Chedaol llechukl
1 Nephi 17


17 Bliongel

A Nephi a mlo modurech el mo meruul er a diall – A rubekul a mlomtok er ngii – Ng mlo melasm el meledaes a rengerir meng mlo ouchais chisel a teletelel a Dios el mo er a rechad er a Israel – Ng mlo mui er a klisiichel a Dios – A rubekul a dimlak el kirir el merutech er ngii lel retechii e tedi mo merat el uaia chudel.

1 Chelecha kiluuta el mocha merael er a chelsel oreomel; lomrolam a di merkong el kora di bedul ongos. Meng mle betok a metacher besul me a ringel el kiblo er ngii er a chelsel oreomel me a re bechemam a mlo mechell er a rengalk er a chelsel oreomel.

2 Endi ng mle klou a klengeltengat er a Rubak el mle er kemam, me a tech a dimle chemadech ea kimengang, endi re bechemam a mle betok chosechel a detrir meng dimlak le bol sengrenger a rengalk, me tir a mle msisiich el mle uaia re sechal, meng mlo sebecham el tal lomrael e dimlak longiremerum.

3 Mi seia uchul meng kired el moltirakl a llechul a Dios. Ele alsekum ea re ngalek el chad a mo oltirakl a llechul a Dios, e ngii a mo mekelid, e smisichid, e kudmeklii a rolel eng mo sebeched el mo lomolm a ikel llechul elle beskid; miseia uchul eng milskemam aikel ki muluusbech er se el taem er a kim kiei er a oreomel.

4 Le tia el delengcheklam er a chelsel oreomel a mlo kekemangel leng mlor ngii eiai el rak el kiblara oreomel.

5 Elecha kimle er a beluu el kimulmekedong er ngii el kmo, Brikt le ngii el mle betok a rodech me a ilotel a chalakngikl, el ngii el rokui a le kildmokl a Rubak meng diaki mad er a kall. E dirrek el milsa daob, me a ki mulmekedong er ngii el kmo Irreantum, el belkul a kmo betok almel.

6 Me chelcha, kimocha mekedecherur a tento er kemam er bitara daob. Oi, alta eng mera el mle betok ongarm el mle er kemam me a kerrior meng diak el sebechemam el lemuches er rokui, endi ng mlo er ngii a klou el deuelreng er a kimei er bita er a daob, me a ki milngeklii el kmo Brikt leng mle betok a rodech er ngii.

7 A tara klebesei er a kimngara beluu er a Brikt el mla mo betok el klebsei, ea ngerel a Rubak a mle er ngak el kmo: Bekiis e morael mo er a rois. Mak mlekiis e mirrael mor bebul a rois e lilangel lomkedong er a Rubak.

8 Chelcha Rubak a mocha melkoi er ngak el kmo: kemo melasech er a bilas, loltirakl a teletael bo kulecholt er kau, meng mo sebechek el ngoi titrir a re bebil er kau el mo imuul er tia el daob.

9 Mak dula el kmo; Rubak, ak mo ngmai a deel er ker el bo kulngoes e ousbech el meruul a dongu el bo kuusbech el melasech er a diall loltirakl er a teletael el bla mochotii er ngak?

10 Me a Rubak a ulochotii a basio el ngar ngii a deel meng mlo sebechek el remuul a dongu el bo kuusbech.

11 Chelchae ngak el Nephi a rirellii oruoru lousbech a budel a charm, el bo kuusbech er ngii el meruoru er a ngau. Elcha bochak merek eak ngilai cherul bad el meluis meng mlo sebechel chumlii a ngau.

12 A Rubak a dimlak el soal aki monguml a ngau er a kimorael er a chelsel oreomel, meng dilu el kmo, ak remuul a keliu el moungil a telemetemul meng mo diak a belkul molengoes;

13 Ak dirrek el mo llemesiu er a chelsel oreomel, e mo meledaes er a roliu alsekum ko moltirakl a llechuk, me se el bo moltirakl a llechuk e ak mo omekrael mo er kemiu el mobedul a beluu er a telbiil, me komo medenge el kmo, ngak omekrael er kemiu.

14 Oi, a Rubak a dirrek el dilung el kmo: Se el chobora beluu er a telbiil, e ko momedenge el kmo, ngak el Rubak a ngak a Dios; meng ngak el Rubak a millubet er kemiu er a tellemall, e ngilikemiu loltobed er kemiu er a Jerusalem.

