Ko e Fonua Tapú ʻi he Taimi ʻo e Fuakava Foʻoú

Taia mo Saitoni Naʻe fakatatau ʻe Sīsū ʻa Kolasini mo Petesaita ki Taia mo Saitoni (Mātiu 11:20–22). Naʻá Ne fakamoʻui ʻa e ʻofefine ʻo ha fefine Senitaile (Mātiu 15:21–28).

Moʻunga ʻo e Liliú Naʻe liliu ʻa Sīsū ʻi he ʻao ʻo Pita, Sēmisi, mo Sioné, pea naʻa nau maʻu ʻa e ngaahi kī ʻo e puleʻangá (Mātiu 17:1–13). (ʻOku tui ha niʻihi ko e Moʻunga Heamoní ʻa e Moʻunga ʻo e Liliú; pea ʻoku pehē ʻe ha niʻihi ia ko e Moʻunga Tēpoá).

Sesalia Filipai Naʻe fakamoʻoniʻi ʻe Pita ko Sīsū ʻa e Kalaisí, pea naʻe talaʻofa kiate ia ʻa e ngaahi kī ʻo e puleʻangá (Mātiu 16:13–20). Naʻe tomuʻa fakahā ʻe Sīsū ʻa ʻEne pekiá mo e Toetuʻú (Mātiu 16:21–28).

Vahefonua ʻo Kālelí Naʻe nofo ʻa Sīsū mo fai ha konga lahi ʻo ʻEne ngāué ʻi Kāleli (Mātiu 4:23–25). Naʻá Ne fai ai ʻa e Malanga ʻi he Moʻungá (Mātiu 5–7); peá ne fakamoʻui ai ha tangata kilia (Mātiu 8:1–4); peá ne fili, fakanofo, mo fekauʻi atu mei ai ʻa e kau ʻAposetolo ʻe Toko Hongofulu-Mā-Uá, ʻa ia ko Siutasi ʻIsikāliote toko taha pē ai naʻe ʻikai ko ha Kāleli (Maʻake 3:13–19). Naʻe hā mai ʻa Kalaisi kuo toe tuʻú ki he kau ʻAposetoló ʻi Kāleli (Mātiu 28:16–20).

Tahi ʻo Kālelí, ʻa ia naʻe toki ui ki mui ko e Tahi ʻo Taipilioó Naʻe akonaki ai ʻa Sīsū mei he vaka ʻo Pitá (Luke 5:1–3) peá ne ui ʻa Pita, ʻAnitelū, Sēmisi, mo Sione ke nau hoko ko e kau toutai tangata (Mātiu 4:18–22; Luke 5:1–11). Naʻá ne toe lolomi foki ai ke nonga ʻa e matangí (Luke 8:22–25), pea ako ʻaki ha ngaahi talanoa fakatātā mei ha vaka (Mātiu 13), pea hāʻele ʻi he fukahi tahí (Mātiu 14:22–32), pea hā ki heʻene kau ākongá hili ʻene Toetuʻú (Sione 21).

Petesaita (Peteseta) Naʻe fanauʻi ʻa Pita, ʻAnitelū, mo Filipe ʻi Petesaita (Sione 1:44). Naʻe ʻalu toko taha pē ʻa Sīsū mo e kau ʻAposetoló ki ha potu lilo ʻoku ofi ki Petesaita. Naʻe muimui kiate ia ʻa e fuʻu kakai tokolahi, peá ne fafanga ʻa e toko 5,000 (Luke 9:10–17; Sione 6:1–14). Naʻe fakamoʻui ai ʻe Sīsū ha tangata kui (Maʻake 8:22–26).

Kapaneume Ko e kolo ʻeni naʻe nofo ai ʻa Pitá (Mātiu 8:5, 14). Naʻe hanga ʻe Sīsū ʻo fakamoʻui ha tangata pipiki ʻi Kapaneume, ʻa ia naʻe ui ʻe Mātiu ko e “kolo tonu” ʻo Sīsuú (Mātiu 9:1–7; Maʻake 2:1–12), peá ne fakamoʻui ai ʻa e tamaioʻeiki ʻa e ʻeikitaú, pea fakamoʻui mo e faʻē ʻa e uaifi ʻo Pitá (Mātiu 8:5–15), naʻa ne ui ai ʻa Mātiu ke hoko ko e toko taha ʻo ʻene kau ʻAposetoló (Mātiu 9:9), pea fakaʻaaki ai ʻa e mata ʻo e kuí, pea kapusi ki tuʻa mo ha tēvolo (Mātiu 9:27–33), pea fakamoʻui ʻi ha ʻaho Sāpate ha tangata naʻe mate hono nimá (Mātiu 12:9–13), pea fai ai mo e malanga ʻo kau ki he mā ʻo e moʻuí (Sione 6:22–65), pea fakahā ai ʻene loto ke totongi tukuhau, ʻo ne fakahā kia Pita ke ʻalu ʻo maʻu mai ʻa e paʻangá mei he ngutu ʻo ha ika (Mātiu 17:24–27).

