Ma Suhmuhslah
Helaman 3


Sapta 3

Mwet Nephi pucspucs elos som nuh ke acn ma oan nuh acir—Elos muhsah lohm simacn ac liyacacng ma sihmlac pucspucs—Singucul kuhtuh tausin mwet eklac wolac ac pacptaislac—Kahs luhn God kol mwet uh nuh ke molwelah—Nephi suc wen nahtuhl Helaman el fuhnohslah siyah in nuhnuhnkuh. Sahp ke yac 49–39 Met Liki Kraist.

1 Ac na tukun ma inge ke yac ahkangngaul ac tolu ke kolyuck luhn mwet nuhnuhnkuh, wacngihn fohs inmahsrlon mwet lal Nephi sahyacn na oasr kuhtuhsrihsrihk inse fuhlwact ma oasr ke alu uh, ma tuh oraclah kuhtuhsrihsrihk fohs inmahsrlon mwet uh, ac ma inge ahksahfyeyucklac ke sahflahiyacn yac ahkangngaul ac tolu.

2 Ac wacngihn fohs inmahsrlon mwet uh ke yac ahkangngaul ac ahkosr; wacngihn pac fohs yohk ke yac ahkangngaul ac limekohsr.

3 Ac tukun ma inge ke yac ahkangngaul ac ohnkohsr, ahok, oasr fohs yohk ac akuhkuhin pucspucs; pwacnwacng arulacna puhs mwet suc som liki acn Zarahemla, ac som nuh ke acn ma oan nuh acir in usrui acn we.

4 Ac elos tuh fuhfahsryucsr arulacna loesuhllah, yohkna oruh elos tuhkuh nuh inkof luhlahp ac infacl pucspucs.

5 Ahok, ac elos maelihk nuh ke ipin acn nuhkwewa we, nuh ke oacna sie acn ma tiacna mahmahuh ac ma wacngihn sahk we, ke srihpen mwet pucspucs suc muhta we suc tuh usrui acn we met.

6 Ac inge wacngihn kuhtwena ipin acn we mahmahuh, sahyacn na sahk; tuhsruhk ke srihpen arulacna upac kuhnausyucklac luhn mwet suc tuh usrui met acn uh oruh pahngpahng acn mahmahuh.

7 Ac tuh oasr kuhtuhsrihsrihk sahk fin acn uh, ne ohinge mwet suc som ah arulacna suhmahtlah ke orekma ke simacn; ke ma inge elos tuh muhsah lom simacn, ma elos muhta loac.

8 Ac tukun ma inge elos puhsweni ac maelihk, ac tuh som liki acn ma oan lacyacn nuh epang nuh ke acn ma oan nuh acir, ac elos maelihk yohkna oruh elos muhtwacwacack in afuhnlah acn ah nohfohn, liki meoa epang nuh ke meoa acir, liki meoa rohtoh nuh ke meoa kuhtuhlacp.

9 Ac mwet ma muhta ke lacyacn acn nuh acir ah tuh muhta ke lohm nuknuk, ac ke lohm simacn, ac elos karuhnguhnwacng sahk ma sruhnyak fin acn uh tuh in kapwack, tuh in pacl ac fah oasr lalos sahk in muhsahi lohm selos, ahok, siti lalos, ac tempuhl lalos, ac iwen lohlngohk lalos, ac acn muhtahl lalos, ac kain in lohm nuhkwewa selos.

10 Ac tukun ma inge ke sahk uh arulacna sesahlah in oasr fin acn nuh lacyacn acir uh, elos tuh suhpuh yohk ke orekmakihnyen oak uh.

11 Ac ohinge elos tuh ahkkweye mwet ma muhta fin acn nuh lacyacn acir tuh elos in kuh in muhsaheack siti pucspucs, kwewana ke sahk ac ke simacn.

12 Ac tukun ma inge tuh arulacna puhkantwen sin mwet lal Ammon, suc isuslac oa mwet Laman, elos oacyacpac som nuh fin acn se inge.

13 Ac inge arulacna puhkantwen ma sihmlac liyeyuckyang ke mukwikwi luhn mwet inge, sin mwet pucspucs sin mwet inge, ma ahkuhtweyac kahlwem ac arulacna yohk, kaclos.

