An Ika-Duwang Libro ni Nephi

1 Asin ta uminagi an panahon na pagkatapos na ako, si Nephi, magtukdo sa sakuyang manga tugang, an samuyang ama, na si Lehi nagtaram man nin dakol na manga bagay sa sainda, asin isinaysay giraray sa sainda, kun gurano kadakula an manga bagay na ginibo kan Kagurangnan para sa sainda sa pagdara sainda paluwas sa daga kan Jerusalem.

2 Asin ta nagsabi siya sa sainda manunungod kan saindang pagturumang kan duman sinda sa kadagatan, asin an pagkaherak kan Dios na iningatan pa an saindang buhay, na dai sinda hinalon kan dagat.

3 Asin ta nagsabi man siya sa sainda manunungod kan dagang ipinangako, na nakua na ninda—kun gurano kamaherakon an Kagurangnan sa pagpatanid satuya na maghali na sa daga kan Jerusalem.

4 Huli nanggad, an sabi niya, nakahiling ako nin sarong bision, na aram ko na an Jerusalem narumpag; asin ta kun kita nag-erok sana sa Jerusalem napara man kutana kita.

5 Alagad, nagsabi siya, maski na labi-labi an satuyang pagsakit, nakua niato an dagang ipinangako, an dagang pinili sa gabos na manga daga; an dagang ipinakipagtipan kan Kagurangnan na Dios sakuya na kaipuhan dagang panunundon kan sakuyang bunga. Iyo, ipinakipagtipan ining dagang ini kan Kagurangnan sakuya asin sa sakuyang manga aki sagkod pa man, asin idtong gabos na manga maharali sa ibang nasion na aantabayan kan kamot kan Kagurangnan.

6 Kaya ako, si Lehi, nagpropesia dara kan kapangyarihan kan Espiritu na nasa sakuya, na daing makakapadigdi sa dagang ini kun bakong dara kan kamot kan Kagurangnan.

7 Kaya, an dagang ini naging banal sa saiyang manga dadarahon digdi. Asin ta kun mangyari man na sinda maglingkod saiya susog sa manga tugon na itinatao niya, ini magiging daga nin katalingkasan sa sainda; kaya, dai nanggad sinda madadara sa pagkabihag; kun iyo man, ini huli na sa kasumbikalan, huli ta kun an kasumbikalan magpadagos, isusumpa an dagang ini para sa sainda, alagad sa manga matatanos paladan ini sagkod pa man.

8 Asin ta nangyari nanggad, na ini sarong kadunungan na an dagang ini itatago nguna sa kaaraman nin ibang manga nasion; huli nanggad, ta kadakol na manga nasion an magsasakop sa daga, kaya mawawaraan na nin panunundon na rona.

9 Kaya ako, si Lehi, nakakua nin panuga na mantang an manga ilinuwas sa Jerusalem kan Kagurangnan na Dios magsusurunod sa manga tugon niya, sinda mag-uuruswag sa ibabaw kan dagang ini; asin sinda dai masasakop nin ibang manga nasion na magsasadiri kan dagang ini para sa sainda. Asin ta kun mangyari na saindong sunodon an manga tugon niya babalaogan sinda sa ibabaw kan dagang ini, asin ta dai saindang magpaparibok, o maagaw sa daga na saindang pinanunod; asin ta mag-eerok sindang ligtas sagkod pa man.

10 Alagad, magdangog, kun umabot an panahon na sinda diit-diit na magrayo sa pagtubod, pagkatapos na saindang akoon an labi-labing manga balaog na hali sa kamot kan Kagurangnan—na igwa na nin kaaraman kan paglalang kan kinaban, asin gabos na tawo, nakakaaram na kan bantog asin makangangalas na manga ginibo kan Kagurangnan magpoon pa kan paglalang kan mundo; na igwang kapangyarihan na itinao sainda tanganing magibo an gabos na manga bagay sa paagi nin pagtubod; na igwa kan gabos na katugonan magpoon sa kapinonan, asin dinara sa pinaorog na daga na ipinangako sa paagi kan saiyang daing-katapusan na karahayan—totoo, sakuyang sasabihon, na kun umabot an panahon na saindang isikwal an Banal kan Israel, an tunay na Mesias, an saindang Paratubos asin saindang Dios, totoo, an saiyang paghatol na igwang katanusan mapapasainda.

