1. Bix at chʼintl tuʼn t-xiʼ nmaʼna teya, aya ncʼwaʼl, tuʼnj nchin naʼna tiʼj que miyaʼ txulch tnabila tiʼj aj tuʼn cyjaw itzʼj cyimna.

2. Lutzan luʼ, cxel nmaʼna teya que ntiʼ itzʼjbil, bixmo tuj juntl wik tuʼmal ko kochiwlaj, wajbila tuʼn t-xiʼ nmaʼna que aj xumlalbaj te camacy milay tikʼ aj tuʼn mi tcyim, aj nicyʼca xcyakbil milay tzʼoc te baʼn, asta despwés ocxa tul Cristo.

3. Lutzan luʼ tuʼnkʼa nbant tuʼn cyjaw itzʼj cyimna. Mas lutzan luʼ, aya ncʼwaʼl, aj tuʼn kjaw itzʼj juntl el minaʼx tuljo. Jaʼla oc chin naʼla tiʼj jun misterio; simbargo, at nim ke misterio, eʼwan bixque mijun loʼn tuʼn masque oʼcx Dios. Per cxel nyecʼana teya aj oʼ txiʼ nkaʼnna tuʼn cyakil wipamala te Dios tuʼn tel nnicyʼa tiʼj; bix atzanjo aj itzʼjbil te acʼaj.

4. Lutzan luʼ, oʼ cyaj kʼot jun tyemp jatuma cyakilka xjal chi jawal itzʼj tiʼj camacy. Mas jtojtzan tuʼn tulj tyemp banan maj, mi jun loʼn tuʼn; per te Dios loʼn tuʼn nicyʼ or.

5. Bix tiʼjtzanj aj ka at jun tnejal, tcaban bixmo toxan el tyemp aj tuʼn cyjaw itzʼj xjal tiʼj camacy, pwes ntiʼ kajbil tiʼjjo; pwes loʼn tuʼn Dios ajke cyakil cosas ajo; bix tucʼa tel nnicyʼa tiʼj ajo: tiʼj que banan maj jun tyemp tiʼj que cyakilke xjal chi jawal weʼ juntl el tiʼj camacy.

6. Mas ctel jun tyemp tiʼj t-xol aj tyemp te camacy bix aj itzʼjbiltl.

7. Bix jaʼlatzan cxel nkaʼnna: ¿Ti cbajel tiʼj cyanma xjal tuj tyemp luʼ asta tuj tyemp banan tiʼj tuʼn tul itzʼjbil?

8. Bix ntiʼ kajbil tiʼj ka at txkantl tyemp banan tiʼj tuʼn cyjaw itzʼj xjal, tuʼnj miyaʼ tuj junx elx chi cymel tzaʼnx cytenca, bix j-ajo ntiʼ kajbil tiʼj; cyakil j-ajo lonxa icytzan junx kʼijjo tuj twitz Dios, bix oʼcx cye xjal maloʼn tyemp.

9. Cyjaʼtzan jluʼ, banan maj jun tyemp cye xjal aj tuʼn cyjaw itzʼj cyxol cyimna; bix at jun tyemp t-xol aj tyemp te camacy bix itzʼjbil. Bix tiʼjtzan aj tyemp at t-xol, aj cbajel tiʼj cyanma xjal, atzan aj xiʼ nkaʼnna tuʼn cyakil wipamal te Kajaw tuʼn tel nnicyʼa tiʼj; bix tiʼjtzanj ajo atzanjo aj loʼn wuʼna.

10. Bix octzan tpon tyemp aj tuʼn cyjaw itzʼj xjal cyakil, tons quelaltzan cynicyʼ tiʼj que loʼn tuʼn Dios jteʼ tyemp banan tiʼj cye xjal.

11. Jaʼlatzan tiʼj aj tuʼmal anma t-xol camacy bix itzʼjbil, lutzan luʼ, oʼ tzaj tkʼamaʼn jun ángel wecyʼ cyiʼj cyakilke cyxew xjal, tzinxax nbant tcyaj cycolan cyib tiʼj xumlalbaj te cyimleʼn, icytzanjo, aj cyxew cyakil xjal, banwtla ka baʼnka bixmo nachka, oc chi xel kʼit twitz Dios aj tzaj kʼon te cyankʼbil.

12. Bix cbanteltzan que ajke cyxew xjal aj tbanalke oc chi cʼametal tuj jun tuʼmal te tzalajibil tuj paraíso tbi: jun tuʼmal te ujlabil, jun tuʼmal te ttxubtxajal, jatuma chi ajlal tiʼj cyakil taʼw cyiʼj, bix tiʼj cyakil cwentbitz bix tnachal.

13. Bix tons cbanteltzan que aj cyxewke nach, icytzanjo, alcyekaj nach, lutzan luʼ, mitiʼ chʼin cyoclen tiʼj t-Xew Kajaw tuʼnj ma jaw cysicʼoʼn ajke binchben nach twitzke tbanal, que aj t-xew dyablo maʼ tzʼocx tuj cyxumlal bix maʼ choc etzan tuʼn — akatzanjo chi xel kʼot tuj klolj tiʼjxa; atzan ctel okʼeljo, bix oc ctzacʼal txe cyeʼ; bix aj ajo tuʼnx cye cynachal, pwes ma cheʼx kʼiʼn pres tuʼn Dyablo.

