13. Na iLakolako ni Kaulotu nei Paula na iApositolo

Kesa Sa vunautaki Karisito ko Filipe ka papitaisotaka e dua na matanivanua mai Iciopea ena nona ilakolako ki Kesa (Cakacaka 8:26–39).

Jerusalemi Raica na mape 12 ena veika a yaco e Jerusalemi.

Jopa A ciqoma ko Pita e dua na raivotu ni sa solia na Kalou na isolisoli ni veivutuni vei ira na kai Matanitu tani (Cakacaka 10; 11:5–18). Sa vakaturi Tapaica cake mai na mate ko Pita (Cakacaka 9:36–42).

Samaria Sa veiqaravi mai Samaria ki Filipe (Cakacaka 8:5–13), erau a qai veivakavulici eke ko Pita kei Joni (Cakacaka 8:14–25). Ni rau solia oti na isolisoli ni Yalo Tabu, sa segata ko Saimoni na daucakaisausau me volia mai vei rau na isolisoli oqo (Cakacaka 8:9–24).

Sisaria Eke, ni oti na nona veiqaravi e dua na agilosi vua e dua na turaganivalu ni Roma na yacana ko Konilio, sa vakadonuya ko Pita me papitaiso (Cakacaka 10). Eke a sabai koya kina vei Akaripa ko Paula (Cakacaka 25–26; raica talega JS—AT 1:24–25).

Tamasiko A rairai vei Saula ko Jisu (Cakacaka 9:1–7). Ni sa dolava tale na mata i Saula ko Ananaiasa, sa papitaiso ko Saula ka tekivuna na nona veiqaravi (Cakacaka 9:10–27).

Anitioki (e Siria) Eke era a vakatokai taumada na tisaipeli me ra lotu Vakarisito (Cakacaka 11:26). Sa parofisaitaka ko Akapusi na dausiga (Cakacaka 11:27–28). Sa tubu e Anitioki na veisaqasaqa levu ena vuku ni veicilivi (Cakacaka 14:26–28; 15:1–9). Sa tekivuna e Anitioki ko Paula na ikarua ni nona kaulotu vata kei Sailasa, Panapasa, kei Jutasa Parisapa (Cakacaka 15:22, 30, 35).

Tarisu Na koro nei Paula; A talai mai ki ke ko Paula mai vei ira na veiliutaki ni lotu me taqomaka na nona bula (Cakacaka 9:29–30).

Kipiro Ni oti na nodra vakacacani, era a dro eso na Yalododonu ki na yanuyanu (Cakacaka 11:19). A lako kosovi Kipiro ko Paula ena imatai ni nona ilakolako vakaulotu (Cakacaka 13:4–5), ka qai vakatalega kina ko Panapasa kei Marika e muri (Cakacaka 15:39).

Pafo A cudruva eke ko Paula e dua na daucakaisausau (Cakacaka 13:6–11).

Tapi Erau vunautaka na kosipeli ena koro oqo ko Paula kei Panapasa (Cakacaka 14:6–7, 20–21).

Lisitira Ni vakabula e dua na lokiloki ko Paula, erau qai vakacaucautaki vata kei Panapasa ni rau kalou. A vakaviriki ena vatu ko Paula ka mani nanumi ni sa mate ia a vakabulai ka tomana na nona vunau (Cakacaka 14:6–21). Vale nei Timoci (Cakacaka 16:1–3).

Ikoniona Ena imatai ni nodrau kaulotu, erau a vunau eke ko Paula kei Panapasa ka rau qai vakarerei ena nodrau lauviri (Cakacaka 13:51–14:7).

Leotisea kei Kolosa Ko Leotisea e dua vei ira na taba ni Lotu a veisiko kina ko Paula ka ciqoma kina eso na ivola mai (Kolo. 4:16). Oqo talega e dua vei ira na vitu na koro ka volai ena ivola ni iVakatakila (na kena vo ko Efeso, Simurina, Perikamo, Caetaira, Sariti, kei Filatelifia; raica iVakata. 1:11). Ko Kolosa e koto rauta ni 18 na kilomita ena tokalau kei Leotisea. A volavola ko Paula vei ira na yalododonu era vakaitikotiko mai kea.

Anitioki (e Pisitia) Ena imatai ni nodrau kaulotu, erau a vakavuvulitaka kina vei ira na Jiu ko Paula kei Panapasa ni vu mai na Karisito ena kawa i Tevita. Sa solia ko Paula na kosipeli vei ira na Isireli, qai muri vei ira na kai Matanitu tani. Erau a vakacacani ko Paula kei Panapasa ka vakasavi tani (Cakacaka 13:14–50).

