1. Ucat Almajj uca arunac jupanacar arscän ucapachajja, jupajj orakeruw kontʼäna. Ucat Amulecajj saytʼasin aqhäm sas yatichañ kalltäna:

2. Jilanaca, qhitit-tejj jupajj Diosan Yokapaw sas nanacajj yatichapcta, uca Criston jutañapat arsut cunanacat jan yatipjjañamjj janiw iyawsquirist-ti. Janïr nanacat mistqui ucapach ucanacan jumanacar wal yatichatätapjj yat-twa.

3. Jumanacajj tʼakhesïwinacamat cunatejj lurapjjañamäqui ucjjat munat jilajjarojj jisctʼapjjta, amuyunacamar waquichañataquisti jupajj parlapjjtamwa; jïsa, iyawsañanïpjjañamataqui, llampʼu chuymamp suyapjjañamataquiw ewjjapjjtam.

4. Jumanacan arun sumätap yantʼañatac uc chuymanacaman satapjjañamataquejja, iyawsañanïpjjañamataquiw ewjjapjjtam.

5. Nanacasti amuyapjjtwa, amuyumanquiri jachʼa jisctʼäwejj acawa: Arojj Diosan Yokapanquit janicha, jan ucajja, Cristojj utjanit janicha?

6. Uqhämaraqui jilajjajj walja toket uñachayapjjtam ucat uñjapjjaracta; Arojj khespiyasiñataquejj Cristonquiwa.

7. Jilajjajj Zenosampin Zenocampin arunacap ayti, cutsuyañan Diosan Yokap toke jutañap uñachayañataqui. Uqhämaraqui Moisesarojj ucanacan chekätap uñstayañatac aytaraquïna.

8. Jichhasti, naya pachpat ucanacan chekätapat ircatapjjaraquïma. Nayajj sapjjsmawa: Criston jaken wawanacap taypiru, marcapan camächit pʼaquitanacap catjjaruñatac jutañapjj yat-twa; orakenquir jakenacan juchanacapan tʼakhesiyäwipar phokhañap yatiracta; cunalaycutejj Dios Tatitojj uqhäm arsu.

9. Juchanacan tʼakhesiyäwipar phokhañajj waquisiwa. Wiñay Diosan jachʼa arustʼaparjama, juchanacan tʼakhesiyäwipar phokhañapajj utjañapawa, jan ucajja, take jakenacajj chhakapjjañapäniwa. Jïsa, takeniw chʼollkheptata, takeniw tincuta chhakataraqui; janitejj uca waquisit juchanacan tʼakhesiyäwipar phokhañajj utjcaspajja, takeniw chhakapjjañaparaquïna.

10. Mä jachʼa khepïr loktäwin utjañapaw waquisi. Uca loktäwisti janiw jakëcaspasa, uywacaspasa, cunayman jamachʼïcaspasa. Janiw ucajj jake loktäwïñapäquiti, jan ucasti wiñay jan wati loktäwïñapawa.

11. Jichhajja, janiw cawquïr jakes quipca wilap loktasajja, maynin juchanacapan tʼakhesiyäwipar phokcaspati. Jichhasti, jakenacatejj jiwayapjjanejja, cheka asqui leyisajj jilapan jacäwip apakaniti? Nayajj janiw uqhämäquiti sapjjsmawa.

12. Antisas leyejj jiwayirin jacäwip apake; ucat juchanacan tʼakhesiyäwipar jan wati phokhañaquiw orakenquirinacan juchanacapatac waquisispa.

13. Ucat jachʼa khepïr loktäwin utjañapajj waquisi; ucat wil wartäwejj tucusini, jan ucajja, tucusiñapajj waquisiniwa. Ucapachajj Moisesan leyipajj phokhasiniwa, jïsa takpach ucajja, sapa jiscʼa kellkasa jiscʼa arusa phokhasiniwa. Janiraquiw cunas chhakatäcaniti.

14. Acataquiw takpach leyejja, takpach ucajja uca jachʼa khepïr loktäwiruw uñtayi. Uca jachʼa khepïr loktäwisti Diosan wiñay jan tucusquir Yokapäniwa.