Makitala, Makitani Ko e feituʻu ʻeni naʻe nofo ai ʻa Mele Makiteliné (Maʻake 16:9). Naʻe haʻu ki ai ʻa Sīsū hili ʻene fafanga ʻa e toko 4,000 (Mātiu 15:32–39), naʻe kole ai ʻe he kau Fālesí mo e kau Sātusí ke ne fakahā ange ha fakaʻilonga mei he langí (Mātiu 16:1–4).

Kena Naʻe liliu ai ʻe Sīsū ʻa e vaí ko e uaine (Sione 2:1–11) peá ne fakamoʻui ʻa e foha ʻo ha ʻeiki ʻa ia naʻe ʻi Kapaneume (Sione 4:46–54). Naʻe nofo foki ʻa Nātaniela ʻi Kena (Sione 21:2).

Nāsaleti Naʻe hoko ʻi Nāsaleti hono fakahā mai kia Mele mo Siosefa ʻa hono ʻaloʻi mai ʻo Sīsuú (Mātiu 1:18–25; Luke 1:26–38; 2:4–5). Naʻe hili ʻa e foki mai ʻa Sīsū mei ʻIsipité, naʻá ne nofo heni lolotonga ʻa e taimi ʻo ʻene kei siʻí mo ʻene kei talavoú (Mātiu 2:19–23; Luke 2:51–52), peá ne fakahā ʻene hoko ko e ʻAlo ʻo e ʻOtuá, pea naʻe fakafisinga ia ʻe hono kakaí (Luke 4:14–32).

Selikō Naʻe fakaʻaaki ai ʻe Sīsū ʻa e mata ʻo ha tangata kui (Luke 18:35–43). Naʻá ne kai mo Sākeasi, pea ko e “matāpule ia ʻi he kau tānaki tukuhaú” (Luke 19:1–10).

Petapala Naʻe fakamoʻoniʻi ai ʻe Sione ko e Papitaisó ko ia ʻa e “leʻo ʻo e toko taha ʻoku kalanga ʻi he toafá” (Sione 1:19–28). Naʻe papitaiso ʻe Sione ʻa Sīsū ʻi he Vaitafe Soataní peá ne fakamoʻoniʻi ko Sīsū ʻa e Lami ʻa e ʻOtuá (Sione 1:28–34).

Toafa ʻo Siuteá Naʻe malanga ʻa Sione ko e Papitaisó ʻi he toafa ko ʻení (Mātiu 3:1–4) ʻa ia naʻe ʻaukai ai ʻa Sīsū ʻi he ʻaho ʻe 40 pea naʻe ʻahiʻahiʻi ai iá (Mātiu 4:1–11).

ʻEmeasi Naʻe fononga atu ʻa Kalaisi kuo toe tuʻú ʻi he hala ki ʻEmeasí mo ha toko ua ʻo ʻene kau ākongá (Luke 24:13–32).

Petefesi Naʻe ʻomi ʻe ha ākonga ʻe toko ua ha ʻuhikiʻi ʻasi ʻa ia naʻá ne heka atu ai ʻi heʻene hāʻele ikuna atu ki Selūsalemá (Mātiu 21:1–11).

Pētani Ko e kolo ʻeni naʻe nofo ai ʻa Mele, Māʻata, mo Lāsalosí (Sione 11:1). Naʻe fanongo ai ʻa Mele ki he ngaahi folofola ʻa Sīsuú, pea naʻe folofola ai ʻa Sīsū kia Māʻata ʻo kau ki he “fili ʻa e meʻa leleí” (Luke 10:38–42); pea naʻe fokotuʻu hake ai ʻe Sīsū ʻa Lāsalosi mei he maté (Sione 11:1–44); pea naʻe hanga ai ʻe Mele ʻo tākai ʻaki ʻa e lolo ʻa e vaʻe ʻo Sīsuú (Mātiu 26:6–13; Sione 12:1–8).

Pētelihema Naʻe ʻaloʻi mai ai ʻa Sīsū pea toka ʻi he ʻaiʻangakai ʻo e manú (Luke 2:1–7); pea naʻe fakahā mai ʻe he kau ʻāngeló ki he kau tauhi-sipí ʻa hono ʻaloʻi ʻo Sīsuú (Luke 2:8–20); pea tataki mai ʻa e kau tangata potó ʻe ha fetuʻu kia Sīsū (Mātiu 2:1–12); pea tāmateʻi ʻe Hēlota ʻa e fānau īkí (Mātiu 2:16–18).