1 Ac tukun ma inge ke yac ahklamngaul ac ahkosr oasr mwet lain pucspucs ke alu uh, ac oacyacpac oasr sie fohs inmahsrlon mwet uh, yohkna oruh yohk ahkmas.

2 Ac mwet ma lain inge elos acnwucki ac lihsyucklac liki acn uh, ac elos tuh som nuh yurun tohkohsrah luhn mwet Laman.

3 Ac tukun ma inge elos tuh srihke in mokleack mwet Laman in mweun lain mwet Nephi; tuhsruhk liye, mwet Laman ah elos arulacna sahngweng, yohkna oruh elos tiacna lohng kahs luhn mwet lain ingacn.

4 Tuhsruhk tukun ma inge ke yac ahklamngaul ac ohnkohsr ke kolyuck luhn mwet nuhnuhnkuh, oasr mwet lain suc som liki mwet Nephi nuh yurun mwet Laman; ac elos wi mwet sahyac ingacn kuhtanglah in puhrakuhlosyak in kasrkuhsrak lain mwet Nephi; ac elos nuhkwewa ahkolah in mweun ke yac sac.

5 Ac ke yac ahklamngaul ac itkohsr elos tuhkuh in lain mwet Nephi in mweun, ac elos muhtwacwacack oruh orekma luhn misac; ahok, yohkna oruh ke yac ahklamngaul ac alkosr ke kolyuck luhn mwet nuhnuhnkuh elos kuhtanglah in sruokyac acn lal Zarahemla; ahok, ac oacyacpac acn nuhkwewa, finne ke acn ma oan sisken acn Puhs.

6 Ac mwet Nephi ac un mwet mweun lal Moronihah elos ukohkyak nuh fin acn Puhs;

7 Ac elos tuh ahkkweyeyucklac we in lain mwet Laman, liki meoa rohtoh, finne nuh kuhtuhlacp; ac fuhfahsryucsr lusen lwen se nuh sin sie mwet Nephi, ke tahk soko ma elos ahkkweyelah ac fihliyac un mwet mweun lalos in karuhnguhnwacng acn selos ke lacyacn nuh acir.

8 Ac ohinge mwet lain ingacn luhn mwet Nephi, ke kahsruh luhn un mwet mweun pucspucs luhn mwet Laman, elos eislah kwewa ma luhn mwet Nephi ma oan fin acn oan lacyacn nuh epang. Ac ma inge nuhkwewa oreklac ke yac ahklamngaul ac alkosr ac yuc ke kolyuck luhn mwet nuhnuhnkuh.

9 Ac tukun ma inge ke yac ahkonngoul ke kolyuck luhn mwet nuhnuhnkuh, Moronihah el wi un mwet mweun lal ah kuhtanglah in sruokyac ipin acn pucspucs fin acn uh; ahok, elos sifilpac eislah siti pucspucs ma tuh puhtatyang nuh in poun mwet Laman.

10 Ac tukun ma inge ke yac ahkonngoul ac sie ke kolyuck luhn mwet nuhnuhnkuh elos kuhtanglah sifilpac eislah tahfuh ke ma lalos nuhkwewa.

11 Na kuf na yohk se inge luhn mwet Nephi, ac ahkmas yohk ma orek inmahsrlolos, luhkuhn tiac sikyak fin tiac ke ma koluk lalos ac ma sruhngwacyuck lalos ma oasr inmahsrlolos; ahok, ac ma inge oacyacpac oasr inmahsrlolos suc fahk lah elos wi alu luhn God.

12 Ac ma ke srihpen fuhlwact luhn insiaclos, ke srihpen kahsruhp yohk lalos, ahok, ma ke srihpen ahkkohs lalos nuh sin mwet suhkahsruhp, sruokyac na mongo nwaclos liki mwet masrinsrwacl, sruokyacna nuknuk lalos liki mwet kohflohfohl, ac puok mwet insepuhsisacl wiyaclos ke lihkihn tuhpahlos, isruhn ma suc muhtahl, lahfwekihn nguhn in pahluh ac fwackyuck, ahkmas, suhlallacl, kikiacp, pihsrapasr, orek kosro, tuyak ke fohs luhlahp, kahinglac nuh fin acn lal Nephi, inmahsrlon mwet Laman—

13 Ac ke srihpen ma koluk yohk lalos, ac fihlacng lalos ke kuh lalos sifacna, elos sisyucklac in muhngnguh kuh lalos sifacna; ke ma inge elos tiacna kapkapwack, tuhsruhk elos ahkkweokyeyuck ac srihngihlyuck, ac ukohkyak ye liki mwet Laman, ne ke na elos tilac sruok inkaiyacn acn lalos ah.

