1 Ngan ine nahitabo nga ako, hi Nephi, kahuman makighimangraw han Ginoo, in bumalik ha tolda han akon amay.

2 Ngan ine nahitabo nga nagyakan hiya ha akon, nga nasiring: Pamati ako in nag-inop hin usa nga inop, nga diin an Ginoo in nagsugo ha akon nga ikaw ngan imo mga kabugtoan in bumalik ngadto ha Jerusalem.

3 Kay kamatuoran, an sinurat han mga Judiyo an aada kan Laban ngan sugad man an lista han akon mga kaapoy-apoyan, nga nakaokit ha mga lamina nga tumbaga.

4 Sanglit, an Ginoo an nagsugo ha akon nga ikaw ngan an imo mga kabugtoan nga lalaki in angay nga kumadto ha panimalay ni Laban, ngan pamilnga an mga sinurat, ngan dad-a ito nganhi ha kamingawan.

5 Ngan yana, makabirido an imo mga kabugtoan nga lalaki in nagngongorotob, nasiring nga ine in makuri nga buruhaton nga akon ginkikinahanglan ha ira; kundi tinuod dire ako an nanginginahanglan hiton ha ira, kundi ine an kasugoanan han Ginoo.

6 Sanglit lakat na, anak ko, kay ikaw in papaurogon han Ginoo, kay ikaw in waray magngongorotob.

7 Ngan ine nahitabo nga ako, hi Nephi, in nagsiring ha akon amay: Makadto ako ngan hihimoon ko an mga buruhaton nga ginsugo han Ginoo, kay maaram ako nga an Ginoo in dire maghahatag hin mga kasugoanan ngadto han anak han katawhan, labot la nga hiya in mag-andam hin usa nga paagi para ha ira agud ira mahimo an buruhaton nga iya iginsugo ha ira.

8 Ngan ine nahitabo nga han pakabati han akon amay hine nga mga tugon hiya in duro an kalipay, kay iya nahisabotan nga ako in ginbendisyonan han Ginoo.

9 Ngan ako, hi Nephi, ngan han akon mga kabugtoan in naglalakaton ha kamingawan, dara an amon mga tolda, agud kumadto ha katunaan han Jerusalem.

10 Ngan ine nahitabo nga han kami in nakaabot han katunaan han Jerusalem, ako ngan han akon kabugtoan in nagpasarusagdon.

11 Ngan kami in naghugot-hugotay — kun hin-o ha amon an angay nga sumulod ha balay ni Laban. Ngan ine nahitabo nga an kabuynasan in nahingada kan Laman; nga hi Laman in sumulod ngadto ha balay ni Laban, ngan hiya in nakighimangraw ha iya samtang hiya in nalingkod ha sakob han iya balay.

12 Ngan ginhangyo niya kan Laban an mga sinurat nga nakaokit ha mga lamina nga tumbaga, nga may sulod nga listahan han mga katulinan han akon amay.

13 Ngan kamatuoran, ine in nahitabo nga hi Laban in nasina, ngan ginduso hiya tipagawas tikang han iya atubangan; ngan nadire hiya nga ighatag an mga sinurat. Sanglit, nagsiring hiya, kamatuoran, ikaw in usa nga tikasan, ngan papatayon ko ikaw.

14 Kundi hi Laman in nakapalagiw ha iya atubangan, ngan ginsumat an mga hitabo nga ginhimo, ni Laban ha amon. Ngan kami in nagtikang hin pagkabido hin duro, ngan an akon mga kabugtoan in andam na pagbalik ngadto han akon amay nga aadto ha kamingawan.

15 Kundi waray pagkahadlok nagsiring ako ha ira nga: Samtang an Ginoo in buhi, ngan samtang buhi pa kita, dire kita mabalik ha aton amay ngadto ha kamingawan tubtub nga dire pa naton natutuman an buruhaton nga iginsugo han Ginoo ha aton.

16 Sanglit, kita in angay nga magin tangkod ha pagtuman han mga kasugoanan han Ginoo; sanglit, panmalik kita ha katunaan nga pinanunod han aton amay, kay kamatuoran, iya ginbilin an bulawan ngan salapi, ngan ngatanan nga klase hin karikohan. Ngan ine ngatanan in iya nahimo tungod han mga kasugoanan han Ginoo.

