iVakamacala Taumada

Eratou sa tauyavutaka na Mataveiliutaki Taumada kei na Kuoramu ni iApositolo Le Tinikarua na veivola eso ni Nodra iVakavuvuli na Peresitedi ni Lotu me vukea na kena vakatitobutaki na nomuni kila vakavinaka na kosipeli vakalesui mai kei na nomuni toro voleka yani vua na Turaga ena nodra ivakavuvuli na parofita edaidai. Ena kena sa vakalevutaka na Lotu na lewe ni veivola oqo, ko ni na vakasokumuna rawa kina na veivola vakosipeli eso me baleta na nomuni vuvale.

E lewe ni ivola oqo na ivakavuvuli nei Peresitedi Spencer W. Kimball, ka a veiqaravi vaka-Peresitedi ni Lotu i Jisu Karisito ni Yalododonu Edaidai mai na ika 30 ni Tiseba, 1973, ki na ika 5 ni Noveba, 1985.

Vuli Yadua

Ena nomuni vulica na ivakavuvuli nei Peresitedi Kimball mo ni kerea na veivakauqeti ni Yalotabu. Mo ni nanuma na yalayala nei Nifai: “Ia ko koya sa vakasaqara matua ena kunea, ka na vakatakilai vua na veika vuni ni Kalou, ena kaukauwa ni Yalo Tabu” (1 Nifai 10:19). Tekivuna na nomuni vuli ena masu, ka mo ni masu tikoga e lomamuni ni ko ni wiliwili tiko.

Ena icavacava ni veiwase yadua, ko ni na raica kina na veitaro kei na ivolanikalou ena vukei kemuni mo ni kila vakavinaka ka bulataka na ivakavuvuli nei Peresitedi Kimball. Sa rawa mo ni raica taumada ni bera na nomuni wilika na iwase.

Sa rawa mo ni taurivaka talega na idusidusi oqo:

• Vakasaqara na ulu ni vosa kei na malanivosa. Kevaka o ni sa kunea e dua na vosa o ni sega ni kila vakavinaka, mo ni vakayagataka na dikiseniri se dua tale na ivurevure mo ni kila vakavinaka kina na kena ibalebale.

• Mo ni vakasamataka na ibalebale ni ivakavuvuli nei Peresitedi Kimball. Sa rawa mo ni makataka na veivosa kei na yatuvosa yadudua e vakauqeta na nomuni vakasama kei na yalomuni.

• Mo ni raitayaloyalotaka na veika o ni sotava ka salavata kei na ivakavuvuli nei Peresitedi Kimball.

• Vakanananutaka na veisala e rawa ni taurivaki kina vei kemuni na ivakavuvuli nei Peresitedi Kimball. Vakasamataka na sala e veiwekani kina na ivakavuvuli oqo ki na nomuni leqa se vakatataro. Vakadeitaka na veika mo ni cakava me baleta na veika o ni sa vulica.

Veivakavulici mai na iVola Oqo

E rawa me vakayagataki na ivola oqo ena veivakavulici ena vuvale se ena lotu. Ena vukei kemuni na idusidusi oqo:

Raica matua na Vosa nei Peresitedi Kimball kei na iVolanikalou

E sa vakarota na Turaga me da vakavulica “walega na nodra vosa na parofita kei na iapositolo me vaka sa volai tu, io me vaka sa vakatakila vei [keda] ko koya na Dauveivakacegui, ena vuku ni nodra masu kei na vakabauta” (V&V 52:9).

Sa nomuni ilesilesi mo ni vukea na nodra kila vakavinaka ka ra bulataka na kosipeli o ira na tamata ena ivakavuvuli nei Peresitedi Kimball kei na ivolanikalou. Ni kakua ni vakawalena na ivola oqo se vakarautaka na lesoni mai na ivola tale eso. Ni taurivaka vakatabakidua e dua na gauna ni lesoni me wiliki kina na ivakavuvuli nei Peresitedi Kimball ena ivola oqo ka me veivosakitaki na kedra ibalebale kei na kena bulataki.

Vakayaloqaqataki ira na vakaitavi me ra vulica na veiwase oqo ni bera na lesoni ena Sigatabu ka me ra kauta tiko na ivola oqo ki Lotu. Ni ra vakayacora vakakina, era na vakavakarau vakavinaka kina ka veivakavukui vakaira.

Vakasaqara na Veidusimaki ni Yalo Tabu

Ena nomuni masulaka mo ni vukei ka vakavakarau vagumatua, ena dusimaka na nomuni sasaga na Yalo Tabu. Ena vukei kemuni o Koya mo ni vakamatatataka na veitiki ni iwase yadua ka na vakayaloqaqataki ira eso me ra kila vakavinaka ka bulataka na kosipeli.

