1. Ucat taripirinacan quimsa tunc maran kalltäwipana, nayrïr phajjsin payïr uruna, Moronejj Helamanat ucsa toke orakenquir jakenacan sarnakäwipat kellkat catokäna.

2. Acanacaw jupan kellkat arunacapajja: Wali munat Moroni, Tatituns nuwasiñ tʼakhesïwins jilajja, munat jilajja, mä jucʼa acsa toke oraken nuwasitanacajjat jumar yatiyañajjaw utjitu.

3. Ammonan Nefi oraket irpat jakenacatjja, pä warank waynanacawa. Jichhajja, jumajj jupanacan Lehi awquisan jilïr Laman yokapat sarakerïtapjj yat-tawa;

4. Janiw nayajj jupanacan saranacapata, jan iyawsatapat jumar yatiyañajjäquiti, jumajj take ucanacat yat-tajja.

5. Ucat waliw nayatac aqhäm jumar yatiyañajja: uca waynanacat pä warankaniw nuwasiñ armanacap aptasinjja, nayan jilïripäñajj munapjje. Nanacasti marcajjar arjjatañataquiw mistupjjta.

6. Uqhämaraqui, awquinacapan jilanacapar wil wartañatac nuwasiñ armanacap jan aptañatac lurat arsüwit yatiractaw jumajja.

7. Ucampis pä tunc sojjtan maranjja, jupanac toket tʼakhesïwinacajjamp llaquinacajjamp uñjapcän ucqhajja, jupanacajj nanacar arjjatir nuwasiñ armanacap aptañ munasaw lurat arsüw pʼaquiñampïpjjäna.

8. Ucampis nayajj janiw uca lurat arusjäw pʼaquintapjjañap muncäyät-ti. Juräwi luratäc ucarjam phokhapjjatap laycu, Diosan nanacar chʼamachañapar iyawsasa, jan jucʼamp tʼakhesiñar puriñataqui.

9. Ucampis acajj jiwasan mä cusisiñasataquiw utji. Pä tunc sojjtan maranjja, naya Helamanajj uca pä warank wayn nayrakat irptasaw Judea marcar sarta, ucsa toke orakenquir jakenacjjar juman jilïritac ut-tʼayat Antipusar yanapañataqui.

10. Nayasti pä warank yokajjaruw (cunalaycutejj jupanacajj yok satäñataquejj asquïpjjewa) Antipusan nuwasiri tamapamp mayachta. Ucatsti Antipusajj wal cusisïna, cunalaycutejj jupan nuwasiri tamapajj Laman jakenacan walja jakenacasar jiwayatap laycuw jiscʼachatäna. Ucatsti llaquisiñasaw utji.

11. Ucampis ucat chuymachas-snawa, jupanacajj Diosatac marcapatac nuwasisaw jiwapjje, jïsa, jupanacajj cusisipjjewa.

12. Uqhämaraqui, Laman jakenacajj walja catuntatanac catjjäsipjjaraqui. Ucanacasti jilïr capitancamaquiwa, jan yakhanacarus jaquir jaytatap laycu. Jupanacajj jichhajj Nefi orakencapcaspas uqhäm amuyasipjjtajja. Janitejj jiwayatäpc-chejja, uqhamäpachawa.

13. Jichhajja, acanacaw Laman jakenacan walja kamasan jakenacasan wilap wartas catut marcanacajja:

14. Manti orake, jan ucajja Manti marca, Zeezron marca, Cumeni marca, Antipara marcampi.

15. Nayajj Judea marcar purcta, ucapach catut marcanacän ucanacajja. Nayasti Antipusamp jakenacapamp marcar chʼamanacapamp chʼamañchañatac trabajquir jicjjat-ta.

16. Jupanacajj janchits ajayuts karit llaquisitäpjjänwa, ur jornal kamasamp nuwasitapa, marcanacapar imañatac aruman trabajatap laycu. Uqhämaw take casta tʼakhesipjjäna.

17. Jupanacajj ucqhan atipañataquis jiwañataquis mayac chuymtʼapjjäna. Ucat uca jucʼa nayan apanit nuwasiri tamajja, jïsa, yokanacajjajj jupanacar wal cusisiyasa jachʼa suyäw jupanacar puriyatap sum amuyasmajja.

