1 Ngan ine nahitabo nga nag otro kami paglakat ha kamingawan; ngan naglakat kami tipakadto ha sinirangan nga rumbo tikang hadto. Ngan naglakat kami ngan tinmabok ha butnga hin duro nga kasakitan ha kamingawan; ngan an amon kababayen-an in nanganak ha kamingawan.

2 Ngan dako an mga bendisyon han Ginoo ha amon, ngan bisan kun kami in nabubuhi pinaagi hin hilaw nga karne ha kamingawan, an amon mga babaye in naghatag hin damo nga gatas han ira mga anak, ngan magkusog, ngan liwat, pareho hin tigurang nga mga lalaki; nagtikang hira pagilob han paglinakat hin waray pagngorotob.

3 Ngan amon nakita nga an mga sugo han Diyos in kinahanglan matuman. Ngan kun mahinabo nga an anak han katawhan in magtuman han mga kasugoanan han Diyos iya hira ginpapadako, ngan pinakukusog, ngan nag-aandam hin paagi para ira matuman an mga butang nga iya iginsusugo ha ira; tungod hine, hiya in nag-andam hin paagi nga amon ikabubuhi samtang nga kami nag-uukoy ha kamingawan.

4 Ngan kami in nag-uukoy ha sakob hin damo nga mga katuigan; ngan liwat, nga umabot hin walo katuig dida ha kamingawan.

5 Ngan umabot kami ngadto han tuna nga ginngaranan nga Kahuraan, tungod kay ine in damo an prutas ngan dugos hin putyokan; ngan an ngatanan hine nga waray kinabuhi nga mga butang gin andam han Ginoo para dire kami mamatay. Ngan amon nakita an dagat, nga amon ginngaranan nga Irreantum, nga an karuyag sidngon, haluag nga katubigan.

6 Ngan ine nahitabo nga amon gintukod an amon tolda ha baybayon; bisan kun kami nag-agi hin damo nga kasakitan ngan duro nga kakurian, ngan liwat, duro hin kadamo nga dire namon akus igsurat ngatanan, nagin duro an amon kalipay han umabot kami ha baybayon; nga ginngangaranan namon ine nga lugar nga Kahuraan, dara han kadamo han prutas.

7 Ngan ine nahitabo nga kahuman ako, hi Nephi, in kumadto han tuna nga Kahuraan ha sakob hin damo kaadlaw, an tingog han Ginoo in nahibatian ko nga nagsiring: Buhat, ngan kumadto ha bukid. Ngan ine nahitabo nga ako in bumuhat ngan pumakadto ha bukid, ngan nanginyupo ngadto ha Ginoo.

8 Ngan ine nahitabo nga an Ginoo in nagyakan ha akon, nga nasiring: Maghimo ka hin sarakyan pandagat, sugad hine nga paagi nga ipakikita ko ha imo, nga akon madara an imo mga tawo ngadto ha tabok hine nga katubigan.

9 Ngan ako nagsiring: Hain Ginoo ako kakadto para makakuha hin mina nga puthaw nga tutunawon, para makahimo hin garamiton paghimo hin sarakyan pandagat ha paagi nga imo ipinakita ha akon?

10 Ngan ine nahitabo nga an Ginoo nagsiring ha akon kun hain ako kakadto para makabiling hin puthaw, nga minahon nga hihimoon nga garamiton.

11 Ngan ine nahitabo nga ako, hi Nephi, in naghimo hin panhuyop para pagpalaga hit kalayo, tikang ha mga panit hin ihalas nga mga hayop; ngan kahuman ko paghimo hin panhuyop, nga magkamayada ako panhuyop han kalayo, in gin intok ko in duha nga bato para makahimo hin kalayo.

12 Tungod nga waray kami pabay-i han Ginoo nga maghimo kami hin dako nga kalayo, samtang kami in naglalakaton ha kamingawan; nagsiring hiya: Hihimoon ko an iyo pagkaon nga marasa nga dire na kamo magluluto;

13 Ngan ako liwat an iyo magigin suga ha kamingawan; nga ig-aandam ko an iyo pag-aagian kun sugad nga kamo in magsusunod han akon mga kasugoanan; sanglit, kun kamo in magsunod han akon mga kasugoanan kamo in uupdan ngadto han tuna nga iginsaad; ngan iyo hibabaroan nga pinaagi ha akon kamo in nahingadto.

14 Oo, ngan an Ginoo nagsiring liwat: Kahuman niyo makaabot ngadto han tuna nga iginsaad, mahibabaro kamo nga ako, an Ginoo, in nagsalbar ha iyo han karat-an; ngan liwat, kamo in akon gindara tikang han katunaan han Jerusalem.

15 Sanglit ako, hi Nephi, in naniguro nga masunod an mga kasugoanan han Ginoo, ngan akon gin-aghat an akon mga kabugtoan ha pagkamatinoohon ngan pagkamaduruto.