15 Me ngak el Nephi a mle blechoel loba blakelreng loltirakl a llechul a Rubak, e ulurrimel er a rubekuk el kirel a mesisiich el klaumerang me a blakelreng.

16 Ta er a klebesei, e ak mocha remuul a dongu el deel el kullengoes loltobed er a bad.

17 Chelcha rubekuk er a losekak el mocha omuchel el mo melasch er a diall, e temlo mengiremerum er ngak el kmo: A ochelled a mla mo kebelung me ngomdasu el kmo ng mo meruul er a diall, e lekong sebechel ngar ngii el mo imuul er tia el klou el daob.

18 Mai kaia mle teletelir a rubekuk, er a lomtok er ngak leng dimlak el sorir el mo oureor, e dimlak loumerang el kmo, ng sebechek el dosechii a diall; e dirrek el dimlak loumerang el kmo, ak mla mechedereder er a Rubak.

19 Elcha tia rirellak ngak el Nephi meng kmal mlo mekngit a renguk er a delcherecherel a rengrir; elcha lomes er ngak melsal mekngit a renguk, eng bai mlo ungil a rengrir, mete dulang el kmo, a kimedenge el kmo ngdiak el sebechem el doschii a diall, le kimedenge el kmo kau a telkib el ngesonges er a uldasu el diak a rolel e mrellii choa klungel tiang lurreor.

20 Me kau a diuaia demad el dimle kleblung el urungulel a rengul; e mla choteklid me kede mla choitii a beluad er a Jerusalem, e mei me kede merorael er a chereomel el kma el beteknga el rak, me a re bechid al dioll e te meringel loureor, e dirrek lomechell er a chelsel oreomel, e betok el ringel a le blo er ngii eldi ta el kodall a dimlak, meng bai ungil a lemlad er a uchei ral tobed er a Jerusalem mellak le bora ika el betok el ringel.

21 Me a ikal betok el rak el dechilarm er a chelsel a chereomel eng mle sebeched el ngara deuelreng lousbech a klokled, el ngara chetemed me a blid, el loldeu a rengud.

22 Me kemam a medenge el kmo, tirikel chad el kiei er a Jerusalem a melemalt el chad; le tultirakl a llach me a uldesuel a Rubak, me a rokui el tikingel, loltirakl a llechul a Moses; me kedemedenge el kmo te melemalt el chad; ea demad a mle medakt er tir, me kede milrrael le kede mlo orrenges a tikingel, me a ochelled a diuai ngii. Ai kaikid a mle teletelel chomilkingir se el longiremrum e lomtok er kemam.

23 Mi tiae ngak el Nephi a mocha mengedecheduch er tir el kmo: Ko moumerang el kmo, a re demad el mle ngelekel a Israel ngmlo sebechir el tuobed er a chimorir a rechad er a Egipten alsekum eng mlo diak lorrenges a tikingel a Rubak.

24 E kemiu komomdasu el kmo, ngmlo sebechir el tuobed er a klsibai, alsekum a Rubak a dimlak el du er a Moses me blo loltobed er tir me blo lak el sibai?

25 Chelcha komedenge el kmo, a re ngelekel a Israel a mle sibai; kom dirrek el medenge el kmo a urrelir a kmal mlo obraod er tir mete kma el mle chuarm er ngii, meng mlo uchul a klungiolir er a le mengubet er a kelsibai.

26 Elcha komedenge el kmo, a Moses a mlodurch er a Rubak el mo meruul er tia el klou lurreor; kom dirrek el medenge el kmo, ngdi mle tekoi er a ngerel, ea debel a Bekerekard el Daob a di ulebii er a belengel, me tedi mlo merael er a medidirt el chutem.

27 Endi kemiu a medenge el kmo, a rechad er a Egipten riros er a chelsel a Bekerkard el Daob a mle soldau er a Pharaoh.

28 E kom dirrek el medenge el kmo, te milenga Manna er a le ngara lekes el beluu.

29 Oi, me kemiu a dirrek el medenge el kmo, a Moses a dimle tekoi er a ngerel lokiu a klisiichel a Dios el mlar ngii, eng chillebedii a bad, meng tilobed a ralm me a re ngelekel a Israel a mlo diak el meched ku rengrir.