18. Ucat Laman jakenacajj Antipusan jucʼamp chʼam nuwasiri tamapar catokatap uñjasinjja, Judea marcjjaru jan ucajja, nanacjjar jan nuwasir jutañapataquiw Ammoronan yatiyäwipan yatiyatäpjjäna.

19. Uqhäm Tatitun bendicitäpjjta, cunalaycutejj jupanacatejj uqhäm tʼuqha cancañajjan nanacjjar jutapjjetasapänjja, inas jucʼa nuwasiri tamajjar tucqhapjjchitasapäna. Ucampis uqhäm imatäpjjäyätwa.

20. Jupanacan catutäpcän uca marcanac imañataquiw yatiyäw Ammoronat catokapjjäna. Uqhämaw pä tunc sojjtan marajj tucusïna. Ucat pä tunc pakallkon maran kalltäwipan nanacas marcajjas arjjatasiñatac waquichasitäpjjäyätwa.

21. Ucat Laman jakenacan nanacjjar jutañap munapjjäyäta. Nanacasti janiw pucaranacapan jupanacar jaljjatañ munapcäyät-ti.

22. Ucat uñakerinac Laman jakenacan onjjtäwinacap uñjañataquiw uscupjjäyäta, jupanacan nanacar arumats uruts pasaquipasin alay tokenquir yakha marcanacajjar jan jaljjatañanacapataqui.

23. Nanacajj uca marcanacan Laman jakenacar thurtʼasiñatac jan chʼamanïtapjj yatipjjäyätwa. Ucat jupanacatejj nanacar pasapquitasapänjja, nayrakatat jaljjatatäpcasapän ucspachaw nanacajj khepat jaljjatañ munapjjäyäta, purapar cutiquipstayañataqui. Nanacajj jupanacar atipapquirists uqhäm amuyasipjjäyäta. Ucampis uca munañajjarojj janiw phokhapcäyät-ti.

24. Jupanacajj takpach nuwasiri tamapamp pasañ ajjsarapjjänwa, nanacajj cawqhancapctejj uca chek pasañ nuwasiri tamapat mä kawkhanimpis pasañ ajjsarapjjaraquïna jan thurtʼasiñ chʼamanïsin atipatäpcaspas uqhäm amuyasa.

25. Uqhämaraqui Zarahemla marcjjar sarañat ajjsarapjjaraquïna. Nefia marcar Sidon kalltäwin maqhatañat ajjsarapjjaraquïna.

26. Uqhäm catupcän uca marcanacarojj nuwasiri tamanacapamp imañataquejj mayac chuymtʼapjjäna.

27. Ucat uca maran payïr phajjsinjja, uca pä warank yokajjan tatanacapat walja juyranacaw nanacar apayanitäna.

28. Uqhämaraqui Zarahemla oraket pä warank jakenacajj nanacar qhitanitaraquïna. Ucat nanacajj tunca warank jakenacampiw jupanacataqui, warminacapataqui, wawanacapataquis juyranacamp waquichatäpjjäyäta.

29. Ucat Laman jakenacajj nuwasiri tamajjar sapür jiljjatir uñjasa, utjañanacajjatac juyranac puritap uñjasaraquiw, jupanacajj ajjsarañ kalltapjjäna. Ucat jupanacajj juyranac jucʼamp jakenac catokañajjar tucqhañatac mistuñ kalltapjjäna.

30. Ucatsti Laman jakenacan ucjjat llaquisiñ kalltatap uñjasajja, nanacajj jupanacar sallkjañ munapjjäyäta. Ucat Antipusajj nayan jiscʼa yokanacajjamp jacʼa marcar juyranac apapquirists uqhäm jacʼa marcar sarañajjatac yatiyitu.

