1 Bia bungi kupita, dîyi dia Mukalenga diakamba kundi: Angata muvungu munena, ne fundamu ne mutshi wa mukanda wa muntu, bitangila Mahâ-shalala-hasha-baza.

2 Ne ngakangata kundi bajadiki ba lulamatu bua kuandikabu, Uliya muakuidi, ne Zekâya muana wa baluma wa Yebelekaya.

3 Ne ngakaya kudi muprofete mukaji; ne wakimita ne kulela muana wa baluma. Pashisha Mukalenga wakamba kundi: Bikila dîna dienda ne Mahâ-shalala-hasha-baza.

4 Bualu Mona, muana kakumanya kudila, Tatu wanyi, ne mamu wanyi to, mabanji a Damaseke ne binyengibu bia Samaleya kabiyi bianji kunyengibua kumpala kua mfumu wa Ashû to.

5 Mukalenga wakakula kabidi kundi kabidi, wamba:

6 Bualu monsu mudi bantu aba babenga mâyi a Shiloa adi apueka talalâ, ne badi basankila mu Lesine ne muana wa baluma wa Lemalaya;

7 Mpindiewu bua nanku, Mona, Mukalenga udi utuala pa mutu pabu mâyi a musulu, makola ne a bungi, mena mfumu wa Ashû ne butumbi buenda bonsu; ne nealua pa mutu pa mitubu yabu yonsu, ne neaya pa mielelu yawu yonsu.

8 Ne neapitshila mu Yuda; neapumuka ne neuwula pa mutu, neafikila mena ku nshingu; ne dialabaja dia mapuapua enda nediwuja butshiama bua bulaba bueba, Ô Imanuele.

9 Disangishayi, Ô nuenu bantu, ne nenutshibuluka bitupa; ne teyayi ditshi, nuenu bonsu ba mu matunga a kula; disuikayi mukaba, ne nenutshibuluka bitupa.

10 Kuatayi dîyi pamua, ne nedilua tshianana; akulayi dîyi, ne kadiakutua to; bualu Nzambi udi netu.

11 Bualu Mukalenga wakakula nanku kundi ne tshianza tshikola, ne wakangambila ne ntshivua ne bua kuenda mu njila wa bantu aba to, wamba:

12 Kanuambi, Tshifufu, kudi bonsu bamba bantu aba: Tshifufu; nansha kanutshinyi ditshina diabu, anyi kanumvu bôwa to.

13 Ambayi ne Mukalenga wa Misumba nkayenda ngua tshijila, ne ikala ditshina dienu, ne ikala bôwa buenu.

14 Ne neikala tshisokomenu; kadi bua dibua dia ditetula, ne lubuebua lua tshilenduishi kudi bubidi nzubu ya Isalele, bua disoka ne diteyi kudi bena mu Yelushalema.

15 Ne ba bungi munkatshi muabu nebatetuka ne nebapona, ne batshibuka, ne bateyibua, ne bakuatshibua.

16 Kuta bujadiki, kanga mikenji munkatshi mua bayidi banyi.

17 Ne nengindila kudi Mukalenga, udi usokoka mpala wenda kudi nzubu wa Yakoba; ne nentangidila kudiye.

18 Monayi, mema ne bana badi Mukalenga mumpesha tudiku bua bimanyinu ne malu a dikema mu Isalele a kudi Mukalenga wa Misumba, udi muikadila mu Mukuna wa Siyona.

19 Ne pânuambilabu: Kebayi kudi bena lubuku, ne kudi bena mupongu badi bela tushibua ne banungana—bantu kabena ne bua kukeba kudi Nzambi wabu bua ba moyo bua kumvua kudi bafua anyi?

20 Ku mikenji ne ku bujadiki; ne biapangabu kuakula bilondeshila ku dîyi edi, bidi bualu bua kakuena bukenka munda muabu to.

21 Ne nebapitshila mu mpaji mikola ne nzala; ne nebilua ne pumvuabu nzala, nebaditatshisha nkayabu, ne nebatshipa mfumu wabu ne Nzambi wabu, ne batangila mûlu.

22 Ne nebatangila ku buloba ne kumona tshimvundu, ne mîdima, ne difîkuluka dia dipampakana, ne nebasakibua baya ku mîdima.