24. Kaberenaum
Kaberenaum, are e mena i mataniwin Naman Kariraia are mai meang, bon oin nen ana mwakuri ni ibuobuoki Iesu i Kariraia (Mat. 9:1–2; Mar. 2:1–5). E kakawaki ao te tabo n akawa ao boton te iokinibwai, bon mwengaia Tientaire ao Iutaia naba. Mwaitin ana botanaomata n te moan tienture e aki raka nakon 1,000 aomata. Kaberenaum e mena n te tutanikawai ae kakawaki ibukin kawai ni iokinibwai, ma aba aika maiu tanoia aika katobibia. Tautian Rom a katei auti n tebotebo ao taabo ibukin kawakinan bwaai ikai. E ngae ngke a bati kakai aika karaoaki ikai, ao ni bon arona aomata a aki butimwaea ana mwakuri ni ibuobuoki te Tia Kamaiu. Ngaia are, e kamaraia te kaawa Iesu (Mat. 11:20, 23–24). I nanon taina, Kaberenaum e bwaka ni urubekebeke ao e a tiku n aki maekanaki.
Bwaai aika Riki aika Kakawaki: Kaberenaum e ataaki naba bwa “oin ana kaawa” te Tia Kamaiu (Mat. 9:1–2; Mar. 2:1–5). E karaoi kakai aika bati n te tabo aei. Te katoto, E katoki aorakiia aomata aika mwaiti (Mar. 1:32–34). ni ikotaki ma ana tia mwakuri te mataniwiin are tebubua (Ruka 7:1–10), tinan buun Betero (Mar. 1:21, 29–31), te aomata ae te nakibaina are e karuoaki ana kainiwene mai taubukin te auti (Mar. 2:1–12), ao te aomata ae mate baina (Mat. 12:9–13). Ikai naba are Iesu e kanakoia tamnei aika buakaka aika a mwaiti (Mar. 1:21–28, 32–34), e kauta natin Iairo te aine man te mate (Mat. 9:18–19, 23–26; Mar. 5:22–24, 35–43), ao e anga te kabwarabwara i aon te kariki ni kamaiu i nanon te auti n nebo i Kaberenaum (Ioane 6:24–59). Te Tia Kamaiu e tuanga Betero bwa e na rawea te ika man Naman Kariraia, e na kauka wina, ao e kunea te mwane are e na kabwaka iai te angabwai (Mat. 17:24–27).