31. Ucat Antipara marc jacʼana, qhurcatan lamar iran thiya ucsanquir marcar sarapquirists uqhäm sarapjjañajjänwa.

32. Ucat nanacajj juyranacajjamp uca marcar sarapquirists uqhämaw sarapjjäyäta.

33. Ucat Antipusajj mä kawkha nuwasiri tamapamp mistüna, jiltʼirinacar marc arjjatañatac jaytasa. Ucampis nayan jiscʼa nuwasiri tamajjamp sarcasa, Antipara marca jacʼar puriñajjcamajj janiw mistuncänti.

34. Laman jakenacan chʼaman nuwasiri tamapasti Antipara marcancänwa, jïsa, uca nuwasirinacajj waljanipunïnwa.

35. Ucat uñakerinacapajj jupanacar nanacjjat yatiyapcän ucqhajja, jupanacajj nuwasiri tamapamp mistusaw, nanac contra nuwasir jutapjjäna.

36. Ucat nanacajj jupanac nayrakatat alay tokeruw jaltapjjäyäta. Uqhämat nuwasiri Laman jake tamanacat jucʼamp chʼaman nuwasiri tamapjj irpsupjjäyäta.

37. Wali jayaruw jupanacarojj irpsupjjäyäta. Ucan jayätap laycusti Antipusan nuwasiri tamapar chʼamanacapamp jupanacar arctir uñjapcän ucqhajja, jupanacajj janiw cupirus chʼekarus muytapcänti, antisas jupanacajj nanacar arctir chekaw jutapjjäna. Jupanacan jakenacan jan muyuntatäñanacapataqui, janïr Antipusajj jupanacar purcasp ucqhajja, nanacar jiwayañ munapcaspas uqhäm amuyapjjta.

38. Ucat Antipusajj nanacan jan walincatajj uñjasajja, jucʼamp lakaw nuwasiri tamapar jutayäna. Ucampis arumtʼjjänwa; ucat janiw jicjjatanipquituti. Janiraquiw Antipusas jupanacarojj jicjjatapcaraquïnti ucat arumajj icnokapjjäyäta.

39. Ucat janïr willjtäcän ucqhaw, Laman jakenacajj nanacar arctanjjapjjetäna. Jichhajja, janiw nanacajj jupanacamp nuwasiñatac chʼamanïpcäyät-ti. Janiw nayajj jiscʼa yokanacajj amparanacapar puriyañ muncäyät-ti. Ucat saräwijjan sarascaquisaw wasar toker cut-tawayjjapjjta.

40. Jupanacasti janiw cupirus chʼekarus muytañ munapcänti, nanacan jan muyuntatäñapataqui. Janiraquiw nayajj cupirus chʼekarus muytañ muncaraquïyät-ti, jupanacan jan nayar catjañanacapataqui, jan thurtʼasirjamäsasti, jiwayapjjetaspawa, ucat jaltjjapjjaraquispa. Ucat ur jornalpachaw wasarar chʼamactʼañcam jaltjjapjjäyäta.

41. Ucat wastat alwa khan uñstcän ucqhajja, nanacajj Laman jakenacar nanacjjar jutir uñjapjjäyäta, ucatsti jupanac nayrakatat jaltapjjaraquïyäta.

42. Ucat jupanacajj mä jucʼa nanacar arctasaw saytʼapjjäna. Ucasti pakallkör phajjsin quimsïr ur willjtänwa.

43. Nanacasti janiw yatipcti, Antipusan jupanacar jicjjatataps jan jicjjatatapsa, ucampis jakenacajjarojj sistwa: Janiw yatctanti, inas jupanacajj saytʼapjjchi, jupanac contra sarascaquiñasataqui, uqhämat sipitapar jaltʼañasataqui.

44. Uqhämasti, yokanacajja, camsapjjtasa? Jupanacamp nuwasir sarapjjätati?

45. Ah! Munat Moron jilajja! Janipuniw uqhäm kamasan jakenacjj uñjcäyät-ti; Nefi jakenac taypinsa.

46. Nayan jupanacar yokanacajj satajj laycojja, (takpach jupanacan jucʼa maranïtap laycu) jupanacajj aqhäm sapjjetuwa: Tatay, Diosajjajj nanacampiwa. Janiw jupajj atipatäñajj muncaniti, uqhämasti sarapjjañäni. Jilanacajjatejj nuwasiñar jan waytʼapquitaspajja, janiw jupanacar jiwayapquirist-ti. Uqhämasti Antipusan nuwasiri tamapar janïr atipjquipan sarantapjjañäni.

