Судрууд
Мормоны Ном


Хиламаны Ном

Бүлэг 12

Хүмүүн тогтворгүй мөн мунхаг мөн хилэнцийг хийхдээ түргэн—Их Эзэн хүмүүсээ цээрлүүлдэг—Бурханы хүчтэй харьцуулахад хүмүүн юу ч биш—Шүүлтийн өдөр, хүмүүн үүрдийн амьдралыг эсвэл үүрдийн ялыг авах болно. Ойролцоогоор мэө 6 он.

1Мөн хүмүүний үрс ямар хуурамч, мөн түүнчлэн зүрх сэтгэл нь тогтворгүй болохыг бид тийн болгоож чадах буюу; тийм ээ, Их Эзэн өөрт нь найдлага тавьдаг тэднийг хэмжээлшгүй агуу сайн сайхнаараа адисалж мөн дэгжүүлэхийг бид харж чадна.

2Тийм ээ, мөн тэрээр өөрийн хүмүүсийг дэгжүүлэх чухам үед, тийм ээ, талбайг нь, бог болон бод малыг нь, мөн алт, мөн мөнгө, мөн бүх төрлийн мөн янз бүрийн уран хийц бүхий үнэт зүйлсийг зүйл бүрээр нь нэмэгдүүлэхэд; амийг нь хэлтрүүлж, мөн тэднийг дайснуудынх нь гараас чөлөөлөхөд; тэдний эсрэг дайн зарлахгүй байлгахын тулд дайснуудынх нь зүрхийг зөөллөхөд; тийм ээ, эцэст нь өөрийн хүмүүсийн сайн сайхан болон аз жаргалын төлөө бүх зүйлийг тэрээр хийхэд; тийм ээ, тэгэхэд тэд зүрх сэтгэлээ хатууруулж, мөн Их Эзэн Бурханаа мартаж, мөн Ариун Нэгэнийг хөл дороо дэвсэлдэг тийм цаг үе байдгийг бид харж болох бөлгөө—тийм ээ, мөн энэ нь тэдний амар хөнгөн амьдрал, мөн тэдний үлэмж агуу дэгжлийн учир бөлгөө.

3Мөн тийн бид Их Эзэн өөрийн хүмүүсийг олон зовлонгоор цээрлүүлэхгүй бол, тийм ээ, тэр тэдэнд үхлээр мөн аймшгаар, мөн өлсгөлөн болон бүх төрлийн тахлаар зочлохгүй бол, тэд түүнийг санадаггүйг бид ийн харлаа.

4Ай ямар мунхаг, мөн ямар хоосон, мөн ямар хилэнцэт, мөн чөтгөр шиг, мөн алдсыг үйлдэхдээ хичнээн хурдан, мөн сайныг үйлдэхдээ хичнээн удаан билээ, хүмүүний үрс; тийм ээ, хилэнцэт нэгний үгийг сонсохдоо, мөн зүрх сэтгэлээ дэлхийн хоосон зүйлүүд дээр тавихдаа хичнээн хурдан билээ!

5Тийм ээ, бардамналд хөөрөхдөө хичнээн хурдан бэ; тийм ээ, сагсуурахдаа, мөн алдас болох түүний бүх төрлийг хийхдээ хичнээн хурдан билээ; мөн Их Эзэн Бурханаа санахдаа, мөн түүний зөвлөмжүүдэд чих тавихдаа хичнээн удаан, тийм ээ, мэргэн ухааны замуудаар алхахдаа хичнээн удаан билээ!

6Болгоогтун, өөрсдийг нь бүтээсэн Их Эзэн Бурхан нь өөрсдийнх нь дээр захирахыг мөн засаглахыг тэд хүсдэггүй; тэдэнд түүний хандуулах агуу сайн сайхан хийгээд нигүүлсэл байсан хэдий ч, тэд түүний зөвлөмжүүдийг үл ойшоодог, мөн тэд түүнийг өөрсдийг нь хөтлөн дагуулагчаа байлгахыг хүсдэггүй.

7Ай хүмүүний үрс юу ч биш нь ямар агуу их билээ; тийм ээ, тэд бүр газрын тоосноос ч өчүүхэн билээ.

8Учир нь болгоогтун, газрын тоос бидний агуу их мөн үүрдийн Бурханы зарлигаар, хоёр хуваагдах хүртлээ нааш цааш хөдөлдөг.

