1 Xcʼulvachitej cʼa chi xichʼo quiqʼuin ri nunimal y quereʼ xinbij chique: Joʼ cʼa chic jun bey pa Jerusalem. Tikacukubaʼ cʼa kacʼuʼx richin yekatakej ri rupixaʼ ri Dios. Roma cʼa, can nimalej vi ri ruchukʼaʼ rijaʼ chuvech chijun ri ruvachʼulef. ¿Achique cʼa roma tok man ta nimalej ri ruchukʼaʼ chuvech ri Laban quiqʼuin ri cavinek lajuj rusamajelaʼ? ¿O stapeʼ vi ta e cʼo e qʼuiy lajujitek vokʼo rusamajelaʼ riqʼuin?

2 Roma cʼariʼ, joʼ akʼanij. Kojcʼojeʼ cʼa cof achiʼel ri Moisés. Rijaʼ xchʼo cʼa chire ri Nimalej Quiek Yaʼ y can xuchʼer vi riʼ, quereʼ y quelaʼ. Jariʼ tok ri kateʼ katataʼ xekʼax pe y xeʼel pe pa quikʼa ri e aj Egipto. Ja cʼariʼ, ri oyovanelaʼ richin ri Faraón ri xetzekelben pe quichin xejikʼ cʼa chupan ri Nimalej Quiek Yaʼ.

3 Vacami cʼa, rix ivetaman chi reʼ xa kitzij. Chukaʼ ivetaman chi jun takonaxel chʼovinek iviqʼuin. ¿Achique cʼa roma niben caʼiʼ icʼuʼx? Joʼ akʼanij. Ri Ajaf nitiquir yojrucol, achiʼel cʼa xuben quiqʼuin ri kateʼ katataʼ ojer. Nitiquir chukaʼ nuyoj ri Laban achiʼel xuben chique ri e aj Egipto.

4 Tok quereʼ xinbij chique, cʼa xpe na coyoval. Chukaʼ xexebeloj cʼa chic jun bey. Man riqʼuin vi riʼ, xinquitzekelbej xa cʼa tok xojapon chirij ri tzʼak richin ri Jerusalem.

5 Vacami cʼa tocokʼaʼ chic. Cʼa cʼariʼ, yin xinben chi ri nunimal xquevaj quiʼ chirij ri tzʼak. Tok rijeʼ quevan chic quiʼ, yin Nefi xinoc ekal chupan ri tinamit y xibe apon chirachoch ri Laban.

6 Jacʼa ri Uxlabel ri ucʼuayon nubey, roma yin manjani vetaman achique xtinben.

7 Man riqʼuin vi riʼ, xibe cʼa. Tok xijel apon chirachoch ri Laban, xintzʼet jun achin tzakinek pan ulef pa bey. Rijaʼ kʼabarel cʼa chic riqʼuin kʼabarisanel yaʼ.

8 Tok xinapon riqʼuin, xinnabej chi ja rijaʼ ri Laban.

9 Xintzʼet cʼa ri rutzaqʼuibal y xinvelesaj el pa rucʼojlibal. Ri ruchapbel can kʼana chʼichʼ vi, y yalan utzilej ri rubaniquil. Chukaʼ xintzʼet ri ruxak y riʼ can jebel covilej chʼichʼ.

10 Xcʼulvachitej cʼa chi ri Uxlabel xubij chuve chi tincamisaj. Jariʼ tok yin xinbij pa vánima: Manjun bey nucamisan ta jun achin. Cʼariʼ xqʼuis ri vuchukʼaʼ, y man xinvajoʼ ta xincamisaj.

11 Cʼa cʼariʼ, ri Uxlabel xubij chic chuve: Vacami cʼa ri Ajaf rujachon pan akʼaʼ. Kitzij cʼa chi yin vetaman chukaʼ chi rijaʼ xutij rukʼij richin yirucamisaj. Chukaʼ man xerutakej ta ri rupixaʼ ri Ajaf. Chukaʼ rijaʼ xumej can ri kabeyomal.

