1 Chelchang soak chobo modengel kmo, a uriul er a demak e rael bocha le merek e lomlaoch el kirel a remo ngelekel er a uriul klebesei, ea Rubak a liluut el melekoei ngii el kmo, ng diak elungil a dil ngii me a telungalek er ngii el ngar oreomel; a rengelekel a kirir el mo siik er a redil mo becherir, meng morngii a remo ngelekel a Rubak er a beluu er a telbiil.

2 Chelecha Rubak a diluer ngii el kmo, ngak el Nephi me a rubekuk a kiram el lelmuut el mo er a Jerusalem, e nguu a Ishmael me a telungalek er ngii el mera oreomel.

3 Me chelcha ngak el Nephi me a rodam er ngak, a luueta el merola er a chereomel el mo er a Jerusalem.

4 Elecha kimerolael mo er a blil a Ishmael, e ngii a kora kmal di mloungil a rengul, meng mlo sebechemam el dmu tikingel a Rubak el mor ngii.

5 Chelcha Rubak a dilmedmekii a rengul a Ishmael me a telungalek er ngii, meng mlo sebechel lobengekel el lelmuut el mo er a chereomel er a tento er a demmam.

6 Chelecha tiael lomrolam er a chelsel oreomel, ea Laman me a Lemuel, me a reteru er a rengelekel a Ishmael redil me a reteruel ngelekel a Ishmael el sechal me a retelungalek er tir, a mlekiis el mo omtok er kemam; oi, omtok er ngak el Nephi me a Sam, me a demerir er a Ishmael, me a bechil me a re tedei el ngelekel redil.

7 Chelcha tirka mlo omtok leng mle sorir lelmuut el mo er a beluu er a Jerusalem.

8 Me chelcha bochael uaisei e ngak el Nephi er a kentil a renguk er a dercherecherel a rengerir, a mocha melekoi er ngii el Laman me a Lemuel kmo: kamosang, kemiu a meklou er ngak, endi ng ngera meng kmal medecherecher a rengmiu, e milkolk a uldesuiu, meng ngak el kekrei lochelliu e mocha mellach er kemiu e omekrael er kemiu.

9 Ngera meng diak bo morrenges a tikingel a Rubak?

10 Komla obes el kmo kemiu a mla mesa anghel er a Rubak?

11 Ea, kemiu komla bes a betok el meklou el tekoi el blal ruul a Rubak el kired, meng silbecheklid er a chimal a Laban, me a uchul me kede ngilai a rekord?

12 Ea, komla bes el kmo a Rubak, a sebechel remuul a rokui el tekoi el di moltirakl er a uldesuel kirir a rengalek el chad, alsekum eng mo mesisiich a klemraer tir er ngii.

13 Ea lsekum e leuaisei me bodoumerang er ngii e kede moubeluu er a beluu er a telbiil; me kemiu a dirrek el mo medengei el kmo, a ngar medad el klebsei, ea tekingel a Rubak el kirel a telmellel a Jerusalem a di mo tmaut; le rokui el tekoi el kirel a telmellel a Jerusalem a kmal di mo tmaut.

14 Ele, a Reng er a Rubak a di kmeed kung mo cheroid er tir; leng diak lorrenges er a re profet, me a Jeremia bla le chesmerii er a kelebus. E mle sorir el melai er a klengar er a demak, mete mlatirii lotebedii er a beluu.

15 Mak subedemiu el kmo, alsekum kolmuut el mo er a Jerusalem, e komnguemed lobenterir. Me sel lungil er kemiu e bong, ngi di bomlatk a ikel bla kulekoi el kmo, chobong e komo nguemed; a Reng er a Rubak el loldurech er ngak me ak mengedecheduch.

16 Chelecha ngak el Nephi, er a bochakmerek el melkoi er a rubekuk a ikael tekoi, eng mlo kesib a rengerir re ngak. Tirka kmal mlo kesib a rengerir, me te mildechemak e ngmai lechet el lochetak, el leko te mo mlai er a klengar re ngak, e mengoit er ngak el mo kelel a teblik el charm er a oreomel.

17 Endi, ak milluluuch el mo er a Rubak el kmo: Rubak a kultuir er a klemra re ngak er kau, e olengit me mesebecheklak er a ra chimorir a rubekuk, e beskak a klisiichek me boel sebechek el lmoched a ikael llechetek.

18 Tiael bochaek merek el melkoi a ikael tekoi, ea ikael lechet a di mlekedoked er a chimak, me ak mlekiis el mo dechor re medrir tir elobekuk e luutael mocha melekoi er tir.

19 Chelchang luutael kesbengei rengrir rengak, me a leko temo oldechelakl er ngak endi a ta er a rengelekel a Ishmael redil, me a delal, me a ta er a rengelekel a Ishmael sechal, a mocha mengeluch er a rubekuk, meng mlo chelellakl a rengrir, meng dikeael sorir el melai er a klengar rengak.

20 Mitiang kmal mlo mekngit a rengrir er a mekngit lomerellir, me temlo riou losus er ngak, e olengit er ngak me kusubes er tir er a omerellir el mer ngak.

21 Chelcha kmerael mlo ousubes er tir er a ikei el riruul mer ngak, e mlengususeu er tir me bo loluluuch el mo er a Rubak el Dios er tir me bo lousubes. Me chelecha temlo meluluuch. Ea uriul er a bo lemerek el meluluuch el mo er a Rubak, ea kiluutael er a omerolam el mo er a tento er a demak.

22 Chelechang ngomrolam el me er a tento er a demmam. Me a kimerema ngak me a rubekuk me a telungalk er a Ishmael me er a tento er a demak, e temlo ureng a sulel a Rubak el Dios er tir, me te millenget e mellul a uldars el mo er ngii.