11 Iyo, saiyang dadarahon an ibang manga nasion sa sainda, asin saiyang tatawan sinda nin kapangyarihan, asin saiyang hahalion sa sainda an dagang pagsadiri ninda, asin ta gigibohon niya na sinda makawagas asin mapadusahan.

12 Iyo, mantang an sarong kapagarakian minaabot sa masunod na kapagarakian magkakaigwa nin pagbulos nin dugo, asin dakulang manga pagdalaw sainda; kaya, sakuyang manga aki, boot ko na marumdoman nindo; Iyo, boot ko na magdangog kamo sa sakuyang manga tataramon.

13 O kamo mapukawan lugod; mapukaw sa hararom na pagturog, iyo, maski sa pagturog kan impiyerno, asin iwandag an makangurungirhat na kadena na nakagapos saindo, kun arin na manga kadena na nakagapos sa manga aki nin tawo, na nagdadara sainda sa pagkabihag sa daing-kasagkuran na look nin pagtios asin kamundoan.

14 Magmata! Asin magbangon hali sa kabokabo, asin magdangog sa manga tataramon nin nagtatakig na magurang, na an hawak madali na nindong papahigdaon sa malipot asin matuninong na lulubngan, na daing siisay man na paralakbay na nakakabalik; manga magkapirang aldaw na sana mapasiring na ako sa padudumanan kan gabos sa kinaban.

15 Alagad totoo, na tinubos kan Kagurangnan an sakuyang kalag hali sa impiyerno; nahiling ko an saiyang kamurawayan, asin ta ako nakukugos sagkod pa man kan manga takyag kan saiyang pagkamoot.

16 Asin ta naghuhulaw ako na saindong marumdoman na utobon an susundon asin kahatolan kan Kagurangnan; magdangog, ta iyo ini an ikinahahadit kan sakuyang kalag magpoon pa sa kapinonan.

17 An sakuyang puso dayaday na nagagabatan sa kamundoan, huli ta ako natatakot, na tibaad sa katagasan kan saindong manga puso an Kagurangnan na saindong Dios umabot na pano nin kaanggotan saindo, na kamo masiblag asin marumpag sagkod pa man.

18 O, na an sarong sumpa umabot saindo sa laog nin dakol na manga kapagarakian; asin kamo dadalawon nin espada, asin tag-gutom, asin kaungisan, asin ta dadarahon kamo susog sa pagboot asin pagkabihag kan demonio.

19 O sakuyang manga aking lalaki, dai man lugod umabot ining manga bagay na ini saindo, alagad na kamo maging manga pinili asin pinaorog na manga tawo kan Kagurangnan. Alagad, mangyari man lugod an saiyang kapagbotan; huli ta an saiyang manga paagi matanos sagkod pa man.

20 Asin saiyang sinabi na: Mantang sinusunod nindo an sakuyang manga katugonan kamo mag-uuruswag digdi sa daga; alagad kun kamo dai magsurunod sa sakuyang manga katugonan isisirikwal ko kamo sa atubangan ko.

21 Asin sa ngonian tanganing an sakuyang kalag magkaigwa nin kaogmahan sa saindo, asin an sakuyang puso maghali sa mundong ini na igwang kaogmahan huli sa saindo, tanganing ako dai madara sa lulubngan na igwang kamundoan asin kapungawan, bumangon kamo hali sa kabokabo, sakuyang manga aking lalaki, asin magpakalalaki, asin magkaigwa nin pagmawot na magkasararo sa isip asin sa puso, magkasararo sa gabos na bagay, tanganing dai man lugod kamo umabot sa pagkabihag.

