1 Kunantaq noqa Nephi, ancha munasqay wawqeykuna, qankunaman unanchayta tukuni. Manan qelqayta atinichu, ichaqa, huk chikallanta, yachanin cheqaqtapuni chaykuna kananta; manataqmi qelqayta atinichu, ichaqa huk chikallanta wawqey Jakobpa rimayninkunamanta.

2 Hinaqa, allinñan qelqasqaykuna; ichaqa, huk chikantawanmi rimarinay Cristoq yachachiyninkunamanta; chhaynaqa, sut’itapuni rimarisaykichis, unanchayniykuna sut’i kasqanman hina.

3 Anchatapunin nunay kusikun sut’in kaqpi; khaynatan Wiraqocha Yaya llank’an runakunaq wawankuna purapi. Wiraqocha Yayaqa hamut’anapaqmi k’anchayta qon; runakunamantaq rimarin siminkuman hina, hamut’anankupaq.

4 Chhaynaqa, yuyarinaykichistan munayman, Wiraqocha qhawachiwasqan unanchaqmanta qankunaman rimarisqayta; paytaq Yayaq Chitanta unuchanqa, Paytaq runakunaq huchankunata horqonqa.

5 Kunantaq Yayaq Chitan qollanan kaspa, llapa chaninchayta hunt’akunanpaq un unuwan unuchasqa kanan chayri, hayk’atawanraqmi noqanchis nesitanchis mana qollanan kaspa unuchakunanchispaq, ari, unuwanpuni?

6 Kunantaq qankunata tapusaykichis ancha munasqay wawqeykuna, imaynatan Yayaq Chitan llapa chaninchayta hunt’arqan unuwan unuchakuspa?

7 Manachu yachankichis qollanan kasqanta? Qollananña Pay karqan chaypas, runakunaq wawankunamanmi qhawachirqan, Taytaq ñawpaqenpi Pay kikin aychaman hina ullpuykukusqanta; Taytamantaq sut’inchan, kamachiyninkunata waqaychananpaq kasukuq kananta.

8 Unupi unuchasqa kasqan patamantaq Qollanan Nuna Pay pataman urayamurqan urpi phurmapi.

9 Runakunaq wawankunamantaq qhawachin, ñanpa siwkneq kayninta, punkuq k’ikllu kaynintawan; chaynintataq paykuna haykunanku, ñawpaqninkuta imayna ruwanata Pay qhawachispa.

10 Paytaq runakunaq wawankunaman nirqan: Qatikuwaychis, nispa. Chhaynaqa ancha munasqay wawqeykuna, Jesus qatikuyta atiswanchu, Taytaq kamachiyninkunata waqaychananchispaq mana munayniyoq kaspa?

11 Taytataq nirqan: Kutiriychis, kutiriychis huchaykichiskunamanta, Ancha Munasqay Churiypa sutinpitaq unuchasqa kaychis, nispa.

12 Khaynatan Churiq arunpas hamuwarqan: Sutiypi unuchakuqmanqa, Qollanan Nunatan payman Tayta qonqa noqaman hina; chhaynaqa qatikuwaychis, ruway rikuwasqaykichistataq ruwaychis, nispa.

13 Hinaqa, ancha munasqay wawqeykuna, yachanin, Churita qatikunkichis tukuy sonqowan, mana ishkay uya kaspa, Yayaq ñawpaqenpi mana q’otuspa ima chayqa, ichaqa, cheqay munaywan, huchaykichismanta kutirimuspa, unuchakuywan Cristoq sutinta hoqariyta munasqaykichista Taytaman sut’inchaspa; ari, Wiraqochaykichista, Qespicheqniykichista rimayninman hina unukama qatikuspaykichis chayqa, chaymi Qollanan Nunata chashkinkichis; ari, chay patamanmi ninawan, Qollanan Nunawan ima unuchay hamun; hinamantataq angelkunaq siminwan rimayta atinkichis, Israelpa Qollananmantaq yupaychaykunata qapariyta atinkichis.

14 Ichaqa ancha munasqay wawqeykuna, khaynatan Churiq arun chayamuwarqan: Huchaykichismanta kutirimusqaykichis pataman, Taytamantaq sut’incharqankichis kamachiyniykunata waqaychay munasqaykichismanta, unupi unuchakuspa, hinaspataq chashkirqankichis ninawan, Qollanan Nunawan ima unuchayta, hoq mosoq simiwantaq rimayta atiwaqchis chayqa; ari, angelpa siminwan, chay patamantaq noqata mananchawankichisman chayqa, aswan allinmi qankunapaq kanman karqan mana reqsiwanaykichis, nispa.

15 Khaynatataq huk aruta Taytamanta uyarirqani: Ari, Ancha Munasqaypa rimayninkunaqa cheqaqmi, iñiysapataq. Tukukuykama takyaqmi qespichisqa kanqa, niqta.

16 Kunantaq ancha munasqay wawqeykuna, kayraykun kayta yachani, kawsaq Yayaq Churinpa qhawachisqan qatikuypi mana tukukuykamachu runa takyanqa chayqa, manan qespichisqachu kanqa.

17 Chhaynaqa, Wiraqochaykichispa, Kutichikapuqniykichispa ima ruwanan rikusqayta qankunaman nisqayta ruwaychis; kayraykun kaykuna qhawachiwasqa karqan, mayqen punkunta haykuyta yachanaykichispaq. Haykunaykichis punkuqa huchamanta kutirimuy, unupi unuchakuypiwanmi; hinamantaq ninawan Qollanan Nunawan ima huchaykichiskunapaq panpachay hamun.

18 Hinamantaqmi kay wiñay kawsayman pusaq siwk llañu ñanpi qankuna kankichis; ari, punkuntan haykurqankichis; Taytaq, Churiq ima kamachiyninkunaman hinan ruwarqankichis; Qollanan Nunatataq chaskirqankichis, paytaq Taytamanta Churimantawan sut’inchan, Paypa ruwasqan promesa hunt’akunanpaq—ñanninta haykuqtiykichisqa chashkinaykichista.

19 Kunantaq ancha munasqay wawqeykuna, kay siwk llañu ñanman haykusqaykichis pataman tapuykichisman—llapanñachu ruwakurqan? Noqataq nisaykichis, manan nispa; manan kaykama hamuwaqchischu karqan, Cristoq rimaynin mana kanmanchu karqan chayqa, Paypi mana kuyureq iñiywan, qespichiypaq atiysapaq ruwayninkunapi k’irarikuspa ima chayqa.

20 Chhaynaqa ñawpaqmanmi rinaykichis Cristopi allinta sayapakuspa, suyakuypa hunt’asqa k’anchariyniyoq kaspa; Yayaq munakuyninwan, runakunaq munakuyninkuwan ima kaspa. Chhaynaqa, ñawpaqman qatikunkichis chayqa, Cristoq rimayninpi kusikuspa, tukukuykamataq takyaspa chayqa, khaynatan Tayta nin: Wiñay kawsayniyoqmi kankichis, nispa.

21 Kunantaq ancha munasqay wawqeykuna, kaymi ñan; manataqmi hukniraq ñan kanchu, nitaq huk sutipas hanaqpachaq urayninpi qosqa kanchu, chaywan runakuna Yayaq qhapaqsuyunpi qespichisqa kanankupaq. Kunanqa, kaymi Cristoq yachachiynin, kay sapallantaqmi Taytaq, Churiq, Qollanan Nunaqpiwan (kaytaq huk Yayalla, mana tukukuyniyoq) cheqaq yachachiyninku. Hinataq kachun.