17 Kay maaram hiya nga an Jerusalem in maguguba, tungod han mga karaotan han mga tawo.

18 Kay sigurado, waray nira karawata an mga tugon han mga propeta. Sanglit, kun an akon amay in nag-ukoy pa didto hine nga tuna kahuman nga hiya ginsugo pagpalagiw tipagawas hadto nga tuna, tuod, namatay liwat unta hiya. Salit, kinahanglan gud pumalagiw hiya tikang hine nga katunaan.

19 Ngan kamatuoran, amo adto an kinaadman han Diyos ngan angay naton makuha adto nga sinurat, agud aton mapreserba para ha aton mga anak an yinaknan han aton mga kaapoy-apoyan;

20 Ngan agud aton liwat mapreserba ha ira an mga tugon nga iginsumat pinaagi han baba han ngatanan nga mga baraan nga mga propeta, nga amo an iginhatag ha ira han Espiritu ngan gahum han Diyos, tikang pa hadton pagtikang han kalibutan ngada yana nga panahon.

21 Ngan ine nahitabo nga ha sugad hine nga paagi hin pamulong nadara ko an akon mga kabugtoan, agud hira in magin tangkod ha pagsunod han mga kasugoanan han Diyos.

22 Ngan ine nahitabo nga kami lumusad ha katunaan nga amon pinanunod, ngan amon gintirok an amon mga bulawan, an amon mga salapi, ngan an amon marahalon nga mga waray kinabuhi nga butang.

23 Ngan katapos namon matirok ine nga mga waray kinabuhi nga butang, kami in bumalik ngadto han balay ni Laban.

24 Ngan ine nahitabo nga kami in nasingadto kan Laban, ngan ginhangyo ha iya nga ihatag niya ha amon an mga sinurat nga ginukit ha mga lamina nga tumbaga, ngan ihahatag namon ha iya an amon mga bulawan, an amon mga salapi, ngan an ngatanan nga amon marahalon nga waray kinabuhi nga mga butang.

25 Ngan ine nahitabo nga han pakakita ni Laban han amon propyedad, nga duro ito hin kadamo, ginkaipa niya ine, nga hasta nga ginpantikwang kami tipagawas, ngan ginsugo an iya mga suruguon nga panmatayon kami, agud makuha niya an amon mga propyedad.

26 Ngan ine nahitabo nga kami in pumalagiw ha mga suruguon ni Laban, ngan napiritan kami pagbilin han amon propyedad, ngan nahingadto adto ha kamot ni Laban.

27 Ngan ine nahitabo nga kami in pumalagiw ngadto ha kamingawan, ngan an mga suruguon ni Laban in waray makalanat ha amon, ngan kami nagtago ha lungag nga bato.

28 Ngan ine nahitabo nga hi Laman an nasina ha akon, ngan sugad man ha akon amay; ngan sugad man hi Lemuel, kay hiya in nanmati ngadto han mga tugon ni Laman. Tungod hine hi Laman ngan hi Lemuel in nagyakan hin maul-ol nga mga tugon ha amon, nga ira mga manghud nga bugto nga lalaki, ngan kami in ginkastigo ngani pinaagi hin balbag.

29 Ngan ine nahitabo nga samtang ginkakastigo nira kami hin balbag, dagmit, usa nga anghel han Ginoo an umabot ngan tumukdaw ha atubangan nira, nga nagyakan hin pagkasiring: Kay ano nga ginbabalbag niyo an iyo manghud nga bugto hin tungkod? Dire ba kamo maaram nga hiya in ginpili han Ginoo nga magmangolo ha iyo, ngan ine tungod han iyo mabug-at nga pakasala? Pamati, kamo in mabalik ngahaw ha Jerusalem, ngan igtutubyan han Ginoo hi Laban ngadto han iyo mga pagtimangno.

30 Ngan kahuman makipaghimangraw han anghel ha amon, hiya in lumakat.

31 Ngan kahuman pakalakat han anghel, hi Laman ngan Lemuel nagtikang na liwat pagngorotob, nga nasiring: Paonano adto mahitatabo nga itutubyan han Ginoo hi Laban ngadto ha aton mga pagtimangno? Kamatuoran, hiya in gamhanan nga tawo, ngan akus niya magsugo hin 50, sugad man, bisan akus niya patayon; kita pa ba it dire?