Diyin bizaad
Helaman 13
Ahit’áád Hóyahdi Na’asdzoh

Hide Footnotes

Saad Bik’ehgo Nda’anishí

Helaman Binaaltsoos

Wóltaʼii 13

Samuel Laman bidineʼé nilíinii Nephi bidineʼé náásgóó ádooldįįłígíí tʼáá hazhóʼó beʼiinaʼ łahgo áńdayiidlaago tʼéiyá yaa halneʼ—Bí dóó binaalyeʼé bikʼijįʼ haʼoodzííʼ—Diyin God yá dahalneʼii doo deiniizį́įʼ da dóó tsé yee ndeistseed, dóó níłchʼi bidaʼiiníziinii bináztʼiʼ dóó bąąhági átʼéii biyiʼ ił hózhóonii hadeinitá. Díí tʼah doo Jesus biʼdichíhę́ędą́ą́ʼ 6 yihahą́ądą́ą́ʼ nahalzhiishgo ádahóótʼįįd.

1 Dóó kʼad tseebídiin dóó baʼaan hastą́ą́ yihahgo, Nephi bidineʼé tʼahdii bąąhági átʼéii yaa naakai, aooʼ tsʼídá yéigo bąąhági átʼéii yee yildah, áko Laman bidineʼé éí Diyin God bibeehazʼáanii tʼáá íiyisíí yikʼeh dahółʼį́, Moses bibeehazʼáanii bikʼehgo.

2 Áádóó éí yihahígíí biyiʼ hastiin Samuel wolyéii léiʼ, Laman bidineʼé nilį́įgo, Zarahemlagi níyá, dóó diné neidíníitą́ą́ʼ. Áádóó naʼnitingo, ląʼída yiską́, niheʼiinaʼ łahgo áńdaahdlééh níigo diné yee neineeztą́ą́ʼ, dóó chʼídayiisxan, dóó tsʼídá kʼad bikéyahgo ńdeesdzáago.

3 Jó ndi, Bóhólníihii bichʼįʼ haadzíiʼgo binééʼ yidiitsʼaʼ, nátʼą́ą́ʼ ńdíídááł bidííniid, dóó nijéí biyiʼdi nił hodoonihígíí náasdi ádaatʼéii diné bee bił hodíílnih.

4 Áádóó kintah yah adoogáałgo bichʼįʼ bá hóchįʼ; éí bąą tsé kin ndashijaaʼgóó binázʼáhą́ą yikááʼ haasnaʼ, dóó bílaʼ yee yichʼįʼ dadiilniiʼ dóó iinééʼ ayóo íitsʼaʼgo yichʼįʼ hadoolghaazh, dóó Bóhólníihii náasjįʼ ádahodooníiłii bijéí yiih yiléhígíí diné yee yił hoolneʼ.

5 Dóó kwíyidííniid: Jó, shí, Samuel, Laman bidineʼé nishłį́, dóó Bóhólníihii bizaad shijéí yiih yiléhígíí bee yáshtiʼ; jó áko díí shijéí yiih yiyííláago diné bee bichʼįʼ haasdziih tʼáá ákogo nihwiiʼaahii bibééshhał díí diné kʼadę́ę bikʼiʼdasitą́; dóó tʼáadoo dį́įʼdi neeznádiin náháhí díí diné tʼáá ákogo nihwiiʼaahii bibééshhał bikʼi ndookǫs.

6 Aooʼ, tsʼídá ląʼí diné ndootsiłgo éí bibaʼ sitą́, dóó tʼáá aaníí díí diné éí bikʼiidooldoh, dóó tsʼídá tʼáadoo bee yisdáhóótʼiʼí da dooleeł tʼáá hazhóʼó iiná łahgo hazhóʼó ánályaago dóó Bóhólníihii Jesus Christ yoodlą́ągo tʼéiyá yisdáhóótʼiʼ, éí tʼáá aaníí nihookááʼ doogááł, dóó ląʼída tʼáadoo leʼé yikʼee tiʼhwiidoonih dóó bidineʼé bá bidiʼyoolyééł.

7 Jó áádóó, Bóhólníihii yá naalʼaʼii yee shił hoolneʼ, dóó haneʼ yáʼátʼéehii sheinílá. Jó áádóó, nihichʼįʼ ashiʼdoolʼaʼ áko bee nihił hodeeshnih ałdóʼ biniiyé, áko haneʼ yáʼátʼéehii nihí dooleeł; ákondi doo dashinoozį́įʼ da.