14 Tuhsruhk liye, ip ahksiofok ke mukwikwi luhn mwet inge, ahok, sramsram soko ke mwet Laman ac ke mwet Nephi, ac mweun lalos, ac fohs lalos, ac akuhkuhin, ac luti lalos, ac kahs in pahluh lalos, ac suhpweyuck kahko ke oak lalos ac muhsah luhn oak lalos, ac muhsah luhn tempuhl lalos, ac luhn iwen lohlngohk ac acn muhtahl lalos, ac suwohswohs lalos, ac koluk lalos, ac ahkmas lalos, ac pihsrapasr lalos, ac sruhinkuh lalos, ac kain in ma sruhngwacyuck nuhkwewa ac kosro, tiac kuh in sihmihsyucklac nohfohn ke orekma se inge.

15 Tuhsruhk liye, puhkantwen puk ac puhkantwen ma sihmlac ke kain nuhkwewa, ac ma inge liyeyuckyang yohkna sin mwet Nephi.

16 Ac ma inge tuhtahflah nuh ten liki sie fihl nuh ke siepac sin mwet Nephi, ne ke na elos puhtatyang nuh ke tahfonglac ac acnwucki, pihsrapasrlah, ac ukweyuck, ac lihsyuckyak, ac uniyucki, ac fahsrelihk fin acn ah, ac akuhlamihsi wi mwet Laman ne ke na elos tiac sifil pahngpahng mwet Nephi, elos eklac koluk, ac lwemnak, ac suhlallacl, ahok, finne in eklac mwet Laman.

17 Ac inge nga sifilpac fohlohklac nuh ke sramsram luhk; ke ma inge, ma suc nga sruhmuhn uh sikyak tukun oasr fohs luhlahp, ac lokoalok, ac mweun, ac akuhkuhin, inmahsrlon mwet lal Nephi.

18 Yac ahkangngaul ac ohnkohsr ke kolyuck luhn mwet nuhnuhnkuh sahflah;

19 Ac tukun ma inge srwackna oasr fohs luhlahp fin acn ah, ahok, finne ke yac ahkangngaul ac itkohsr, ac oacyacpac ke yac ahkangngaul ac alkosr.

20 Ne ohinge Helaman el tuh fohnohslah siyah ke nuhnuhnkuh suwohs ac ohiyac wo; ahok, el tuh karuhnguhnwacng na in liyacacng masap, ac nuhnuhnkuh, ac masap luhn God; ac el tuh oruh ma suc pwacye ke ye muhtuhn God pacl nuhkwewa; ac el tuh ukwe na ohiyac luhn pahpah tuhmwacl, yohkna oruh el kapkapwack fin acn uh.

21 Ac tukun ma inge oasr wen luo nahtuhl. El sang nuh sin ma mahtuh sac inel Nephi, ac nuh sin ma srihsrihk se emet ah, inel Lehi. Ac elos muhtwacwacack in kapkapwack nuh sin Leum.

22 Ac tukun ma inge mweun ac fohs uh muhtwacwacack in fihsrwacsr uh, kuhtuhsrihsrihk, inmahsrlon mwet luhn mwet Nephi, ke kapihn yac ahkangngaul ac alkosr ke kolyuck luhn mwet nuhnuhnkuh fin mwet lal Nephi.

23 Ac tukun ma inge ke yac ahkangngaul ac yuc ke kolyuck luhn mwet nuhnuhnkuh, fahfahlac in oasr mislac akwucki fin acn uh, nohfohn sahyacn na u lukmac ma Gadianton suc sie mwet pihsrapasr el tuh oakiyac ke acn ma puhslac mwet we fin acn ah, ac in pacl se ingacn ma se inge tiacna etweyuck selos suc kol kafucrmacn; ke ma inge elos tiacna kuhnausyucklac fin acn uh.

24 Ac tukun ma inge ke yac sepacna inge arulacna yohk kapwack ke alu uh, yohkna oruh oasr pihsen mwet tausin tausin kuhtuh suc tuh sifacna welah alu uh ac pacptaislac nuh ke auliyak.

25 Ac arulacna yohk kapwack luhn alu uh, ac arulacna puhs mwe insewowo ma kahklah nuh fin mwet uh, pwacnwacng finne mwet tol fuhlwact ac mwet luti ah elos sifacna ahluhkwelah lut.

