1 Asin ngonian ta uminagi an panahon sa ika-walong pulo may anom na taon, an manga Nephite nagdanay man giraray sa saindang kasumbikalan, iyo, sa dakulang kasumbikalan, alagad an manga Lamanite tunay na nagsunod sa katugonan kan Dios, sunod sa katugonan ni Moises.

2 Asin ta uminagi an panahon, na sa taon na ini, igwang sarong Samuel, sarong Lamanite, na uminabot sa daga kan Zarahemla, asin nagpoon na maghulit sa manga tawo. Asin ta uminagi an panahon na siya naghulit, nin dakol na manga aldaw, nin pagsolsol sa manga tawo, asin siya saindang pinahali, asin siya mabalik na kuta sa saiyang sadiring daga.

3 Alagad uya, an tingog kan Kagurangnan uminabot sa saiya, na magbalik giraray siya, asin magpropesia sa manga tawo kan ano man na bagay na umabot sa saiyang puso.

4 Asin ta uminagi an panahon na dai siya ninda tinugotan na maglaog sa siudad; kaya siya nagduman asin nagsakat sa muralya kaidto, asin inunat niya an saiyang kamot asin nagkurahaw sa sarong makusog na tingog, asin nagpropesia sa manga tawo kan ano man na manga bagay na ibinugtak kan Kagurangnan sa saiyang puso.

5 Asin siya nagsabi sainda: Magdangog, ako, si Samuel, sarong Lamanite, nagtataram kan manga tataramon kan Kagurangnan na saiyang ibinugtak sa sakuyang puso; asin magdangog ibinugtak niya ini sa sakuyang puso tanganing isabi sa manga tawong ini na an espada nin kapantayan nakabitin sa tangod kan manga tawong ini; asin dai pang apat na gatos na taon an maagi bago an espada kan kapantayan mahuhulog sa manga tawong ini.

6 Iyo, labi-labing pagkarumpag an naghahalat sa manga tawong ini, asin maabot nanggad ini sa manga tawong ini, asin daing makakaligtas sa manga tawong ini kundi an pagsolsol asin an pagtubod sa Kagurangnan na Jesu-Cristo, na maabot nanggad sa mundo, asin magtitios nin dakol na manga bagay asin gagadanon para sa saiyang manga tawo.

7 Asin totoo nanggad, na sarong anghel nin Kagurangnan an nagsabi kaini sakuya, asin siya nagdara nin maogmang manga bareta sa sakuyang kalag. Asin totoo nanggad, ipinadara ako sa saindo tanganing ibalangibog man ini sa saindo, tanganing magkaigwa kamo nin maogmang manga bareta; alagad ta totoo na dai ako nindo inako.

8 Kaya, siring an sabi kan Kagurangnan: Huli sa katagasan kan manga puso kan manga tawo kan manga Nephite, sagkod na sinda magsorolsol sakuyang babawion sa sainda an sakuyang tataramon, asin hahalion ko an sakuyang Espiritu sa sainda, asin dai ko na sinda titioson pa, asin bibirikon ko an manga puso kan saindang manga katugangan laban sa sainda.

9 Asin dai makakaagi an apat na gatos na taon na dai ko gibohon na sinda mapadurusahan; iyo, sakuyang dadalawon sinda kan espada asin tag-gutom asin kahilangan.

10 Iyo, sakuyang dadalawon sinda sa sakuyang makangurungirhat na kaanggotan, asin igwa sa ika-apat na kapagarakian na mabubuhay, sa saindong manga kaiwal, na makakahiling kan lubos nindong pagkarumpag; asin ini maabot nanggad kun dai kamo magsorolsol, sabi kan Kagurangnan; asin idtong nasa ika-apat na kapagarakian magdadara saindo kan saindong pagkarumpag.

11 Alagad kun kamo magsorolsol asin magbaralik sa saindong Kagurangnan na Dios hahalion ko an sakuyang kaanggotan, sabi kan Kagurangnan; iyo, siring an sinabi kan Kagurangnan, paladan idtong manga magsosorolsol asin magbabaralik sa sakuya, alagad herak man saiya na dai magsolsol.

12 Iyo, herak man sa dakulang siudad kan Zarahemla; huli totoo, na huli sa manga matatanos kaya idto naligtas; iyo, herak man sa dakulang siudad na ini, huli ta sakuyang nahihiling, sabi kan Kagurangnan, na dakol, iyo, an kadakulaan na kabtang kan dakulang siudad na ini, magpapataragas kan saindang manga puso sa sakuya, sabi kan Kagurangnan.

13 Alagad paladan sinda na magsosorolsol, huli ta sinda sakuyang iririligtas. Alagad totoo, na kun bako sa manga matatanos na anion sa dakulang siudad na ini, hilinga, sakuyang gigibohon na an kalayo bumaba hali sa langit asin rumpagon ini.