8 Éí bąą, ákótʼáo Bóhólníihii ání: Nephi bidineʼé bijéí dantłʼizígíí biniinaa, tʼáá hazhóʼó beʼiinaʼ łahgo áńdayiidlaago tʼéiyá doo shizaad bitsʼáńdideeshʼáał da, dóó shiiʼSizíinii nátʼą́ą́ʼ kóńdeeshdlííł, dóó doo tʼóó bá deeshnih da dooleeł, dóó bikʼisóó danilíinii bikʼijįʼ kódeeshłííł.

9 Dóó doo dį́įʼdi neeznádiin ńdoohah da áko ałtso ndahodiʼdootsił; aooʼ, bééshhał dóó dichin dóó naałniihii bee atídahodeeshłííł.

10 Aooʼ, tʼáá íiyisíí hachʼįʼ shá háchįʼgo hataadeeshaał, dóó niheʼenaʼí, dį́įʼdi są́ náʼoogą́ą́ʼgóó biyiʼ, łaʼ ałtso ásooʼdįįdgo deidoołtsééł; dóó tʼáá aaníí áhodoonííł tʼáá hazhóʼó niheʼiinaʼ łahgo ándaahdléehgo tʼéiyá, ní Bóhólníihii; dóó dį́įʼdi są́ náʼoogą́ąʼdi nootʼį́łígíí éí ałtso ndanihidoołtsił.

11 Ndi niheʼiinaʼ łahgo ádaoohłaago dóó Bóhólníihii nihiDiyin God bichʼįʼ kóńdaoohdzaago shá háchįʼígíí nihitsʼą́ąjįʼ kódeeshłííł, ní Bóhólníihii; aooʼ, Bóhólníihii ání, beʼiinaʼ łahgo áńdayiidlaaígíí dóó shichʼįʼ kódaadzaaʼígíí éí bikʼihojídlíi dooleeł, ndi tʼáadoo beʼiinaʼ łahgo ádayiilaaígíí éí doo bá yáʼádaatʼéeh da dooleeł.

12 Aooʼ, yíi díí ayóó átʼáo kintah Zarahemla atídoolnííł; jó áko, tʼáá ákótʼéego ákweʼé dahinánígíí biniinaa éí doo doolchxǫǫł da; aooʼ, díí ayóó átʼáo kintahígíí atídoolnííł, háálá shił bééhózin, ní Bóhólníihii, atisgo ánéelą́ąʼgo, aooʼ, díí ayóó átʼáo kintahdóó ndi, doo dashidiiztsʼą́ąʼ da dadooleeł, ní Bóhólníihii.

13 Ndi beʼiinaʼ łahgo áńdayiidlaaígíí éí bikʼijideeshdliił, éí doo atídeeshłíił da. Jó ndi díí kintah ayóó átʼéii biyiʼ łaʼ tʼáá ákótʼéego ndaakaígíí bąą, jó, yáʼąąshdę́ę́ʼ kǫʼ ádadidoonał dóó bee adideeshkʼą́ą́ł.

14 Jó ndi, tʼáá ákótʼéego dahinánígíí biniinaa doo yighą́ąʼ da. Jó ndi, Bóhólníihii ání, bichʼįʼ éí hoolzhish, yáʼátʼéehgo dahináanii chʼídahisoohłtłʼíidgo, índa bąąhági átʼéii bee dasinoołtsʼą́ągo nihididoogą́łígíí baa hoolzhíish dooleeł; aooʼ, díí kintah hóyéeʼgi siʼą́ą dooleeł, háálá doo yáʼátʼéehii dóó tsʼídá aláahdi dajoodláhígíí biyiʼ hólónígíí biniinaa.

15 Aooʼ, kintah Gideon hóyééʼ bił hwiidooʼaał, doo yáʼátʼéehii dóó tsʼídá aláahdi dajoodláhígíí biyiʼ hólónígíí biniinaa.

16 Aooʼ, tʼáá ałtso díí Nephi bidineʼé bikéyah bikáaʼgo kin hadaalʼáhígíí hóyéeʼgo bił nahazʼą́ą dooleeł, doo yáʼátʼéehii dóó aláahdi dajoodláhígíí biyiʼ dahólónígíí biniinaa.