12 Xcʼulvachitej cʼa chi ri Uxlabel xubij chic chuve: Tacamisaj cʼa roma ri Ajaf can rujachon vi pan akʼaʼ.

13 Can kitzij vi chi ri Ajaf yerucamisaj ri e itzel, richin chi yecʼachoj ri chojmilej tak rurayibal rijaʼ. Yalan utz chi xticamisex cʼa xe jun achin, chuvech xqueyojyaj can y xquesachiyaj jun tinamit roma manjun niquinimalaʼ.

14 Yin Nefi xinvacʼaxaj cʼa re chʼabel reʼ. Jariʼ tok xinnataj achique ri xubij chuve ri Ajaf pa ri tolan ruvachʼulef. Chiriʼ cʼa xubij quereʼ: Vi ri avijaʼtzul yequitakej cʼa ri nupixaʼ xqueqʼuiyer cʼa chupan ri ruvachʼulef sujun can.

15 Chukaʼ xinnojij chi rijeʼ man yetiquir ta yequitakej ri rupixaʼ ri Dios vi manek ri pixaʼ quiqʼuin. Ja pixaʼ riʼ ri xyaʼox chire ri Moisés.

16 Vetaman cʼa chukaʼ chi ri pixaʼ riʼ tzʼiban cʼa can chuvech ri xaxilej tak cʼakoʼj chʼichʼ.

17 Chukaʼ cʼa vetaman chi xaxe romariʼ tok ri Ajaf rujachon can ri Laban pa nukʼaʼ yin. Riqʼuin cʼariʼ, cʼo cʼa banel richin xquencʼuaj el ri retal banobel, achiʼel cʼa ri pixaʼ ri ruyaʼon pe chuve.

18 Roma cʼariʼ, xinnimaj rutzij ri Uxlabel. Xinchop rusumal ruviʼ ri Laban y xintzaqʼuij el ri rujolon riqʼuin ri rutzaqʼuibal rijaʼ.

19 Tok nutzaqʼuin chic el ri rujolon riqʼuin ri rutzaqʼuibal rijaʼ, jariʼ tok xinqʼuen pe ronojel ri rutziak, y xincusaj yin. Xincusaj chukaʼ ronojel ri rutoʼbal.

20 Queriʼ nubanon chic tok xibe apon pa ri ruyaconbal puek richin ri Laban. Tok xibe cʼa apon, xintzʼet ri rusamajel ri Laban ri chajiyon ri jakbel richin ri ruyaconbal puek. Xinben cʼa ri ruchʼabel ri Laban, y xinbij chire chi quirachibilaj apon, cʼa chupan ri ruyaconbal puek.

21 Rijaʼ xutzʼet cʼa ri tziek y chukaʼ ri tzaqʼuibel nuximon xeʼ nupan. Roma cʼariʼ, xunojij chi ja yin in Laban, ri rajaf.

22 Xchʼo cʼa pe viqʼuin chiquij ri nimakul quichin ri e aj Judá. Rijaʼ retaman cʼa chi ri Laban, ri rajaf, xbe quiqʼuin rijeʼ chakʼaʼ.

23 Y yin xichʼo riqʼuin achiʼel cʼa nichʼo ri Laban.

24 Chukaʼ cʼa, xinbij chire chi cʼo chi xtinqʼuen el ri xaxilej tak cʼakoʼj chʼichʼ ri cʼo ri tzʼibanic chuvech. Cʼa cʼariʼ, xtincʼuaj el chique ri vachʼalal ri in coyoben chirij ri tzʼak.

25 Chukaʼ xinbij chire chi titzekeʼ pe chuvij.

26 Rijaʼ xtzekeʼ cʼa pe chuvij. Rijaʼ xunojij cʼa chi xichʼo chiquij ri vachʼalal e cʼo chupan ri kʼataj. Chukaʼ xunojij chi ja yin in Laban, ri achique xincamisaj yan.

