Talateu ki he Nofo Kemi ʻa e Kau Finemuí
“ʻIo, haʻu kia Kalaisi, pea hoko ʻo haohaoa ʻiate ia” (Molonai 10:32).
“[Ko] ha matavai ʻo e vai maʻa” mo ha “pupunga ʻakau iiki” (Mōsaia 18:5)—Naʻe fakaʻaongaʻi ʻe Molomona e ngaahi lea ko ʻení ke fakamatalaʻi ʻaki e feituʻu naʻe toi ai ʻa ʻAlamā hili ʻene hola mei he Tuʻi ko Noá. Naʻe “fakaʻofoʻofa … ki he mata” ʻo e kakai ne kau fakataha mo ʻAlamaá ʻa e ʻuluʻakau mo e vai ko iá. Ko e hā nai hono ʻuhingá? Koeʻuhí naʻe maʻu ʻe ʻAlamā mo hono kakaí ʻi he feituʻu ko iá, “ʻa e ʻilo ki honau Huhuʻí” (Mōsaia 18:30).
ʻE lava ke fakaʻofoʻofa e feituʻu ʻe fai ki ai e nofo kemi ʻa e Kau Finemuí—pe ʻi he vaotaá, ʻi ha paaka, ʻi ha matātahi, pe ʻi ha ʻapisiasi—ki he mata ʻo kinautolu kotoa ʻoku fakataha atu ki aí. Hangē ko ʻAlamā mo hono kakaí, ʻoku fie maʻu ʻe he kau finemuí ha feituʻu ʻe lava ke nau fakataha kotoa ki ai, mavahe mei he ngaahi ivi tākiekina fakaemāmaní, ongoʻi e Laumālie ʻo e ʻEikí, tupulaki ʻi he uouangataha mo e ʻofa, mo fakamālohia ʻenau tuí mo e fakamoʻoni ki he Tamai Hēvaní pea mo Sīsū Kalaisi.
ʻOku poupouʻi ʻe he Siasí ʻa e nofo kemi maʻá e kau finemuí. ʻI he malumalu ʻo e fakahinohino ʻa e kau taki lakanga fakataulaʻeikí, fakataha mo e fakakaukau ki he ngaahi fie maʻu ʻa e ngaahi fāmilí, ʻoku fakapapauʻi ʻe he kau palesitenisī fakauooti mo fakasiteiki ʻa e Kau Finemuí ʻa e tuʻo lahi mo e fuoloa ʻo e polokalama nofo kemí. ʻOku faʻa fakahoko e nofo kemi fakatokolahí ʻi he taʻu kotoa pē ʻi he lēvolo ʻo e uōtí pe siteikí. ʻE lava ke fakahoko e ngaahi nofo kemi ʻaho pe pō kakato kehé ʻo fakatatau mo e fakahinohino ʻa e kau taki lakanga fakataulaʻeikí ke feau mo e ngaahi fie maʻu mo e tokanga fakalotofonuá. ʻOku totonu ke fakaʻaongaʻi ʻi he palani kotoa pē ʻa e ngaahi tefitoʻi moʻoni ʻi he tohi ko ʻení.
ʻOku fakataumuʻa e kemí ki he kau finemui kotoa pē ʻoku malava ke kau ʻi he polokalama ʻa e Kau Finemuí. ʻE lava foki ke kau mo e kau finemui ʻoku ʻikai kau ki he Siasí ʻoku nau loto fiemālie ke tauhi e ngaahi tuʻunga moʻui ʻa e Siasí. ʻOku totonu ke fakapapauʻi ʻe he kau takí ʻa e kau finemui te nau taʻu motuʻa feʻunga ʻi he taimi ʻe fakahoko ai e nofo kemí pea fakaafeʻi kinautolu ke nau kau mai. ʻE lava ke fealēleaʻaki fakataha e mātuʻá mo e kau takí ki ha faʻahinga fakaʻatā makehe mei he fakahinohino ki he taʻu motuʻá kae fakakaukau ki he tuʻunga fakapotopotó mo e vā fetuʻutaki fakatoʻú. Vakai, Tohi Tuʻutuʻuni Fakakātoá: Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní,, 11.2.1.3, ChurchofJesusChrist.org.)
Taʻu Motuʻa ʻOku Fiemaʻú: Ka fakangofua ʻe heʻenau mātuʻá, ʻe lava ke kau ʻa e kau finemuí ki ha ngaahi kemi pō kakato ʻa e Kau Finemuí ʻo kamata ʻi Sānuali ʻo e taʻu ʻoku hoko ai honau taʻu 12.
ʻOku totonu ke fakaʻaongaʻi ʻe he kau palesitenisī ʻo e Kau Finemuí, kau taki nofo kemí, mo e kau taki toʻu tupu ki he nofo kemí ʻa e ngaahi tefitoʻi moʻoni ʻi he tohi fakahinohino ko ʻení ke palani mo fokotuʻutuʻu ha nofo kemi. ʻE tokoni e ngaahi tefitoʻi moʻoni ko ʻení ke palani ʻe he kau taki kakai lalahi mo e kau taki toʻu tupu ki he nofo kemí ha aʻusia nofo kemi maʻá e kau finemui ʻi he ʻiuniti kotoa pē ʻo e Siasí, ʻo tatau ai pē pe ko e fē e feituʻú mo e ngaahi tūkungá. ʻE tokoni e kemi ʻoku palani mo fokotuʻutuʻu ʻo fakatatau ki he ngaahi tefitoʻi moʻoni fakalaumālie ko ʻení ke tupulaki e kau finemuí ʻi he ongoongolelei ʻo Sīsū Kalaisí, fakatupulaki e vā fakakaungāmeʻá, fakalahi ʻa e moʻui fakafalala kiate kitá mo e ngaahi taukei ki tuʻá.
Naʻe ʻikai nofo ʻa ʻAlamā mo hono kakaí ʻi he Vai ʻo Molomoná, ka naʻe nofoʻia e ngaahi aʻusia ne nau maʻu ʻi he Vai ʻo Molomoná ʻiate kinautolu. Ko e meʻa tatau pē, ʻi he foki atu ʻa e kau finemuí ki honau ʻapí, ʻe nofoʻia mo fakamālohia kinautolu ʻe he ngaahi aʻusia ne nau maʻu ʻi he nofo kemí koeʻuhí kuo nau maʻu ha ʻilo lahi ange ki honau Huhuʻí.