1 Xcʼulvachitej cʼa chi ri Samuel ri jun aj Lamaniʼ xeruyaʼ qʼuiy chic lokʼolej tak rutzijol ri manek banel chi yetzʼibex can.

2 Can kitzij vi, rijaʼ quereʼ xubij chique: Vaveʼ cʼa, ninyaʼ chive jun retal. Roma xaxe chic xtikʼax voʼo junaʼ, y jariʼ tok xtipe ri Rucʼajol ri Dios richin yerelesaj pe pa mac conojel ri yeniman richin ri rubiʼ.

3 Can kitzij vi cʼa, jareʼ ri retal ri xtinyaʼ chirij ri rupetebal. Roma can kitzij vi, xquecʼojeʼ nimalej tak sakil chicaj. Pa ri akʼaʼ tok cʼa manjani talex rijaʼ, can man xtikʼekumer ta. Riqʼuin cʼariʼ, nitzuʼun chiquivech ri vinakiʼ achiʼel vi ta xa pa kʼij.

4 Roma cʼariʼ, xtikʼax jun kʼij y jun akʼaʼ y jun chic kʼij, achiʼel vi ta xaxe jun kʼij y manek akʼa, y ja cʼareʼ jun retal chive. Roma rix xtitzʼet chi nel pe ri kʼij y chukaʼ nikaka chic. Roma cʼariʼ tok rix can jic vi xtivetamaj chi yekʼax caʼi kʼij y jun akʼa. Man riqʼuin vi riʼ, man xtikʼekumer ta chakʼaʼ. Ja cʼariʼ ri akʼaʼ ri nunabiyej ri kʼij tok xtalex rijaʼ.

5 Can kitzij vi cʼa, xtitzuʼun pe jun cʼacʼaʼ chʼumil ri man junan ta riqʼuin xabachique chic chʼumil ri itzʼeton can. Jacʼa chukaʼ reʼ jun chic retal chive.

6 Kitij cʼa chi man xaxe ta riʼ. Xa xquebanatej chukaʼ e qʼuiy retal y meyel tak cʼutbel chilaʼ chicaj.

7 Xticʼulvachitej cʼa chi rix xtimey ronojel reʼ y xtichʼobolaʼ rij y xquixtzak ka chuvachʼulef.

8 Chukaʼ xticʼulvachitej cʼa chi ri xtiniman richin ri rubiʼ ri Rucʼajol ri Dios can ja vi riʼ ri xticʼojeʼ ri rucʼaslen jumul.

9 Can kitzij vi, ri Ajaf riqʼuin ri rutakonaxel rubin chuve chi quipe cʼa iviqʼuin y tinbij chive re naʼoj reʼ. Kitzij cʼa chi rijaʼ in rutakon richin ninyaʼ re lokʼolej rutzijol reʼ chive rix, y rijaʼ quereʼ rubin chuve: Tachʼabalij quereʼ chique re vinek reʼ: Titzolin pe icʼuʼx y tichojmirisaj apon ri rubeyal ri Ajaf.

10 Vacami cʼa, xa roma yin in jun aj Lamaniʼ y nutzijon chive ri chʼabel ri xubij ri Ajaf chuve, y roma can cʼayef vi re chʼabel reʼ chive rix, cʼariʼ can yixoyover vi viqʼuin, y nitij ikʼij richin yinicamisaj, y xinivokotaj yan el chiʼicojol.

11 Man riqʼuin vi riʼ, xtivacʼaxaj ri nuchʼabel roma xaxe romariʼ tok in jotol pe vaveʼ pa ruviʼ ri rutzʼak ri tinamit richin queriʼ cʼo banel richin xtivacʼaxaj cʼa y xtivetamaj ri cʼajisabel richin ri Dios ri ix royoben can roma ri itzel ibanobal. Y chukaʼ richin xtivetamaj ri rubaniquil ri tzolibel cʼuʼx.

