1. Bix banttzan que aj tbajlenxa ttxʼolbaʼn Alma ajke yol ajo, ncub tutzʼeʼ twitz txʼotxʼ, bix njaw weʼ Amulek, nkeʼ tuʼn cyxiʼ caʼwan, cyjaʼw:

2. Akiya wermaniya, milay tzʼocx tuj nwiʼya que mitiʼ loʼn cyuʼna cyiʼj cosas maʼ chi yolat tiʼj tuʼn tul Cristo, aj, según kxnakʼatza, ajo tCʼwaʼl Dios; ax loʼn wuʼna que cub yecʼanxix kej cosas ajo cywitza aj naʼxtax cyel lakʼeʼya kiʼja.

3. Bix maʼ txiʼ cykaʼnna te wermaniya tuʼn t-xiʼ ttxʼolbaʼn que ti tkal tuʼn tbant cyuʼna, tuʼn tlaj cybisa; bix maʼ txiʼ tmaʼnkʼa chʼin tiʼj tuʼn tbant ten cyanmiya; icytzanjo, maʼ txiʼ tocsaʼn cyeya tuʼn ten cyocslabila bix cypasensa;

4. Icytzanjo, que tuʼn ten nim cyocslabila tuʼn t-awet tuj cyanmiya aj yol bix tuʼn tcub tuj preba aj tbanal.

5. Bix oʼ kil que aj matij problema at tuj cyximbitza atzan, aj yol taʼ tiʼj tCʼwaʼl Dios, bixmo ka ntiʼ ten Cristo.

6. Bix ax maʼ cyila que aj wermaniya matzaj tyecʼan wena cyeya, tuj nim tuʼmal, aj yol taʼ tiʼj Cristo te colbil.

7. Maʼ cheʼx tkʼamaʼn wermaniya cyiʼj tyol Zenós, que aj colbil tzajnajo tiʼj tCʼwaʼl Dios; bix ax icyxke tyol Zenoc; bix ax maʼ txiʼ tmaʼn tiʼj Moisés, tuʼntzan tyecʼat que ajke cosas ajo ax toc cyiʼj.

8. Bix lutzan luʼ cxel nyecʼana cyeya wiʼj wibxa que ax toc kej cosas ajo. Lutzan luʼ, cxel nmaʼna cyeya que tzul Cristo cyxol cycʼwaʼl xjal tuʼn tikʼ tibaj aj twitz cyil tnam bix tuʼn tchojan tiʼj twitz il te mundo, tuʼnj oʼ tzaj tkʼamaʼn Kajaw Dios.

9. Tunj il tiʼj tuʼn ten jun chojbil cyiʼj twitz il; según aj matij plan te Dios te Junmajx, il tiʼj tuʼn ten jun chojbil cyiʼj twitz il, bixmo ka miʼn, tuʼntzan cycyim cyakil xjal junmajx; icytzanjo, cycyakilka maʼ chi cyiwax; icytzanjo, cyakilka ma chi cub tzʼak bix maʼ chi najset, bix, nokatwatxan ntiʼ chojbil aj il tiʼj tuʼn tbant, il tiʼj tuʼn cycyim.

10. Tuʼnj il tiʼj tuʼn ttzaj jun matij bix jun sacrificio twiʼpan; miyaʼ jun sacrificio cye xjal mix cye txcup, mix cye tiʼx tkal wikal chʼit; miyaʼ jun sacrificio cye xjal, sino jun sacrificio mitiʼ tbajal bix te junmajx.

11. Bix mitiʼ jun alcye xjal jaʼca txiʼ toʼyan tchicyʼel tuʼn cychjet twitz til juntl. Tuʼnj kama biyoʼn jun xjal, lutzan luʼ. ¿Cxel tiʼn aj kley, ax toc, aj tankʼbil termano? Cxel nmaʼna cyeya que miʼn.

12. Sino que ntkananta ley aj ankʼbil tej aj otak biyoʼn; cyjaʼtzan jluʼ, aj oʼcx icytzan jun chojbil miʼn baj jaʼca tzaj ttzakʼweʼn tiʼj twitz til mundo.

13. Que aj tuʼmal ilx tiʼj jun matij bix twiʼpan sacrificio; tons octzan cbel kʼot, bixmo il tiʼj tuʼn tpon baj twiʼ aj tuʼn tel chicyʼ; tons octzan quelal baj tley Moisés twitz; icytzanjo, octzan cjapanel baj twitz, mix tuʼn atxwat taj jun jota mo tilde, bix mitiʼ aj tiʼ tkal mintiʼ otak baj.

14. Bix lutzan luʼ, atzan aj t-xiʼlen leyjo enter, pwes cyakil part ntyecʼa aj matij bix twiʼpan sacrificio; bix aj matij bix twiʼpan sacrificio atzan tCʼwaʼl Diosjo; icytzanjo, matij bix te junmajx.