17 Jó áádóó, Tʼáá ałtsoní bee Bóhólníihii ání, díí kéyah bikʼijįʼ haʼdoodzih, díí kéyah bikáaʼgi baa naʼaldeehígíí biniinaa, aooʼ, doo yáʼátʼéehii dóó dajoodláhígíí yaa naaskaiígíí biniinaa.

18 Dóó baa hodoolzhish, ní Tʼáá ałtsoní bee Bóhólníihii, aooʼ, nihiDiyin God tʼáá aaníí dóó ayóó átʼéii, tʼáá háíshį́į́ daʼílíinii nahasdzáán biyiʼ néideesʼį́įʼgo chʼééh haidínóotaał, kéyah ayóó átʼáo bikʼijįʼ haʼoodzíʼígíí biniinaa, tʼáá hazhóʼó diné tʼáá ákótʼéego naagháii dóó Bóhólníihii díí baa áhólyą́ níigo néideesʼį́įʼgo tʼéiyá.

19 Háálá shí éí íinisin, ní Bóhólníihii, binaadeeł daʼílíinii bíniʼ ńdeidiłʼįįh dóó bíniʼ baa áhólyą́ dashiłní; dóó doo binaadeeł daʼílíinii tʼáadoo shidaʼíłníhí ńdeidiłʼįįhii bikʼijįʼ hadeesdzih; dóó doo łaʼ binaadeeł daʼílíinii shił ńdeididoołʼį́įł da tʼáá hazhóʼó yáʼátʼéehgo dahináanii tʼéiyá; dóó doo binaadeeł daʼílíinii shił néideesʼį́ʼígíí, éí bikʼijįʼ haʼdoodzih, binaadeełii ałdóʼ, dóó doo łaʼ baa ńdoodił da háálá kéyah éí bikʼijįʼ haʼoodzííʼ.

20 Dóó baa hodoolzhish binaadeeł daʼílíinii ńdeidiłʼįįhgo, naadeełii tʼéí bíniʼ danilį́įgo biniinaa, dóó naadeełii tʼéí bíniʼ ádayiilaaígíí biniinaa, binaadeełí ńdeididoołʼį́į́ł anaʼí yitsʼą́ąjįʼ ńdadínóodzołgo; háálá doo shichʼįʼ ńdeidiłʼįįhígíí biniinaa, bí dóó binaadeełii daʼílíinii bikʼijįʼ haasdzííʼ; áadi yoołkáałgo bichʼįʼ ndahwiidiʼyooʼnaał, ní Bóhólníihii.

21 Jó nihí, díí ayóó átʼáo kintahdóó nohłínígíí, shizaad bikʼeh dahonołʼį́ ; aooʼ, Bóhólníihii bizaad yee yáłtiʼígíí deísínóołtsʼą́ą́ʼ; jó háálá, nihinaadeełii daʼílíinii biniinaa nihikʼijįʼ haʼoodzííʼ ní, dóó tʼáá éí tʼéí bidánoołníigo biniinaa nihinaadeełii daʼílíinii ałdóʼ bikʼijįʼ haʼoodzííʼ, dóó doo éí nihainíláhígíí bizaad dadoohtsʼaʼ da.

22 Bóhólníihii nihiDiyin God tʼáadoo leʼé yee nihikʼihojisdliʼígíí doo béédaohłniih da, ndi nihinaadeełii daʼílíinii éí áłahjįʼ béédaohłniih, doo éí Bóhólníihii Diyin God bichʼįʼ baa ahééh danohsin da; aooʼ, Bóhólníihii éí doo deidísin da, ndi tʼóó báhádzidgo ádaa dadzódlí, dóó ádaa dahaʼniih, nitsʼą́ąjįʼ ádaʼdólzin, oolchʼį́į́d, á háchįʼ, ákánaatʼá, akʼijįʼ daʼídlį́, dóó naʼatsxeed, dóó tʼáá ałtso bąąhági ádaatʼéii yiiʼ deeskai.

23 Háálá díí biniinaa Bóhólníihii Diyin God kéyah bikʼijįʼ haʼoodzíiʼgo yee hoołʼaʼ, dóó nihinaadeełii daʼílíinii ałdóʼ ákóyiilaa, dóó díí nihibąąhági ádaatʼéii biniinaa.