12 Y chukaʼ richin xtivetamaj cʼa chirij ri rupetebal ri Jesucristo, ri Rucʼajol ri Dios, ri Tataʼixel richin ri caj y ri ruvachʼulef, ri Tzʼucunel richin ronojel cʼa pa tok rutiquiribel pe. Y chukaʼ richin xtivetamaj chirij ri retal ri rupetebal rijaʼ richin queriʼ xtinimaj cʼa rubiʼ.

13 Vi ninimaj cʼa ri rubiʼ, xtitzolin pe icʼuʼx chupan ronojel ri imac richin queriʼ xquetojtej cʼa roma ri rutzil rijaʼ.

14 Vaveʼ cʼa chukaʼ ninyaʼ jun chic retal chive. Jareʼ ri retal richin ri rucamic.

15 Can kitzij vi chi cʼo chi xticom rijaʼ richin queriʼ, nibanatej ri colotajic. Rucʼamon y nicʼatzin chi rijaʼ nicom richin nibanatej ri cʼastajibel quichin ri caminakiʼ, richin queriʼ ri vinakiʼ xqueʼucʼuex chic riqʼuin ri Ajaf.

16 Jaʼ can kitzij vi, ri rucamic rijaʼ xtujek can ri cʼastajibel, y xquerusolocopij conojel ri vinakiʼ chupan ri nabey camic. Jariʼ ri camic richin ri uxlabel. Roma conojel ri vinakiʼ, xa roma ri rutzakinen ri Adán, can e elesan vi chic el riqʼuin ri Ajaf, y jariʼ xa achiʼel e caminek quichin ri chʼaculaj y chukaʼ quichin ri uxlabel.

17 Can kitzij vi, ri rucamic ri Cristo yerusolcopij pe ri vinakiʼ, jaʼ, conjel ri vinakiʼ, y yerucʼuaj chic jun bey riqʼuin ri Ajaf.

18 Chukaʼ nuqʼuen pe ri rubaniquil ri tzolibel cʼuʼx. Riqʼuin cʼareʼ, ri nitzolin pe rucʼuʼx man nicʼuk ta el y man nitorix ta ka pa kʼakʼ. Jacʼa ri man nitzolin ta rucʼuʼx can nicʼuk vi el y nitorix ka pa kʼakʼ. Chique cʼa rijeʼ nipe chic jun bey camic, jaʼ, ri camic richin ri uxlabel, y jariʼ jun rucaʼn camic. Roma rijeʼ yeʼelesex chic el jun bey riqʼuin ronojel ri chojmilal.

19 Roma cʼariʼ, titzolin pe icʼuʼx, titzolin pe icʼuʼx, roma vi ivetaman ronojel reʼ y man nitakej ta, jariʼ tok niben chi nipe ka ri cʼajisabel chivij y xquixkʼirirex ka pa re rucaʼn camic reʼ.

20 Vacami cʼa, can kitzij vi xinbij chive chirij ri jun chic retal, jariʼ ri retal ri rucamic. Can kitzij vi cʼa chi chupan ri kʼij tok xticom rijaʼ, xtikʼelkumer ruvech ri kʼij y man chic xtuyaʼ ta pe ri rusakil chive. Quereʼ cʼa chukaʼ xtiquiben ri icʼ y ri tak chʼumilaʼ. Y can oxiʼ kʼij man xticʼojeʼ ta manjun sakil chuvech re ruvachʼulef reʼ. Nitiquir ka pa ri kʼij tok nicom rijaʼ, cʼa pa ri kʼij tok nicʼastej pe chiquicojol ri caminakiʼ.

21 Chupan cʼa ri kʼij riʼ tok rijaʼ nicom, xquexibin cʼa ri cokolajay y ri coyopaʼ y can janíla xqueyaloj. Chukaʼ ri ruvachʼulef xtisolon y xtibaybot. Ri abej ri e cʼo chuvech re ruvachʼulef can xquepaxlan vi ka. Ja abej riʼ ri e cʼo ka chuxeʼ re ruvachʼulef y chukaʼ pa ruviʼ. Rix ivetaman chi vacami ri abej riʼ janíla e cof y chi qʼuiy chique e cof y janíla e nim.