16 Ngan ine nahitabo nga nanhimo ako hin garamiton tikang han puthaw nga gintunaw tikang ha bato.

17 Ngan han makita han akon mga kabugtoan nga ako in nagtitikang paghimo hin sarakyan pandagat, hira in nagtikang pagngorotob kontra ha akon, ngan nagsiring: An aton bugto in tuyaw, kay huna-huna siguro niya nga makakaghimo hiya hin sarakyan pandagat; oo, ngan ha huna-huna niya nga makakatabok hiya hine nga haluag nga katubigan.

18 Ngan ha sugad hine an akon mga kabugtoan in nagreklamo kontra ha akon, nga karuyag nira nga dire magtrabaho, kay natuo hira nga dire ako makakahimo hin sarakyan pandagat; ngan natuo hira nga waray ako pagsugoa han Ginoo.

19 Ngan yana ine nahitabo nga ako, hi Nephi, in duro an kabido tungod ha kamatig-a han ira mga kasingkasing; ngan yana han makita nira nga ako in nabido hira in nagmalipayon ha ira mga abilidad, ngan sugad hin nalipay hira ha akon, ngan nasiring: Maaram kami nga dire ka makakahimo hin sarakyan pandagat, ngan maaram kami nga kulang ka hin hibaro; tungod hine, dire mo akus mahuman ine nga dako nga buruhaton.

20 Ngan ikaw in puro pareho hit aton amay, nga nadara han mga tinuyaw nga panhunahuna han iya kapasidad; oo, gindara kita tikang han tuna ha Jerusalem, ngan naglalakaton ha kamingawan hin damo nga mga katuigan; ngan an aton kababayen-an in nagtrabaho hin duro, tungod kay hira in may gindadara han ira tiyan, hira in nanganak ha kamingawan ngan nagsakit hin ngatanan nga kakurian, labot la han kamatayon; ngan maupay pa unta kun namatay hira san-o gumawas ha Jerusalem kontra han mag antos hine nga mga kasakitan.

21 Kamatuoran, hine nga kadam-an nga mga tuig nag-antos kita ha kamingawan, ha diin hine nga oras unta kita in nakagpahimulos han aton mga ginpapanag-iyahan ngan han tuna nga aton surondon; oo, ngan unta kita in nagin malipayon.

22 Ngan maaram kami nga an mga tawo nga aadto ha tuna han Jerusalem in magtadong nga mga tawo; kay ira ginsusunod an mga balaod ngan katadungan han Ginoo, ngan an ngatanan nga iya kasugoanan, subay han balaod ni Moises; sanglit, maaram kami nga hira in mga buotan nga mga tawo, ngan an aton amay in naghukom ha ira, ngan nadara kita tungod kay nanmati kita han iya mga tugon; oo, ngan an aton bugto nga puro pareho ha iya. Ngan kahuman hine nga mga pamulong an akon kabugtoan in nanngorotob ngan nagreklamo kontra ha amon.

23 Ngan ine nahitabo nga ako, hi Nephi, naghimangraw ha ira nga nasiring: Natuo ba kamo nga an aton mga amay, nga mga anak ni Israel, in nahigawas han mga pagtimangno han mga taga Egipto kun hira waray panmati han tugon han Ginoo?

24 Oo, kasiring ba niyo nga mahigagawas hira tikang han pagkauripon, kun waray pagsugo an Ginoo kan Moises nga kinahanglan panguluhan hira nga maigawas hira ha pagkauripon?

25 Ngan yana maaram kamo nga an mga anak ni Israel in aada ha pagkauripon; ngan maaram kamo nga hira in binubugatan han ira mga buruhaton, nga mabug-at pagdad-on; sanglit, maaram kamo nga usa nga maupay nga hitabo para ha ira, nga hira in kinahanglan maigawas ha pagkauripon.

26 Ngan yana maaram kamo nga ginsugo hi Moises han Ginoo nga maghimo hadto nga dako nga buruhaton; ngan maaram kamo nga ha pinaagi han iya mando an tubig ha Mapula nga Dagat in nagkabulag ngadto hin duha kaparte, ngan hira in nag-agi ha mamara nga tuna.

27 Pero maaram kamo nga an mga taga Egipto nagkalulumos ha Mapula nga Dagat, nga mga sundalo han Paraon.

28 Pero maaram liwat kamo nga hira in ginpakaon hin tinapay ha kamingawan.

29 Oo, ngan maaram liwat kamo nga hi Moises, pinaagi han iya mando subay han gahum han Diyos nga nakada ha iya, ginbundol an bato, ngan dida umawas an tubig, para mawara an kauhaw han mga anak ni Israel.

