Scriptures
Helaman 16


An Libro ni Helaman

Kapitulo 16

An manga Nephite na nagturubod ki Samuel binunyagan ni Nephi—Si Samuel dai nagagadan kan saindang manga pana asin gapo—An iba pinataragas an saindang manga puso, asin an iba nakahiling nin manga anghel—An manga dai nagtuturubod nagsabi na bakong katanusan an magtubod ki Cristo asin sa saiyang pag-abot sa Jerusalem. Manga 6–1 B.C.

1 Asin ngonian, uminagi an panahon na dakol an nakadangog kan manga tataramon ni Samuel, na Lamanite, na saiyang itinaram sa ibabaw kan muralya kan siudad. Asin kun gurano kadakol kan nagturubod kan saiyang manga tataramon iyo man an nagduruman asin nagharanap ki Nephi; asin kan duman na sinda asin nakua na siya, sinda nagkurumpisal sa saiya kan saindang manga kasalan asin ta dai nag-inda, nagmamawot na tibaad sinda mabunyagan sa Kagurangnan.

2 Alagad kun gurano kadakol an dai nagturubod sa manga tataramon ni Samuel iyo man an nagkaaranggot saiya; asin ta siya ginarapo sa ibabaw kan muralya, asin man dakol an manga nagparana sa saiya kan siya nagtitindog sa ibabaw kan muralya; alagad an Espiritu kan Kagurangnan yaon saiya, kaya dai siya ninda natamaan kan saindang manga gapo asin kan saindang manga pana.

3 Kaya kan saindang nahiling na dai siya ninda natatamaan, orog na kadakol pa an nagturubod sa saiyang manga tataramon, kaya sinda nagduruman ki Nephi tanganing magpaburunyag.

4 Huli totoo, na si Nephi nagbubunyag, asin nagpopropesia, asin naghuhulit, nagkukurahaw nin pagsolsol sa manga tawo, nagpapahiling nin manga tanda asin manga ngangalasan, naggigibo nin manga milagro sa manga tawo, tanganing saindang maaraman na an Cristo madali nang umabot—

5 Sinasabihan sinda kan manga bagay na madali nang umabot, tanganing saindang maaraman asin marumdoman sa panahon kan pag-abot kan manga ini na ipinaaram na sa sainda sa enot pa, sa katuyohan na tibaad pa na sinda magturubod; kaya kun gurano kadakol an nagturubod kan manga tataramon ni Samuel iyo man an nagduruman sa saiya na magpabunyag, huli ta nagduruman sinda na nagsosorolsol asin nagkukurumpisal kan saindang manga kasalan.

6 Alagad an kadakolan sa sainda dai nagturubod sa manga tataramon ni Samuel; kaya kan saindang mahiling na dai siya ninda natatamaan kan saindang manga gapo asin kan saindang manga pana, sinda nagkururahaw sa saindang manga kapitan, na an sabi: Dakopon an tawong ini asin siya gaposon, huli ta hilinga igwa siyang demonio; asin huli sa kapangyarihan kan demonio na nasa sa saiya dai ta siya natatamaan kan satuyang manga gapo asin kan satuyang manga pana; kaya siya dakopon asin gaposon, asin darahon sa harayo.

7 Asin kan sinda nagrarani tanganing siya kapotan, totoo na siya luminukso hali sa muralya asin nagdulag paharayo sa saindang daga, iyo, sagkod sa saiyang sadiring banwaan, asin nagpoon na magbalangibog asin magpropesia sa saiyang sadiring manga tawo.

8 Asin pagkatapos dai na siya nadangog pa sa manga katiripunan kan manga Nephite; asin siring an manga gibo-gibo kan manga tawo.

9 Asin sa siring natapos an walong pulo may anom na taon na pamahala kan manga hukom sa manga tawo ni Nephi.

10 Asin sa siring natapos an walong pulo may pitong taon na pamahala kan manga hukom, an kadakolan kan manga tawo danay na nasa saindang kapaharo-haralangkawon asin kasumbikalan, asin an diit na kabtang maingat na naglalakaw sa atubangan kan Dios.