14 Alagad totoo nanggad, ini huli sa manga matatanos kaya naligtas. Alagad totoo, an panahon maabot, sabi kan Kagurangnan, na kun an matatanos pahahalion nindo sa saindo, saka kamo magiging hinog sa pagkarumpag; iyo, herak man sa dakulang siudad na ini, huli kan kasumbikalan asin karumpotan na yaon sa saiya.

15 Iyo, asin herak man sa siudad kan Gedeon, huli kan kasumbikalan asin karumpotan na yaon sa saiya.

16 Iyo, herak man sa manga siudad na nasa dagang parilibot, na nasasadiri kan manga Nephite, huli kan kasumbikalan asin karumpotan na yaon sainda.

17 Asin totoo, sarong sumpa an maabot sa daga, sabi kan Kagurangnan nin manga Hukbo, huli kan manga tawo na nasa daga, iyo, huli sa saindang kasumbikalan asin manga karumpotan.

18 Asin ta maagi an panahon, sabi kan Kagurangnan nin manga Hukbo, an satuyang dakula asin totoong Dios, na an siisay man na magtago nin manga kayamanan sa daga dai na ninda makukua an manga idto giraray, huli sa dakulang sumpa kan daga, apuera kun siya matanos na tawo asin itago idto sa Kagurangnan.

19 Huli ta boot ko, sabi kan Kagurangnan, na sinda magtarago kan saindang manga kayamanan sa sakuya; asin isurumpa sinda na dai magtarago kan saindang manga kayamanan sa sakuya, huli ta daing nagtatago kan saindang manga kayamanan sa sakuya kundi idtong matatanos; asin siya na dai magtago kan saiyang manga kayamanan sa sakuya, siya isusumpa, asin man an kayamanan, asin daing siisay man na makakatubos kaidto huli sa sumpa kan daga.

20 Asin an aldaw maabot na itatarago ninda an saindang manga kayamanan, huli ta ibinurugtak na ninda an saindang manga puso sa saindang manga kayamanan; asin huli ta ibinurugtak na ninda an saindang manga puso sa saindang manga kayamanan, asin itatarago ninda an saindang manga kayamanan sa pagdurulag ninda sa saindang manga kaiwal; huli ta dai ninda itatarago an manga idto sa sakuya, isusurumpa sinda asin an sainda man na manga kayamanan; asin sa aldaw na iyan sinda papadurusahan, sabi kan Kagurangnan.

21 Magdarangog kamo, manga tawo kan dakulang siudad na ini, asin maghirinanyog kan sakuyang manga tataramon; iyo, maghirinanyog kan manga tataramon na sinasabi kan Kagurangnan; huli totoo, sinasabi niya na isinurumpa kamo huli sa saindong manga kayamanan, asin man an saindong manga kayamanan isinurumpa huli ta ibinurugtak nindo an saindong manga puso sa manga idto, asin dai nagsurunod sa saiyang manga tataramon na nagtao kan manga idto sa saindo.

22 Dai nindo rinurumdom an Kagurangnan na saindong Dios sa manga bagay na saiyang binalaog sa saindo, alagad danay nindo na rinurumdom an saindong manga kayamanan, bako an magpasalamat sa Kagurangnan na saindong Dios huli kan manga idto; iyo, an saindong manga puso bakong pasiriring sa Kagurangnan, kundi an manga ini nagtataralubo sa dakulang kapaabawan, sagkod sa paghambog, asin sagkod sa dakulang pagtalubo, manga pag-uri, manga pagpasuruhay, manga karaksotan, manga pag-uusig, asin manga panggadan, asin gabos na paagi nin kasumbikalan.

23 Huli kaini an Kagurangnan na Dios papangyarihon na umabot an sarong sumpa sa daga, asin man sa saindong manga kayamanan, asin ini huli sa saindong manga kasumbikalan.

24 Iyo, herak man sa manga tawong ini, huli sa panahon na ini na uminabot, na pinapahali nindo an manga propeta, asin pinagtuturuya-tuya sinda, asin sinda ginagarapo, asin sinda ginagaradan, asin sinda ginigiribohan nin gabos na paagi nin kasumbikalan, siring sa giniribo ninda kaidtong panahon.

25 Asin ngonian, kun kamo nagtataram, sinasabi nindo: kun an satuyang manga aldaw nasa manga aldaw kan satuyang kamagurangan kan panahon, dai ta kuta ginaradan an manga propeta; dai ta kuta sinda ginarapo, asin pinaharali.

26 Totoo kamo orog pa sa sainda; huli ta sagkod na an Kagurangnan nabubuhay, kun an sarong propeta umabot sa saindo asin ibalangibog sa saindo an tataramon kan Kagurangnan, na magpapatotoo kan saindong manga kasalan asin manga kasumbikalan, kamo magkakaaranggot saiya, asin saindong papaharalion siya, asin maharanap nin gabos na paagi na siya magadan; iyo, sasabihon nindo na siya sarong bakong totoong propeta, asin ta siya sarong parakasala, asin sa demonio, huli ta siya nagpapatotoo na an manga gibo nindo mararaot.

