalaan kami na ilalo ed gloria to ed pigara a lasus a taon sakbay na isabi to; tan aliwa a sikami labat so awalaan na ilalo ed gloria to, no ag amin a masanto a profeta ed kasakbayan mi.

5 Nengneng yo, sikara so anisia ed si Cristo tan ingalang da so Ama ed ñgaran to, tan igagalang mi so Ama ed ñgaran to. Tan makaseñgeg ed saya a gagala susumpalen mi so saray gangan nen Moises, lapu ed saya so mañgitoturo na kamarerua mi ed sikato; tan makaseñgeg ed saya a pamaakaran sikato so apasanto ed sikami ya onkana ed inkamatunong, angan saya met so kinaukolan ed si Abraham ed kalawakan ya itulok to ed saray gangan na Dios ed panamegley na pañgibagat to ed laki ya anak to a si Isaac, a saya so kanengneñgan na Dios tan say Bugbugtong ya Anak to.

6 Dia ed ontan, anapen mi so saray profeta, tan awalaan kami na dakel a puyan tan espiritu na profesiya; tan lapu ed wala ed sikami so amin da a pantasi agamoran mi so ilalo, tan say pananisia mi so nanmaliw ya ag-nagiing, a lapu ed saya nayarian mi so mangangan ed ñgaran nen Jesus tan angan saray kakiewan ononor ed sikami, odino saray kapalandeyan, odino saray daluyon na dayat.

7 Angaman ontan, say Katawan a Dios impanengneng to ed sikami so saray kakapuyan mi pian nakabatan mi a dia ed panamegley na gracia to, tan dia ed saray andi-angaan a panagkawalo to ed saray anak na totoo, kanian awalaan kami na pakayari a mangawa ed saraya a beñgatla.

8 Nengneng yo, makana tan makapakelaw so saray kimey na Katawan. Agay la ya ag narumog so kaaraleman na saray misterio to; tan ag nayarian na too a dumogen so amin a kagagawa to. Tan angapo so siopaman a too so makapikabat ed saray kagagawa to likud no saya so nipuyan ed sikato; dia ed ontan, kaagian, ag yo leglemewen so saray puyan na Dios.

9 Tan nengneng yo, lapu ed pakapanyari na salita to say too so apalsa ed tapew na saya a dalin, a saya a dalin so apalsa ed pakapanyari na salita to. Dia ed ontan, sano say Dios so ayarian to so nansalita tan apalsa to so mundo nen saman, tan lapu ed impansalita to apalsa so too, O sirin, akin ya ag to nayarian a ganganen so dalin, odino saray kimey na lima to a wala ed tapew to nia, unong ed linawa tan kaliktan to?

10 Dia ed ontan, kaagian, ag yo aanapen a sikayo so mamilin ed Katawan balet sikayo so mañgawat na bilin a manlapu ed lima to. Tan nia, kabat yo ed inkasikayo a dili a sikato so mambibilin ed kakabatan, tan dia ed kaptekan, tan ed baleg a panañgasi, ed tapew na amin a kimey to.

11 Dia ed ontan, inararok a kaagian, mipulañgan kayo ed sikato ed panamegley na bagat nen Cristo a pamaandi na kasalanan, say Bugbugtong ya Anak to, tan nayari a nagamoran yo so kioli ed bilay, unong ed pakapanyari na kioli ed bilay a wala ed si Cristo, tan sikayo so niparungtal ya unaan a buñga nen Cristo ed Dios, ya awalaan na pananisia, tan akagamor na maong ya ilalo ed gloria, sakbay na pañgipanengneng to ed inkasikato ed laman.

12 Tan natan, inararok, ag kayo mankelaw no ibagak ed sikayo so saraya a beñgatla; akin ag ak mansalita nipaakar ed bagat nen Cristo a pamaandi na kasalanan, tan nagamoran so nagnap a pikakabat ed sikato, pian nagamoran so kakabatan ed sakey a kioli ed bilay tan say mundo ya onsabi?

13 Nia, kaagian ko, siopaman a mamprofesiya, paulyan yo a mamprofesiya onkana ed pantalus na saray totoo; lapu ed say Espiritu mansalita na katuaan tan ag mantila. Dia ed ontan, saya so mansalita nipaakar ed saray beñgatla unong ed peteg a kipapasen da natan, tan saray beñgatla unong ed peteg a kipapasen da ed arapen; dia ed ontan, saraya a beñgatla so nipatnag a malinlinew ed sikatayo, onkana ed kilalaban na saray kamarerua tayo. Balet nengneng yo, aliwa a sikatayo labat so tasi ed saraya a beñgatla; tan say Dios sinalita to met ed saray profeta ed kadaanan a panaon.

14 Balet nengneng yo, saray Judio matalker so teñger da a totoo; tan linenlemew da so saray salita a malinew, tan pinatey da so saray profeta, tan inanap da so saray beñgatla ya ag da natalusan. Dia ed ontan, lapu ed inkabulag da, a saya ya inkabulag sinmabi lapu ed innengneng da ed labas na tanda, sikara so nakaukolan a napelag; lapu ed say Dios inekal to so inkalinew to ed sikara, tan initer to ed sikara so dakerakel a beñgatla ya ag da natalusan, lapu ed saya so pilalek da. Tan lapu ed saya so pampilalek da say Dios ginawa to, pian sikara so naigapol.

15 Tan natan siak, Jacob, intunton ak na Espiritu ed pamprofesiyak; tan aliknak lapu ed saray kimey na Espiritu a wala ed siak, tan dia ed kigapol na saray Judio ag da awaten so bato a dampay a dia ed tapew to nia saya so pamaalageyan da tan nawalaan ira na maligen a leletnegan.

16 Balet nengneng yo, unong ed saray masanto a kasulatan, saya a bato a dampay so manmaliw a makabaliksan, tan sikato so kaunoran, tan saman labat so peteg a leletnegan, a dia ed tapew to nia so pañgipatalindegan na saray Judio.

17 Tan natan, inararok, panon a nagawa so saraya, kayari impañgipulisay da ed petepeteg a leletnegan, nayarian da kasi so mañgipatalindeg ed tapew to ed kapiganman, pian sikato so manmaliw ya ulo na saray suyok da?

18 Nia, inararok a kaagian, lukasan ko so saya a misterio ed sikayo; no ag ko gawaen, dia ed antokaman a pamaakaran, nayegyeg kayo manlapu ed elet ed Espiritu, tan sikayo so nigapol lapu ed mapalalo a kapagaan ko makaseñgeg ed sikayo.