1 Hinataq, Lamanita Samuel aswan askha imaymanakunatawan unancharqan, manataq chaykuna qelqakuyta atikunmanchu.

2 Khaynatataq paykunaman nirqan: Huk señaltan qosqaykichis—pishqa watakunan hamunqa, hinamantaq Yayaq Churin hamunqa, sutinpi llapan kreyiqkunata kutichikapunanpaq.

3 Kaytan hamunan pachapi señalta hina qosqaykichis: Ancha hatun k’anchaykunan hanaqpachapi kanqa, hinataq hamunanpa ñawpaqenpa tutanpi mana tutayaq kanqachu, hinataq runaman rikhurinqa p’unchawllapas kanman hina.

4 Chhaynataq huk p’unchaw, huk tuta, huk p’unchawpiwan kanqa, huk p’unchawllapas mana tutayoq kanman hina; kaytaq qankunapaq señal kanqa; yachankichismi intiq lloqsimunanmanta haykunanmantapas; chhaynaqa, sut’intapunin yachanqaku ishkay p’unchaw huk tutapiwan kananmanta; chaypiwanpas manan tutaqa laqhayanqachu. Kaytaq Pay paqarinan ñawpaqen tutanpi kanqa.

5 Huk mosoq qoyllur rikhurimunqan, mana hayk’aqpas rikusqaykichis hina; kaypas señalmi qankunapaq kanqa.

6 Mantaqmi llapanchu kay, askha señalkuna, utirayanakunapiwanmi hanaqpachapi kanqa.

7 Llapaykichistaq utirayankichis, hinataq panpaman urmankichis.

8 Yayaq Churinpi tukuy iñeqtaq wiñay-wiñaypaq kawsayniyoq kanqa.

9 Khaynatan angelninwan Wiraqocha kamachimuwarqan, hamuspa qankunaman kay imaymanakunata willanaypaq; ari, kay imaymanakunata qankunaman unanchanaypaqmi Pay kamachiwarqan; ari, khaynatan Pay niwarqan: Yuyayniykichisman kutiriychis, Wiraqochaq ñannintataq allichaychis nispa kay runakunaman qaparimuy, nispa.

10 Kunantaq, lamanita kasqayrayku, Wiraqochaq kamachiwasqan simikunata qankunaman rimareqtiy, qankuna kontra k’araq kasqanraykupiwantaq, noqa kontra phiñarikurqankichis, wañuchiwaytataq mashkashankichis, qankuna chawpimantataq qarqowarqankichis.

11 Uyarinkichismi rimayniykunata, chayraykun kay llaqtaq perqankuna pataman seqamurqani, millay ruwayniykichisrayku Yayaq taripayninkuna qankunata suyasqan uyarinaykichispaq, yachanaykichispaqwan; yuyayman kutirimunapaq imayna kananta yachanaykichispaq ima;

12 Yayaq Churin Jesucristo, hanaqpachaq kay pachaqpiwan Taytan, qallariymantapacha llapan imaymanakuna Kamaqpa hamunanamanta yachanaykichispaqwan; hamuyninpa señalninkunamanta yachanaykichispaq ima, sutinpi kreyinaykichispaq.

13 Sutinpi kreyinkichis chayqa, llapan huchaykichiskunamantan kutirimunkichis, chhayna kaqtintaq, Paypa ruwayninkunawan huchaykichiskuna panpachayniyoq kanaykichispaq.

14 Yapamantataq, huk señalta qosqaykichis; ari, wañuyninmanta señalta.

15 Cheqaqtapunin Pay wañunan, qespiy hamunanpaq; allinmi Paypaq, nesitakuntaqmi Pay wañunan, wañusqakunaq kawsariyninkuta wakichinanpaq, Wiraqochaq ñawpaqenman runakuna apamusqa kanankupaq.

16 Ari, kay wañuymi kawsariyta apamun, ñawpaqkaq wañuymantataq lliw runakunata qespichimun—chay nunapi wañuymanta. Llapan runakunan Adanpa urmayninwan Wiraqochaq ñawpaqenmanta t’aqasqa kaspanku, kay pachapi imaymanakunamantapas, nunapi imaymanakunamantapas wañusqa hina kanku.

17 Ichaqa, Cristoq kawsariyninmi llapan runakunata qespichin, ari, llapan runakunata; Wiraqochaq ñawpaqenmantaq paykunata kutirichimun.