27 Alagad totoo, kun sarong tawo an umabot sa saindo asin magsabi: Gibohon ini, asin daing kasumbikalan; gibohon idto asin dai ka man magtitios; iyo, masabi siya: Lakaw sunod sa ikaoomaw kan saindong manga puso; iyo, lakaw sunod sa ikaoomaw kan saindong manga mata, asin gibohon an ano man na minamawot kan saindong manga puso—asin kun igwang sarong tawo na umabot sa saindo asin sabihon ini, aakoon nindo siya asin sasabihon na siya sarong propeta.

28 Iyo, siya oomawon nindo asin siya tatawan nindo kan saindong pagkabuhay; tatawan nindo siya kan saindong bulawan, asin kan saindong manga plata, asin siya susulotan nindo nin manga mamahalon na gubing; asin huli ta siya nagsasabi nin manga putik na pag-omaw na manga tataramon sa saindo, asin nagsasabi siya na an gabos marahay, kaya dai kamong makukuang maraot saiya.

29 O kamo na masumbikal asin maraksot na kapagarakian; kamo na matatagas asin manga sutil na manga tawo, gurano kahalawig sa paghuna nindo na titioson kamo kan Kagurangnan? Iyo, gurano kahalawig na tutugotan nindo an sadiri nindo na madara kan kablas asin buta na manga paraantabay? Iyo, gurano kahalawig na pipilion nindo an kadikloman ki sa liwanag?

30 Iyo, totoo, na an kaanggotan kan Kagurangnan nagpoon na sa saindo; totoo na saiyang isinumpa an daga huli sa saindong kasumbikalan.

31 Asin totoo, an panahon maabot na saiyang isusumpa an saindong manga kayamanan, na an manga ini magiging mahalnas, na dai na nindo makakapotan an manga ini; asin sa aldaw kan saindong kadukhaan dai na nindo an manga ini makukua pa.

32 Asin sa aldaw kan saindong kadukhaan kamo magkukurahaw sa Kagurangnan; asin ta daing kamugtakan an saindong pagkurahaw, huli ta an saindong pagmundo uminabot na sa saindo, asin an saindong pagkarumpag nakatakda na; asin saka kamo magtatarangis asin mag-aaragrangay sa aldaw na iyan, sabi kan Kagurangnan nin manga Hukbo. Asin saka na kamo magmumurundo, asin masarabi:

33 O kun ako nagsolsol, asin dai nanggadan kan manga propeta, asin naggapo sa sainda, asin nagpahali sa sainda. Iyo, sa aldaw na iyan masabi ka: O kun satuyang rinumdom an Kagurangnan na satuyang Dios kan aldaw na itinao niya satuya an satuyang manga kayamanan, asin kutana dai an manga ini naging mahalnas tanganing nagkawarara niato an manga ini; huli totoo, an satuyang manga kayamanan nawara sa satuya.

34 Hilinga, nagburugtak kita nin gamit digdi asin sa pagkaaga dai na; hilinga an satuyang manga espada kinurua sa satuya sa aldaw na hinaharanap niato an manga idto para sa labanan.

35 Iyo, satuyang itinarago an satuyang manga kayamanan asin an manga ini nagkawarara sa satuya, huli sa sumpa sa daga.

36 O kuta nagsorolsol na kita sa aldaw na an tataramon kan Kagurangnan uminabot sa satuya; huli totoo an daga isinumpa, asin an gabos na manga bagay naging mahalnas, asin dai na niato makakapotan an manga ini.

37 Hilinga, kita napapalibotan nin manga demonio, iyo kita napapalibotan kan manga anghel niya na naghaharanap na raoton an satuyang manga kalag. Totoo, an satuyang manga kasumbikalan kadakula. O Kagurangnan, dai mo daw mahahali an saimong kaanggotan sa samuya? Asin iyo ini an magiging manga tataramon nindo sa manga aldaw na iyan.

38 Alagad totoo, an manga aldaw kan pagbalo saindo nakaagi na; pinaliman-limanan nindo an aldaw kan saindong kaligtasan sagkod na idto naging daing katapusan na pagkahuri, asin an saindong pagkarumpag itinakda na; iyo, huli ta kamo nagharanap sa gabos na aldaw kan saindong manga buhay kan manga dai man nindo makukua; asin kamo nagharanap nin kaogmahan sa paggibo nin kasumbikalan, na bagay na salungat sa kun ano an katanusan na nasa satuyang dakula asin Daing-Kasagkuran na Pamayo.

39 O kamong manga tawo kan daga, lugod magdangog kamo kan sakuyang manga tataramon! Asin ipinapamibi ko na an kaanggotan kan Kagurangnan mahali man sa saindo, asin lugod kamo magsorolsol asin makariligtas.