Scriptures
2 Nephi 4


Kapitulo 4

Hinatolan asin benendisionan ni Lehi an saiyang ipapangaraki—Nagadan siya asin ilinubong—Inomaw ni Nephi an karahayan kan Dios—Itinao ni Nephi an saiyang panarig sa Kagurangnan sagkod pa man. Manga 588–570 B.C.

1 Asin ngonian, ako, si Nephi, nagtataram manunungod kan manga propesia na sinabi kan sakuyang ama, manunungod ki Jose, na dinara sa Egipto.

2 Huli ta totoo nanggad, na siya nagpropesia manunungod kan saiyang gabos na bunga. Asin an manga propesia na saiyang isinurat, daing dakol na maorog pa. Asin nagpropesia siya manunungod samuya, asin an samuyang masunod na kapagarakian; asin an manga ini nakasurat sa plakeng tanso.

3 Kaya, pagkatapos kan pagtaram kan sakuyang ama manunungod sa manga propesia ni Jose, saiyang inapod an manga aki ni Laman, an saiyang manga aking lalaki, asin an saiyang manga aking babae, asin nagsabi sainda: Magdarangog, manga aki kong lalaki, asin manga aki kong babae, na manga aki kan sakuyang panganay, minamawot ko na kamo magdarangog sa sakuyang manga tataramon.

4 Huli ta an Kagurangnan na Dios nagsabi na: Sagkod na saindong sinusunod an sakuyang manga katugonan kamo mag-uuruswag sa daga; asin sa siring na kamo dai magsunod sa sakuyang katugonan kamo isisiriblag sa sakuyang atubangan.

5 Alagad totoo, manga aki kong lalaki asin manga aki kong babae, dai ako maduman sa sakuyang lulubngan sagkod na dai ko kamo walatan nin bendision, huli totoo, na aram ko na kun kamo pinadarakula sa tamang dalan na saindong aagihan, dai nanggad kamo maharali diyan.

6 Huli kaini, kun kamo isumpa, magdangog, iwinawalat ko an sakuyang bendision saindo, tanganing an sumpa mahali saindo asin ta sisimbagon kan saindong manga magurang.

7 Kaya, huli sa sakuyang bendision an Kagurangnan na Dios dai matitios na kamo mapara; kaya, magigi siyang maheherakon saindo asin sa saindong ibubunga sagkod pa man.

8 Asin ta uminagi an panahon na pagkatapos magtaram kan sakuyang ama sa manga aking lalaki asin manga aking babae ni Laman, saiyang hinagad na darahon an manga aking lalaki asin manga aking babae ni Lemuel saiya.

9 Asin siya nagsabi sa sainda, an sabi: Magdangog, sakuyang manga aking lalaki asin sakuyang manga aking babae na manga aking lalaki asin manga aking babae kan ika-duwa kong aking lalaki; magdarangog sakuyang iwinawalat saindo an siring man na bendision na sakuyang iwinalat sa manga aking lalaki asin manga aking babae ni Laman; huli kaini, dai nanggad kamo marurumpag; alagad sa katapusan an saindong bunga bebendisionan.

10 Asin ta uminagi an panahon na pagkatapos magtaram kan sakuyang ama sa sainda, totoo, siya nagtaram sa manga aking lalaki ni Ismael, iyo, sagkod sa gabos na nasa saiyang harong.

11 Asin pagkatapos kan saiyang pagtaram sainda, siya nagtaram ki Sam, an sabi: Paladan ka, asin an saimong bunga; huli ta saimong panunundon an daga na siring kan sa saimong tugang na si Nephi. Asin an saimong bunga ibibilang na kaiba kan saiyang bunga; asin ika ipapantay sa saimong tugang, asin an saimong bunga kapantay kan saiyang bunga; asin ika papaladon sa gabos mong manga aldaw.

12 Asin ta uminagi an panahon pagkatapos na an sakuyang ama, na si Lehi, magtaram sa saiyang pag-iriba sa harong, sunod sa namamatian kan saiyang puso asin sunod sa Espiritu kan Kagurangnan na nasa saiya, siya nagluya sa pagkagurang. Asin uminagi an panahon na siya nagadan, asin ilinubong.

13 Asin ta uminagi an panahon na dai nahaloy matapos na siya magadan, si Laman asin si Lemuel asin an manga aki na lalaki ni Ismael nagka-aranggot sa sakuya nin huli kan manga patanid kan Kagurangnan.

14 Nin huli ta ako, si Nephi, napiritan na magtaram sa sainda, susog sa saiyang tataramon; nin huli ta ako nagsabi nin kadakol na manga bagay sa sainda, asin man an sakuyang ama, bago siya nagadan; na an kadakolan sa manga tataramon na iyan nakasurat sa sakuyang ibang manga plake; huli ta an iba pang kabtang sa sakuyang manga ginibong kasaysayan nakasurat sa sakuyang ibang manga plake.

15 Asin ta digdi sakuyang isinurat an manga bagay manunungod kan sakuyang kalag, asin an kadakol na manga banal na kasuratan na nakaukit sa manga plakeng tanso. Huli ta an sakuyang kalag nag-oogma sa manga banal na kasuratan, asin an sakuyang puso naghohorop-horop kan manga ini, asin ta sakuyang isinusurat an manga ini para sa kaaraman asin sa pakinabang kan sakuyang manga aki.

16 Totoo na an sakuyang kalag naoogma sa manga bagay kan Kagurangnan; asin ta an sakuyang puso naghohorop-horop nin padagos sa manga bagay na sakuyang nahihiling asin nadadangog.