30 Ngan bisan pa hira ginuupdan, han Ginoo nga ira Diyos, an ira Manurubos, nga naguupod ha ira, ha oras ngan naghatag hin lamrag ha gab-i, ngan nagbuhat han ngatanan nga buruhaton nga kinahanglan makarawat han katawhan, gintig-a nira an ira kasingkasing ngan ginbuta nira an ira mga hunahuna, ngan ginyubit nira hi Moises ngan kontra han tinuod ngan han buhi nga Diyos.

31 Ngan ine nahitabo nga sugad han iya panagna hira in ginpatay niya; ngan subay han iya panagna hira in ginmangolohan niya; ngan subay han iya panagna ginbuhat niya an ngatanan nga burnhaton para ha ira; nga waray buruhaton nga nahimo labot la ha paagi han iya panagna.

32 Ngan katapos tumabok han salog ha Jordan ginhimo nira hiya nga makusog ha pagpaiwas han mga anak han tawo nga nakada ha tuna, sugad man, ngada han pagpasarang ha ira ha pagkabungkag.

33 Ngan yana, kasiring ba niyo nga an mga anak hine nga tuna, nga nakada ha tuna nga iginsaad, nga gintabog han aton kaapoy-apoyan, makasiring ba kamo nga hira in magtadong? Ungod, nasiring ako ha iyo, nga Dire.

34 Kasiring ba niyo nga an aton mga amay in labi nga pinili kontra ha ira kun hira in magtadong? Nasiring ako ha iyo, nga Dire.

35 Ha iya kaaram, pareho an pagtratar han Ginoo han ngatanan nga unod; ngan adton magtadong in ginpapaurog han Diyos. Pero sigurado, ine nga mga tawo nga iginwaraybali an kada tugon han Diyos, ngan hira in hinog na ha mga sala; ngan an katumanan han kasina han Diyos in aada ha ira; an Ginoo in ginsumpa an tuna kontra ha ira, ngan ginbendisyonan para ha aton mga amay; ngan liwat, iya iginsumpa ine ngadto han ira pagkaguba, ngan ginbendisyonan ito ngadto han aton mga amay ngada han pakakuha han gahum hito.

36 Ha iya kaaram, ginhimo han Ginoo an tuna para ito pagukyan; ngan ginhimo an iya mga anak agud hira in magtagiya hito.

37 Ngan iya ginpaursa in usa nga matadong nga nasud, ngan ginruruba an mga nasud nga maraot.

38 Ngan iya ginpangulohan an mga magtadong ngadto han pinili nga mga tuna, ngan an magraot in iya ginruruba, ngan ginsusumpa an tuna para han ira karat-an.

39 Hiya an nagdudumara ha kahitas-an han langit, tungod kay ine an iya trono, ngan an kalibutan an tungtungan han iya tiil.

40 Ngan hinihigugma niya adton kumakarawat ha ira Diyos. Kamatuoran, hinigugma niya an aton katulinan, ngan hiya in nakig-uyon ha ira, ngan liwat, bisan kan Abraham, Isaae, ngan Jakob; ngan nahinumduman an mga kauyonan nga iya ginhimo; sanglit, iya hira gindara tikang ha tuna han Egipto.

41 Ngan hira in iya gindidid-an didto ha tuna han kamingawan, pinaagi han iya pagpakuri; mahitungod kay ira ginpatig-a an ira mga kasingkasing, pareho ha iyo; gindid-an hira han Ginoo tungod han ira mga sala. Nagpadara hiya hin naglalaga nga nalupad nga sugad hin halas ha ira; ngan kahuman nira matukob nag-andam hiya hin paagi nga matambal; ngan an ira la bubuhaton in pagkita; ngan tungod han kamasayon han paagi, o kamadali hito, damo an nagkamatay.

42 Ngan ha panahon nga ira gintig-a an ira mga kasingkasing, ira ginpapakaraot hi Moises, ngan liwat kontra han Diyos; pero bisan pa man, maaram kamo nga hira in ginmangulohan han iya dire matutupngan nga gahum ngadto han tuna nga iginsaad.

43 Ngan yana, paglabay hine nga mga hitabo an takna in umabot nga hira in nagin magraot, sugad man, harapit na mahinog; ngan dire ako maaram pero hini nga adlaw hira mabubungkag na; kay maaram ako nga an panahon maabot gud nga hira in kinahanglan bubungkagon, labot la hin pipira, nga mahigagawas han pagkadakop.

44 Sanglit, an Ginoo in nagsugo han akon amay nga lumakat ngadto ha kamingawan; ngan an mga Judiyo in naghihingyap nga kuhaon an iya kinabuhi; oo, ngan hi kamo liwat in naghihingyap nga kuhaon an iya kinabuhi; sanglit, kamo manmaratay hin tawo ha iyo abilidad ngan kamo in pareho ha ira.