26 Ac tukun ma inge orekma luhn Leum kapkapwack ke pacptaiselah ac oracni nuh sie nuh ke alu luhn God, mwet pucspucs, ahok, finne tausin singucul kuhtuh.

27 Ohinge kuht kuh in liye lah Leum El pahkotwen nuh selos nuhkwewa suc ac fah, ke inse pwacye lalos, pahngon ine muhtahl Lal.

28 Ahok, ohinge kuht liye lah muhtuhnpot inkuhsrao ikacklah nuh sin mwet nuhkwewa, finne nuh selos suc ac fah luhlahlfongi ke inel Jisus Kraist, suc pa Wen nuhtin God.

29 Ahok, kuht liye lah kuhtwena mwet suc luhngse ac kuh in sruokyac na kahs luhn God, ma sa ac fokoko, ma fah srwaclihk kwewa kuhtasrihk ac sruhf ac kikiacp luhn devil, ac kohllah mwet luhn Kraist ke sie inkacnek suwohs ac ohsrihksrihk in som nuh ke luhf in ahsor ne tok ma pahtpaht ma ahkoeyucklac in ohkohmlah mwet koluk—

30 Ac fihliyac nguhnalos, ahok, nguhn kawihl lalos, ke lacpo lacyot luhn God ke tohkohsrahi inkuhsrao, in muhta weluhl Abraham, ac Isaac, ac weluhl Jacob, ac wi pahpah muhtahl nuhkwewa tuhmwacsr, in tiac sifilpac tufoklac.

31 Ac ke yac se inge fahfahlac in oasr engan fin acn lal Zarahemla, ac ke acn nuhkwewa ma raunweack acn we, finne acn nuhkwewa ma sruokyucki sin mwet Nephi.

32 Ac tukun ma inge oasr mislac ac engan yohk na pwacye ke lusen pacl luhlah ke yac ahkangngaul ac yuc; ahok, ac oacyacpac fahfahlac in oasr mislac ac engan yohk ke yac ahklamngaul ke kolyuck luhn mwet nuhnuhnkuh.

33 Ac ke yac ahklamngaul ac sie ke kolyuck luhn mwet nuhnuhnkuh oacyacpac oasr mislac, sahyacn na insefuhlwact ma muhtwacwacack in ilyak nuh ke alu uh—tiac nuh ke alu luhn God, tuhsruhk nuh ke insiacn mwet suc fahk lah elos wi alu luhn God—

34 Ac elos pihsryak ke insefuhlwact, finne in kalyei mwet pucspucs wiyaclos. Na ma se inge ma na koluk se, ma tuh oruh un mwet insepuhsisacl ah in kweok ke kalyeiyuck yohk, ac in sun ongaiyac yohk.

35 Ne ohinge elos tuh lalo ac pruhe pacl nuhkwewa, ac fokokoi na fokokoi ke insepuhsisacl lalos, ac fokokoi na fokokoi ke luhlahlfongi lalos ke Kraist, nuh ke nwacnwaclah luhn nguhnalos ke kaksak ac engan, ahok, finne ke ahknwacsnwacsyeyucklac ac ahkmuhtahlyeyucklac luhn insiaclos, ma ahkmuhtahlyeyucklac uh tuhkuh ke srihpen elos sang insiaclos nuh sin God.

36 Ac tukun ma inge ke yac ahklamngaul ac luo oacyacpac sahflah ke mislac, sahyacn na insefuhlwact yohk ma tilyang nuh insiacn mwet uh; ac ma ke srihpen kahsruhp yohk lalos ac kapkapwack lalos fin acn uh; ac ma inge kapwack faclos ke lwen nuh ke lwen.

37 Ac tukun ma inge ke yac ahklamngaul ac tolu ke kolyuck luhn mwet nuhnuhnkuh, Helaman el misac, ac wen mahtuh se emet nahtuhl suc inel pa Nephi el muhtwacwacack in kol aholuhl. Ac tukun ma inge el fohnohslah siyah in nuhnuhnkuh ke suwohs ac ohiyac wo; ahok, el tuh liyacacng masap luhn God, ac el fahsr ke ohiyac luhn pahpah tuhmwacl.