15. Cyjaʼtzan jluʼ, atzante tzul tiʼn colbil cyekej jteʼx ma tzʼocx cyocslaʼn tiʼj tbi; aj tuʼmal tiʼj twiʼpan sacrificio atzanj tuʼn tcub tuj binchben aj xtalbil, que at tipamal tuj xtis bix nxiʼ tkʼoʼn cye xjal aj tuʼmal tuʼn ten cyocslabil tuʼntzan tajtz tiʼj cyanma tiʼj tnachal.

16. Bix cyjaʼtzan jaʼca ten t-xtalbil tiʼj tuʼmal te xtis, bix xiʼyna cyiʼjal xjal tucʼ kʼabaj cyiw ten; myentras alcyej ntiʼ ma bant tuʼn aj ocslabil tuʼn tajtz tiʼj tanma, oc cyjel colat tiʼj cyakil tuʼmal te xtis; cyjaʼtzan jluʼ, oʼcx tej aj at tocslabil tuʼn tajtz tiʼj tanma tiʼj tnachal oc cbantel aj matij bix te junmajx plan te colbil.

17. Cyjaʼtzan jluʼ akiya wermaniya, baʼnwt ttzaj tkʼoʼn Dios cyeya tuʼn tbant cyuʼna aj ocslabil tuʼn tajtz tiʼj cyanmiya tiʼj tnachal tuʼntzan tkeʼ tuʼn cykanna tiʼj tbi, tuʼntzan ten t-xtalbil cyiʼja;

18. Icytzanjo, chi kanna tiʼj t-xtalbil, tuʼnj ponan te colal.

19. Icytzanjo, cybecyʼbiliʼn cub cywitza bix chux cucx bant orasyon cyuʼna.

20. Chi nana Dios tekʼa aj oc cytena tuj cyakʼana, icytzanjo, cyiʼj cyakil cyneʼla.

21. Chi xmejluna twitz tuj cyjaya, icytzanjo, cyiʼj cyakilkaj ateʼ tuj cyjaya, prim, chilcakʼij bix kaʼla.

22. Icytzanjo, chi kanna tiʼj te tuʼn mi ten tipamal cyajkʼoja;

23. Icytzanjo, tiʼj dyablo, que ajo jun ajkʼoj tiʼj cyakil xtis.

24. Chi xmejluna twitz tiʼj aj cycosecha, tuʼntzan cyeʼyax tuʼn cyoc.

25. Chi nana Dios tiʼj cyneʼla tuʼntzan cypokʼan.

26. Mas miyaʼ oʼcx jluʼ; ilx tiʼj tuʼn tel cyanmiya tuj cyligara tuj ewj bix tuj cyligara jatuma ntiʼ xjal.

27. Icytzanjo, bixka ntiʼ nchi nana Dios twitz Kajaw, cykʼoʼn cyaja tuʼn tnoj cyanmiya, tuʼn cynana Dios tiʼj cyex cyeʼ baʼn icytzanj aj baʼn te cyej teʼ cytxlajala.

28. Bix lutzan luʼ, akiya wermaniya nim cʼujlaʼnke wuʼna, cxel nmaʼna cyeya tuʼn mi tocx cyocslaʼna que oʼcxjo; tuʼnj ka otakxa chi bant cosas ajo, ma tzʼel cyicʼana aj at il tiʼj te bix aj sbaʼj tiʼj, bix mi ma txiʼya lolte aj yab taʼ bix aj ncastiwayin, ka mi ma txiʼ cykʼoʼna tiʼj aj cybaʼna, ka at, cyekaj aj at il tiʼj cye, cxel nmaʼna cyeya que ka mi ma bant mi junke cosas ajo cyuʼna, lutzan luʼ aj cy-orasyona nok ganajo bix mitiʼ tajblananjo, icytzan chocal icytzankaj xmeletzʼ ncub cyeʼwan ocslabil.

29. Cyjaʼtzan jluʼ, ka mi ma pon tiʼj cycʼuʼja ajke meba, akiyatz lonxa icytzanj tzʼis nxiʼ cyxoʼnkej refinadores (tuʼnj ntiʼ cybalora), bix tetzan cybetzʼbil xjaljo.

30. Bix jaʼlatzan, akiya wermaniya, despwés que otak cyikʼa aj nim yecʼbil, tuʼntzanj ntzaj cykʼamaʼnke Tuʼjal ax toc cyiʼj cosas ajo, wajbila tuʼn cytzaja bix tuʼn tcyakʼ cywitza aj tuʼn tajtz tiʼj cyanmiya tiʼj tnachal.

31. Icytzanjo, wajbila tuʼn cytzaja bix tuʼn mi tcub cycyiwsan más cyanmiya; tuʼnj lutzan luʼ, atzanj tyemp bix kʼij jaʼla tiʼj colbil cyiʼja; bix cyjaʼtzan jluʼ, ka ma tzʼajtz tiʼj cyanmiya tiʼj tnachal bix ka mi ma cub cycyiwsan más cyanmiya, tons octzan bantel tbinchben plan te colbil cyibaja.

