1 Dó ó kʼad, áádóó ląʼída Samuel, Laman bidineʼé nilínígíí, deidiiztsʼą́ą́ʼ, kin tsé binázʼáhígíí bikááʼdóó yáłtiʼgo. Dóó yee haadzíʼígíí daʼoosdląądígíí Nephi hadeídínéestą́ą́ʼ; dóó yikʼídaaskaigo bąąhági ádaatʼéii yaa naaskai yę́ę yee yił dahoolneʼ dóó ałtso ádaa dahoolneʼ, Bóhólníihii bízhiʼ binahjįʼ tó bee danihidiʼdoolzį́į́ł danízingo.

2 Ndi ląʼída Samuel bizaad tʼáadoo dayoosdląądę́ę éí bá dahaschįįd; dóó tsé yistłʼinígíí yikááʼ dah sizį́įgo tsé yee dayółneʼ dóó tʼóó ahayóí éí kʼaaʼ yee dayoołtʼoh ńtʼę́ę́ʼ tsé yistłʼinígíí yikááʼ dah sizį́įgo; ndi Bóhólníihii biiʼSizíinii baa áhályą́ą́ ńtʼę́ę́ʼ, áko índa chʼééh tsé yee dayółneʼ dóó kʼaaʼ yee dayoołtʼoh.

3 Áko chʼééh ndeidiiłneʼ dóó dayołká dayiiłtsą́ągo, tʼóó ahayóí áłtsé doo daʼoodlánę́ę bizaad dayoosdląąd, dóó Nephi tó yee dabidoosį́įł doo biniiyé yichʼįʼ eekai.

4 Jó áko, Nephi éí tó yee iisį́įhgo, dóó náás ádahodooníiłii yaa halneʼ, dóó naʼnitin, diné niheʼiinaʼ łahgo áńdaahdlééh yił níigo, bee éédahózinii dóó ayóó ádaatʼéii yił ííshją́ą́ ííłʼį́įgo, diné bitahgóó álíleekʼeh naalnishgo, áko Christ hodíinaʼgo bidiʼdoochííł bił béédahodoozįįł dooleeł biniiyé—

5 Hodíinaʼgo ádahodooníłígíí yee yił halneʼgo, áko ádahodooníłígíí bił béédahózin dóó yéédaalniih doo áko tʼah doo adahanéehgo bił béédahózin dooleeł biniiyé, áko daʼoodlą́ą dooleeł biniiyé; éí bąą tʼáá átʼé Samuel bizaad dayoosdląądígíí Nephi yaa heeskai tó bee dabidiʼdoolzį́į́ł biniiyé, háálá beʼiinaʼ łahgo áńdalnéehgo dóó bąąhági ádaatʼéii yaa ndaaskai yę́ę yaa dahalneʼgo.

6 Ndi ałnííʼ biláahgo éí Samuel bizaad tʼáadoo dayoosdląąd da; éí bąą chʼééh tsé yee ndeidiiłneʼgo dóó chʼééh dayiiłtʼoh yaa ákodaniizį́įʼgo, binaatʼáanii yichʼįʼ nadadeesghaazh, kódaaníigo: Díí hastiin daoohsił dóó bidaʼohtłʼó, jó háálá chʼį́įdii beʼiiníziinii bił hólǫ́; dóó háálá chʼį́įdii beʼiiníziinii bibee adziilii iiʼ hólónígíí biniinaa tsé dóó kʼaaʼ chʼééh bee ndadiilneʼ dóó chʼééh deíníilkááh; éí bąą bił dadoohdeeł dóó bidaʼohtłʼó, dóó yíwohjįʼ ádaahłééh.

7 Dóó dajiisił biniiyé bichʼįʼ nízhdiijééʼ, jó, tsé yistłʼinę́ę yikááʼdóó adah dadiilwod, dóó hakéyahdóó chʼélwod, aooʼ, tʼáá bí bikéyahgóó anáálwod ndi, dóó bidineʼé neinitin dóó náasdi ádahodooníiłii yee yił halneʼgo yaa ńdiidzá.

8 Jó áádóó, Nephi bidineʼé bitahdi tʼáadoo baa nááhóóneʼ da; dóó ákótʼáo diné bitahgóó ádahóótʼįįd.

9 Dóó ákótʼáo Nephi bidineʼé ándahwiiʼaahii dadínéezbin dóó bikʼehgo adeesdeeʼ dóó wóshdę́ę́ʼ tseebídiin dóó baʼaan hastą́ą́ nááhai.

10 Dóó ákótʼáo ándahwiiʼaahii dadínéezbindóó tseebídiin dóó baʼaan tsostsʼid ałdóʼ ałtso nááhai, diné ałnííʼ bilááhdóó tʼahdii ádaa dahaʼniih dóó bąąhági átʼéii yaa naakai, dóó tʼáá áłchʼį́į́dígo hazhóʼó Diyin God bibeehazʼáanii yikééʼ deíkááh.

11 Dóó díigi ałdóʼ ádahootʼéé ńtʼę́ę́ʼ, ándahwiiʼaahii dadínéezbindóó tseebídiin dóó baʼaan tseebíí nááhai.

12 Dóó dineʼé yaa naakaiígíí tʼįįhdígo łahgo ádzaa, tʼáá hazhóʼó diné tʼóó hózhǫ́ bąąhági átʼéii yaa ńdiikai, dóó tʼóó hózhǫ́ Diyin God bibeehazʼáanii yitsʼą́ą́jígo tʼáadoo leʼé yaa ńdiikai, ándahwiiʼaahii dadínéezbindóó tseebídiin dóó baʼaan náhástʼéí yihahígíí biyiʼ.