30 Me chelechang Rubak el Dios er tir, e chosebelir a ulemekrael er tir, loiak medrir a le mellomes, e omesterir a llomes a le klebesei, e meruul mor tir a rokui lungil lomruul mo er a rechad, endi tir a mle medecherecher a rengrir, e milkolk a uldesuir, me te mlo omtok er a Moses me a ngar el Dios.

31 Me chelecha eng dimle tekoi er a ngerel e te ngilemed; e mle tekoi er a ngerel omekrael er tir, e di mle tekoi er a ngerel e riruul a betok el tekoi el mor tir, e dimlak a ngii di le ngerang el milkedmokl a le mlak el tekoi er a ngerel.

32 E sera bo liuul er a omoachel er a Jordan eng milsterir a klisiichir me te ulechiisterir a re ngalk er se el beluu, e ulemriid er tir me tedi ngilemed.

33 Chelcha chomomdasu e tirke el ngalek er tia el beluu, el kiliei er tiael beluu er a telbiil el mlodechelakl rar demad, chomomedasu e temle melemalt el chad? Ak dmu er kemiu el kmo ng diak.

34 Chomomdasu ear demad te kuk mla er bab er tir alsekum te mle melemalt. Bo modenge el kmo, ng kmal diak.

35 Kamesang, a rokui el tech a diosisiu er a rengul a Rubak; endi ngike el kedung, a moruchei er a rengul a Dios. Kamosang tireka el chad a mla chotngakl a rokui el tekingel a Dios, me te kmal mla mo imis er a delengerenger, me a ngesechel a rengul a Rubak a mla mo imis el kirir; me a Rubak a millebeakl er a beluu el kirir, e miltelat er ngii el kirir a re demad; Oi, ng millebeakl er ngii meng mo uchul a telmellir, e meltelat er ngii el mo er a re demad me te mlo mesisiich e ngiluu.

36 Kamosang, a Dios a milebii a beluulechad el kirel morngii a delengchokl, e milebid kid el ngelekel kired el mo kiei er ngii.

37 E chomekedelad a ike el melemalt el beluu, e millemall er a re mekngit el beluu.

38 E chomekrael er a re melemalt el mo er a ike el lungil beluu, e ar e dengerenger a lolekngemed er tir, e dobeklii a beluu el kirir.

39 Ngii a merreder er a babeluades er rokir eleng kingellel, me tia el beluulechad a kongel ochil.

40 E klou a beltikelreng er ngii el mo er tirke el nguu meng mo Dios er tir. Kamosang, ng mle betik a rengul er a redemad, meng mirrenged a telbilir Ngii me a Abraham, me a Isak me a Jakob; e dimlak lobes er a telbilir, meng mlo ngoititerir loltobed er tir er a beluu er a Egipten.

41 E ulemeklemalt er tir loba chelebed er a le ngara lekes el beluu; leng mlo medecherecher a rengrir el diuai kemiu; me a Rubak a mlo mesmechokl er tir er a delngerengerir. Me nguldurokl a suebek el bersoech el metebetobed a ngau er ngii el mlo er tir, ea uriul er a lobangech e ngulchotii er tir a teletelel e te moungil; e tia el teletael a kmal mle e ungil kmal mle beot, leng mle kirir el di mo omes er se el kirir lomes er ngii; endi betengel tia el teletael, el kmal mle beot, me te mle betok a ngilemed.

42 Me te mlo medecherecher a rengrir er a tara taem el mo er a tara taem, me te mlekiis el mo omtok er a Moses, e dirrek el mlo omtok er a Dios; endi komedenge el kmo, ngdi ulemekrael er tir er a diak el mochit el klisichel me temlo soiseb er a beluu er a telbiil.

43 Elecha uriul er a ika el betok el tekoi, e te mla lmuut el mo medecheduch er a klengit, meng diak kudenge el kmo ngoingerang, endi kmedenge el kmo ngdi kmeed ku temo nguemed; a kmal lungil medenge el kmo ng ngarngii a sils el tir a di mo nguemed el di mo medechel a re di mekesai el mo mengai el mo mekelebus.

44 Mi sei auchul me a Rubak a dilu er a demak el kmo, mtobed el mo er a chereomel; me a re chiJews a dirrek lulsiik er ngii el melai er a klengar re ngii, oi, me kemiu meng dirrek el somiu el melai er a klengar er ngii; me kemiu omekeuad er a rechad leng ngar ngii er a rengmiu me kom diuai tir.