32. Tuʼnj lutzan luʼ, aj ankʼbil luʼ atzan tyempjo tuʼn tbant ten xjal tuʼn tpon twitz Dios; icytzanjo, aj kʼij tej ankʼbil luʼ atzan kʼijjo tuʼn tbant tbinchben xjaljo.

33. Bix icytzanj xiʼ nmaʼna cyeya tnejal, ya que at-xa nim ax toc cyeʼya, cxel nkaʼnna cyeya, cyjaʼtzan jluʼ, miʼn chi ayona tiʼj twiʼpan kʼij tuʼn tajtz tiʼj cyanmiya; tuʼnj tbajlenxatzanj kʼij te ankʼbil ajo, que ntzaj kʼoʼn ke tuʼn tbant kten te junmajx, lutzan luʼ, ka mi ma mejoraʼrat ktyemp tuj ankʼbil luʼ, tons tzultzan aj konicyʼan te klolj jatuma milay tuʼn tbant jun ti tkaʼl kuʼn.

34. Milay bant tuʼn t-xiʼ cymaʼna, ajke teʼtla tuj tnachal wena cajatz tiʼj wanmiya; chin naʼjal meltzʼaja tucʼ nDiosa. Milay bant tuʼn t-xiʼ cymaʼntla j-ajo; tuʼnj aj ax xewbaj etzalte cyxumlala oc cyexa tuj ankʼbil luʼ, ax xewbajjo at tipamal tuʼn toc tetzan cyxumlalajo tuj juntl mundo te junmajx.

35. Tuʼnj ka ma cyaj cykʼoʼna tuʼn cyjaw jolpaja tiʼj tnachal tuj twiʼpan kʼij, banwtla asta oc cycyima, lutzan luʼ, otak chi tena tuj tkʼab t-xew dyablo que bix chocal totxʼoʼn te tex; cyjaʼtzan jluʼ, nneltzan lakʼeʼ cyiʼja aj t-Xew Kajaw bix mitiʼ tcubil cyucʼala, bix atzan dyablo at tipamal cyibaja; bix atzan tuʼmal nachjo tuj oc tjapan baj twiʼ.

36. Bix lon wuʼne ajo, porque cyaj tmaʼn Kajaw miʼn najan cyuj templo ẍwaj, sino cyuj cyanmi ke eteʼ tuj xtis ax xiʼtmaʼn ke baʼn xjal chicbel tutzʼe tuj tnajbil tuʼn miʼn cyetztl bix ke cyxbalan chocal pur sakxix tuʼn tchicyʼel tNel Dios.

37. Bix jaʼlatzan, akiya wermaniya cʼujlaʼn wuʼna, wajbila tuʼn t-xiʼ cycʼujlaʼcje ke cosas ajo; tuʼn cycambana tiʼj colbil tuʼn tchi twitz Dios; tuʼn mi tcub cyeʼwantla más tiʼj tuʼn tul Cristo;

38. Miʼn chi kʼojltla mas tiʼj Xewbaj Sant, sino que nok tuʼn tcyikʼa bix tuʼn t-xiʼ cyiʼna cyibaja aj tbi Cristo; tuʼn tcub cybecyʼbiliʼn cywitza asta oc cyoca kuk bix tuʼn cynana Dios tuj cyakil ligar jatuma ateʼya bixmo chi tela, tuj xewbaj bix ax toc; bix tuʼn cyankʼin juʼnjun kʼij tuj chjonta tiʼj nim xtalbil bix cyʼiwbil ntzaj tkʼoʼn cyibaja.

39. Icytzanjo, bix ax cxel nmaʼna cyeya, akiya wermaniya, tuʼn cycwenta cyiba bix cuxiʼ tuʼn cynana Dios mi cyxiʼya tuj tmoybil dyablo, bix mix tuʼn cycuba tuʼn, mix tuʼn cyoca te tmajan tuj twiʼpan kʼij; tuʼnj lutzan luʼ, ntiʼ ntzaj tkʼoʼn cosas tbanal.

40. Akiya wermaniya nim wajbil cyiʼja, wajbila tuʼn t-xiʼ nmaʼna cyeya tuʼn ten cypasensa, tuʼn tcub cyapaʼna nim taʼw bix miʼn tzʼoc cykʼojleʼna ajke nchel icʼana cyuʼn tuʼn tlaj cymebayila, tuʼntzan mi cyoca binchal twitz il icytzan cye.

41. Sino tuʼn ten cypasensa, tuʼn t-xiʼ cyiʼna ajke taʼw ajo tuʼn cytena tuj que tuj jun kʼij yajxa oc chi ujlala cyiʼj cyakilkaj taʼw cyiʼja.