1. Jichhajj wawajjay, cuntejj jilamar siscta, ucat jucʼampiw jumar sañajjatac utji. Janit jumajj jilaman thurtʼatätapa, jupan chekapätapa, Diosan camächitanacapar jan karis phokherïtap uñjcta? Janit jupajj suma uñachayäw uñachayctam?

2. Zoram jakenac taypinjja, janiw jumajj arunacajjar jilamjam yäkctati. Ucaw juman juchamajja, jumajj chʼamamata, yatiñamata jachʼa jachʼaw tuctajja.

3. Janiw ucajj takpachäquit wawajja, cunatejj llaquisiyquitu uc jumajj lurta. Jumajj ar yatichañ jaytasaw, Siron orakeru, Laman jakenac thiyaru, Isabel kʼañusir warmin uc sarta.

4. Jupajj waljanin chuymanacap lunthatäna, ucampis janiw uqhämïpan juman lurañamajj waquiscänti. Jumar churatäcän uca luräw phokhañamaruw uchasiñamänjja.

5. Wawajjay, janit Tatit nayrakatan ucanacan ajjtcañätap yatcta? Ucajj take yakha juchanacat sipan jucʼamp ajjtcañawa, jan ucajja, jan juchan wil wartäwimpi, Kollan Ajayur ajjalnucuñampi ucat sipan jucʼamp ajjtcañawa.

6. Cunalaycutejja, kollan ajayurutejj juman chuymamancquipan ajjalnucüta, ucar ajjalnucutam yatisajja, uca juchajj janiw kʼomachatäñ jicjjatcaspati. Cawquïritejj Diosan khanapa, yatiñap contra jiwayqui ucajja, juchanacapatac pampachäw wali chʼaman jicjjati. Jïsa wawajja, jumaruw sisma: Janiw juchanacapat pampachäw jasac jicjjatcaspati.

7. Jichhajj wawajja, janic uqhäm jachʼa juch lurcasamänti. Janitejj jumatac asquïcaspajja, janiw jumar llaquisiyañatac juchanacamat parlquirismati.

8. Ucampis juchanacamjj janiw Diosat imantcasmati; janitejj jumajj ucanacat cutiquipstcätajja, khep khepa urun ucanacajj jumat ircatapjjätam.

9. Jichhajj wawajjay, juman juchanacamat cutiquipstas ucanac jaytañam munirista. Nayranacaman munarañanacaparjam jan jucʼamp saramti, antisas take ucanacatjj jarcʼakasimaya. Janitejj uc lurcätajja, janiw cunjämats Diosan khapak marcap tutjam catokcätati. Amuyasim, uc lurañ amtasim, ucanacat jarcʼakasim.

10. Uqhämaraqui lurañanacamjjat jilïr jilanacamar jisctʼasiñ yatenoktañamataquiw sisma. Jumajj waynäsctawa, jilanacaman jumar yanapañapaw waquistam. Ucat arunacapar istʼasajj yäkam.

11. Cawquïr jila tucur jan amuyun cunaymaninacamp jan irpakayasimti. Supayan wastat chuymamar uca ñankha kʼañusir warminacar irpcatañap janirac munamti. Wawajjay, jumajj jachʼa ñankhanacaruw Zoram jakenacarojj puriytajja, cunalaycutejj jupanacajj juman luräwinacam uñjasajja, janiw arunacajjarojj iyawsapcänti.

12. Jichhasti, Tatitun Ajayupajj nayaruw situ: Walja jakenacan chuymanacapar tucqhäwiru jan irpakañanacapatac wawanacamar asc lurañatac camächit churam. Ucat wawajja, Diosar ajjsarasaw, ñankha luräwinacam jaytjañamatac camächit chursma.

13. Juman take chʼamachañamampi, chʼamampi, amuyumampi, Diosar cutiquipstañamataqui, yakha jakenacan chuymanacapar ñankh lurir jan irpakañamataqui, jan ucasti jupanacar cut-tasin, juchanacamat pantasïwinacamat jupanacar arsusiñamatac camächit churaracsma.

14. Aca oraken kamiriptañanaca, jila tucur cunaymaninac jan munamti. Ucanacjj janiw jumamp apcätati.

15. Jichhajj wawajja, Criston jutañapat mä jucʼa parlaraquïma. Nayajj sismawa: Qhititejj orakenquirinacan juchanacap apakeri chekpach jutcani ucajj jupawa. Jïsa, jupajj khespiyäwita cusisiyir yatïwinac jakenacapar yatiyiriw jutani.

16. Jichhajj wawajjay, cuna yatiyañarutejj jumajj jawsatäcta ucajja, aca yatiyañawa; aca jakenacan amuyunacapar waquichañataqui uca cusisiyir yatïwinac jupanacar yatiyañawa; jan ucajja khespiyañan jupanacar puriñapataqui, jupajj jutcani ucapachajja, wawanacapan amuyunacap arur istʼañatac waquichañanacapataquiwa.

17. Jichhajja, amuyumar mä jucʼa ucat khanañchä. Wali jayapach janïr jupajj jutcani ucapach ucanacan yatitäñapat jumajj muspharta. Nayajj sismawa: Jupajj jutcani ucapach jakempi janit mä jichha jakejj Diosan quipca munatäqui?

18. Janit cutsuyir arustʼan aca jakenacar yatiyatäñapajj wawanacapar yatiyatäñapamp quipca waquisqui?

19. Janit Tatitutaqui alajjpach qhitaparu uca cusisiyir yatiyäwinac jiwasar yatiyañatac qhitaniñapajj wawanacasar qhitaniñapamp quipca jasäqui, jan ucajja, jutañap khepat qhitaniñapampejj quipca jasäqui?