14. Cyjaʼtzan luʼ, atzan tuʼmal cyanma nachkejo; icytzanjo, tuj klolj bix tuj jun tuʼmal junmajx nach bix nim tchi tiʼj aj tuʼmal tkʼoj Dios tuʼn tcub tzʼak cyibaj; bix cyjaʼtzan chi tel tuj tuʼmal ajo, lonxa icytzan cyej tbanal tuj paraíso, asta oc cyjaw itzʼj juntl el te acʼaj.

15. Per atka juʼnjun oʼ tzʼel cynicyʼ tiʼj aj tuʼmal te tzalajibil bix aj tuʼmal te najbil te anma, aj naʼxtak itzʼjbil atzanjo jun tnejal itzʼjibil. Icytzanjo, cxel nkʼoʼna tuʼmal que aj tuʼn ticʼy xewbaj bixmo anma, bix aj tuʼn tocx tuj aj tuʼmal te tzalajibil bixmo te najbil jaʼca bant tuʼn tkʼamet que a itzʼjbiljo, según ajke yol oʼ chi kʼunj.

16. Bix lutzan luʼ, ax oʼ kʼametl que at tnejal itzʼjbiljo, jun itzʼjbil cyej nok jteʼx maʼ chi ankʼin, ateʼ bixmo chi tel, asta oc t-itzʼj juntl el Cristo cyxol cyimna.

17. Bix milay txiʼ kmaʼn bixmo txiʼ knaʼn tiʼj que aj tnejal itzʼjbil, aj al iʼj oʼ koyolan, que atzan itzʼjbil cye anma tuj tchi-al bixmo najbil. Miʼn txiʼ tnaʼna tiʼj que a t-xiʼlenjo.

18. Lutzan luʼ, cxel nmaʼna teya que miʼn; sino que atzan t-xiʼlen tuʼn toc tjunan juntl el tib anma tucʼ xumlalbaj, cyekaj i ankʼin atxax tuj kʼij te Adán asta tuj itzʼjbil te juntl maj te Cristo.

19. Mas ka ma choc chmoʼn cyakil tuj jun elx, aj cyanma bix cyxumlal ajke al-iʼj maʼ koyolan, ajke nach tzanxke tbanal, miʼn txi nmaʼna; tucʼala tuʼn t-xiʼ nmaʼna que oc chi jawal weʼ cyakil, bixmo tuj juntl tuʼmal, aj tuʼn cy-itzʼj juntl el tzul cwando antes que ajke chi cymel despwés tiʼj ocxa tjaw itzʼj Cristo.

20. Miʼn txiʼ nmaʼna, aya ncʼwaʼl que aj tun cyjaw itzʼj atzanj tuj tyemp oc tjaw itzʼj Cristo; sino que nok nxiʼ nmaʼna, nokxax jun nximbitza, que aj cyanma bix cyxumlal ajke tbanal cocal cyjunan cyib tuj tyemp oc tjaw itzʼj Cristo bix aj oc tjax tuj cyaʼj.

21. Bixmo ka ma bant j-ajo oc tjaw itzʼj bixmo yajxa, miʼn txiʼ nmaʼna; pero cxeʼl nmaʼna que at chʼin tyemp t-xol camacy bix itzʼjbil te xumlalbaj, bix jun tuʼmal te tzalajibil bixmo najbil te anma, asta tuj tyemp oʼ cyaj bant tuʼn Dios tuʼntzan cyjaw weʼ cyimna, tuʼntzan toc cyjunan cyib anma bix xumlalbaj, tuʼntzan cyxiʼ kʼiʼn twitz Dios tuʼn cyoc tuj xtis según aj cybinchben.

22. Icytzanjo, atzanjo cbantel tuʼn cyul te acʼaj ajke cosas oʼ chi txʼolbet tuʼn cytziʼ profetas.

23. Aj anma cajatz kʼoʼn te acʼaj tuj xumlalbaj, bix aj xumlalbaj tucʼ anma; icytzanjo, bix cyakilka juʼnjun part bixke aj ocna mojeʼ oc chajatz kʼoʼn juntl el te acʼaj tuj cyxumlal; icytzanjo, mi jun ttzmal cywiʼ cxel naj, sino que cyakilxa cajatz kʼoʼn te acʼaj tuj tex bix tligaral tuʼmal.

24. Atzanjo, pwes, aya ncʼwaʼl, atzan tuʼmal aj binchben te acʼaj oʼ kʼuʼnj tuʼn cytziʼ profetas.

25. Tons ajketzan tbanal octzan chi kopanel tuj treyno Dios.

26. Mas lutzan luʼ, jun camacy junmajx nach tzul cyibajke nach xjal; tuʼnj chi cymel tiʼj aj tuʼmal jikan tiʼj; pwes ẍwaʼjkajo, bix mijun ẍwaʼj jaʼca tikʼ aj reyno te Dios; sino que chelax xoʼn tiʼjxa bix biʼx quelal xcʼaʼyan cye tuʼn cyneben tiʼj loʼj tuʼn tlaj cybinchben bixmo cyakʼan nach oʼ chi bant; bix cxel cycʼaʼn aj t-ẍwaʼjal jun copa cʼa.