22 Tanganing dai man lugod kamo isurumpa nin makangurungirhat na sumpa; asin man, tanganing dai umabot saindo an kauyaman kan pantay na Dios, sagkod sa pagkarumpag, iyo, an daing-kasagkuran na pagkapara kan kalag asin hawak.

23 Magmata, manga aki kong lalaki; isulot nindo an kalasag nin katanusan. Iwandag an kadena na nakagapos saindo, asin lumuwas sa kadikloman, asin bumangon sa kabokabo.

24 Dai na kamo makiiwal sa saindong tugang, na an manga pananaw mamuraway, asin nagsusunod sa manga katugonan magpoon pa kan panahon paghali niato sa Jerusalem; asin ta siya an naging kasangkapan kan manga kamot kan Dios, sa pagdara satuya sa dagang ipinangako; huli ta kun bako saiya, napara na kutana kita sa kagutoman digdi sa kadlagan; alagad, boot pa nindong halian siya nin buhay; iyo, asin ta nakamati pa siya nin labi-labing kamundoan nin huli sa saindo.

25 Asin ta labi-labi an sakuyang takot asin ako nagtatakig huli sa saindo, na tibaad siya magtios na naman; nin huli, ta sinasaotan siya nindo na boot niyang magkaigwang kusog asin kapangyarihan sa saindo; alagad aram ko na dai niya boot na magkaigwa nin kapangyarihan asin kabagsikan sa saindo, kundi an saiyang minamawot iyo an kamurawayan kan Dios, asin an saindong daing-kasagkuran na karahayan.

26 Asin kamo nagngungururob-ngurob huli ta siya malinaw sa saindo. Sinabi nindo na maisog siya; iyo sinabi nindo naanggot siya saindo; alagad totoo, an pagkaisog niya iyo an pagkaisog kan tataramon kan Dios, na nasa saiya; asin ta an inaapod nindo na kaanggotan iyo an katotoohan, susog sa kaidtong nasa Dios, na dai niya mapugol, sa pagpahiling nanggad kan manga kasumbikalan nindo.

27 Asin ta kaipuhan nanggad na an kapangyarihan kan Dios nasa saiya, sagkod na pagbotan kamo na magsunod. Alagad totoo, na bako man siya, kundi iyo an Espiritu kan Kagurangnan na nasa saiya, na nagbuka kan nguso niya na magtaram na dai na niya mapugolan.

28 Asin ngonian, aki kong Laman, asin kamo man Lemuel asin Sam, asin man kamong manga aki ko na aking lalaki ni Ismael, magdarangog, kun kamo magdarangog kan tingog ni Nephi dai kamo mapapara. Asin kun kamo magdarangog sa saiya wawalatan ko kamo nin balaog, iyo, maski an pinakaenot kong balaog.

29 Alagad kun dai kamo magdarangog sa saiya babawion ko saindo an enot kong balaog, iyo, maski an sakuyang balaog, asin ta idto mapapasaiya.

30 Asin ngonian, Zoram, nagtataram ako saimo: Magdangog, ika an surogoon ni Laban; alagad, dinara ka paluwas sa daga kan Jerusalem, asin aram ko na ika tunay na amigo kan sakuyang aki, na si Nephi, sagkod pa man.

31 Kaya, huli ta ika maimbod, an saimong ibubunga paladan kaiba kan saiyang ibubunga, na sinda mabubuhay na mauswag nin halawig na panahon sa ibabaw kan dagang ini; asin ta daing iba, kundi kasumbikalan man sana ninda an maratak o maparibok kan saindang kauswagan sa ibabaw kaining daga sagkod pa man.

32 Kaya, kun saindong susunodon an manga katugonan kan Kagurangnan, an Kagurangnan pababanalon an dagang ini para sa kaligtasan kan saindong ibubunga kaibahan kan ibubunga kan sakuyang aki.