24 Aooʼ, yíi díí diné yee bił hólǫ́, háálá áajįʼ ahoolzhiizh, Diyin God yá dahalneʼii chʼídahinoołkaadgo, dóó tʼóó bá ndahohłtʼiʼgo, dóó tsé bee ńdanoołneʼgo, dóó ndaałtseedgo, dóó tʼáá ahayóí ałʼąą átʼáo bąąhági ádaatʼéii bikʼijįʼ ádaołʼį́įgo, ałkʼidą́ą́ʼ diné ádáádzaa yę́ęgi átʼáo.

25 Dóó kʼad yádaałtiʼgo, kódadohní: Danihizhéʼé dahinánę́ędą́ą́ʼ dahiniiʼnáago, Diyin God yá dahalneʼii doo ndasiiltseed da ńtʼę́ę́ʼ; doo éí tsé bee ńdasíníilneʼ da doo ńtʼę́ę́ʼ, dóó doo chʼídahiniilkaad da doo ńtʼę́ę́ʼ.

26 Jó nihí biláahgo ádanohtʼé; háálá Bóhólníihii tʼáá aaníí hináago, Diyin God yá halneʼii łaʼ nihitah níyáago dóó Bóhólníihii bizaad yee nihił ahoʼniilneʼgo, éí daʼsoosihígíí dóó nihibąąhági ádaatʼéii yaa halneʼgo, éí bichʼįʼ nihá dahachįʼ doo, dóó chʼídadínóohłchééł dóó ałʼąą átʼáo nabidiʼdooltsiłígíí hadanohtá; jó, Diyin God bá halneʼii tʼóó átʼéhígíí átʼé, dóó niʼiisiihii, dóó chʼį́įdii beʼiiníziinii bitsʼą́ą́dę́ę́ʼ yigááł dadidoohniił, nihinaanishígíí doo yáʼádaashónígíí biniinaa.

27 Jó ndi, diné łaʼ nihitah níyáago dóó kóníigo: Díí baa naahkai, doo éí bąąhági átʼéii da; éídóʼ baa ndaahkai dóó doo éí tiʼdahwiidoohnih da; aooʼ, ádidooniił: Tʼáá nihí nohsinígíí bikʼeh dahinohná; aooʼ, danohłį́įgo danohsinígíí baa ndaahkai, dóó tʼáá ałtso tʼáá nihí danohsinígíí baa ndaahkai—áko diné łaʼ kóníigo nihitah níyáago, wóshdę́ę́ʼ dabididoohniił, dóó Diyin God yá halneʼí nilį́ dadohníi doo.

28 Aooʼ, baa dahohniih dooleeł, dóó nihinaadeełii baa dadohnił; nihibéésh óola, dóó nihibéésh łigai baa dadohnił, dóó ééʼ daʼílíinii bee hadadidoohłííł; dóó tʼáá ádzaagóó nihaa haʼniihígíí biniinaa, dóó tʼáá ałtsogo hózhǫ́ǫgo nahazʼą́ níigo, índa éí doo nihił átʼéhégo baa ntsídidoohkos.

29 O nihí bąąhági ádanohtʼéii dóó yáʼátʼéehgo iináanii doo danohsinii; diné daastłʼisii dóó doo bikʼos daniłdzilii, haa nízahjįʼ lá Bóhólníihii tʼóó nihinééłʼį́įʼgo yił átʼée dooleeł? Aooʼ, haa nízahjįʼ shąʼ doo ádahalyáanii dóó doo daʼooʼíinii ndanihiʼeesh dooleeł? Aooʼ, haa nízahjįʼ éí adinídíín doo danohsingo chahałheeł deiyínóhtąʼ dooleeł?

30 Aooʼ, jó, Bóhólníihii éí tʼáá íídą́ą́ʼ nihichʼįʼ bá hóóchįįd; jó, nihibąąhági ádaatʼéii biniinaa nihikéyah yikʼijįʼ haadzííʼ.

31 Jó áádóó, nihinaadeełii daʼílíinii yikʼijįʼ hadoodzihígíí bichʼįʼ hoolzhish, áko éí bídéeltǫʼ dadooleeł, áko chʼééh daoohłtsʼóod dooleeł; dóó nihaa dahojoobáʼígíí dasoolį́įʼgo chʼééh deinohtąʼ dooleeł.