Ni ko ni sa veivakavulici, mo ni masu ena yalomuni me na salavata kei na nomuni vosa kei na veivosaki ni kalasi na kaukauwa ni Yalotabu. E kaya o Nifai, “Ia ko koya sa vosa ena kaukauwa ni Yalo Tabu, na kaukauwa ni Yalo Tabu ena vakadewa ki na yalodra na luve ni tamata” (2 Nifai 33:1; raica talega V&V 50:13–22).

Vakavakarau mo ni Veivakavulici

Na veiwase ena ivola oqo era sa tuvanaki tu me na vukea na nomuni vakavakarau mo ni veivakavulici. Sa rawa talega mo ni taurivaka na idusidusi oqo:

1. Vulica na iwase ni ivola. Vulica ena masumasu na wase ni ivola mo ni yalodei kina ena nomuni kila vakavinaka na ivakavuvuli nei Peresitedi Kimball. Ko ni na veivakavulici ena yalodina cecere kei na kaukauwa ena kena vakauqeti kemuni na nona vosa (raica V&V 11:21). Ni ko ni sa wiliwili tiko, mo ni nanuma na veika era gadreva o ira ko ni vakavulica tiko. Sa rawa mo ni makataka na tikina ko ni kila ni na vukei ira. Mo ni kila na ulutaga lalai katabuto ni iwase. Era tuvanaka na veivakasama bibi ena iwase.

2. Digitaka na tikina cava mo ni vakayagataka. Na lewe ni veiwase yadudua e levu cake mai na kena o ni rawa ni vakavulica ena dua na lesoni. Kakua ni saga mo ni vakaotia na wase taucoko, ia mo digitaka ena masumasu na tikina eso ko ni kila ena vukei ira vakalevu o ni vakavulica.

3. Digitaka na iwalewale mo ni vakavuvulitaka kina na lesoni. Ko ni na vakavurea na vakarorogo matua, ena itekivu ni lesoni, na nomuni rawa ni wasea e dua na ka o ni a sotava se kerea e dua na lewe ni kalasi me wilika e dua na italanoa mai na itekivu ni iwase se raica e dua na iyaloyalo ena iwase o ya. Mo qai taroga, “Na cava e vakavulica tiko na italanoa (se iyaloyalo) oqo me baleta na ulutaga ni iwase oqo?” Sa rawa talega mo ni tekivuna na lesoni ena kena wiliki e dua na ivolanikalou se dua na vosalaveti mai na iwase se lagati e dua na sere. E vakasama yaga talega na nodra kila na lewe ni kalasi na ulu ni vakasama ni lesoni.

4. Digitaka na sala ni kena vakaturi na veivosaki. Oqo na vanua e dodonu mo ni vakayagataka vakalevu kina na gauna ni lesoni. Raica lesu na vakatutu ni kena liutaki na veivosaki veivakavukui ena tabana viii–ix ni ivola oqo. Sa rawa mo ni vakayagataka na taro mai na “Vakatutu ni Vuli kei na Veivakavulici” ena icavacava ni iwase. Sa rawa mo ni vakarautaka toka eso na nomuni taro vakataki kemuni. Taroga na veika ena vukei ira ko ni vakavulica tiko:

   • Vakaraica na veika e vakavulici tiko. Na veitaro vakaoqo ena vukei ira na lewe ni kalasi me ra kunea ka kila vakavinaka na itukutuku taleitaki ni ivakavuvuli nei Peresitedi Kimball. Kena ivakaraitaki, ni ko ni sa kunea rawa e dua na vosalaveti taleitaki, sa rawa mo ni taroga, “Na cava eso na ulu ni vosa se malanivosa ena vosalaveti oqo?” se “Na cava na ulutaga ni vosalaveti oqo?”

   • Vakasamataka na kena ibalebale. Na veitaro vakaoqo ena vukei ira na lewe ni kalasi me ra kila vakavinaka sara na ivakavuvuli nei Peresitedi Kimball. Kena ivakaraitaki, “Na cava o ni nanuma kina ni bibi na ivakavuvuli oqo? Se “Na cava o ni nanuma se vakila me baleta na vosalaveti oqo?” se “E vakaibalebale vakacava vei kemuni na ivakavuvuli oqo?”

   • Me veiwaseitaki na veika a sotavi. Na veitaro vakaoqo ena vakayaloqaqataki ira na lewe ni kalasi me ra semata na veika a tukuna o Peresitedi Kimball me baleta na nodra bula yadudua. Kena ivakaraitaki, “Na veika cava o ni sa sotava ka baleta tiko na veika a kaya o Peresitedi Kimball?”

   • Bulataki ni veika sa vakavulici. Na veitaro vakaoqo ena vukei ira na lewe ni kalasi me ra vakasamataka na sala me ra bulataka kina na ivakavuvuli nei Peresitedi Kimball. Kena ivakaraitaki, “Na veika cava e vakayaloqaqataki keda tiko kina o Peresitedi Kimball me da cakava? Na sala cava me da bulataka rawa kina na veika e a kaya?”