13 Ndi áádóó ándahwiiʼaahii dadínéezbindóó náhástʼédiin yihahígíí biyiʼ, diné ląʼída bee éédahózinii, dóó ayóó ádaatʼéii dayiiłtsą́; dóó Diyin God yá dahalneʼii bizaad yę́ę bikʼé dahoniidzo.

14 Dóó diyin yá ndaalʼaʼii, diné dahóyáanii yichʼįʼ ííshją́ą́ ádaʼdiilyaa, dóó haneʼ ayóó átʼáo bitsʼą́ą́dóó hózhóonii yee yił dahoolneʼ; áko díí yihahígíí biyiʼ Diyin God bizaad bidaʼalnéehgo hahoolzhiizh.

15 Ákótʼée ndi, diné bijéí deistłʼis, tʼáá hazhóʼó diné hózhǫ́ daʼoodlánígíí tʼéiyá, Nephi bidineʼé dóó Laman bidineʼé tʼáá áła, áko diné tʼáá bí bibee adziilii dóó tʼáá bí ééhózinii yadaʼólíigo hahoolzhiizh, dóó kódaaníigo:

16 Łaʼ shį́į́ éí tʼáá ákótʼéego dajíiniiʼ, ląʼída baa dahóóneʼígíí; jó ndi, díí tʼáá átʼé naanish ayóó ádaatʼéii dóó ayóó ádahodoonííł haʼnínígíí, doo ałtso bidaʼdoolníiłgo nihił béédahózin.

17 Dóó díí yaa ntsídaakeesgo dóó saad ahídeetʼáahgo hahoolzhiizh, kódaaníigo:

18 Áko doo shį́į́ ákótʼée da díí Christ nilíigo doogáłígíí; áko níyáago, dóó tʼáá aaníí Diyin God biYeʼ nilį́įgo, yáʼąąsh dóó nahasdzáán biTaaʼ nilį́įgo, baa hóóneʼę́ęgi átʼéego, haitʼáoósh doo nihichʼįʼ ííshją́ą́ ádiʼdidoolníił da Jerusalemdi ádzaaígi átʼáo?

19 Aooʼ, haitʼáoósh éí doo díí kéyah bikáaʼgi doo ííshją́ą́ íʼdílnéeh da Jerusalem kéyahdi ádzaaígi átʼáo?

20 Jó ndi, díí éí doo yáʼátʼéehgo haneʼígíí átʼéego nihił béédahózin, éí éí danihizhéʼé bitsʼą́ą́dę́ę́ʼ yidił, haʼátʼííshį́į́ ayóó átʼéego dóó ayóó ádahodoonííł haʼnínígíí deidoodląął nihidiʼníigo biniiyé, ndi doo éí nihitah áhodooníił da, ndi kéyah doo deeghanídi siʼánígíí bikáaʼdi áhodoonííł, kéyahdi doo nihił béédahózin da; éí bąą tʼáadoo nihił béédahózinígóó ádanihósin, háálá tʼáá aaníí nihinááʼ bee deidiiltséłígíí doo bíighah da.

21 Dóó éí ádoonííł, chʼį́įdii doo yáʼáshóonii bináʼágiz dóó doo bééhózingóó éʼélʼíinii bee, doo nihił béédahózinii ayóó átʼáo doo bééhózinii ádeidoolííł, dóó bizaadkʼehgo binaalteʼ daniidlį́įgo éí yee yaago kódanihósin ádanihidoolííł, dóó binaalteʼ ałdóʼ daniidlį́į doo, háálá naʼnitin yee ndanihinitingo baa daʼííníidlí; dóó ákótʼéego bikééʼ nihiikáahgo éí doo nihił éédahózin da dooleeł, ałtso niheʼiinaʼ ádeiilyaajįʼ.

22 Dóó ląʼída diné bijéí biyiʼdi tʼáadoo leʼé yaa ntsídaazkééz daazlį́į́ʼ, éí éí tʼáá bíhólníihgo dóó tʼáadoo biniiyéhé da; dóó tʼáá íiyisíí dabidiisnááʼ, háálá Satan beʼiiníziinii dabidiisnáaʼgo áłahjįʼ bąąhági átʼéii yaa naakai silį́į́ʼ, aooʼ, tʼáá ałtso kéyah bikááʼgóó atseezį́ dóó saad hainiłchaad, áko diné yáʼátʼéehii dóó náasjįʼ ádahodooníiłii yikʼijįʼ bijéí deidoołtłʼis biniiyé.

23 Dóó azhą́ bee éédahózinii dóó ayóó ádaatʼéii Bóhólníihii bidineʼé bitah ádahoodzaa ndi, dóó ląʼída álíleekʼehgo ndaashnish ndi, diné bijéí Satan beʼiiníziinii tʼáá íiyisíí yisił tʼáá ałtso kéyah bikááʼgóó.

24 Dóó ákótʼáo ándahwiiʼaahii Nephi bidineʼé yá dadínéezbindóó náhástʼédiin ałtso nááhai.

25 Dóó ákótʼáo Helaman binaaltsoos ałtso ályaa, Helaman dóó biyeʼ binaʼasdzooígíí bikʼehgo.