14 Tuhsruhk liye, Moronihah el tuh luti ma pucspucs nuh sin mwet uh ke srihpen ma koluk lalos, ac oacyacpac Nephi ac Lehi, suc pa wen nahtuhl Helaman, elos tuh luti ma pucspucs nuh sin mwet uh, ahok, ac palye ma pucspucs nuh selos ke ma koluk lalos, ac ma ac fah tuhkuh nuh yohrohlos elos fin tiac auliyak ke ma koluk lalos.

15 Ac tukun ma inge elos tuh auliyak, ac yohkna ke elos tuh auliyak elos tuh muhtwacwacack in kapkapwack.

16 Tuh ke Moronihah el liye tuh elos auliyak el srihke in kohlohlos in ahkwot liki acn nuh ke acn, ac liki siti nuh ke siti, ne ke na elos sifilpac eislah sie tahfuh ke ma lalos ac sie tahfuh ke acn nuhkwewa selos.

17 Ac ohinge sahflah yac ahkonngoul ac sie ke kolyuck luhn mwet nuhnuhnkuh.

18 Ac tukun ma inge ke yac ahkonngoul ac luo ke kolyuck luhn mwet nuhnuhnkuh, Moronihah el tiacna kuh in sifilpac eislah ma luhn mwet Laman.

19 Ke ma inge elos tuh tohllah plwacn lalos in eislah acn luhlah lalos, tuh arulacna puhkantwen mwet Laman oruh upaclah na pwacye nuh sin mwet Nephi in eislah kuh yohk faclos; ke ma inge Moronihah el oruh tuh un mwet mweun lal nuhkwewa in karuhnguhnwacng acn ma el tuh eislah ah.

20 Ac tukun ma inge, ke srihpen puhsiyacn pihsacn mwet Laman, mwet Nephi elos arulacna sahngweng, tuh elos kuh na in kuhtangyucklac, ac lolongyucki, ac acnwucki, ac kuhnausyucklac.

21 Ahok, elos muhtwacwacack in esam kahs in pahluh lal Alma, ac oacyacpac kahs lal Mosiah; ac elos liye lah elos sie un mwet lihkkeke, ac lah elos likiyac nuh sahyac masap luhn God.

22 Ac lah elos ekuhllah ac longyac ye niyaclos masap lal Mosiah, kuh ma suc Leum El sapkihn nuh sel in sang nuh sin mwet uh; ac elos liye lah masap lalos koluklac, ac lah elos eklac sie un mwet koluk, yohkna oruh elos koluk finne oacna mwet Laman.

23 Ac ke srihpen ma koluk lalos alu uh muhtwacwacack in muhnahslah; ac elos muhtwacwacack in suhlahlahlfongi nguhn in pahluh ac nguhn in fwackyuck; ac nuhnuhnkuh luhn God siiyac muhtahlos.

24 Ac elos liye lah elos muhnahslah, oacna mwet wiyaclos, mwet Laman, ac lah Nguhn luhn Leum tiac sifil karuhnguhnuhlos; ahok, ma inge som luhkwelos ke srihpen Nguhn luhn Leum tiacna muhta ke tempuhl semuhtahl—

25 Ke ma inge Leum El tui in karuhnguhnuhlos ke kuh usrnguck ac wacngihn kuh oacna, tuh elos puhtatyang nuh ke sie ohiyac in suhlahlahlfongi ac koluk na upac; ac elos liye lah mwet Laman elos arulacna puhseni luhkwelos, ac elos fin tiac fungyang nuh sin Leum God lalos elos enenuh in misac.

26 Tuh liye, elos liye lah kuhiyacn mwet Laman ah yohk oacna kuhiyaclos, finne mwet nuh ke mwet. Ac ohinge elos puhtatyang nuh ke tahfonglac yohk se inge; ahok, ohinge elos muhnahslah, ke srihpen tahfonglac lalos, ke lusen yac puh.