18 Ari, yuyayman kutirimunapaq ñantataq apamun; pipas yuyayman kutirimuqtaq mana wit’usqachu ninaman choqasqa kananpaq; ichaqa, yuyayman mana kutirimuqqa, wit’usqa kaspan ninaman choqasqa kapun; yapamantataq nunapi wañuy paykunaman hamun; ari, ishkaykaq wañuy, yapamantataq chanin kaq imaymanakunamanta paykuna wit’usqa kanku.

19 Chhaynaqa kutiriychis kutiriychis yuyayniykichisman, kaykunata yachaspa mana ruwaspaykichistaq kondenasionman haykumuyta ñak’ariwaqchis, kay ishkay kaq wañuyman apamusqa kaspa.

20 Ichaqa, huk señalmanta qankunaman nisqay hina, wañuyninmanta señal—chay wañunan p’unchawpiqa, intin tutayanqa, manataq qankunaman k’ancharimunqachu; hinallataq killapas qoyllurkunapas. Manataq k’anchay kay hallp’a patapi kanqachu, wañusqan pachamanta kinsa p’unchaw, wañusqakunamanta yapamanta sayarimusqan pachakama.

21 Ari, nunanta haywanan pachapiqa, askha horaskunan qhaqyakuna illapakunapiwan kanqa, hallp’ataq chhapchikunqa khatatatanqataq; kay hallp’a patapi kaq qaqakunataq, hallp’a patapi hallp’a ukhupiwan kaq qaqakunataq, kunanpacha mana ch’eqtasqa kasqanta yachasqaykichis, utaq chay qaqaq aswannin mana ch’iqtasqa kaqqa, ch’eqtakunqan;

22 Ari, ishkaypin ch’eqtakunqaku; chaymanta wiñaypaqtaq k’akrasqa, ch’eqtasqa, hallp’antinpi k’ullpikunapi p’akisqapiwantaq tarikunqa; ari, hallp’a patapipas hallp’aq ukhunpipas.

23 Sallallallaykunan kanqa, askha orqokunataq panpayachisqa kanqa qheshwakuna hina; kunanpacha qheshwakuna nispa waqyasqa askha hallp’akunataq ancha suni orqokunapi hatarinqaku.

24 Askha hatun ñankunan p’akisqa kanqa; askha llaqtakunataq purunyanqa.

25 Askha ayapanpakunataq kicharisqa kanqaku, askha wañuqninkunatataq haywanqaku; askha qollanan runakunataq askhaman rikhurimunqaku.

26 Khaynatan angel rimariwarqan, askha horaskunan qhaqyakuna, illapakuna kanqa, nispan niwarqan.

27 Paytaq niwarqan: Chay qhaqyakuna, illapakuna, sallallallaykunapiwan kaqtinmi kay imaymanakunaqa kanqa, tutayaqtaq hallp’antinta kinsa p’unchaw pakanqa, nispa.

28 Angeltaq niwarqan: Askha runakunan kaykunamanta aswan hatun imaymanakunata rikunqaku, kay señalkuna, kay ancha hatun utirayaykunapiwan, kay hallp’antinpi kananta kreyinankupaq; runakunaq wawankuna purapi mana-kreyina mana kananpaq.

29 Kaytaq kanqa, pipas kreyiq qespichisqa kananpaq; pipas mana kreyiqkunamantaq chanin taripay hamunanpaq; kundenasqa kanqaku chaytaq paykuna kikinku kundenasionninkuta apakamunku.

30 Kunantaq wawqeykuna, yuyariychis yuyariychis, pipas wañun chayqa, pay kikinpaqmi wañun; pipas millay kaqta ruwan chayqa, pay kikinmanmi chayta ruwan. Qespin kankichis, qankuna kikiykichismanta imatapas ruwanaykichispaq kacharisqan kankichis; yachaytan Yaya qorqasunkichis, qespitataq Pay ruwarqasunkichis

31 Allin kaqta mana-allin kaqmanta yachanaykichispaqmi qorqasunkichis, qorqallasunkichistaqmi kawsayta utaq wañuytapas akllanaykichispaq. Atinkichismi allin kaqta ruwaytapas, allin kaqman yapamanta sayarichisqa kanaykichispaq, utaq chay allin kaq qankunaman yapamanta qosqa kananpaq; utaq, millay kaqta ruwaytapas atiwaqchismi, chay millay kaq qankunaman yapamanta sayarichisqa kananpaq.