1 Asin ngonian ako mataram saimo, Jose, na aki kong huring ipinangaki. Ika ipinangaki sa kadlagan sa sakuyang manga kasakitan; iyo, sa manga aldaw nin sakuyang makuring kamundoan ika ipinangaki kan saimong ina.

2 Asin pakabanalon man lugod kan Kagurangnan an dagang ini para sa saimo, na pinakaorog na daga, na saimong panundon asin panundon kan saimong ipapangaraki kaibahan an saimong manga tugang, tanganing ika ligtas sagkod pa man, kun ika magsusunod kan manga katugonan kan Banal kan Israel.

3 Asin ngonian, Jose, na sakuyang nguhod na aki na sakuyang ilinuwas sa kadlagan sa sakuyang manga kasakitan, bendisionan ka man lugod kan Kagurangnan sagkod pa man, huli ta an saimong manga ibubunga dai marumrumpag.

4 Huli, ta ika an bunga kan sakuyang habayan; asin ta ako gikan ki Jose na dinarang bihag sa Egipto. Asin dakula an manga tipan kan Kagurangnan na saiyang ginibo ki Jose.

5 Huli kaini, nahiling na nanggad ni Jose an satuyang aldaw. Asin ta nakua niya an pangako nin Kagurangnan, na hali sa bunga kan saiyang habayan mapili an Kagurangnan na Dios nin sarong matanos na sanga sa harong kan Israel; bako an Mesias, alagad sarong sanga na babarion; alagad, marurumdoman sa manga tipan kan Kagurangnan na an Mesias mahahayag sa sainda sa manga huring aldaw, sa espiritu nin kapangyarihan, sagkod sa pagdara sa sainda hali sa kadikloman pasiring sa liwanag—iyo, hali sa natatagong kadikloman asin hali sa pagkabihag pasiring sa katalingkasan.

6 Huli si Jose tunay na nagpatotoo, na an sabi: Sarong nakakakita an patitindugon kan Kagurangnan na sakuyang Dios, na magiging sarong piniling nakakakita gikan sa bunga kan sakuyang habayan.

7 Iyo, si Jose tunay na nagsabi: Siring an sinabi kan Kagurangnan sa sakuya: Sarong piniling nakakakita an sakuyang patitindugon na gikan sa bunga kan saimong habayan. Asin tatanawon siyang halangkaw na bunga kan saimong habayan. Asin saiya ko itatao an katugonan na siya an magibo kan manunungod sa manga bunga kan saiyang habayan, sa saiyang manga katugangan, na dakula an halaga sa sainda, sagkod sa pagdara sa sainda kan kaaraman kan manga tipan na sakuyang ginibo sa saindong manga ginikanan.

8 Asin sakuyang itatao saiya an sarong katugonan na dai siyang ibang gigibohon, kundi an ipinapagibo ko lamang saiya. Asin gigibohon ko siyang dakula sa sakuyang manga mata; huli ta saiyang gigibohon an sakuyang ipinapagibo.

9 Asin ta siya magiging dakula siring ki Moises, na sakuyang sinasabi na sakuyang patitindugon sa saindo, na magliligtas kan sakuyang manga tawo, O, Harong kan Israel.

10 Asin si Moises sakuyang pinatindog, tanganing iligtas an sakuyang manga tawo paluwas sa daga kan Egipto.

11 Alagad sarong nakakakita an sakuyang patitindugon hali sa bunga kan saimong habayan; asin ta sakuyang itatao saiya an kapangyarihan na madara kan sakuyang manga tataramon sa bunga kan saimong habayan—asin bako sana sa pagdara kan sakuyang tataramon, an sabi kan Kagurangnan, kundi sagkod sa pagpakuyog sainda sa sakuyang manga tataramon, na nasa sainda na.

12 Huli kaini, an bunga kan saimong habayan masurat; asin an bunga kan habayan ni Juda masurat; asin an manga sinurat kan manga bunga kan saimong habayan, asin man an isinurat kan manga bunga kan habayan ni Juda, magtatalubong sabay, sa pagtapos kan salang doktrina asin an pagpundo kan iriwal, asin an pagkaigwa nin katuninongan sa manga bunga kan saimong habayan, asin an pagdara sainda sa kaaraman kan saindang manga kamagurangan sa huring manga aldaw, asin man sa kaaraman kan sakuyang tipan, an sabi kan Kagurangnan.

