1 Vacami cʼa, vachʼalal ri ix nucʼuʼxlan, ninkʼalajirisaj chivech chi vi man xtitzolin ta pe icʼuʼx, ri ivachoch can xquemalix vi can chivech.

2 Kitzij cʼa chi vi man nitzolin ta pe icʼuʼx, ri ivixjayilal cʼo na cʼa chi janíla xqueʼokʼ tok xqueʼalan. Roma rix xtivajoʼ xquixanimej. Man riqʼuin vi riʼ, man xtivil ta cʼa acuchi xtivevaj vi iviʼ. Kitzij cʼa, joʼoc quivech ri xa jubaʼ chic man yeʼalan, roma janíla ri calal, y romariʼ tok man xquetiquir ta chic xqueʼanimej. Roma cʼariʼ, rijeʼ xquepalibex can y xquemalix can richin xquecom.

3 Kitzij cʼa chi joʼoc quivech re vinakul reʼ ri xquibiniʼaj ri ruvinakul ri Nefi, vi man xtitzolin ta pe quicʼuʼx tok xqeuquitzʼet re retal y re meyel tak cʼutbel reʼ ri xquekʼalajirisex chiquivech. Roma can kitzij vi chi rijaʼ e jun vinakul can e chaʼon vi roma ri Ajaf. Kitzij cʼa chi rijaʼ janíla e rajovan pe ri ruvinakul ri Nefi, y chukaʼ e ruchʼolin chupan ri kʼij tok itzel xquibanalaʼ. Y rijaʼ yeruchʼolij roma can yerajoʼ vi.

4 Jacʼa kitzij vachʼalal chi rijaʼ e retzelan ri Lamaniʼ roma can jutakel vi quibanalon ri itzel. Quereʼ quibanalon roma ri itzel tak banobel e quinakʼisan ri catiʼt quimamaʼ ojer. Man riqʼuin vi riʼ, ri colotajic apovinek chic quiqʼuin rijeʼ roma ja ri Nefiʼiʼ xechʼabalin chique. Roma cʼariʼ, ri Ajaf ruyalojisan ri quikʼij.

5 Yin ninvajoʼ cʼa chi rix nitzʼet chi janíla chique rijeʼ quitzekelben cʼa ri bey richin ri lokʼolej quisamaj, y can choj vi yecʼaseʼ chuvech ri Dios, y niquitij quikʼij richin yequitakej ri rupixaʼ, y ri rupixabanic, y ri rukʼatoj tzij achiʼel cʼa nrajoʼ ri rupixaʼ ri Moisés.

6 Kitzij cʼa ninbij chive chi can janíla vi qʼuiy chique rijeʼ niquiben quereʼ vacami, y man yetaneʼ ta richin niquitij quikʼij chi utzil richin yequitijoj ri chʼakaʼ chic cachʼalal chire ri etamabel richin ri kitzij. Roma cʼariʼ tok e cʼo e qʼuiy vinek ri yeʼoc pe quiqʼuin kʼij kʼij.

7 Can kitzij vi, rix ivetaman chukaʼ, roma can itzʼeton vi, chi e janíla chique rijeʼ e tijon chic chire ri kitzij, y quetaman chic chiquij ri itzelilej y tzʼilolej nakʼisan tak banobel quichin ri catiʼt quimamaʼ. Rijeʼ e tijon richin chi niquinimaj ri lokʼelej tzʼibanic y ri lokʼolej rutzijol quichin ri e yaʼol lokʼolej rutzijol ri e tzʼibatel can. Jariʼ yequitijoj rijeʼ chire ri cukubabel cʼuʼx riqʼuin ri Ajaf, y chukaʼ chire ri tzolibel cʼuʼx. Ri cukubabel cʼuʼx riʼ y ri tzolibel cʼuʼx riʼ, jariʼ yebanon richin nijalatej ri cánima.

8 Roma cʼariʼ, rix ivetaman chi e jampeʼ na chique rijeʼ ri quereʼ quibanon can, xa can e cof vi e cʼo, y e chʼiquiban chic riqʼuin ri kitzij tijonic, y riqʼuin achique ri solcopiyon pe quichin.