45 Kamo in madagmit hin pagbuhat han sala kundi mahinay ha paghinumdum han Ginoo nga iyo Diyos. Nagpakakita kamo han usa nga anghel, ngan naghimangraw hiya ha iyo; sugad man, nakabati kamo han iya tingog ha oras-oras; ngan hiya nagyakan ngadto ha iyo ha mamingaw ngan gutiay nga tingog, kundi kamo in waray aabat, nga dire niyo inaabat an iya mga tugon; tungod hine, hiya in nagyakan ha iyo sugad han tingog hin dalogdog, nga nakabantad han tuna nga sugad sugad hin mabubuka.

46 Ngan maaram liwat kamo nga pinaagi han gahum han iya makagarahum nga mando mahihimo niya an kalibutan nga mawara; oo, ngan maaram kamo nga pinaagi han iya mga mando mahihimo niya an dire mahamis nga lugar nga magin mahamis, ngan an maghamis nga lugar in mabubuak. O, kay ano nga tumubo an katig-a han iyo mga kasingkasing?

47 Sigurado, an akon kalag, in nagmamabido upod an kasubo tungod ha iyo, ngan an akon kapasidad in inool-olan; Nahadlok ako nga bangin kamo igsalikway hin kadayonan. Pamati, ako in puno hin Espiritu han Diyos, nga an akon lawas in waray kusog.

48 Ngan yana ine nahitabo nga han igyakan ko ine nga mga tugon hira in nasina ha akon, ngan karuyag iglabog ako ha kahiladman han dagat; ngan han hira in dumaop para ako paglabtan han ira mga kamot, nagsiring ako ha ira: Ha ngaran han Makagarahum nga Diyos, ginsugo ko kamo nga dire ako niyo paglabtan, kay puno ako hin gahum han Diyos, bisan ngada han pakadaog han unod; ngan kun hin-o man nga mga kamot an maglabot ha akon in mauuga sugad hin mamara nga banwa; ngan hiya in mawawarayan hangkag ha atubangan ha gahum han Diyos, kay an Diyos in magsisirot ha iya.

49 Ngan ine nahitabo nga ako, hi Nephi, nagsiring ha ira nga dire hira magnginorotob kontra han ira amay; nga dire ighalot an ira pagbulig ha akon, tungod kay an Diyos nagsugo ha akon nga maghimo hin sarakyan pandagat.

50 Ngan nagsiring ako ha ira: Kun an Diyos in nagsugo ha akon nga buhaton an ngatanan nga mga buruhaton ito in mahihimo ko. Kun magsugo hiya ha akon nga magyakan ako hine nga tubig, ikaw in magigin tuna, ine in mahihimo nga tuna; ngan kun ine pagyaknon ko, ine in mahihinabo.

51 Ngan yana, kun an Ginoo in mayada makagarahum nga gahum, nga makakahimo hin damo nga mga milagro ha butnga han anak han katawhan, kay ano nga dire niya ako matututdoan, nga maghimo hin sarakyan pandagat?

52 Ngan ine nahitabo nga ako, hi Nephi, in nagyakan hin damo nga mga pulong ngadto han akon kabugtoan nga mga lalaki, sugad nga hira in nagupong ngan waray pakiglantugi kontra ha akon; ngan waray hira makaglabot ha ira mga kamot o tubilon ako han ira mga tudlo, bisan ha sakob hin damo kaadlaw. Ngan yana waray hira pakagbuhat ha akon hine kay bangin hira in mauga ha akon atubangan, labis an kakusog han Espiritu han Diyos; nga ine in nahanabo ha ira.

53 Ngan ine nahitabo nga an Ginoo in nagyakan ha akon: Unata liwat an imo kamot ngadto han imo kabugtoan nga mga lalaki, ngan hira dire mamauuga ha atubangan mo, pero pakukurogon ko hira, nasiring an Ginoo, ngan ine in bubuhaton ko para nira mabaroan nga ako an Ginoo nga ira Diyos.

54 Ngan ine nahitabo nga gin unat ko an akon kamot ngadto han akon kabugtoan, ngan hira in waray kalaya ha atubangan ko; kundi ginpapanngorog hira han Ginoo, subay han panagna nga iya ginyakan.

55 Ngan yana, hira in nagsiring: Sigurado kami nga an Ginoo in aada ha imo, tungod kay maaram kami nga an gahum han Ginoo in nakabantad ha amon. Ngan hira in nanngupo ha atubangan ko nga haros hira in magampo ha akon, pero gindid-an ko hira, nga nasiring: Ako in iyo bugto; sugad man, iyo bugto nga manghud; tungod hine, magampo kamo ha Ginoo nga iyo Diyos, ngan pagtahud kamo han iyo amay ngan iyo iroy, nga humalaba an iyo mga henerasyon ha katunaan nga ighahatag ha iyo han Ginoo nga iyo Diyos.