15. Uqhämasti, cawquïrinacatejj sutipar iyawsapcan ucanacaruw jupajj khespiyäw puriyani. Ucataquiw uca jachʼa khepïr loktäwejja, qhuyapayäwir luräw toke ut-tʼayañataqui. Uca qhuyapayäwisti chekaparjam taripäwjjar chʼamaniwa, jakenacar juchanacat cutiquipstañcam iyawsañataquiw ut-tʼayaraqui.

16. Uqhäm qhuyapayäwejj chekaparjam taripañan mayïwinacaparuw phokhe. Ucat jakenacar arjjatir amparanacapamp khomthapi. Ucampis cawquïrinacatejj juchanacat cutiquipstañcam jan iyawsañanïpcanejja, jupanacajj chekaparjam taripañan mayïwinacapan takpach leyipar catuyatäniwa. Ucata, juchanacat cutiquipstañcam iyawsirinacataquiquiw jachʼa wiñay cutsuyir arustʼajj ut-tʼayata.

17. Ucat jilanaca, juchanacat cutiquipstañcam iyawsas sarnakañ kalltapjjañam Diosajj jumanacar churpan; jupan kollan sutipar artʼañ kalltapjjañam jumanacar churaracpan, jupan jumanacar qhuyapayañapataqui.

18. Qhuyapayäw jupat mayisipjjam; jupajj jachʼaw khespiyañataqui.

19. Chuymanacamar llampʼuchapjjam, uqhämaraqui jupat mayisisipcaquim.

20. Yapunacamancapjjät ucqhajja, take uywa tamanacamatac jupar artʼasipjjam.

21. Utanacamanjja, take utamanquirinacamatac willjtas chicürus arumas jupar artʼasipjjam.

22. Timanacaman chʼamap contra jupar artʼasipjjam.

23. Jïsa, supay contra artʼasipjjam. Jupaw take chekapar uñjañan timapajja.

24. Yapu juyranacamatac jupar artʼasipjjam, ucanacat jachʼaptapjjañamataqui.

25. Uywa tamanacaman mirañanacapatac artʼasipjjam.

26. Ucampis ucajj janiw takpachäquiti; jumanacajj uta mankhanacamana, jamasawjanacamana, wasaran take chuymamp jupar artʼasipjjam.

27. Uqhämaraqui Tatitur jan jachʼat artʼapcät ucapachajja, jumanacan waliquïñanacamataqui, muyuntapctam uca masinacaman waliquïñapataqui, jan tucusa chuymanacamatjam mayisiñamp chuymanacamar phokhantayapjjam.

28. Jichhajja, munat jilanaca, nayajj sapjjsmawa: Ucajj takpachäcaspajj uqhäm jan lupʼipjjamti. Take ucanac luratamatjja, usutanacarus tʼakhesiyatanacarus jan tumpapcätajja, utjapctam uca yänacamat waquisirinacar jan wajjtʼapcätajja, nayajj sapjjsmawa, ucanacat mays jan lurapcätajja, mayisïwimajj inamayaquïniwa; janiraquiw cuns jumanacataquejj lurcaraquiniti, jumanacasti iyawsañar ajjalnucur cʼari chuyman jakenacjamäpjjätawa.

29. Ucat janitejj qhuyapayasiñ amtasipcäta, jumanacajj jiru lekʼen apanucut kherkhjamäpjjätawa, (ucajj janiw cunataquis walïquiti). Ucasti jakenacan taquisitawa.

30. Jichhajja, jilanaca, uqhäm walja ircatäwinac catokatamatjja, kollan kellkatanacan ucanacat ircatäwipat amuyasa, jumanacajj jutasin juchat cutiquipstañatac achunac uñstayapjjañam munirista.

31. Nayajj jumanacan jutapjjañam munirista, jan jucʼamp chuymanacamar chʼollkheptayapjjañam munaraquirista, cunalaycutejj khespiyasiñanacamataquiw jichha urojja, jichpach khespiyasiñamataquiraquiwa. Ucat juchanacamat cutiquipstasin chuymanacamar janirac chʼollkheptayapcät ucajja, jachʼa cutsuyir arustʼajj jumanacatac ut-tʼayatäniwa.

