1 Saray salita ya imbesñgaw nen Jacob, say laki ya agi nen Nephi, ed saray totoo nen Nephi, kayari impatey nen Nephi:

2 Natan, inararok a kaagian, siak, Jacob, unong ed saray susumpalen ya eebatan ko ed Dios, pian naseetan ko so kimey ko a sikakalakal, tan pian ekalen ko ed saray kawes ko so kasalanan yo, onla ak ed templo ed saya ya agew pian nibawag ko ed sikayo so salita na Dios.

3 Tan dia ed sikayo a dili nakabatan a nanseet ak ed akatawagan ko a kimey; balet siak dia ed saya ya agew abelatan ak ed saray dakerakel ni a pilalek tan kapagaan onkana ed pankaabigan na saray kamarerua yo a lalo ni nen saray apalabas la.

4 Tan nengneng yo, natan, sikayo ni so matolok ed salita na Katawan, a saraya so initer ko ed sikayo.

5 Balet nia, deñgel kayo ed siak, tan kabaten yo a lapu ed tulong na Makapanyari ed amin a Manamalsa na tawen tan dalin nibagak ed sikayo so saray wala ed kanunotan yo, no panon a sikayo so ongagapo a mankimey ed kasalanan, a saman a kasalanan dia ed pakanengneng ko mapalalo a marumsis, on, tan marumsis ed Dios.

6 On, apaermen so kamareruak tan saya so makaseñgeg a minmelag ak ed kababaiñgan ed arapan na Amalsa ed siak, kanian kaukolan a paneknekan ko ed sikayo so nipaakar ed karelmeñgan na saray puso yo.

7 Tan ontan met apaermen ak lapu ed impanagamil ko na sebeg ed pananalita ed sikayo, dia ed imaton na saray kaasawaan yo tan saray anak yo, a dakel ed sikara say liknaan da so mapalalo ya anlemek tan malinis tan mayumis ed arapan na Dios, a saya a beñgatla so makaruyo ed Dios;

8 Tan impasen ko a sikara so dinmago dia ya ondeñgel ed makaruyo a salita na Dios, on, say salita so makatambal ed asugat a kamarerua.

9 Dia ed ontan, abelatan so kamareruak kanian apasuot ak lapu ed malet a gangan a saya so inawat ko ed Dios, pian sikayo so bilinen ko makaseñgeg ed saray mauges a kagagawa yo, a labay yo a pabalegen ni so sugat na saray asugatan la, imbes a ligliwaen tan tambalen yo so saray sugat da; tan saraman so ag asugatan, imbes a manliket kayo ed makaruyo a salita na Dios intoruk yo so utok na patarem ed saray kamarerua ra pian sugatan yo so saray mayumis a kanunotan da.

10 Balet, angaman ontan la so kinabaleg na saya a kimey, saya so sumpalen ko unong ed malet a gangan na Dios, tan ibagak ed sikayo so nipaakar ed saray karelmeñgan yo tan karumsisan yo, ed arapan na saray dalisay ed puso, tan say maermen a puso, tan dia ed leksab na limgis na makatoruk a mata na Makapanyari a Dios.

11 Dia ed ontan, nakaukolan ya ibagak ed sikayo so katuaan unong ed inkalinew na salita na Dios. Tan nengneng yo, legan ya ontetepet ak ed Katawan, onia so sinmabi a salita ed siak, a nankuan: Jacob, onla ka ed templo ed kaimbuasan, tan ibawag mo so salita ya iter ko ed sika ya onkana ed saraya a totoo.

12 Tan natan nia, kaagian ko, saya so salita ya ibawag ko ed sikayo, a dakel ed sikayo so ginmapo a mansukait na balitok, tan pilak, tan amin a nengneng na ankabli a bato, dia ed saya a dalin, a saya so dalin a sipan ed sikayo tan saray boleg yo, a saraya so amayamay tan daakan.

13 Tan say lima na managtalima sikayo so inimisan to na makaruyo, kanian sikayo so akagamor na dakel a kayamanan; tan lapu ed say arum ed sikayo so akagamor na dakerakel nen saray kaagian yo sikayo so nipaatagey ed kinon na saray puso yo, tan sikayo so añgipanengneng na teñger a matalker tan atagey ya ulo yo lapu ed kablian na saray sulong yo, tan pinasegsegang yo so saray kaagian yo lapu ed ipapasen yo a magmaong kayo nen say sikara.

14 Tan natan, kaagian ko, ipasen yo kasi a say Dios so paandien to so kasalanan yo ed saya a beñgatla? Nia, ikuan ko ed sikayo, Andi. Balet ayewen to kayo, tan no sikayo so mansiansia ed saraya a beñgatla say panañgokom to nakaukolan a masiglat ya onsabi ed sikayo.

15 O no nayari ya ipanengneng to ed sikayo a nayarian to kayo a natabek, tan dia ed sakey a limgis na mata to so nayarian to kayo a temeken anga ed siñga sapok!

16 O no nayari ekalen to ed sikayo so saya a karelmeñgan tan karumsisan. Tan, O sikayo so ontalineng ed salita na saray gangan to, tan ag yo abuloyan a saya a kinon na saray puso yo so manderal ed saray kamarerua yo!

17 Nunot yo so saray kaagian yo a siñga unong ed inkasikayo, tan maasinger kayo ed sikara ya amin tan mabunlok kayo ed saray tagano yo, pian sikara met so onyaman a siñga sikayo.

