Chedaol llechukl
1 Nephi 5


5 Bliongel

A Sariah outektok er a Lehi – Toldeu a rengrir er a luut er a rengelekir – Te mlo oldars – Aikel tibereberk el sintsyu a ngar ngii a llecheklel a Moses me a reprofets – Ngulchotii Lehi el kmo, ng ngara kliblillel a Josef – A Lehi omlaoch el kirel a rengelekel me a okedmeklel aikel tibereberk el sintsyu.

1 Tial kimerema er a oreomel el me er a demmam, engii me a delak er a Sariah a kmal mlo ungil a rengrir, le delemam a kmal mlo llemangel el kemam a uchul.

2 Leng mlousbech el kmo; aki mlamad er a chelsel oreomel, meng mlo outektok er a dmak el kmo; alko ngomes a ues el mla mouchul e kede mla chemoit a chetmed me a blid, me a rengelekek a mla mo dibus, me kid a di mo medei kung er a chelsel oreomel.

3 Aikaia mle tekingel a delak er a louteketok er a demak.

4 Mitiang ea demak a mocha melekoi er ngii el kmo, Ak medengei el kmo ngak omes a ues; alsekum eng dimlak kumes er a ues aikel tikingel a Dios lemei, eng dimlak bo kudengelii a klungiolel a tekingel a Dios, me akdi kiliei er a Jerusalem e mad ngak me a rebebil er ngak.

5 Endi akmla nguu a beluu er a telbiil meng ngungil a renguk; Oi, ak medenge el kmo a Rubak a mo mesebechakl er a rengelekek er a chimal a Laban, e ngoititerir el mer kid er a chereomel.

6 Aikang a mle tekingel a demak el Lehi er a loruul er a rengul a delak er a Sariah el kiram, er a kimorael er a chelsel oreomel mo er a Jerusalem el mo mlai a rekord er a re chiJews.

7 A lletam me kimerema er a tento er a demak, eng kmal mlo ungil a rengerir me a delak a mesemechekla rengul.

8 Meng mocha melekoi el kmo; elecha kmla mo medngei el kmo a Rubak a dilu er a bechik mel chiis el mo er a chereomel; oi ak dirrek el mla mo medengei el kmo a Rubak a milengkar er a rengelekek, e milsebechakl er tir er a chimal a Laban, e milsterir a klisiichir meng mlo sebechir lotirakl a llechul a Rubak ele bilsterir. Aika a mle teletelel a tekingel.

9 Mitiaikid eng mlorngii a klou el deuelreng er tir, me te mlo melnget e millul a uldars el mo er a Rubak; e ulureng a sulel a Dios er a Israel.

10 Me a uriul er a bole merek loureng a sulel a Dios er a Israel, ea demak el Lehi a ngilai akel rekord el mle lluches er a ikel tibereberk el sintsyu e mocha muchel mesuub er a kot luchul.

11 E mlo metik el kmo, ngar ngii aikel kleim el hong er a Moses, e louchais a teletelel a bluuelchad er a lobeob, me a Adam me a Eva el tir a mle kot el demad me a delad.

12 Me a dirrek el rekord er a re chiJews er a kot luuchul me lmuut er a uchelel omerreder er a Sedekia e king er a Judah;

13 E dirrek el mlar ngii a ulochir ar chedaol profet, er a kot luuchul me lmuut er a uchelel chomerreder er a Sedekia, me a betok luulaoch el tilobed er a ngerel a Jeremia.

14 Itiakid, ea demak el Lehi a miltik er a chelsel tia el tibereberk el sintsyu a blechebechel a telungalek er a remle demal er a irechar; mi sei eng mlo medengei el kmo, ngmla er a telungalek er a Josef; Oi, ngikal Josef el ngelekel a Jakob el mlotrau el mo er a Egipten, e silobel er a chimal a Rubak, meng mlo sebechel loseblii a demal er a Jakob, me a blil er rokui meng diak le ngemed er a bosech.

15 Te dirrek el mlukrael tuobed er a kelbus, me a beluu er a Egipten er a klisiichel a diosisiu el Dios el meketeketang lometebechel er tir.

16 Me a demak el Lehi a mlo metik kung a belechebechel a telungalek er a redemal. A Laban meng mlara telungalek er a Josef miseia uchul engii me a demal a ullab a ikal rekord.

17 Elcha demak er a leues a ikael rokui el tekoi, eng mlo mui er a Edaol Rerg, meng mlo omlaoch el kirel a rengelekel–

18 Kmo, me a ikael tibereberk el sintsyu le bora rokui el beluu, me a klebliil, me a tekoi, me a rechad el tir a mo ngelekel.

19 Ng diluel kmo, aikel tibereberk el sintsyu a diak el kirel remiid; me a lechub e bolengemed er a klemengetel a taem. E ulemlaoch a betok el tekoi el kirir ar ngelekel.

20 Meng mo lmuut er chelechang, e ngak me a demak a mla tirakl a rokui el llechul a Dios el bla le beskemam.

21 Me a kimla ngmai aikel rekord el dilu Dios er kemam, el mla moungil mesuub el mo medengei el kmo, aika ungil e kmal meklou a ututelel mer kemam, meng kiram el mo kudmokl a llechul a Dios el me er a rengelekam.

22 Meng klemedngei er a Rubak a uchul meng kiram el diolab er tiael lomrolam er a chereomel el mochu er a beluu er a telbiil.