22 Xquepaxlan cʼa pa tak nicʼaj y can benek vi ruvech xqueʼilitej e vopol chic, e paxinek, y e rucʼaj chic chuvech chijun re ruvachʼulef reʼ, pa ruviʼ y chukaʼ chuxeʼ.

23 Can kitzij vi chi xquebanatej xicʼanel tak cakʼikʼ y qʼuiy ri tzuputzuc tak juyuʼ xquekasex, xqueʼoc liʼan tak ulef, y e qʼuiy cʼojlibel ri quibiniʼan vacami liʼan tak ulef can xqueʼoc vi tzuputzuc tak juyuʼ ri can nej vi akʼanij xquejoteʼ vi.

24 E qʼuiy nimaʼk tak bey xquepaxitej can, y e qʼuiy tinamit xquemalix can.

25 E qʼuiy tak mukubel xquejakatej y xquequiyec pe qʼuiy chique ri quicaminakiʼ. Y e qʼuiy chojlaxelaʼ xtiquicʼut quiʼ chiquivech qʼuiy vinakiʼ.

26 Can kitzij vi cʼa, quereʼ rubin chuve ri takonaxel. Roma rijaʼ xubij chuve chi xquebanatej can cokolajay y coyopaʼ, y janíla xqueyaloj.

27 Rijaʼ xubij cʼa chuve chi tok xquebanatej ri cokolajay y ri coyopaʼ y ri nimalej cakʼikʼ, jariʼ tok xquecʼulvachitej cʼa can ronojel reʼ. Y xubij chi ri kʼekuʼm xtucuch cʼa chijun re ruvachʼulef reʼ oxiʼ kʼij.

28 Chukaʼ ri takonaxel xubij chuve chi qʼuiy vinek xquequitzʼetelaʼ chʼakaʼ chic cʼulvachitajic janíla e nimaʼk chiquivech re reʼ. Riqʼuin cʼariʼ, xtiquinimaj cʼa chi re retal reʼ y re meyel cʼutbel reʼ can xquecʼulvachitej vi chuvech chijun re ruvachʼulef reʼ. Que cʼariʼ, manek ta cʼa chic roma richin man ta niquinimaj ri calcʼual ri achiʼaʼ.

29 Xtibanatej cʼa ronojel reʼ richin queriʼ ri vinek ri xtiniman, xticolotej cʼa, y richin queriʼ jun chojmilej kʼatonic tzij xtipe ka pa quiviʼ ri man xqueniman ta. Que cʼa chukaʼ reʼ, vi xquecʼajisex rijeʼ, xa can je vi rijeʼ ri e cʼamayon ka chiquij ri quicʼajisabal.

30 Vacami cʼa vachʼalal, tokaʼ cʼa chiʼicʼuʼx, tokaʼ cʼa chiʼicʼuʼx chi ri xtisachtej can, xa nusech cʼa riʼ, y ri nibanon ri itzel, xa nuben ka chire rijaʼ. Roma can kitzij vi chi rix ix solcopin can. Niyaʼox cʼa kʼij chive richin niben ri nivajoʼ rix. Roma can kitzij vi, ri Dios ruyaʼon chive jun etamabel y ix rusolcopin can.

31 Rijaʼ ruyaʼon kʼij chive richin xtivetamaj cʼa ruvech ri utz y ri itzel. Chukaʼ ruyaʼon kʼij chive richin nichaʼ ri cʼaslen o ri camic. Cʼo cʼa banel richin chi vi niben ri utz, xquixtzolitej chic riqʼuin ri utz, o xtiban chi ri utz xtitzolix pe iviqʼuin. Cʼo cʼa chukaʼ banel richin chi vi niben ri itzel, que cʼariʼ xtiban chi ri itzel xtitzolix chic chive.