5. Digitaka na iwalewale ni vakacavari ni lesoni. Sa rawa mo ni raica lesu vakalekaleka na lesoni se kerea e dua se rua na lewe ni kalasi me vakayacora vakakina. Ena veivakauqeti ni Yalotabu mo ni vakadinadinataka na ivakavuvuli sa veivosakitaki oti. Sa rawa talega mo ni sureti ira eso me ra wasea na nodra ivakadinadina. Vakayaloqaqataki ira o ni vakavulica me ra vakamuria na nodra dau vakauqeti mai vua na Yalotabu.

Ni ko ni vakavakarau mo ni veivakavulici, sa rawa mo ni taurivaka na vakasama mai na Veituberi, Me iLutua ni Noda Bula (36123), tikina B, ena wase 14, 16, 28 kei na 29; se mai na Teaching Guidebook (34595).

Vakayacori ni Veivosaki Veivakavukui

Na idusidusi oqo ena vukei kemuni mo ni vakayaloqaqataka ka vakayacora na veivosaki veivakavukui:

• Vakasaqara na veidusimaki ni Yalo Tabu. Ena rawa ni vakauqeti kemuni mo ni taroga eso na taro se mo vakaitavitaki ira eso ena veivosaki.

• Vukei ira na lewe ni kalasi me ra raica matua na ivakavuvuli nei Peresitedi Kimball. Me ra wilika na nona vosa me vakavurea na veivosaki ka sauma na taro eso. Muataka donu na veivosaki sa lako tani mai na ulutaga se vakasama cala se kaukauwa.

• Ni sa gadrevi, wasea na veika eso sa sotavi ka baleta tiko na ivakavuvuli ena iwase.

• Vakayaloqaqataki ira na lewe ni kalasi me ra wasea na nodra nanuma, taro, ka veivakavulici vakaira (raica V&V 88:122). Kena ivakaraitaki, sa rawa mo ni kerei ira me ra soli vakasama ki na veika era kaya eso vei ira, se mo ni taroga e dua na taro vei ira eso na lewe ni kalasi.

• Kakua ni leqataka ni sega ni saumi mai vakatotolo na taro. Sa kena ivakarau vei ira o ni vakavulica me ra dau vakasama mada se raica na nodra ivola ni bera ni ra wasea mai na nodra nanuma, ivakadinadina, kei na veika era sa sotava.

• Vakarorogo sara vagumatua, ka tovolea mo ni kila vakavinaka na nodra vakasama yadudua. Mo ni dau vakavinavinakataka na nodra cau.

• Ni ra dau soli vakasama eso, sa rawa mo ni vola ena papanivolavola se kerea e dua me vola.

• Vakayacora eso na iwalewale vou me ra vakaitavi kina ena veivosaki na lewe ni kalasi. Kena ivakaraitaki, sa rawa me ra veivosakitaka vakailawalawa na taro eso se kei koya e toka tikivi ira.

• Sa rawa mo ni lesia taumada e dua se rua na lewe ni kalasi. Kerea me rau vakavakarau mai ki na kalasi me rau sauma e dua vei ira na taro o ni sa vakarautaka.

• Kakua ni tinia koso e dua na veivosaki vinaka, me baleta ga na nomuni vinakata mo ni vakacavara taucoko na veika o ni sa vakarautaka. Na ka ga e bibi duadua o ya me ra vakila na lewe ni kalasi na veivakauqeti ni Yalotabu ka vakatataki cake vagumatua ena nodra bulataka na kosipeli.

iVakamacala ni iVurevure e Cavuti tiko ena iVola Oqo

Na ivakavuvuli nei Peresitedi Kimball ena ivola oqo era vosalavetaki sara ga mai na ivurevure eso. Na veivosa lavetaki oqo era sa volai tu ga na kedra ivakatakilakila ni veilutuki ni rorogo, sipeli, matanivola lelevu, kei na kena parakaravutaki na ivurevure taumada vakavo ga ke sa veisautaki na lewena se iwalewale ni kena tabaki me rawarawa kina na kena wiliki. Ena vuku ni ka oqo, ko ni na raica kina eso na duidui lalai ena lewe ni ivola.

E dau vakayagataka talega o Peresitedi Kimball na vosa eso me vakataka na tagane, tamata, se kawatamata ni tukuni ira tiko na tamata kecega, na tagane kei na yalewa. E dau vakawasoma na nona vakayagataka na koya ni tukuni rau tiko na tagane kei na yalewa. Oqo e dua na ivakarau ni ivosavosa ena nona gauna. E dina ga ni tiko na duidui ni itautau ni veivosa oqo kei na kena sa taurivaki tiko ena gauna oqo, na ivakavuvuli nei Peresitedi Kimball sa baleta na tagane kei na yalewa.

President Spencer W. Kimball

Kimball signature