17 Alagad, sa ibong kan dakulang karahayan kan Kagurangnan, sa pagpahiling sakuya kan saiyang dakula asin makangangalas na manga gibo, an sakuyang puso nagkukurahaw: O ako na makaheherak na tawo! Iyo, an sakuyang puso nagmumundo huli sa sakuyang laman; an sakuyang kalag nagmumundo huli sa sakuyang manga kasumbikalan.

18 Ako napapalibotan sa paligid huli sa manga sugot asin sa manga kasalan na madaling nakapagpapadagka sa palibot ko.

19 Asin ta kun boot kong mag-ogma, an sakuyang puso nag-aagrangay huli sa sakuyang manga kasalan; alagad aram ko kun kiisay ako nanarig.

20 An sakuyang Dios iyo an sakuyang tukod; siya an nag-antabay sa sakuyang manga kasakitan sa kadlagan; asin ta saiyang iningatan ako sa ibabaw kan tubig kan dakulang kararoman.

21 Pinano niya ako kan saiyang pagkamoot, sagkod na ini namatean kan sakuyang bilog na hawak.

22 Rinibong niya an sakuyang manga kaiwal, sagkod sa magtarakig sinda sa sakuyang atubangan.

23 Totoo, saiyang nadangog an sakuyang inagrangay sa aroaldaw, asin ta tinatawan niya ako nin kaaraman sa paagi nin pagpahiling sa sakuya nin bision sa banggi.

24 Asin sa aldaw ako naging maisog sa maigot na pagpamibi sa atubangan niya; iyo an sakuyang tingog pinaaabot ko saiya sa kaitaasan; asin an manga anghel nagbaraba asin ako pinaglingkodan.

25 Asin sa manga pakpak kan saiyang Espiritu an sakuyang hawak saiyang dinara sa pinakahalangkaw na manga bulod. Asin an sakuyang manga mata nakahiling nin darakulang manga bagay, iyo, darakulang gayo para sa tawo; kaya ako pinatanidan na dai ko isurat an manga idto.

26 O kaya, kun ako nakahiling nin darakulang manga bagay, kun an Kagurangnan sa saiyang pagkaherak asin pagtabang sa manga aki nin manga tawo dinalaw an manga tawo na igwang dakulang pagkaherak, ngata ta an sakuyang puso magtangis asin an sakuyang kalag magdanay sa kapatagan nin kamundoan, asin an sakuyang laman masayang sana, asin an sakuyang kusog magluya, huli sa sakuyang manga kasakitan?

27 Asin ngata ta ako magpapadaog sa kasalan, huli sa sakuyang laman? Iyo, ngata ta ako magpapadara sa manga sugot, tanganing an manga maraot magkaigwa nin lugar sa sakuyang puso sa pagrumpag kan sakuyang katuninongan asin magsakit an sakuyang kalag? Ngata ta maanggot ako huli sa sakuyang manga kaiwal?

28 Magbangon, sakuyang kalag! Dai ka mangluya sa kasalan. Mag-ogma, O sakuyang puso, asin dai na magtao nin lugar sa kaiwal kan sakuyang kalag.

29 Dai ka maanggot giraray huli sa sakuyang manga kaiwal. Dai man pagpaluyaha an sakuyang kusog huli sa sakuyang manga kasakitan.

30 Mag-ogma, O sakuyang puso, asin magkurahaw sa Kagurangnan, asin sabihon: O Kagurangnan, sakuyang oomawon ika sagkod pa man; iyo, an sakuyang kalag mag-oogma saimo, sakuyang Dios, asin gapo kan sakuyang kaligtasan.

31 O Kagurangnan, ano tutuboson mo an sakuyang kalag? Ano ililigtas mo man ako sa manga kamot kan sakuyang manga kaiwal? Ano papangyarihon mo na ako pagtakigan sa pagkahiling nin kasalan?

32 Padagos man lugod na masera an pinto kan impiyerno sa sakuya, huli ta an sakuyang puso nararagrag asin an sakuyang espiritu nagmumundo! O Kagurangnan, dai mo man lugod isara an pintoan kan saimong katanusan para sa sakuya, tanganing ako maglakaw sa dalan kan hababang kapatagan, tanganing ako magdanay sa patag na dalan!

33 O Kagurangnan, sukloban mo man ako kan gubing nin saimong katanusan! O Kagurangnan, gibohan man ako nin dalan tanganing makadulag ako sa sakuyang manga kaiwal! Patanusa man an dalan sa atubangan ko! Dai mo man lugod bugtakan nin manga gapo na masasangkogan an sakuyang dalan—alagad linigi man an dalan sa sakuyang atubangan, asin dai mo man pagbugtakan nin manga kaulangan an sakuyang dalan, kundi an dalan kan sakuyang kaiwal.

34 O Kagurangnan, ako nanarig saimo, asin ta ako mananarig saimo sagkod pa man. Dai ko ibubugtak an sakuyang panarig sa manga takyag na laman; huli ta sakuyang aram na isusumpa an siisay na magbugtak kan panarig sa manga takyag na laman. Iyo, isusumpa siya na nagbubugtak kan panarig sa tawo o ginigibong armas an laman.

35 Iyo, aram ko na an Dios magtatao nin labi-labi sa saiya na naghahagad. Iyo, an sakuyang Dios tatawan ako, kun maghagad ako nin tama; kaya sakuyang iiitaas an sakuyang tingog saiya; iyo, ako magkukurahaw sa saiya na sakuyang Dios, an gapo nin sakuyang katanusan. Totoo nanggad, an sakuyang tingog maitaas sagkod pa man sa saiya, an gapo asin sakuyang daing katapusan na Dios, Amen.