27 Rijaʼ janíla xchʼo viqʼuin chiquij ri nimakul quichin ri e aj Judá tok xojbe cʼa apon quiqʼuin ri nunimal ri e cʼo chirij ri tzʼak.

28 Xcʼulvachitej cʼa chi tok ri nunimal xinquitzʼet, xquinojij chi ja ri Laban ri petenek. Chukaʼ xquinojij rijeʼ chi ri Laban xirucamisaj yin y xrajoʼ xerucamisaj ta rijeʼ chukaʼ. Romariʼ tok ri Laman can xuxibij riʼ, y chukaʼ queriʼ ri Lemuel y ri Sam. Jariʼ tok xeʼanimej chinuvech.

29 Xcʼulvachitej cʼa chi xenvoyoj y rijeʼ xincacʼaxaj. Roma cʼariʼ, xquitanabaʼ caninen chinuvech.

30 Cʼa cʼariʼ, tok ri rusamajel ri Laban xerutzʼet ri nunimal, xa xcʼaracʼot cʼa rijaʼ. Jubaʼ man xanimej chinuvech richin nitzolin pa ri tinamit Jerusalem.

31 Yin Nefi can nim vi ri nupalen, y chukaʼ xincʼul nim vuchukʼaʼ riqʼuin ri Ajaf. Romariʼ tok xinchop ri rusamajel ri Laban y xinpabaʼ richin queriʼ man xanimej ta chic.

32 Xcʼulvachitej cʼa chi xinjiquibaʼ chire pa ri rubiʼ ri Ajaf, y riqʼuin ri nucʼaslen yin, chi man ta cʼa xtikacamisaj, vi rijaʼ xtunimaj cʼa ri nuchʼabel.

33 Xinbij cʼa chire chi man tuxibij riʼ. Xinsuj cʼa chire chi vi nibe kiqʼuin roj pa ri tolan ruvachʼulef, chiriʼ cʼa rijaʼ xa xtoskʼopix cʼa, junan kiqʼuin roj.

34 Quereʼ cʼa chukaʼ xinbij chire: Ri Ajaf rubin can chike chi nikaben quereʼ. ¿La man utz ta cʼa chi xquekatakej chi utzil ri rupixaʼ ri Ajaf? Roma cʼariʼ, vi xcabe pa ri tolan ruvachʼulef riqʼuin ri nataʼ, xticʼojeʼ cʼa ri acʼojlibal kiqʼuin roj.

35 Ri rubiʼ ri samajel riʼ ja Zoram. Xcʼulvachitej cʼa chi rijaʼ xchʼuchʼuʼ ránima tok xracʼaxaj ri chʼabel ri xinbij chire. Rijaʼ xujiquibaʼ chi xtibe cʼa riqʼuin ri nataʼ chupan ri tolan ruvachʼulef. Xujiquibaʼ cʼa chukaʼ chi xticʼojeʼ can kiqʼuin roj benek ruvech.

36 Roj xkajoʼ cʼa chi rijaʼ cʼo kiqʼuin. Vi man ta queriʼ xuben, cʼo chi xquinabej ta ri e aj Judá chi xa xojanimej can pa ri tolan ruvachʼulef. Cʼa ta riʼ, xquetzekeʼ cʼa el chikij richin chi xkojquicamisaj.

37 Xcʼulvachitej cʼa chi tok ri Zoram xujiquibaʼ chi nibe kiqʼuin, manek chic xkaxibij ta kiʼ.

38 Xcʼulvachitej cʼa chi xekacʼuaj el ri xaxilej tak cʼakoʼj chʼichʼ y ri rusamajel ri Laban. Xojbe cʼa apon chupan ri tolan ruvachʼulef y xojapon xa cʼa acuchi cʼo vi ri rumoʼc ri katataʼ.