45 Kemiu a mereched a rengmiu el mo rullii a mekngit, e meoud el mo lotkii a Rubak el Dios er kemiu. Kemiu a mla mesa anghel, meng mla mengedecheduch er kemiu; oi, komla rongesii a le bebil er a taem el mengululau leko er kemiu el kekree ngerel, endi kemiu a mla mo diak molechesuar, meng dikea el sebechiu el mo melechesiu a tekingel; misei a uchul meng mocha mengedecheduch er kemiu el uaia ngerel a drumk, meng di mo melmesim a beluulechad el leko dile metiud.

46 Kom dirrek el medengel kmo, ngdi klisiichel a tekoi er a ngerel, el ngii a kot el ngar bab, ea beluulechad a sebechel mo dibus; oi, kom dirrek el medengel kmo, ngdi tekoi er a ngerel, eng sebechel di mo moded a betok el risois, me a moded a di metemall. Me a le uaisei, eng mekerae kmal di medecherecher a ika el rengmiu?

47 Kamesa klechad er ngak el mla metiud er a klengit el reng el kiriu, me a ringel a ngar er a renguk, le kbekikl kmo, kele bom mriid el mo cherchar. Elechang eak mui er a Reng er a Dios, me a bedengek a diak a klisiichel.

48 Elecha bochak merek el melkoi a ika el tekoi, eng mlo kesib a rengrir er ngak, me a leko tobekak lomidokl er ngak er a dmolech el daob; mi tia el leko te me omdechem er ngak, ea kmocha melekoi er tir el kmo: a kuba ngklel a Dios lolab a bekel klisiich, eak dmu er kemiu el kmo, lako morutech er ngak, ele ngak a mui er a klisiichel a Dios, me a rokui el bedengek a di mui er ngii, me ngke el nguu a chimal me er ngak a di mechimetemet el di mouaia merat el chudel, me ngii a dimo diak el ngerang al taut er ngii a klisiichel a Dios.

49 Me tiaikid e ngak el Nephi a dilu er tir el kmo, chelchang dikea el luut el mengiremrum er a demrir, me a lechub el chetirir lolengeseu er ngak, le Dios a mla dmu er ngak el kmo, molasech er a diall.

50 Mak dilur tir el kmo, a ike el rokui el le du er ngak a Dios el kmo bo moruul a di mo sebechek el remuul. Mal sekum eng dmu er ngak el kmo, mdur tia el ralm me bo el beluu, eng kirel mo beluu, le lsekum ak dulii, eng mo mekedmokl.

51 Me elechang alsekum a Rubak a mera el ngar ngii a klou el klisiichel, meng meruul a betok longasireng el mo er a rengelkel, eng mekera e diak el sebechel losisecheklak el mo sebechek el dosechii a diall.

52 Chelecha ngak el Nephi a mle betok el tekoi ak dilu el mo er a rubekuk el mle mesisiich me tedi mlo teleu a ngerir e mlo diak el sebechir lomtok er ngak, me a lechub e ka lullasm el me merutech er ngak el mlo betok el klebesei; lel rirtechak ea chad a di mo merat er medak. A Reng er a Dios a kmal mle mesisiich meng mlor ngii a rengel mor tir!

53 A tara klebesei ea Rubak a dilur ngak el kmo: modersii a chimam el mo er a rubekum, ng diak le mekesakl, ak diosebek a rengrir, a Rubak a dilung, me bo lodenge el kmo ngak a Rubak el Dios er tir.

54 Me a kuldersii a chimak el mo er a rubekuk, eng dimlak el bole merat er medak, ng bai di ulsebek a rengrir de tedi mlo omritel, el di mlo mad er a ike el tekoi el Ngii a dilung.

55 Me chelecha te dula el kmo: aki mla mo ungil medenge el kmo, Rubak obengkem, le kimla mo medengelii a klisiichel a Rubak el mle er kemam me a kidi mlo omritel. Me tirka di mlo moat er medak el leko te mochu mengull er ngak: me ak dula er tir el kmo, ng diak, ngak a ta er kemiu, e kekerei lochelliu; me moluluuch er a Rubak el Dios er kemiu, e mongull er a demmiu me a delmiu, me bol kemangel a klengar er kemiu er a beluu el Rubak el Dios er kau a mo meskau.