32 Dóó nihaa dahojoobáʼígíí dasoolį́įʼgo Bóhólníihii tʼáá íiyisíí bichʼįʼ sodadołzin dooleeł; dóó nihisodadizin tʼáadoo biniiyéhé da dooleeł, háálá nanihidooltsiłii éí tʼáá íídą́ą́ʼ nihikʼííldoh, dóó nahidiʼdooltsiłígíí ałdóʼ tʼáá aaníí; dóó índa áadi daoocha dóó dadohłwosh dooleeł, ní Tʼáá ałtsoní bee Bóhólníihii. Dóó índa yínííł bee ádadohníi dooleeł, kódadohníigo:

33 O dooládóʼ sheʼiinaʼ łahgo íishłaagoshąʼ ńtʼę́ę́ʼ, dóó doo Diyin God yá dahalneʼii ndaséłtseedgoshąʼ ńtʼę́ę́ʼ, dóó doo tsé bee niséłtseedgoshąʼ ńtʼę́ę́ʼ, dóó doo chʼíniníłchą́ąʼgoshąʼ ńtʼę́ę́ʼ. Aooʼ, áadi ádadohníi dooleeł: O Bóhólníihii nihiDiyin God béédeiilniih dooleeł ńtʼę́ę́ʼ lá naadeełii daʼílíinii nihaa yiiléhę́ędą́ą́ʼ, dóó índa doo éí bídéeltǫʼ daazlį́įʼgo áko doo yóó adahiiʼníił da doo ńtʼę́ę́ʼ; jó áko, nihinaadeełii daʼílíinii éí nihitsʼádahaasdeel.

34 Jó, bee naʼanishí ákǫ́ǫ́ niilyéehgo biiłkáhí ádin łeh; jó áádóó, daʼahiʼniigą́ą́ʼ bijį́įdi nihibééshhał nihigaʼnilgo chʼééh hadadíníitaał łeh.

35 Aooʼ, nihinaadeełii daʼílíinii ńdadiilʼįįhgo dóó nihitsʼą́ą́ʼ doo bééhoyoozįįh da, kéyah bikʼijįʼ haʼoodzíʼígíí biniinaa.

36 O Bóhólníihii bizaad nihichʼįʼ kólyaa yę́ędą́ą́ʼ niheʼiinaʼ łahgo áńdadiilnííł ńtʼę́ę́ʼ lá; jó áko kéyah éí bikʼijįʼ haʼoodzííʼ, dóó tʼáá ałtsoní bídéeltǫʼ daazlį́į́ʼ, dóó chʼééh deiiltsood.

37 Jó, chʼį́įdii danilíinii nihinásʼá, aooʼ, nihitsʼíís dóó nihiyiʼsizíinii éí ndahodeeshtsił nízinígíí yidoołchxǫǫł bá ndaalʼaʼii nihinásʼá. Jó, nihibąąhági átʼéii éí tʼóó ahayóí. O Bóhólníihii, daʼ doósh bíighah da ná háchįʼígíí nihitsʼą́ąjįʼ kónánídléehgo? Áajįʼ ahoolzhiizhgo nihizaad kódaatʼée dooleeł.

38 Jó ndi, nanihiʼdinitaahgo bá hooʼaʼ yę́ę kʼad biláahgo ahoolzhiizh; nihitah nohsingo biyiʼ yisdádooháłę́ę ałtso ayííłką́ kʼad éí hoolʼáágóó doo bíighah da silį́į́ʼ, dóó atínihidíʼdoolníłígíí éí kʼad tʼáá aaníí; aooʼ, háálá tʼáadoo leʼé tsʼídá doo bikʼídooháałii bíká ádaahtʼį́įgo nihiníłką́; dóó nihí chʼééh ił hózhǫ́ bíká ádaahtʼįįd bąąhági átʼéii biyiʼ, éí éí ayóó átʼáo Hoolʼáágóó Ataaʼ bitsʼą́ą́dę́ʼígíí bitsʼą́ąjįʼ átʼéii átʼé.

39 O nihí diné díí kéyahdóó nohłíinii, shizaad dadidoohtsʼį́łę́ę! Dóó Bóhólníihii bá háchįʼ nihitsʼą́ąjįʼ kódoolníłę́ę nisingo sodiszin, dóó niheʼiinaʼ łahgo áńdadoohdlíłę́ę dóó yisdádahidookahą́ą nisin.