9Тийм ээ, түүний дуунаар толгод болон уулс доргиж мөн хөдөлдгийг болгоогтун.

10Мөн түүний дуу хоолойн хүчээр тэдгээр нь хагарч, мөн тал болно, тийм ээ, бүр хөндий адил болно.

11Тийм ээ, түүний дуу хоолойн хүчээр бүхэл газар сэгсрэгдэх ажгуу;

12Тийм ээ, түүний дуу хоолойн хүчээр суурь нь, бүр чухамхүү төвдөө хүртэл хөдөлдөг.

13Тийм ээ, хэрэв тэрээр газарт хандан хэлж—Нүү—гэвэл энэ нь нүүнэ.

14Тийм ээ, хэрэв тэрээр дэлхийд хандан хэлж—өдрийг олон цагаар уртасгахын тул, чи буцаж яв—гэвэл, энэ нь хийгдсэн байна;

15Мөн тийн, түүний үгийн дагуу дэлхий буцаж явна, мөн энэ нь хүмүүнд нар хөдөлгөөнгүй зогсох мэт үзэгдэх бөлгөө; тийм ээ, мөн болгоогтун, энэ нь үүнчлэн байдаг; учир нь нар бус харин дэлхий хөдөлдөг нь гарцаагүй юм.

16Мөн болгоогтун, түүнчлэн, хэрэв тэрээр агуу их гүний усанд хэлж—чи хат—гэвэл энэ нь хийгдсэн байна.

17Болгоогтун, хэрэв тэрээр энэ ууланд—чи өргөгд гэвэл, мөн энэ нь булшлагдахын тулд, тэр хотын дээр ирж мөн унагтун—гэвэл болгоогтун энэ нь хийгдэнэ.

18Мөн болгоогтун, хэрэв хүн эрдэнэсийг газарт нуухад, мөн—энэ нь үүнийг нуусан түүний алдсын учир зүхэгдэг—хэмээн Их Эзэн хэлбэл болгоогтун, энэ нь зүхэгдэх болно.

19Мөн хэрэв—энэ цагаас хойш мөн үүрд хэн ч чамайг олохгүй байхын тулд чи зүхэгдэг—хэмээн Их Эзэн хэлбэл, болгоогтун, хэн ч тэр цагаас хойш мөн үүрд үүнийг авахгүй.

20Мөн болгоогтун, хэрэв—Алдсуудын учир, чи үүрд зүхэгдэх болно—хэмээн Их Эзэн хүнд хэлбэл энэ нь хийгдэх болно.

21Мөн хэрэв—Алдсуудынхаа учир чи дэргэдээс минь тусгаарлагдах болно—хэмээн Их Эзэн хэлбэл тэрээр үүнийг түүнчлэн байхаар болгох болно.

22Тэрээр үүнийг хэнд хэлнэв, түүнд халаг байна, учир нь алдсыг үйлдэх түүнд л байх болно, мөн тэрээр аврагдаж чадахгүй; тиймийн тул, хүмүүн аврагдаж болох энэхүү шалтгааны учир, наманчлал тунхаглагдсан юм.

23Тиймийн тул, наманчлах мөн Их Эзэн Бурханыхаа дуу хоолойг анхааран сонсдог тэд адислагдсан байдаг; учир нь тэд бол аврагдах тэд билээ.

24Мөн хүмүүн наманчлалд хийгээд сайн ажлуудад авчрагдаж болохыг, тэд үйлүүдийнхээ дагуу ач ивээлийн тулд ач ивээлд сэргээгдэж болохыг Бурхан агуу их бүрэн байдлаараа соёрхох болтугай.

25Мөн бүх хүмүүн аврагдах болоосой хэмээнэ би. Гэвч бидний уншдагчлан агуу их хийгээд эцсийн өдөр зайлуулагдах, тийм ээ, Их Эзэний дэргэдээс тусгаарлагдах зарим нь байх болно;

26Тийм ээ, төгсгөлгүй аймшгийн байдалд хүргэгдэх тэд энэхүү үгсийг гүйцэлдүүлэх болно: Сайныг хийсэн нь үүрдийн амьдралыг авах болно; мөн хилэнцийг хийсэн нь үүрдийн ял авах болно. Мөн энэ нь тийн болой. Амен.