31. Ebeto
Mwin te urubwai nakon ana tabo ni kamataku Erene i Ebeto, ike e kabwarabwara iai te Abotoro ae Bauro. Ni bongin te Nu Tetemanti, Ebeto e rang ni kinaaki n te aonaba ae ataaki ibukin tamaroan te tembora are e kateaki ni karinea atuaia bekan te aine i Rom ae Riana. Ngkai e a tiku n uruaki, ma Ebeto ngkoa bon kautun ana burawinti Rom ae Atia ao boton te iokinibwai ae korakora. Taan karao tirewa n te kaawa a karikirakea te iokinibwai ae rangi ni rikirake man kabonakoan katotongan Riana.
Bwaai aika Riki aika Kakawaki: Te Abotoro ae Bauro e kawara Ebeto nuakaan ma tokin ana kauoua ni mwananga ni mitinare (Mwak. 18:18–19). N ana kateniua ni mwananga e tiku n te kaawa i nanon uoua te ririki. E kairoroaki bwa e na kitanna ibukin te beroro are a karikia taan karao tirewa ake a kerikaaki aia iokinibwai ngke e kabwarabwara Bauro ni kaitara taromaurian te atua ni kewe ae te aine ae Riana (Mwak. 19:1, 10, 23–41; 20:1). Te tabo ni kamataku i Ebeto bon te kabanea ni bubura ae tia ni kateaki irouia I-Erene ao te tabo are a kaitaraaki iai toan Bauro irouia taan iowawa (Mwak. 19:29–31). Bauro e korea te reta nakoia kaain te Ekaretia i Ebeto n ana tai ni kabureaki i Rom. Teuana mai buakon itiua mwangan te Ekaretia i Atia are e kaineti nakoia te boki ae Te Kaotioti e mena i Ebeto (Kaoti. 1:10–11; 2:1).