47. Ucqhacamajj janipiniw uca nayräjjajj nuwasipjjerïcänti, ucampis janiw jiwañarojj ajjsarapcänti. Jupanacataquejj tatanacapan antutäwipajj quipca jacäwinacapat sipan jucʼamp munatänwa. Jupanacan taycanacapajj aqhäm sasaw jupanacar yatichapjjäna: Jumanacatejj jan pächasipcätajja, Diosajj jumanacar khespiyapjjätamwa.

48. Jupanacasti mamanacapan arunacap aqhäm sasaw nayar yatiyapjjetu: Mamanacajjan uc yatitapatjj janiw pächasipcti.

49. Ucat nayajj nanacar arctir uca Laman jakenac contraw pä warank waynanacamp cut-tapjjta. Jichhajja, Antipusan nuwasiri tamanacapajj jupanacar catjapjjataynawa, uqhämaraquiw mä ajjsarcañ nuwasïwejj kalltaraquitayna.

50. Ucampis Antipusan nuwasiri tamapajj jucʼa tiempon jaya saräwip laycu karjatäsinjja, Laman jakenacan amparanacapar puriñampïscänwa. Janitejj nayajj pä warankajjamp cut-tquiriscäyätjja, jupanacajj munañap phokhapjjasapänwa.

51. Antipusamp walja jilïrinacapampejj lak jutapjjatapat laycuw karitäpjjäna, ucat espadan jiwayatäpjjäna. Ucat Antipusan jakenacapajj jilïrinacapan jiwarapjjatap laycu jan camachtʼañs yatisajja, Laman jakenacat khepar cut-tañ kalltapjjäna.

52. Ucat Laman jakenacajj kamas catusin jupanacar arctañ kalltapjjäna. Ucat uqhäm Laman jakenacajj jupanacar chʼamamp arctapcän ucqhajja, Helamanajj pä warankapampiw khepat jutapjjäna; jupanacasti walpin jupanacar jiwarayañ kalltäna, takpach Laman jakenacan nuwasiri tamapasti saytʼjjänwa, ucatsti Helaman contraw cutiquipstjjäna.

53. Ucat Antipusan jakenacapasti Laman jakenacan cutiquipstatap uñjasinjja, jakenac tantachthapisaw Laman jakenacan khepapat wastat jutapjjäna.

54. Ucat nanaca, Nefin marcapampi, Antipusan jakenacapampi, nayamp pä warankajjampejja, Laman jakenacar muyuntasaw jiwarayapjjta. Nanacan wal jiwarayatajj laycusti, jupanacajj nuwasiñ armanacap catuyasin jupanac pachpajj nuwasïw catuntatanacjam catuyasjjapjjetäna.

55. Ucat jupanacajj nanacar catuyasipcän ucapachaw nayajj, nayamp chic nuwasipcän uca waynanacar jactʼäyäta, waljanin jiwatapat ajjsarasa.

56. Ucampis nayataquejj sinti jachʼa cusisiñänwa, janiw jupanacat maynis jiwcataynati. Jupanacajj Diosan chʼamapampïcaspas uqhämaw nuwasipjjatayna. Janipiniw nayrajj jakenacajj uqhäm muspharcañ chʼamamp nuwasipcänti, cunalaycutejj jachʼa chʼamampiw Laman jakenacarojj jaljjatapjjäna, ucaw wal jupanacarojj ajjsarayäna. Ucat Laman jakenacajj nuwasïw catuntatanacjam catuyasipjjäna.

57. Ucat catuntatanacajjatac, jupanacar arjjatas Laman jakenacan nuwasiri tamanacapat imañajjatac jan mä chekanïtajj laycusti, jupanacampir Antipusan jan jiwayat jakenacapat mä kawkhanimpiruw Zarahemla marcar qhitapjjäyäta. Antipusan jiltʼir jakenacapamp nayan wayna ammonitanacajjamp mayachasisasti Judea marcaruw cut-tjjapjjta.