13 Asin hali sa kaluyahan magigi siyang makusog sa aldaw kan pagpoon kan sakuyang gibo sa sakuyang manga tawo, sa pagsulit saimo, O harong kan Israel, sabi kan Kagurangnan.

14 Asin siring an propesia ni Jose, na an sabi: Totoo, na idtong nakakakita babalaogan kan Kagurangnan; asin sinda na an tuyo raoton siya mariribong; huli sa pangakong ini, na sakuyang nakua sa Kagurangnan, manunungod sa bunga kan sakuyang habayan, mauutob. Iyo nanggad, totoo na mauutob an pangakong ini;

15 Asin an saiyang pangaran isusunod sa sakuya; asin isusunod sa pangaran kan saiyang ama. Asin magiging siring man siya sakuya; huli sa manga bagay na ipapagibo kan Kagurangnan sa paagi kan saiyang manga kamot, sa kapangyarihan nin Kagurangnan dadarahon an sakuyang manga tawo sa kaligtasan.

16 Iyo, siring an propesia ni Jose: Sakuyang aram na totoo nanggad an bagay na ini, siring sa sakuyang aram nanggad an pangako ni Moises; huli ta sinabi ini sakuya kan Kagurangnan, iingatan ko an saimong ibubunga sagkod pa man.

17 Asin an Kagurangnan nagsabi: Mapatindog ako nin sarong Moises; asin sakuyang itatao saiya an kapangyarihan sa sarong sugkod; asin itatao ko an paghukom sa saiya sa kasuratan. Alagad dai ko palulumoyon an saiyang dila, tanganing dai siya makapagtaram nin labi-labi, huli ta dai ko siya gigibohon na marahay sa pagtaram. Alagad sakuyang isusurat saiya an sakuyang katugonan, sa paagi kan muro kan sadiri kong kamot; asin ta tatawan ko siyang tagapagtaram para sa saiya.

18 Asin an Kagurangnan nagsabi man sakuya; mapatindog ako sa bunga kan saimong habayan; asin sakuyang tatawan siya nin tagapagtaram. Asin totoo nanggad na sakuyang itatao saiya na siya makasurat kan kasuratan kan manga bunga kan saimong habayan, para sa manga bunga kan saimong habayan, asin an tagapagtaram kan manga bunga kan saimong habayan an magbabalangibog kaini.

19 Asin an manga tataramon na saiyang isusurat iyo an manga tataramon na igwang pakinabang sa sakuyang kadunungan na makaabot sa manga bunga kan saimong habayan. Asin ini mangyayari na garo an manga bunga kan saimong habayan nagkurahaw hali sa kabokabo; huli ta sakuyang aram an saindang pagtubod.

20 Asin sinda magkukurahaw hali sa kabokabo; iyo, sagkod sa pagsorolsol kan saindang katugangan, sagkod sa pagkatapos nin dakol na kapagarakian sainda umagi na. Asin maagi an panahon na an saindang kurahaw magpapadagos, sagkod susog sa saindang manga yanong tataramon.

21 Huli sa saindang pagtubod an saindang tataramon maluwas sa sakuyang nguso sa saindang katugangan na manga bunga kan saimong habayan; asin an kaluyahan kan saindang manga tataramon gigibohon kong makusog sa saindang pagtubod, tanganing marumdoman an sakuyang tipan na sakuyang ginibo sa saindong manga ginikanan.

22 Asin ngonian, magdangog, Jose na sakuyang aki, sa siring kaining paagi an sakuyang ginikanan na ama nagpropesia.

23 Kaya, huli kaining tipan ika naging mapalad; huli ta an saimong ibubunga dai marurumpag, huli ta magdadarangog sinda sa manga tataramon sa libro.

24 Asin igwang magtitindog na sarong makapangyarihan sa sainda, na magibo nin dakol na karahayan, sa tataramon o sa gibo, huli ta siya sarong kasangkapan kan kamot kan Dios, na igwang labi-labing pagtubod, tanganing makagibo nin darakulang ngangalasan, asin makagibo kan bagay na dakula sa paghiling kan Dios, tanganing mautob an dakol na manga pagsusulit sa harong kan Israel, asin sa manga bunga kan saimong katugangan.

25 Asin ngonian, paladan ka Jose. Totoo, na ika sadit; kaya magdangog sa manga tataramon kan saimong tugang, na si Nephi, asin ta mangyayari saimo sunod sa manga tataramon na sakuyang sinabi. Rumdomon mo an manga tataramon kan saimong magagadanon na ama. Amen.