O Le Tusi a Enosa

1 Faauta, sa oo ina ua iloa e a’u, o Enosa, o lo’u tamā o se tagata amiotonu o ia—ona sa ia aoaoina a’u i lana gagana, ma i le tausiga ma le apoapoaiga foi a le Alii—ma ia faamanūina lava le suafa o lo’u Atua mo lena mea—

2 Ma o le a ou faamatala atu ia te outou le tauiviga na ou faia i luma o le Atua, ae ou te lei maua se faamagaloga o a’u agasala.

3 Faauta, sa ou alu e tuli manu i le vao; ma o upu sa ou faalogo soo o tautala i ai lo’u tamā e uiga i le ola e faavavau, ma le olioli o le au paia, sa goto loloto ifo i lo’u loto.

4 Ma sa matelaina lo’u agaga; ma sa ou tootuli i lalo i luma o Lē na faia a’u, ma ou tagi atu ia te ia i le tatalo malosi ma le faatauanau mo lo’u lava agaga; ma sa ou tagi atu ia te ia i le aso atoa; ioe, ma ina ua oo mai le po sa ou sii maualuga a’e pea lo’u leo sa oo ina oo atu i le lagi.

5 Ma sa oo mai se siufofoga ia te a’u, ua fetalai mai: Enosa e, ua faamagaloina au agasala, ma o le a faamanuiaina oe.

6 Ma o a’u, o Enosa, sa ou iloa e le mafai ona pepelo le Atua; o le mea lea, sa tafi esea ai o’u lagona tausalaina.

7 Ma sa ou fai atu: Le Alii e, ua faapefea ea ona faia lenei mea?

8 Ma sa fetalai mai o ia ia te a’u: Ona o lou faatuatua ia Keriso, o lē e te lei faalogo lava pe na e vaai muamua i ai. Ma e tele tausaga e mavae atu ae lei faaali mai e ia o ia lava i le tino; o le mea lea, inā alu ia, ua faamamāina oe i lou faatuatua.

9 O lenei, sa oo ina ua ou faalogo atu i nei upu sa amata ona ou lagona se naunautaiga mo le soifua manuia o o’u uso, o sa Nifaē; o le mea lea, sa ou sasa’a atu ai lo’u agaga atoa i le Atua mo i latou.

10 Ma a’o faapea ona ou finau i le agaga, faauta, sa toe tulei mai le siufofoga o le Alii i lo’u mafaufau, ua fetalai mai: O le a Ou asiasi atu i ou uso e tusa ma lo latou filigā i le tausiga o a’u poloaiga. Ua Ou tuuina atu ia te i latou lenei laueleele, ma o se laueleele ua paia; ma Ou te lē fetuuina lava, vaganā ai ona o le amioletonu; o le mea lea, o le a Ou asiasi atu ai i ou uso e pei ona Ou fai atu ai; ma o a latou solitulafono o le a Ou ave ifo i lalo ma le faanoanoa i luga o o latou lava ulu.

11 Ma ina ua uma ona faalogo atu o a’u, o Enosa i nei upu, sa amata ona lē maluelue o lo’u faatuatua i le Alii; ma sa ou tatalo atu ia te ia ma ni tauiviga uumi e tele mo o’u uso, o sa Lamanā.

12 Ma sa oo ina ua uma ona ou tatalo atu ma galue ma le filigā atoa, sa fetalai mai le Alii ia te a’u: O le a Ou tuu atu ia te oe e tusa ma ou naunautaiga, ona o lou faatuatua.

13 Ma o lenei faauta, o le naunautaiga lenei sa ou naunau i ai mai ia te ia—e faapea afai e oo ina pa’u’ū lo’u nuu o sa Nifaē i le solitulafono, ma i’u ina faaumatiaina ai, ma o le a lē faaumatiaina sa Lamanā, ia faasaoina e le Alii le Atua se talafaamaumau o lo’u nuu, o sa Nifaē; e tusa pe tatau ai ona faasaoina e ala i le mana o lona aao paia, ina ia mafai ona aumai i se aso o lumanai i sa Lamanā, ina atonu e mafai ona aumai ai i latou i le faaolataga—

14 Ona o le taimi nei ua lē aoga a matou tauiviga e toefuatai mai i latou i le faatuatuaga moni. Ma ua latou tauto i lo latou ita e faapea, afai e mafai, o le a latou faaumatia a matou talafaamaumau ma i matou, ma uputuu uma foi a o matou tamā.

15 O le mea lea, i lo’u iloa sa mafai e le Alii le Atua ona faasaoina a matou talafaamaumau, o lea na ou tagi atu ai ia te ia e lē aunoa, auā sa fetalai mai o ia ia te a’u: Soo se mea e te ole mai ai i le faatuatua, ma talitonu o le a e maua e ala i le suafa o Keriso, o le a e mauaina lava.