32. Aca jacäwejj jakenacan Diosamp jiquisir waquichañatac pachawa; aca jacäwin urupajj jakenacan lurañanacap lurañanacapatac uruwa.

33. Ucat cunjämatejj nayrakatajj sapcsma, uqhäm wastat achictʼapjjsma: Walja ircatäwinac catokapjjatam laycu, juchat cutiquipstañamataquejj jan tucuycam suyapjjamti. Aca jiwasanacar wiñayatac waquichañataqui churat jacäwi uru khepatjja, janitejj jiwasanacajj aca jacäwi pachasan lurañanacas phokhapcañänejja, jan irnakäwinac lurcay chʼamac arumaw jutani.

34. Cunapachatejj uca ajjsarcañ jaljtäwir irpatäpcät ucqhajja, janiw sapcasmati: Nayajj juchanacajjat cutiquipstasaw Diosajjar cut-tanï –sasajja. Janiw uc sapcasmati, cunalaycutejj aca jacäwit mistupcät ucapachajja, cuna ajayutejj janchinacamar catuscani uca pachpa ajayuw wiñay oraken janchimar catuñataquejj chʼamaniraquïni.

35. Jumanacatejj juchanacamat cutiquipstañatac jiwañcam suyapjjätajja, supayan ajayupar jaysiriruw tucupjjäta; jupasti jumanacarojj jupanquirit uñtʼasjjasaw sanampapjjätam. Ucat Tatitun Ajayupajj jumanacat jaltasinjja, janiw jumanacan utjcaspati, supayasti jumanacjjarojj take chʼamanïniwa. Ucasti ñankhanacan khepa utjäwipawa.

36. Nayajj yat-twa, Tatitojj jan kollan utanacanjj janiw utjcti –siwa. Jan ucasti, jupajj asquinacan chuymanacapan utji. Uqhämaraqui jupajj saraquiwa: Asquinacajj khapak marcajjan jan jucʼamp mistuñapataquiw kontʼapjjani. Jupanacan isinacapajj Corderon wilap toket jankʼoptayatäniwa.

37. Jichhajja, munat jilanaca, jumanacan ucanac amtasipjjañam munta. Jumanacan Dios nayrakatanjja, ajjsarasa khespiyasiñamatac luräwinac phokhapjjañam munta. Cristojj janiw jutcaniti, jucʼamp sañamjj janiw muncti.

38. Jumanacan Kollan Ajayur jan jucʼamp kʼewtasipjjañama, jan ucasti ucar catokapjjañama, Criston sutip catjjarupjjañam munaracta. Lakʼjam chuymanacamar llampʼuptayapjjañama, cawqhancapcasmas ucana, Diosar ajayuna, chekana yupaychapjjañam munirista. Uqhämaraqui jumanacar walja churat qhuyapayäwinacapata, asqui churäwinacapat sapür yuspagaras sarnakapjjañam munaracta.

39. Uqhämaraqui jilanaca, jan karis mayisipjjañamataquiw ewjjapjjsma, supayan yantʼanacapan jan irpakatäñanacamataqui, jan jumanacar atipañataqui, khep khepa urunjja jumanacan jupan jaysirinacapar jan tucuñanacamataqui. Jupajj janiw cuna ascs luräwinacamat churapcätamti.

40. Jichhajja, munat jilanaca, take cunayman tʼakhesïwinac llampʼu chuymamp tʼakhesipjjañamataquiw ewjjapjjsma. Jumanacar jan cunanïtam laycu alisnucupctam ucanacar ñankha arunacamp jan ñankhachapjjañamataqui, jupanacjam juch lurir jan tucuñanacamataquiw ewjjapjjaracsma.

41. Antisas llampʼüsaw mä urojj take tʼakhesïwinacamat samarañ chekpach suyasajj, uca tʼakhesïwinac catokapjjañanacam munta.