Milito Ni tiko eke ena ikatolu ni nona kaulotu, a vakasalataki ira kina na italatala qase ni lotu ko Paula ni ra na curuma yani na qele ni sipi eso na “wolifa ca sara” (Cakacaka 20:29–31).

Patimo A kaivesu voli ena yanuyanu oqo ko Joni ena gauna e raica kina na raivotu ka sa tu oqo ena ivola ni iVakatakila (iVakata. 1:9).

Efeso A vunau eke ena qaqa ko Apolosa (Cakacaka 18:24–28). A veivakavulici me rua na yabaki mai Efeso ko Paula ena ikatolu ni nona kaulotu, ka veisautaka kina e vuqa sara na tamata (Cakacaka 19:10, 18). Eke a solia kina na isolisoli ni Yalo Tabu ena veitabaki ni liga (Cakacaka 19:1–7) cakava e vuqa na cakacaka mana, okati kina na vakasavi tani ni yalo velavela (Cakacaka 19:8–21). Eke era a vakatubura kina na dau qaravi Taiana e dua na ue me baleti Paula (Cakacaka 19:22–41). E dua na tiki ni ivola ni iVakatakila a volai ki na Lotu e Efeso (iVakata. 1:11).

Tiroa Ni tiko voli eke ko Paula ena ikarua ni nona ilakolako ni kaulotu, a raica kina e dua na raivotu ni dua na tamata mai Masitonia ka kere veivuke tiko (Cakacaka 16:9–12). Ni tiko voli eke ena ikatolu ni nona kaulotu ko Paula, a vakaturi Utiko mai na mate (Cakacaka 20:6–12).

Filipai Eratou a veisautaka e dua na marama na yacana ko Litia, ko Paula, Sailasa, kei Timoci, eratou vakasava tani e dua na yalo velavela, ka ratou qai warolaki (Cakacaka 16:11–23). Eratou a ciqoma na veivuke vakalou me ratou dro mai valeniveivesu (Cakacaka 16:23–26).

Aceni Ena ikarua ni nona kaulotu ki Aceni ko Paula a vunau kina ena Vanua cecere nei Arisi (Ariopakusi) me baleta na “kalou tawa kilai” (Cakacaka 17:22–34).

Korinica A lako ki Korinica ko Paula ena ikarua ni nona kaulotu, ka laki tiko kina vata kei Akuila kei Pirisila. A vunau eke ka papitaisotaka e vuqa na tamata (Cakacaka 18:1–18). A vola ko Paula na nona ivola vei ira na kai Roma mai Korinica.

Cesalonaika A vunau eke ko Paula ena ikarua ni nona ilakolako ni kaulotu. Eratou a biubiu na nona ilawalawa ni kaulotu ki Peria ni ra sa veivakarerei vei iratou ko ira na Jiu (Cakacaka 17:1–10).

Peria Eratou a raica ko Paula, Sailasa, kei Timoci na yalo vakaturaga me ratou vakavulica ena ikarua ni nona ilakolako ni kaulotu ko Paula. Era a muri iratou ka vakararawataki iratou ko ira na Jiu mai Cesalonaika (Cakacaka 17:10–13).

Masitonia A veivakavulici eke ko Paula ena ikarua kei na ikatolu ni nona ilakolako (Cakacaka 16:9–40; 19:21). E vakacaucautaka ko Paula na nodra yalo vinaka na Yalododonu mai Masitonia, ka ra solia vua ka vakakina vei ira na Yalododonu dravudravua e Jerusalemi (Roma 15:26; 2 Kori. 8:1–5; 11:9).

Melita A mai voca tu eke na waqa nei Paula ena nona ilakolako ki Roma (Cakacaka 26:32; 27:1, 41–44). A sega ni vakaleqai koya na ikati ni dua na gata ka vakabula e vuqa na tauvimate mai Melita (Cakacaka 28:1–9).

Roma A vunau voli eke ko Paula me rua na yabaki ni tauri tiko vakavesu e loma ni nona vale (Cakacaka 28:16–31). A vola talega na ivola vei ira na kai Efeso, Filipai, kei Kolosa ka vakakina vei Timoci kei Filimoni ni tu vakavesu e Roma. A vola ko Pita na imatai ni nona ivola mai “Papiloni,” e rairai ni oqori ga ko Roma, ni oti ga vakalailai na veivakacacani nei Nero vei ira na Lotu Vakarisito ena ika 64 ni yabaki ni noda Turaga. E vakabauti raraba tu ni rau a vakamatei eke ena vuku ni nodrau vakabauta ko Pita kei Paula.