11 Asin iyo man ini an kamugtakan sa laog kan walong pulo may walong taon na pamahala kan manga hukom.

12 Asin nagkaigwa man alagad diit sana na pagbabago sa manga gibo-gibo kan manga tawo, asin an manga tawo nagpoon na maging orog na matagas sa kasumbikalan asin orog pa na naggiribo nin kasalungat sa manga katugonan kan Dios, sa laog kan ika-walong pulo asin siyam na taon kan pamamahala kan manga hukom.

13 Alagad ta uminagi an panahon na sa ika-siyam na pulo na taon kan pamamahala kan manga hukom, nagkaigwa nin darakula na tanda na itinao sa manga tawo, asin manga ngangalasan; asin an manga tataramon kan manga propeta nagpoon nang mautob.

14 Asin an manga anghel nagpahiriling man nanggad sa manga tawo, madudunong na manga tawo, asin nagrukyaw sa sainda nin maogmang manga bareta nin dakulang kaogmahan; sa siring, sa taon na ini an manga kasuratan nagpoon na mautob.

15 Siring man, an manga tawo nagpoon na magpataragas kan saindang manga puso, gabos apuera sa manga talagang nagtuturubod na kabtang ninda, maging sa manga Nephite asin man sa manga Lamanite, asin nagpoon na magsarig sa saindang sadiring kusog asin sa saindang sadiring kadunungan, na an sabi:

16 Manga magkapirang bagay na saindang naokodan nin tama, sa kadakolan; alagad totoo samuyang aram na an gabos kaining darakula asin makangangalas na manga gibo na sinabi na dai mangyayari.

17 Asin ta nagpoon sinda na magirisip-isip asin magpasuruhay sa saindang sadiri, na an sabi:

18 Na bakong tanos na kaisipan na an sarong tawo na siring sa sarong Cristo maabot; kun iyo man, asin siya an Aki kan Dios, an Ama kan kalangitan asin kan kinaban, siring sa sinabi na, ngata ta dai niya ipahiling an saiyang sadiri sa satuya siring man sa sainda na nasa Jerusalem?

19 Iyo, ngata ta dai niya ipahiling an saiyang sadiri digdi sa daga na ini siring man sa daga kan Jerusalem?

20 Alagad totoo, satuyang aram na ini maraot na kapanondan, na iginawad sa satuya kan satuya na manga kamagurangan, tanganing kita magturubod sa sarong dakula asin makangalas na bagay na maabot, alagad bako digdi sa satuya, alagad sa daga na nasa harayo, sarong daga na dai ta midbid; kaya papapagdanayon kita sa kamangmangan, huli ta dai mahihiling kan satuyang sadiring manga mata na an manga ini totoo.

21 Asin sinda, sa paagi kan tuso asin misteriosong manga paagi kan diablo, magibo nin sarong dakula na ngangalasan na dai niato nasasabotan, na magpupugol sa satuya tanganing magi kitang oripon kan saindang manga tataramon, asin man saindang oripon, huli ta masararig kita sa sainda na kita tukdoan kan tataramon; asin sa siring papapagdanayon kita sa kamangmangan kun satuyang itutugot an satuyang buhay sa sainda, sa gabos na aldaw kan satuyang manga buhay.

22 Asin kadakol pang manga bagay an inirisip kan manga tawo sa saindang manga puso, na manga kabuahan asin manga daing kamugtakan; asin sinda nagkarilibong na gayo, huli ta si Satanas binukag sinda na danay na maggibo nin mararaot; iyo naglibot siya na nagkakalat nin manga paglibak asin pagpasuruhay sa ibabaw kan daga, tanganing saiyang mapatagas an manga puso kan manga tawo laban sa kun ano an marahay asin sa kun ano an maabot.

23 Asin sa ibong kan manga tanda asin manga ngangalasan na naginibo sa katiripunan kan manga tawo kan Kagurangnan, asin idtong kadakol na manga milagro na saindang naginibo, nakapotan pa nin makusog ni Satanas an manga puso kan manga tawo sa ibabaw kan gabos na daga.

24 Asin sa siring natapos an ika-siyam na pulong taon kan pamahala kan manga hukom sa manga tawo ni Nephi.

25 Asin sa siring natapos an libro ni Helaman, susog sa kasuratan ni Helaman asin kan saiyang manga aking lalaki.