16 Ma sa ia te a’u le faatuatua, ma sa ou tagi atu i le Atua ia faasaoina e ia talafaamaumau; ma sa osifeagaiga o ia ma a’u o le a ia aumai i latou ia sa Lamanā i lona lava taimi e tatau ai.

17 Ma o a’u, o Enosa, sa ou iloa o le a faia lava e tusa ma le feagaiga ua faia e ia; o le mea lea na mapu ai lo’u agaga.

18 Ma sa fetalai mai le Alii ia te a’u: Sa mananao foi ou tamā i lenei mea mai ia te a’u; ma o le a faia ia te i latou e tusa ma lo latou faatuatua; ona o lo latou lava sa pei o lou faatuatua.

19 Ma o lenei sa oo ina alu atu a’u, o Enosa, i totonu o le nuu o Nifae, ma ou vavalo atu e uiga i mea o le a oo mai, ma molimau atu e uiga i mea sa ou faalogo ma vaai i ai.

20 Ma ou te molimau atu sa saili ma le filigā le nuu o Nifae e toefuatai mai sa Lamanā i le faatuatuaga moni i le Atua. Peitai sa lē aoga a matou galuega; sa mausalī lo latou ita, ma sa taitaiina i latou i o latou natura leaga, sa avea i latou ma tagata aivao ma feai, ma inutoto, ua tumu i le ifo i tupua ma mea eleelea; ua aai i manu ’ai manu; ua nonofo i faleie, ma feoai solo i le vao ma se pa’u manu pupuu e fusi i o latou sulugatiti ma o latou ulu ua tafi; ma sa popoto i latou i le ’aufana, ma le pelu fasimanu, ma le to’i. Ma o le toatele o i latou sa leai se mea sa latou ’aina sa na o aano mata o manu; ma sa latou saili e lē aunoa e faaumatia i matou.

21 Ma sa oo ina galueaiina e le nuu o Nifae le laueleele, ma totō ituaiga eseese o saito, ma fualaau ’aina suamlie, ma fai lafu ma fagaga, ma faatoaga o lafu manu o ituaiga eseese uma, ma ’oti, ma ’oti aivao, ma solofanua foi e tele.

22 Ma sa matuā toatele lava perofeta sa i ai i totonu o i matou. Ma o le nuu, o ni tagata sa ua maaa, sa faigata ona malamalama i ai.

23 Ma sa leai se mea vaganā ai upu malolosi lava, o talaiga ma valoaga o taua, ma finauga, ma faafanoga, ma le faamanatu atu pea lava pea ia te i latou e uiga i le oti, ma le umi o le faavavau, ma faamasinoga ma le mana o le Atua, ma nei mea uma, sa mafai ona faia—e uuna’ia ai pea lava pea i latou, e tumau ai i latou i le matata’u i le Alii. Ou te fai atu, sa leai se mea sa faaitiitia o nei mea, ma le tautala atu ma le manino tele lava, sa mafai ona taofia ai i latou mai le o ifo vave i le faafanoga. Ma ua faapea le ala ua ou tusia ai e uiga ia te i latou.

24 Ma sa ou vaaia taua i le va o sa Nifaē ma sa Lamanā i le gasologa o o’u aso.

25 Ma sa oo ina faasolo ina ou toeaina, ma ua selau fitu sefulu ma le iva nei tausaga ua mavae atu mai le taimi na tuua ai Ierusalema e lo matou tamā o Liae.

26 Ma sa ou vaai ua lata ona ou alu ifo i lalo i lo’u tuugamau, ina ua uma ona galue o le mana o le Atua i o’u luga ia ou talai ma vavalo atu i lenei nuu, ma folafola atu le afioga e tusa ma le upumoni ua ia Keriso. Ma sa ou folafolaina atu i o’u aso uma, ma sa sili ona ou fiafia i ai i lo o mea o le lalolagi.

27 Ma ua lata ona ou alu i le nofoaga o lo’u malologa, lea ou te faatasi ai ma lo’u Togiola; ona ua ou mautinoa o ia ou te malolo ai. Ma ou te olioli i le aso o le a faaofuina ai lo’u tino faaletino i le tino ola pea, ma ou tu ai i ona luma; ona ou vaai ai lea i ona fofoga ma le fiafia, ma o le a fetalai mai o ia ia te a’u: Sau ia ia te a’u, oe ua faamanuiaina, ua i ai se nofoaga ua saunia mo oe i maota o lo’u Tamā. Amene.