1 Ac tukun ma inge ke yac ahkangngaul ac luo ke kolyuck luhn mwet nuhnuhnkuh, tukun Moronihah el sifilpac oakiyac mislac inmahsrlon mwet Nephi ac mwet Laman, liye wacngihn mwet in nwacklah siyah in nuhnuhnkuh; ke ma inge muhtwacwacack in sifilpac oasr fohs inmahsrlon mwet uh lah suc ac fohnohslah siyah in nuhnuhnkuh uh.

2 Ac tukun ma inge Helaman, suc pa wen nahtuhl Helaman, el srihsrngiyucki in fohnohslah siyah in nuhnuhnkuh, ke puhsrwen mwet uh.

3 Tuhsruhk liye, Kishkumen, suc tuh unilyac Pahoran, el muhta sano in oacyacpac kuhnaosuhllah Helaman; ac el ahkkweyeyuck sin u se lal ah, suc ilyak nuh ke sie wuhlweacng tuh tiac sie selos ac etuh ma koluk lal.

4 Tuh oasr sie Gadianton, suc arulacna pihsrlac ke kahs pucspucs, ac oacyacpac ke mukwikwi lal, in tahfwelah in oruh orekma lukmac ke ahkmas ac ke pihsrapasr; ke ma inge el eklac mwet kol luhn u lal Kishkumen.

5 Ke ma inge el tuh eyeinse nuh selos, ac oacyacpac Kishkumen, lah elos fin likilyac ke siyah in nuhnuhnkuh, el ac sang nuh selos suc wi u se lal ah tuh elos ac likiyucki nuh ke kuh ac wal inmahsrlon mwet uh; ke ma inge Kishkumen el suk in kuhnaosuhllah Helaman.

6 Ac tukun ma inge ke el som nuh ke siyah in nuhnuhnkuh in kuhnaosuhllah Helaman, liye sie sin mwet kuhlwacnsap lal Helaman, el oasr lihk ah ke fong ah, ac el etwacack, ke el ekuhllah atacl, sie etwacack ke plwacn ma ahknoeyucklac sin u se inge in kuhnaosuhllah Helaman—

7 Ac tukun ma inge el sonol Kishkumen, ac el sang nuh sel sie akucl; ke ma inge Kishkumen el ahkkahlwemye nuh sel srihpac luhn kena lal, kena tuh elan usacllah nuh ke siyah in nuhnuhnkuh tuh elan kuh in unilyac Helaman.

8 Ac ke mwet kuhlwacnsap se lal Helaman ah etwacack kwewa kena lal Kishkumen, ac fuhkah tuh srihpac se lal uh pa in ahkmas, ac oacyacpac lah pa inge srihpac lalos nuhkwewa suc wi u se lal ah pa in ahkmas, ac in pihsrapasr, ac in eis kuh uh, (ac pa inge plwacn lukmac lalos, ac mukwikwi lalos) mwet kuhlwacnsap se lal Helaman ah fahk nuh sel Kishkumen: Lwelah kuht in som nuh ke siyah in nuhnuhnkuh.

9 Na ma se inge arulacna wo sel Kishkumen, tuh el pahngon na muh el ac oraclah plwacn lal; tuhsruhk liye, mwet kuhlwacnsap se lal Helaman, ke elos som nuh ke siyah in nuhnuhnkuh, el fakihsilyac Kishkumen ke art lal ah, ac el puhtatlac misac ac tiacna salah. Ac el kahsruhsr ac fahk nuh sel Helaman ma nuhkwewa ma el tuh liye, ac lohng, ac oraclah.

10 Ac tukun ma inge Helaman el suhpweyucklac in use un mwet pihsrapasr ac mwet ahkmas lukmac inge, tuh elos in acnwucki in fal nuh ke masap uh.

11 Tuhsruhk liye, ke Gadianton el konwacack lah Kishkumen el tiacna fohlohk el sahngweng lah el ac kuhnausyucklac; ke ma inge el oruh tuh u se lal ah in ukwacl. Ac elos kahinglac som liki acn uh, ke sie inkacnek lukmac, nuh innimac ah; ac ohinge ke Helaman el suhpwaclah mwet in eisaclos elos tiacna kuh in sukokyak.

12 Ac kuhtuh pac ma kacl Gadianton se inge ac fah sruhmuhnyuck tok. Ac ohinge sahflah yac ahkangngaul ac luo ke kolyuck luhn mwet nuhnuhnkuh fin mwet lal Nephi.

13 Ac liye, ke sahflahiyacn puk se inge kom fah liye lah Gadianton se inge el tuh ahkpwacyeiye in kuhtanglah, ahok, el apkuhran in kuhnahoslah nohfohn mwet lal Nephi.

14 Liye tiac kalmeyac sihk pa sahflahiyacn puk lal Helaman, tuhsruhk kalmeyac sihk pa sahflahiyacn puk lal Nephi, yac nga eislah kwewa sramsram ma nga suhmuhslah uh.