1 Nansha nanku, difîkuluka kadiakuikalaku bu muvuabi mu dikengeshibua diabu to, pakatatshishaye kumpala kakesa bulaba bua Zebulona, ne bulaba bua Nafatale, ne kunyima wakatatshisha bikola ku njila wa ku Mbuwa Mukunza dishiya dia Yadene mu Galela wa bisamba.

2 Bantu bavua benda mu mîdima badi bamona bukenka bukola; badi bikadila mu bulaba bua mundidimbi wa lufu, pa mutu pabu bukenka buakenki.

3 Udi muvudija tshisamba, ne mudiundisha disanka—Badi basanka kumpala kueba bilondeshila ku disanka mu dipôla, ne bu bantu basanka padibu bâbanyangana binyengibu.

4 Bualu watshibudi tshikokedi tshia bujitu buabu, ne mutshi wa pa dikaya diabu, mulangala wa mukengeshi wabu.

5 Bualu mvita yonsu ya muluanganyi idi ne mutoyi wa disalu, ne bivualu bivunga mu mashi; kadi etshi netshikala ne diôsha ne nkunyi ya kapia.

6 Bualu kutudi muana waledibu, kutudi muana wa baluma wapeshibu; ne bukôkeshi nebuikala pa dikaya dienda; ne dîna dienda nedibikibua ne Mukemeshi, Mubedi, Nzambi wa Bukitu, Tatu wa Tshiendelela, Mfumu wa Ditalala.

7 Ku divudija dia bukôkeshi ne ditalala kakuena ndekelu to, pa nkuasa wa butumbi wa Davidi, ne pa bukalenga buenda bua kubulombola, ne kubushikika ne tshilumbuluilu tshiakana ne bululama kubangila apa, mena bua kashidi. Lukunukunu lua Mukalenga wa Misumba neluenza nanku.

8 Mukalenga wakatuma dîyi dienda kudi Yakoba ne ndisombela pa mutu pa Isalele.

9 Ne bantu bonsu nebamanya, mena Efelayima ne bena mu Samaleya, badi bamba mu diditambisha ne bulobu bua mutshima:

10 Madiotu adi mupuka panshi, kadi netuibaka ne mabua musonga; mitshi ya sycomore idi mikosa panshi, kadi netuyandamuna mitshi ya cedre.

11 Bua nanku Mukalenga neateka baluishi ba Lesine bua kumuluisha, ne neasangisha bena lukuna benda pamua;

12 Bena Sulia kumpala ne Bena Peleshete panyima; ne nebakusula Isalele ne mukana mubulula. Bua bionsu ebi tshiji tshienda katshiena tshikudimuka to, kadi tshianza tshienda tshitshidi tshiôlola.

13 Bualu bantu kabena bapingana kudiye udi ubatûta to, nansha kabena bakeba Mukalenga wa Misumba to.

14 Bua nanku Mukalenga neakosa mutu ne mukila wa Isalele, ditamba ne disela dituku dimua.

15 Mukulu, udi mutu; ne muprofete udi ulongesha mafi, udi mukila.

16 Bualu balombodi ba bantu aba badi babatupakaja; ne aba badi balombodibua badi babutuka.

17 Bua nanku Mukalenga kakuikala ne disanka mu bansongaluma babu to, nansha kakuikala ne lusa kudi bana ba nshiya ne bakamba babu; bualu yonsu wa kudibu udi ne mpala ibidi ne muenji wa bibi, ne mukana monsu mudi muakula bupota. Bua bionsu ebi tshiji tshienda katshiena tshikudimuka to, kadi tshianza tshienda tshitshidi tshiôlola.

18 Bualu bubi budi bôsha bu kapia; nebubutula mingonga ne mêba, ne nebutema mu bipuka bia mêtu, ne nebubanda mûlu bu mudi dibanduka dia muishi.

19 Ku tshiji tshia Mukalenga wa Misumba, bulaba bufîkuluka, ne bantu nebikala bu nkunyi ya kapia; muntu nansha umua kakuepelesha muanabu to.

20 Ne neabafula ku tshianza tshia baluma ne ikala ne nzala; ne neadia ku tshianza tshia bakaji ne kabakûkuta to; nebadia muntu ne muntu musunyi wa diboku dienda nkayenda—

21 Manashe, Efelayima; ne Efelayima, Manashe; bobu pamua nebaluisha Yuda. Bua bionsu ebi tshiji tshienda katshiena tshikudimuka to, kadi tshianza tshienda tshitshidi tshiôlola.