9 Chukaʼ ivetaman chi rijeʼ e quimukun chic can ri quitoʼbal richin camisanel oyoval, y niquixibij quiʼ richin yequichop chi el. Roma riqʼuin jubaʼ xquemacun vi queriʼ niquiben. Kitzij cʼa chi nitzʼet chi rijeʼ niquixibij chic quiʼ richin yemacun. Can kitzij vi, rijeʼ xtiquiyaʼ cʼa kʼij richin xquepalibex y xquecamisex coma ri quetzelanelaʼ, y man xquequiyec ta chic ri quitzaqʼuibal chiquij rijeʼ. Ronojel reʼ niquiben roma cʼo quicukubabel cʼuʼx riqʼuin ri Cristo.

10 Vacami cʼa, can kitzij vi, ri Ajaf xqueruturusaj cʼa y xqueruyalojirisaj ri quikʼij, stapeʼ cʼa quibanolon can ri itzel. Jariʼ, roma chʼiquiban ri quinojibal rijeʼ tok niquinimaj achique ri niquinimaj, y roma ri cuchukʼaʼ chupan ri quinimanic tok e sakirisan chic.

11 Kitzij chi stapeʼ cʼa vi xquetzak can roma manjun chic niquinimalaʼ, ri Ajaf can cʼa xqueruyalojirisaj na ri quikʼij rijeʼ, cʼa tok xtapon na ri kʼij achojchij xechʼo vi ri e katataʼ, y chukaʼ ri yaʼol lokʼolej rutzijol Zenos y qʼuiy chʼakaʼ chic e yaʼol lokʼolej rutzijol. Rijeʼ xechʼo chirij ri kʼij tok ri kachʼalal Lamaniʼ xquetzolin pe chic chupan ri etamabel richin ri kitzij.

12 Kitzij nibij chive chi chupan ri ruqʼuisibel tak kʼij, ri rusujunic ri Ajaf can e yaʼon vi pe chique ri kachʼalal Lamaniʼ. Stapeʼ cʼa xtiquitij qʼuiy pokonal, y xqueʼokotex quereʼ y quelaʼ chuvech re ruvachʼulef, y quelaʼ chuvech re ruvachʼulef y xquecanolox, y xquesocotej, y xquequiratej, y manek acuchi xtiquevaj vi quiʼ, ri Ajaf can cʼa xtujoyovaj na quivech.

13 Jariʼ, xa achiʼel cʼa nukʼalajirisaj ri lokʼolej rutzijol ri nubij chi rijeʼ can xquetijox vi cʼa chire ri kitzij etamabel. Jariʼ cʼa ri etamabel chirij ri Lokʼolej Quelesanel pa mac, y ri nimalej y kitzij quiyukʼunel. Cʼa cʼariʼ, xqueʼajilex can quiqʼuin ri rucarneʼl rijaʼ.

14 Roma cʼariʼ, ninbij chive chi janíla utzil xtibanatej chique rijeʼ chuvech ri xtibanatej chive rix, vi man nitzolin ta pe icʼuʼx.

15 Rijeʼ xetzak can roma manjun chic niquinimalaʼ, coma cʼa ri nakʼisan tak banobel quichin can ri catiʼt quimamaʼ. Can kitzij vi, ri nimalej tak samaj ri e kʼalajirisatajinek can chivech rix, vi ta xekʼalajirisex chiquivech rijeʼ, ja rix can nitzʼet vi chi manjun chic niquinimalaʼ.

16 Roma cʼariʼ, quereʼ xubij ri Ajaf: Man xquenvulaj ta rijeʼ jumul. Xa pa ri kʼij ri ninvajoʼ yin, can xtinben vi chi xquetzolin pe chic viqʼuin, nichaʼ ri Ajaf.

17 Vacami cʼa, quereʼ nubij ri Ajaf chiquij ri vinakul Nefiʼiʼ: Vi rijeʼ man nitzolin ta pe quicʼuʼx, y man niquitij ta quikʼij richin niquiben ri nurayibal yin, cʼariʼ xquenvulaj can jumul, nichaʼ ri Ajaf. Roma rijeʼ man niquinimaj ta stapeʼ cʼa e nubanon e qʼuiy nimalej tak samaj chiquicojol. Can jic vi chi qʼues ri Ajaf, y quereʼ chukaʼ can jic vi xquebanatej ronojel reʼ, nicha ri Ajaf.