18 Balet sakbay ya anapen yo so kayamanan, anap yo ni so panarian na Dios.

19 Tan kayari a sikayo so akagamor na ilalo ed Cristo sikayo so makagamor na kayamanan, no saraya so anapen yo; tan anapen yo ed gagala a mangawa na maong—say pañgawes ed saray alakseban, tan pamakan ed saray narasan, tan pañgibulos ed saray adakep, tan pañgiter na tulong ed saray mansasakit tan saray asakitan.

20 Tan natan, kaagian ko, nansalita ak ed sikayo nipaakar ed kinon; tan sikayo ya amasakit ed saray kaabay yo, tan sikayo so amasegsegang ed sikato lapu ed saray mapasirayew a puso yo, dia ed saray beñgatla ya initer na Dios ed sikayo, anto so nibaga yo ed saya?

21 Ag yo kasi ipasen a saraya a beñgatla so karumsisan ed sikato ya amalsa ed amin a laman? Tan say sakey a pinalsa so pinabpabli ed pakanengneng to a siñga saray arum. Tan amin a laman so nanlapu ed sapok; tan dia ed saya lamlamang a pamaakaran pinalsa to ra, pian sumpalen da so saray gangan to tan sikato so paglorian da ya ando la ya ando.

22 Tan natan, sampotan ko la so pansalitak ed sikayo nipaakar ed saya a kinon. Tan no ag nakaukolan a mansalita ak ed sikayo nipaakar ed saray ambebelat a kasalanan, say pusok lalo a mangayaga lapu ed sikayo.

23 Balet say salita na Dios bebelatan to ak lapu ed saray ambelbelat a kasalanan yo. Tan nengneng yo, onia so inkuan na Katawan: Saraya a totoo ginapoan da la so onkigtel ed karelmeñgan; ag da natatalusan so saray masanto a kasulatan, lapu ed pampipilalekan da ya ibaraan ed inkasikara so pangagawa da na inkabalangkantis, lapu ed saray beñgatla a nisulat nipaakar ed si David, tan si Solomon ya anak to.

24 Nengneng yo, si David tan si Solomon peteg ya awalaan ira na dakel ya asawa tan kamalala, a saya a beñgatla so karumsisan ed arapan ko, kuan na Katawan.

25 Dia ed ontan, onia so inkuan na Katawan, indawat ko so saraya a totoo a pinmaway ed dalin na Jerusalem, ed pakapanyari na dili a taklay ko, pian mañgitalindeg ak na matunong a sañga ya onkana ed siak a manlapu ed buñga na banel nen Jose.

26 Dia ed ontan, siak a Katawan a Dios ag ko nitepel a saya a totoo so gawaen da so siñga saray kadaanan.

27 Dia ed ontan, kaagian ko, deñgel yo ak, tan talineng yo so salita na Katawan: Lapu ed angapo so sakey a too ed limog yo so nawalaan likud labat ed sakey ya asawa; tan angapo so saray kamalala to;

28 Lapu ed siak, say Katawan a Dios, manliket ed kalinisan na saray bibii. Tan saray inkabalangkantis so karumsisan ed siak; onia so kuan na Katawan na saray Ejercito.

29 Dia ed ontan, saya a totoo sumpalen da so saray gangan ko, kuan na Katawan na saray Ejercito, odino naayew so dalin lapu ed sikara.

30 Tan sano gawaen ko, kuan na Katawan na saray Ejercito, ya ipatalindeg so sakey a boleg ya onkana ed siak, igangan ko so saray totook; odino andi, sikara so ondeñgel ed saraya a beñgatla.

31 Tan nengneng yo, siak, a Katawan, anengneng ko so ermen, tan nadñgel ko so dageyem na saray bibii ya anak na totook ed dalin na Jerusalem, on, tan ed amin a dalin na saray totook, niseñgeg ed karelmeñgan tan karumsisan na saray asawa ra a lalaki.

32 Tan ag ko nitepel, kuan na Katawan na saray Ejercito, a say nañgis na saray malimgas a bibii ya anak na saya a totoo, a sikara so indawat ko ya impaway ed dalin na Jerusalem so onsabi ed siak sumpa ed saray lalaki a totook, kuan na Katawan na saray Ejercito.

33 Lapu ed ag da nayari ya iwanwan ya iarawi ed pasen na adakep so saray bibii ya anak na totook lapu ed inkaoyamo da, likud no dalawen ko ra na ansakit ya ayew, ya angan dia ed kadederal; ya ag ira mangawa na inkabalangkantis, a siñga gawa na saray kadaanan, kuan na Katawan na saray Ejercito.

34 Tan natan nia, kaagian ko, kabat yo a saraya a gangan so niiter nen saman ed ama tayo a si Lehi; dia ed ontan, akabatan yo la so saraya nen saman; tan wala ed sikayo so baleg a kaokom; lapu ed ginawa yo so saray beñgatla ya ag manepeg a gawaen yo.

35 Nengneng yo, nangawa kayo na babaleg a kaugsan nen saray Lamanite, a kaagian tayo. Pinasakitan yo so puso na saray maolimek a kaasawaan yo, tan abalang yo so talek na saray anak yo, makaseñgeg ed saray mauges a pañgaligan ed sikayo ed arap da; tan say pansibek na saray puso ra so nampaatagey ed Dios sumpa ed sikayo. Tan lapu ed kapegetan na salita na Dios, ya ondapo sumpa ed sikayo, dakel so saray puso ya inatey, ya atanek na aralem a sugat.